ਸੰਪਾਦਕੀ

ਸੰਸਾਰ ਵਿਚ ਸਿੰਘਾਪੁਰ ਵਰਗੇ  ਛੋਟੇ ਛੋਟੇ ਬਹੁਤ ਦੇਸ਼ਾਂ ਹਨ, ਜਿਨ੍ਹਾਂ ਨੇ ਜਿਥੇ ਆਪਣੇ ਦੇਸ਼ ਦੇ ਲੋਕਾਂ ਨੂੰ ਸਵਰਗ ਵਰਗੀ ਜਿੰਦਗੀ ਪ੍ਰਦਾਨ ਕੀਤੀ ਹੈ, ਉਥੇ  ਹਰ ਖੇਤਰ ਵਿਚ  ਉੱਚੀਆਂ ਉੱਚੀਆਂ ਮੱਲਾਂ ਵੀ ਬਹੁਤ ਮਾਰੀਆਂ ਹਨ, ਪਰ ਜਦੋਂ ਅਸੀਂ ਬਰਤਾਨੀਆ ਅਤੇ ਚੀਨ ਵਰਗੇ ਦੇਸ਼ਾਂ ਵਲੋਂ ਕੀਤੀ ਤਰੱਕੀ ਵਲ ਝਾਤੀ ਮਾਰਦੇ ਹਾਂ ਤਾਂ ਹੈਰਾਨੀ ਦੀ ਕੋਈ ਹੱਦ ਨਹੀਂ ਰਹਿੰਦੀ, ਕਿਉਂਕਿ ਇਨ੍ਹਾਂ ਦੇਸ਼ਾਂ ਨੇ ਤਾਂ 'ਬਣਾਉਟੀ ਸੂਰਜ' ਬਣਾ ਕੇ ਰੱਖ ਦਿੱਤੇ ਹਨ ਜੋ ਬੇ-ਅਥਾਹ ਊਰਜਾ ਪੈਦਾ ਕਰਦੇ ਹਨ। ਜਾਣੀ ਕਿ ਇਨ੍ਹਾਂ ਦੇਸ਼ਾਂ ਨੇ ਤਾਂ ਊਰਜਾ ਪੈਦਾ ਕਰਨ ਲਈ ਬਣਾਉਟੀ ਸੂਰਜ ਬਣਾਉਣ ਵਿਚ ਵੱਡੀ ਸਫਲਤਾ ਹਾਸਲ ਕਰ ਲਈ ਹੈ। ਪਿਛਲੇ ਦਿਨੀਂ ਬਰਤਾਨਵੀ ਵਿਗਿਆਨੀਆਂ ਨੇ 'ਬਣਾਉਟੀ ਸੂਰਜ' ਬਣਾ ਕੇ ਊਰਜਾ ਪੈਦਾ ਕਰਨ ਦੀ ਦਿਸ਼ਾ 'ਚ ਜੋ ਨਵਾਂ ਕੀਰਤੀਮਾਨ ਪੈਦਾ ਕੀਤਾ ਹੈ, ਦਾ ਲਾਭ ਕੇਵਲ ਬਰਤਾਨੀਆ ਨੂੰ ਹੀ ਨਹੀਂ ਬਲਕਿ ਸਮੁੱਚੇ ਸੰਸਾਰ ਲਈ  ਲਾਹੇਵੰਦ ਸਾਬਤ ਹੋ ਨਿਬੜੇਗਾ। ਬਰਤਾਨਵੀ ਵਿਗਿਆਨੀਆਂ ਨੇ ਸੂਰਜ ਦੀ ਤਕਨੀਕ 'ਤੇ ਨਿਊਕਲੀਅਰ ਫਿਊਜ਼ਨ  ਕਰਨ ਵਾਲਾ ਜਿਹੜਾ ਰਿਐਕਟਰ ਬਣਾਉਣ ਵਿਚ ਸਫਲਤਾ ਹਾਸਲ ਕੀਤੀ ਹੈ ,  ਅਥਾਹ ਊਰਜਾ ਛੱਡਦਾ ਹੈ।ਇਸ ਸੰਬੰਧੀ ਬਰਤਾਨਵੀ ਵਿਗਿਆਨੀਆਂ ਵੱਲੋਂ ਆਕਸਫੋਰਡ ਯੂਨੀਵਰਸਿਟੀ ਨੇੜੇ ਕੀਤੇ ਗਏ ਪ੍ਰਯੋਗ ਦੌਰਾਨ ਇਸ ਰਿਐਕਟਰ ਤੋਂ 59 ਮੈਗਾਜੂਲ ਊਰਜਾ ਨਿਕਲੀ ਹੈ, ਜੋ  ਸੰਸਾਰ ਭਰ ਵਿਚ ਜਿਥੇ ਇਕ ਨਵੀਂ ਵਿਗਿਆਨਿਕ ਖੋਜ ਹੈ, ਉਥੇ ਆਪਣੇ ਆਪ 'ਚ ਇਕ ਰਿਕਾਰਡ ਵੀ ਹੈ। ਊਰਜਾ ਦੀ ਇਸ ਮਾਤਰਾ ਨੂੰ ਪੈਦਾ ਕਰਨ ਲਈ14 ਕਿਲੋ ਟੀ. ਐਨ. ਟੀ. ਦੀ ਵਰਤੋਂ ਕੀਤੀ ਗਈ ਹੈ। ਵਿਗਿਆਨੀਆਂ ਮੁਤਾਬਿਕ ਇਸ ਵਿਗਿਆਨਿਕ ਤਕਨੀਕ ਦੀ ਮਦਦ ਨਾਲ ਤਾਰਿਆਂ ਦੀ ਊਰਜਾ ਨੂੰ ਵਰਤੋਂ ਵਿਚ ਲਿਆਂਦਾ ਜਾਵੇਗਾ, ਜਿਸ ਨਾਲ ਧਰਤੀ 'ਤੇ ਸਸਤੀ ਅਤੇ ਸਾਫ਼ ਊਰਜਾ ਪ੍ਰਾਪਤ ਕਰਨ ਦੇ ਮੌਕੇ ਪ੍ਰਾਪਤ ਹੋਣਗੇ। ਬਰਤਾਨਵੀ ਵਿਗਿਆਨੀਆਂ ਨੇ ਆਪਣੇ ਦੁਆਰਾ ਤਿਆਰ ਕੀਤੀ ਗਈ ਪ੍ਰਯੋਗਸ਼ਾਲਾ ਵਿੱਚ 59 ਮੈਗਾਜੁਲ ਊਰਜਾ ਪੈਦਾ ਕਰਕੇ 1997 ਵਿੱਚ ਕਾਇਮ ਕੀਤੇ ਆਪਣੇ ਹੀ ਰਿਕਾਰਡ ਨੂੰ ਤੋੜਦਿਆਂ  ਪ੍ਰਮਾਣੂ ਊਰਜਾ ਦਾ ਸਫਲ ਪ੍ਰਯੋਗ  ਕੀਤਾ ਗਿਆ ਹੈ। ਵਿਗਿਆਨੀਆਂ ਵਲੋਂ ਉਮੀਦ ਜਤਾਈ ਜਾ ਰਹੀ ਹੈ ਕਿ  ਇਹ ਪ੍ਰਯੋਗ  ਪ੍ਰਮਾਣੂ ਫਿਊਜ਼ਨ ਦੀ ਤਕਨਾਲੋਜੀ ਦੇ ਆਧਾਰ 'ਤੇ ਊਰਜਾ ਦੀ ਸੁਰੱਖਿਅਤ ਅਤੇ ਟਿਕਾਊ ਸਪਲਾਈ ਦੀ ਸੰਭਾਵਨਾ ਸਾਬਤ ਹੋਵੇਗਾ।
ਅਸੀਂ ਹਰ ਰੋਜ ਉੱਚੀ ਉੱਚੀ ਟਾਹਰਾਂ ਮਾਰ ਮਾਰ ਕੇ ਆਖਦੇ ਹਾਂ ਕਿ ਭਾਰਤ ਨੇ ਹਰ ਖੇਤਰ ਵਿਚ ਤਰੱਕੀ ਦੀਆਂ ਬੁਲੰਦੀਆਂ ਨੂੰ ਛੂਹਿਆ ਹੈ ਜਦਕਿ ਇਸ ਦੇ ਨਾਲ ਨਾਲ ਨਵੀਆਂ ਲੀਹਾਂ ਪੈਦਾ ਕੀਤੀਆਂ ਜਾ ਰਹੀਆਂ ਹਨ , ਪਰ ਜਦੋਂ ਗਹੁ ਨਾਲ ਵੇਖਦੇ ਹਾਂ ਤਾਂ ਪਤਾ ਲੱਗਦਾ  ਹੈ ਕਿ ਅਸੀਂ ਹਰ ਖੇਤਰ ਵਿਚ ਪੱਛੜ ਕੇ ਰਹਿ ਗਏ ਹਾਂ। ਹਾਂ ਜੇ ਤਰੱਕੀ ਕੀਤੀ ਹੈ ਤਾਂ ਧਰਮ ਦੇ ਨਾਂ 'ਤੇ ਦੰਗੇ ਕਰਵਾਉਣ ਅਤੇ ਜਾਤੀ ਪਾੜਾ ਵਧਾਉਣ ਵਿੱਚ ਕੀਤੀ ਹੈ ਜਾਂ ਫਿਰ ਅਸੀਂ ਭ੍ਰਿਸ਼ਟਾਚਾਰ ਵਿਚ ਹੱਦਾਂ ਬੰਨੇ ਪਾਰ ਕੀਤੇ ਹਨ ਜਾਂ ਫਿਰ ਬੈਂਕਾਂ ਤੋਂ ਕਰੋੜਾਂ ਰੁਪਏ ਕਰਜਿਆਂ ਦੇ ਰੂਪ ਵਿਚ ਲੈ ਕੇ ਘਪਲੇ ਕੀਤੇ ਹਨ।
ਸਾਡੇ ਦੇਸ਼ ਵਿਚ ਤਾਂ ਅਜੀਬੋ-ਗਰੀਬ ਕਿਸਮ ਦੀਆਂ ਖੋਜਾਂ ਦਾ ਸਿਲਸਿਲਾ ਚੱਲਦਾ ਰਹਿੰਦਾ ਹੈ। ਨਜ਼ਰਾਂ ਉਤਾਰਨ ਲਈ ਗਿੱਟੇ ਨਾਲ ਕਾਲਾ ਧਾਗਾ ਜਾਂ ਟੁੱਟਿਆ ਛਿੱਤਰ ਬੰਨ੍ਹਣਾ, ਰੁੱਖਾਂ ਵਿਚ ਮੇਖਾਂ ਗੱਡਣਾ / ਧਾਗੇ ਲਪੇਟਣਾ ਵੀ ਸਾਡੇ ਦੇਸ਼ ਦੀਆਂ ਮਹੱਤਵਪੂਰਨ ਖੋਜਾਂ ਹਨ। ਪਿਛਲੇ ਦਿਨੀਂ ਬਨਾਰਸ ਹਿੰਦੂ ਯੂਨੀਵਰਸਿਟੀ ਦੇ ਇਕ ਸਿੱਖਿਆ ਸ਼ਾਸਤਰੀ ਨੇ ਤਾਂ ਆਪਣੇ ਵਿਦਿਆਰਥੀਆਂ ਨੂੰ ਗੋਹੇ ਦੀਆਂ ਪਾਥੀਆਂ ਪੱਥਣ ਲਈ ਸਿਖਲਾਈ ਦਿੰਦਿਆਂ ਗੋਹੇ ਦੇ ਦੁਰਲੱਭ ਲਾਭਾਂ ਬਾਰੇ ਕੀਤੀ ਗਈ ਖੋਜ ਤੋਂ ਜਾਣੂ ਕਰਵਾ ਕੇ ਨਵਾਂ ਕੀਰਤੀਮਾਨ ਪੈਦਾ ਕੀਤਾ ਹੈ, ਜਿਸ ਨੂੰ ਦੇਸ਼ ਦੀਆਂ ਮਹੱਤਵਪੂਰਨ ਖੋਜਾਂ ਦੇ ਸੁਨਹਿਰੀ ਪੰਨਿਆਂ ਉਪਰ ਅੰਕਿਤ ਕੀਤਾ ਜਾਵੇਗਾ। ਬਰਤਾਨੀਆ ਅਤੇ ਚੀਨ ਵਲੋਂ ਤਿਆਰ ਕੀਤੇ ਗਏ ਬਣਾਉਟੀ ਸੂਰਜਾਂ ਦੀ ਊਰਜਾ ਸਾਡੇ ਦੇਸ਼ ਵਿਚ ਗੋਹੇ ਤੋਂ ਤਿਆਰ ਕੀਤੀਆਂ ਗਈਆਂ ਪਾਥੀਆਂ ਦੀ ਊਰਜਾ ਦਾ ਮੁਕਾਬਲਾ ਨਹੀਂ ਕਰ ਸਕਦੀ! ਸਾਡੇ ਦੇਸ਼ ਵਿਚ ਤਾਂ ਗਟਰਾਂ ਦੀ ਗੰਦਗੀ ਸਾਫ ਕਰਨ ਲਈ ਅਜੇ ਵੀ ਮਨੁੱਖਾਂ ਨੂੰ ਗਟਰਾਂ ਵਿਚ ਉਤਾਰਿਆ ਜਾਂਦਾ ਹੈ।
ਆਹ ਨੇ ਸਾਡੀਆਂ ਖੋਜਾਂ!
-ਸੁਖਦੇਵ ਸਲੇਮਪੁਰੀ
09780620233
14 ਫਰਵਰੀ, 2022.

ਧਰਤੀ 'ਤੇ ਥੋੜ੍ਹੇ - ਥੋੜ੍ਹੇ ਸਮੇਂ ਬਾਅਦ ਅਕਸਰ ਭੁਚਾਲ ਦੇ ਝਟਕੇ ਲੱਗਦੇ ਰਹਿੰਦੇ ਹਨ। ਕਈ ਵਾਰ ਬਹੁਤ ਹੀ ਘੱਟ ਤੀਬਰਤਾ ਨਾਲ ਭੂਚਾਲ ਆਉਂਦਾ ਹੈ, ਜਿਸ ਨੂੰ ਅਸੀਂ ਮਾਮੂਲੀ ਜਿਹਾ ਮਹਿਸੂਸ ਕਰਦੇ ਹਾਂ ਜਦਕਿ ਕਈ ਵਾਰ ਜਿਸ ਇਲਾਕੇ ਵਿਚ ਬਹੁਤ ਹੀ ਤੇਜ ਤੀਬਰਤਾ ਨਾਲ ਭੂਚਾਲ ਆਉਂਦਾ ਹੈ, ਤਾਂ ਉਥੇ ਘਰਾਂ ਦੀਆਂ ਬੂਹੇ-ਬਾਰੀਆਂ ਜੋਰ-ਜੋਰ ਦੀ ਖੜਕਦੀਆਂ ਹਨ, ਕੰਧਾਂ ਵਿਚ ਤਰੇੜਾਂ ਆ ਜਾਂਦੀਆਂ ਹਨ, ਕਈ ਵਾਰੀ ਤਾਂ ਘਰਾਂ ਦੀਆਂ ਨੀਹਾਂ ਹਿੱਲ ਜਾਂਦੀਆਂ ਹਨ। ਧਰਤੀ ਉੱਪਰ ਭੁਚਾਲ ਦੇ ਝਟਕੇ ਲੱਗਣਾ ਜਾਂ ਸਮੁੰਦਰ ਵਿਚ ਜਵਾਰ ਭਾਟੇ ਦਾ ਆਉਣਾ, ਕੁਦਰਤ ਦੀ ਇਕ ਪ੍ਰਕਿਰਿਆ ਹੈ, ਜੋ ਅਕਸਰ ਚੱਲਦੀ ਰਹਿੰਦੀ ਹੈ, ਪਰ ਸਾਡੇ ਦੇਸ਼ ਵਿਚ ਜਾਂ ਦੇਸ਼ ਦੇ ਵੱਖ ਵੱਖ ਸੂਬਿਆਂ ਵਿਚ, ਉਸ ਵੇਲੇ ਸਿਆਸੀ ਭੁਚਾਲ ਦੇ ਝਟਕੇ ਮਹਿਸੂਸ ਕੀਤੇ ਜਾਂਦੇ ਹਨ, ਜਦੋਂ ਲੋਕ ਸਭਾ ਜਾਂ ਵਿਧਾਨ ਸਭਾ ਦੀਆਂ ਚੋਣਾਂ ਹੁੰਦੀਆਂ ਹਨ। ਸਿਆਸਤ ਵਿਚ ਆਉਣ ਵਾਲੇ ਭੁਚਾਲ ਦੇ ਝਟਕਿਆਂ ਦਾ ਲੋਕਾਂ ਦੀ ਭਲਾਈ ਲਈ ਜਾਂ ਲੋਕਾਂ ਦੀਆਂ ਸਮੱਸਿਆਵਾਂ ਨਾਲ ਕੋਈ ਵੀ ਲੈਣ-ਦੇਣ ਨਹੀਂ ਹੁੰਦਾ।ਇਹ ਝਟਕੇ ਜਾਂ ਤਾਂ ਕੁਰਸੀ ਨਾਲ ਜੁੜੇ ਹੁੰਦੇ ਹਨ ਜਾਂ ਕਿਸੇ ਖਾਸ ਦਬਾਅ ਹੇਠ ਜਾਂ ਕਿਸੇ ਗੁਪਤ ਕਾਰਨ ਕਰਕੇ ਆਉਂਦੇ ਹਨ, ਪਰ ਇਹ ਗੱਲ 100 ਫੀਸਦੀ ਸੱਚ ਹੈ ਕਿ, ਇਨ੍ਹਾਂ ਸਿਆਸੀ ਭੁਚਾਲੀ ਝਟਕਿਆਂ ਦਾ ਲੋਕਾਂ ਨੂੰ, ਸਮਾਜ ਨੂੰ, ਸੂਬੇ ਨੂੰ ਜਾਂ ਦੇਸ਼ ਨੂੰ ਕਿਸੇ ਵੀ ਕਿਸਮ ਦਾ ਲਾਭ ਹੋਣ ਦੀ ਕੋਈ ਉਮੀਦ ਨਹੀਂ ਹੁੰਦੀ। ਪੰਜਾਬ ਵਿਚ ਸਿਆਸੀ ਭੁਚਾਲ ਦੇ ਝਟਕੇ ਆਉਣ ਵਾਲੀ 19 ਫਰਵਰੀ ਤੱਕ ਜਾਂ ਫਿਰ ਵੋਟਾਂ ਵਾਲੇ ਦਿਨ 20 ਫਰਵਰੀ ਤੱਕ ਵੱਜਦੇ ਰਹਿਣ ਦੀ ਸੰਭਾਵਨਾ ਹੈ।
ਲੋਕੋ! ਤੁਸੀਂ ਸਿਆਸੀ ਭੁਚਾਲਾਂ ਦੇ ਝਟਕਿਆਂ ਨੂੰ ਲੈ ਕੇ ਨਾ ਤਾਂ ਚਿੰਤਤ ਹੋਣਾ ਅਤੇ ਨਾ ਹੀ ਖੁਸ਼ ਹੋਣਾ, ਕਿਉਂਕਿ ਇਹ ਝਟਕੇ ਤੁਹਾਡੇ ਭਵਿੱਖ ਦੀ ਬਿਹਤਰੀ ਲਈ ਨਹੀਂ, ਸਿਰਫ ਨਿੱਜੀ ਹਨ! ਤੁਸੀਂ ਆਪਣੀ ਵੋਟ ਦੀ ਮਹੱਤਤਾ ਨੂੰ ਸਮਝਦੇ ਹੋਏ, ਬਿਨਾਂ ਕਿਸੇ ਡਰ ਅਤੇ ਛੋਟੇ - ਮੋਟੇ ਲਾਲਚਾਂ ਤੋਂ ਉਪਰ ਉਠ ਕੇ ਚੰਗੇ ਅਕਸ ਵਾਲੇ ਦੀ ਚੋਣ ਕਰਨ ਨੂੰ ਪਹਿਲ ਦੇਣਾ, ਕਿਉਂਕਿ ਤੁਸੀਂ ਜਾਗਦੀ ਜਮੀਰ ਦੇ ਮਾਲਕ ਹੋ!
ਲੋਕੋ! ਚੋਣ ਸਰਵੇਖਣਾਂ ਦੇ ਝਟਕਿਆਂ ਤੋਂ ਵੀ ਸੁਚੇਤ ਹੋ ਕੇ ਰਹਿਣਾ, ਇਨ੍ਹਾਂ ਵਿਚੋਂ ਬਹੁਤੇ ਫਰਜੀ ਅਤੇ ਨਿੱਜੀ ਹੁੰਦੇ ਹਨ, ਕਿਤੇ ਇਨ੍ਹਾਂ ਦੀ ਘੁੰਮਣ-ਘੇਰੀ ਵਿਚ ਫਸ ਕੇ ਨਾ ਬਹਿ ਜਾਓ, ਆਪਣੀ ਜਮੀਰ ਨੂੰ ਜਿਉਂਦੇ ਰੱਖਦਿਆਂ ਚੰਗੇ - ਮਾੜੇ ਦੀ ਪਰਖ ਕਰਨਾ ਨਾ ਭੁੱਲਿਓ!
-ਸੁਖਦੇਵ ਸਲੇਮਪੁਰੀ
09780620233
11 ਫਰਵਰੀ, 2022.

 ਬੇਲੀ ਰਾਮ ਨੇ ਆਪਣੇ ਦੋਹਾਂ ਮੁੰਡਿਆਂ ਨੂੰ ਬੜੀ ਮਿਹਨਤ ਕਰਕੇ ਪੜਾਇਆ। ਭਾਵੇਂ ਉਸਦੀ ਪਤਨੀ ਇਸ ਦੁਨੀਆਂ ਛੱਡ ਗਈ ਸੀ ਪਰ ਉਸਨੇ ਆਪਣੇ ਮੁੰਡਿਆਂ ਨੂੰ ਮਾਂ-ਬਾਪ ਦੋਹਾਂ ਦਾ ਹੀ ਪਿਆਰ ਦਿੱਤਾ ਸੀ।ਦੋਵੇਂ ਹੀ ਮੁੰਡੇ ਪੜ੍ਹ-ਲਿਖ ਕੇ ਚੰਗੀਆਂ ਨੋਕਰੀਆਂ ਉੱਤੇ ਵੀ ਲੱਗ ਗਏ। ਦੋਵੇਂ ਹੀ ਮੁੰਡੇ ਵਿਆਹ ਕਰਵਾਉਣ ਤੋਂ ਬਾਅਦ ਪਿੰਡ ਵਿੱਚ ਬੇਲੀ ਰਾਮ ਨੂੰ ਇਕੱਲਾ ਛੱਡ ਕੇ ਸ਼ਹਿਰ ਵਿੱਚ ਰਹਿਣ ਲੱਗ ਪਏ। ਹੁਣ ਬੇਲੀ ਰਾਮ ਪਿੰਡ ਵਾਲੇ ਘਰ ਵਿੱਚ ਇਕੱਲਾ ਹੀ ਰਹਿੰਦਾ ਸੀ। ਮੁੰਡੇ ਕਦੇ -ਕਦਾਈਂ ਮਿਲਣ ਆ ਜਾਂਦੇ ਸਨ ਪਰ ਉਹਨਾਂ ਨੇ ਬੇਲੀ ਰਾਮ ਨੂੰ ਕਦੇ ਵੀ ਆਪਣੇ ਨਾਲ ਸ਼ਹਿਰ ਵਿੱਚ ਲਿਜਾਣ ਦੀ ਗੱਲ ਨਹੀਂ ਕੀਤੀ ਸੀ। ਬੇਲੀ ਰਾਮ ਨੂੰ ਇਸ ਉਮਰੇ ਇਕੱਲਾਪਣ  ਬਹੁਤ ਸਤਾਉਂਦਾ ਸੀ ਪਰ ਉਹ ਕਰ ਕੁਝ ਵੀ ਨਹੀਂ ਸਕਦਾ ਸੀ। ਇੱਕ ਦਿਨ ਉਸਦਾ ਵੱਡਾ ਮੁੰਡਾ ਰਾਮ ਪ੍ਕਾਸ਼ ਉਸਨੂੰ ਮਿਲਣ ਲਈ ਆਇਆਂ ।
            " ਪਾਪਾ ਜੀ ਮੱਥਾ ਟੇਕਦਾ ਹਾਂ । "
         " ਪੁੱਤਰ ਪ੍ਰਮਾਤਮਾ ਤਰੱਕੀਆਂ ਬਖਸ਼ੇ। ਅੱਜ ਕਿਵੇਂ  ਗਰੀਬ ਪਿਉ ਦੀ ਯਾਦ ਆ ਗਈ । "
           " ਪਾਪਾ ਜੀ ਤੁਸੀਂ ਵੀ ਨਾ ਹਮੇਸ਼ਾ ਪੁੱਠੀਆਂ  ਗੱਲਾਂ ਹੀ ਕਿਉਂ ਕਰਦੇ ਹੋ ? "
   "ਚਲੋ ਕੋਈ ਨਾ ਤੁਸੀਂ ਦੱਸ ਦਿਉ ਕਿਵੇਂ ਆਉਣਾ ਹੋਇਆਂ ?"
         "ਬਸ ਮੈਂ ਤਾਂ ਕੰਪਨੀ ਦੇ ਕੰਮ ਨਾਲ ਦੇ ਪਿੰਡ ਆਇਆਂ ਸੀ।ਮੈਂ ਸੋਚਿਆਂ ਚਲੋ ਤੁਹਾਨੂੰ ਵਧਾਈਆਂ ਹੀ ਦਿੰਦਾ ਜਾਵਾਂ । "
                " ਵਧਾਈਆਂ......! ਵਧਾਈਆਂ  ਪਰ ਕਾਹਦੀਆ।"
            "ਤੁਹਾਡੇ ਪੋਤਾ ਜੋ ਹੋਇਆਂ ਹੈ। "
                " ਪੋਤਾ........!"  "ਹਾਂ ਜੀ ਪੋਤਾ ਸੁੱਖ ਨਾਲ ਅੱਜ ਸੱਤ ਮਹੀਨਿਆਂ ਦਾ ਹੋ ਗਿਆ ਹੈ। "
                       "ਤੁਹਾਨੂੰ ਵੀ ਵਧਾਈਆਂ ਬਈ। ਚਲੋ ਸੱਤ ਮਹੀਨਿਆਂ ਬਾਅਦ ਹੀ ਸਹੀ ,ਟਾਇਮ ਤਾਂ ਮਿਲਿਆ  ਮੈਨੂੰ ਦੱਸਣ ਦਾ ।"
               "ਪਾਪਾ ਜੀ ਤੁਸੀਂ ਵੀ ਨਾ ਬਸ। ਨਾਲੇ ਸੱਚ ਤੁਹਾਡੀ ਨੂੰਹ ਨੇ ਪੰਜ ਸੌ ਰੁਪਏ ਮਠਿਆਈ ਲਈ ਭੇਜੇ ਹਨ।ਆਹ ਲਵੋ ਪਾਸੇੇ ਤੇ ਮੂੰਹ ਮਿੱਠਾ ਕਰ ਲੈਣਾ । "
                  "ਪੁੱਤਰ ਮੂੰਹ ਮਿੱਠਾ ਤਾਂ ਮੈ ਕਰ ਹੀ ਲਵਾਂਗਾ। ਤੂੰ ਇਹ ਪੰਜ ਸੌ ਰੁਪਏ ਮੇਰੇ ਵੱਲੋਂ ਸ਼ਗਨ ਸਮਝ ਕੇ ਰੱਖ ਲੈ ।ਘਰ ਜਾ ਕੇ ਮੇਰੇ ਪੋਤੇ ਨੂੰ ਸ਼ਗਨ ਪਾ ਦੇਵੀਂ।ਨਾਲੇ ਹਾਂ ਯਾਦ ਨਾਲ ਮੇਰੀ ਨੂੰਹ ਨੂੰ ਵੀ ਦੱਸ ਦੇਵੀਂ। "
            ਰਾਮ ਪ੍ਕਾਸ਼ ਗੱਲ ਬਦਲਣ ਦੀ ਕੋਸ਼ਿਸ਼ ਕਰਦਾ ਹੈ।
    "ਪਾਪਾ ਜੀ ਤੁਹਾਡੀ ਮਾਨੋ ਬਿੱਲੀ ਕਿਤੇ ਦਿਖਾਈ ਨਹੀਂ ਦੇ ਰਹੀ। ਮਾਨੋ ਕਿੱਥੇ ਹੈ? "
   "ਮਾਨੋ..... ਉਹ ਤਾਂ ਘਰ ਛੱਡ ਕੇ ਚਲੀ ਗਈ।"
           "ਚਲੀ ਗਈ ਪਰ ਕਿਉਂ....? "
     "ਪੁੱਤਰ ਆਹ ਜਿਹੜੇ ਦੋ ਬਲੂੰਗੜੇ ਹਨ। ਇਹ ਮਾਨੋ ਦੇ ਹੀ ਬਲੂੰਗੜੇ ਹਨ।"
      "ਅੱਛਾ ਜੀ ਫ਼ੇਰ ਤਾਂ ਬੜੀ ਭੈੜੀ ਨਿਕਲੀ ਮਾਨੋ ਬੱਚੇ ਛੱਡ ਕੇ ਕਿਸੇ ਹੋਰ ਘਰੇ ਚਲੀ ਗਈ।ਇਹਨਾਂ ਨੂੰ ਦੁੱਧ ਕੌਣ ਪਿਆਉਣ । "                             
                   "ਨਹੀਂ ਪੁੱਤਰ ਤੂੰ ਗਲਤ ਸੋਚ ਰਿਹਾ ਹੈ। ਇਹਨਾਂ ਬੱਚਿਆਂ ਨੂੰ ਮਾਨੋ ਛੱਡ ਕੇ ਨਹੀਂ ਗਈ ਬਲਕਿ ਇਹਨਾਂ ਨੇ ਜਬਰਦਸਤੀ ਮਾਨੋ ਨੂੰ ਘਰੋਂ ਪੰਜੇ  ਮਾਰ-ਮਾਰ ਕੇ ਭਜਾ ਦਿੱਤਾ ਹੈ। ਇਹ ਦੋਵੇਂ ਨਾ ਤਾਂ ਉਸਨੂੰ ਕੁਝ ਖਾਣ ਦਿੰਦੇ ਸੀ ਤੇ ਨਾ ਹੀ ਦੁੱਧ ਪੀਣ ਦਿੰਦੇ ਸਨ । ਬੇਚਾਰੀ ਭੁੱਖੀ ਮਰਦੀ ਹੋਰ ਕੀ ਕਰਦੀ ,ਇਹਨਾਂ ਕੋਲੋਂ ਡਰਦੀ ਘਰ ਛੱਡ ਗਈ। ਮੈਂਨੂੰ ਲੱਗਦਾ ਹੈ ਇਹਨਾਂ ਬਲੂੰਗੜਿਆ ਨੂੰ ਵੀ ਇਸ ਘਰ ਦੀ ਹਵਾ ਲੱਗ ਗਈ ਹੈ ।"
         ਬੇਲੀ ਰਾਮ ਦੀ ਗੱਲ ਸੁਣ ਕੇ ਰਾਮ ਪ੍ਕਾਸ਼ ਲਾਜਵਾਬ ਹੋ ਗਿਆ ਹੈ।
     "ਅੱਛਾ ਪਾਪਾ ਜੀ ਮੈਂ ਚੱਲਦਾ ਹਾਂ ਤੁਸੀਂ ਆਪਣਾ ਧਿਆਨ ਰੱਖਣਾ। " ਆਖ ਜਲਦੀ ਨਾਲ ਬਾਹਰ ਵੱਲ ਚੱਲ ਪਿਆ।
                          ਸੰਦੀਪ ਦਿਉੜਾ 8437556667

 4 ਫ਼ਰਵਰੀ 2022 ਦਾ ਦਿਨ ਇਕ ਐਸੇ ਹੀ ਬੰਦੇ ਦੇ ਪਾਪ ਨੂੰ ਸਾਹਮਣੇ ਲੈ ਕੇ ਆਇਆ ਹੈ । ਇਸ ਦੇ ਨਾਲ ਹੀ ਯੂ ਕੇ ਵਿੱਚ ਕਈ ਅਖੌਤੀ ਸਿਖ ਆਗੂਆਂ ਦੇ ਮੂੰਹ ਤੇ ਪਿਆ ਮਖੌਟਾ ਲਾਹਿਆ ਗਿਆ ਹੈ । ਇਹਨਾਂ ਕੁਝ ਆਗੂਆਂ ਦਾ ਸਹਾਇਕ ਇਕ ਬਰਿਟਿਸ਼ ਪਾਕਿਸਤਾਨੀ ਲਾਰਡ ਨਜ਼ੀਰ ਜੋ ਬੱਚਿਆਂ ਨਾਲ ਖੇਹਖਰਾਬੀ ਦੇ ਕੇਸ ਵਿੱਚ ਚਾਰਜ ਹੋਇਆ ਸੀ । ਉਸ ਨੂੰ ਸਾਡੇ ਪੰਜ ਸਾਲ ਦੀ ਕੈਦ ਹੋਈ ਹੈ । ਇਹਨਾਂ ਕੁਝ ਸਿੱਖ ਆਗੂਆਂ ਦਾ ਮੋਹਰੀ ਸੀ ਅਤੇ ਰੈਫਰੰਡਮ 2020 ਦੀ ਅੱਗੇ ਹੋ ਹਮਾਇਤ ਕਰਦਾ ਸੀ । ਇਸ ਤਰਾਂ ਇਹਨਾਂ ਦੇ ਸਾਰੇ ਕਿਰਦਾਰ ਦੀ ਅਸਲੀ ਤਸਵੀਰ ਵੀ ਲੋਕਾਂ ਖਾਸ ਕਰ ਕੇ ਸਿਖਾਂ ਸਾਹਮਣੇ ਦਿਸ ਪਈ ਹੈ । ਬੀਤੇ ਕਈ ਸਾਲਾਂ ਤੋ ਸਿਖਾਂ ਦੇ ਨਾਮ ਥੱਲੇ ਜੋ ਲੰਡਨ ਜਾਂ ਯੂਕੇ ਭਰ ਵਿੱਚ ਜੋ ਮੁਜ਼ਾਹਰੇ ਦੇਖੇ ਜਾ ਰਹੇ ਸਨ , ਉਹਨਾਂ ਮੁਜ਼ਾਹਰਿਆਂ ਵਿੱਚ ਸਿੱਖ ਘੱਟ ਹੁੰਦੇ ਸਨ , ਪਰੰਤੂ ਲਾਰਡ ਦੇ ਸਾਥੀ ਅਤੇ ਪਾਕਿਸਤਾਨੀ ਜ਼ਿਆਦਾ ਹੁੰਦੇ ਸਨ । ਇਸ ਲਾਰਡ ਤੇ ਪਿਛਲੇ ਕਾਫ਼ੀ ਸਮੇਂ ਤੋਂ “ਚਾਈਲਡ ਸੈਕਸ ਓਫੈਂਸਨਜ” ਦਾ ਜਦੋਂ ਕੇਸ ਚੱਲ ਰਿਹਾ ਸੀ ਤਾਂ ਇਹ ਲੋਕ ਇਸ ਦੋਸ਼ ਗਰਿਸਤ ਦੋਸ਼ੀ ਨਾਲ ਰਹਿਨੁਮਾਈ ਸਾਂਝੀ ਕਰਦੇ ਰਹੇ । ਇਹਨਾਂ ਨੇ ਅਜਿਹੇ ਗਰੋਹ ਤੋਂ ਆਪਣੀ ਕੌਮੀ ਇੱਜ਼ਤ ਬਾਰੇ ਬਿਲਕੁਲ ਨਹੀਂ ਸੋਚਿਆ । ਆਮ ਸਿੱਖ ਜਾਣਦੇ ਸਨ ਕਿ ਇਸ ਬੰਦੇ ਤੇ 11 ਸਾਲ ਦੇ ਮੁੰਡੇ ਅਤੇ ਛੋਟੀ ਉਮਰ ਦੀ ਨਾਬਾਲਗ ਬੱਚੀ/ਲੜਕੀ ਨਾਲ ਜਬਰਜਨਾਹ ਦਾ ਕੇਸ ਦਰਜ ਸੀ । ਇਸ ਲਾਰਡ ਨੇ ਇਹ ਪਾਪ 1970 ਸਮੇਂ ਤੋਂ ਹੀ ਕੀਤੇ ਸਨ , ਇਹ ਕੇਸ ਇਸ ਦਾ ਪਿੱਛਾ ਕਰਦੇ ਰਹੇ । ਹੁਣ ਇਸ ਕੋਲ਼ੋਂ ਲਾਰਡਸ਼ਿਪ ਖੋਹੀ ਗਈ , ਇਸ ਨੂੰ  ਬਚਿਆਂ ਨਾਲ ਸੈਕਸ ਸੰਬੰਧਾਂ ਦੀ ਖੇਹ ਖ਼ਰਾਬੀ ਦੇ ਸੰਗੀਨ ਦੋਸ਼ ਅਧੀਨ ਸਾਢੇ ਪੰਜ ਸਾਲ ਦੀ ਕੈਦ ਹੋਈ ਹੈ। ਪਰ ਜੋ ਸਿੱਖ 2020 ਅਤੇ ਐਫ ਐਸ ਓ ਦੇ ਆਗੂ ਇਸ ਲਾਰਡ ਦੇ ਸਾਲਾਂ ਬੱਧੀ ਤੋਂ ਸਾਥੀ ਹਨ , ਉਹ ਕਿਹੜੇ ਵਕਾਰ ਨਾਲ ਆਪਣੇ ਅਹੁਦਿਆਂ ਤੇ ਕਾਇਮ ਹਨ ।ਇਹਨਾਂ ਬੀਬਿਆਂ ਚਿਹਰਿਆ ਦੇ ਪਿੱਛੇ ਕਿਸ ਤਰਾਂ ਕਦੇ ਅਪਰਾਧਿਕ ਮਾਮਲਿਆਂ ਦੀ ਖੇਡ ਖੇਡੀ ਜਾ ਰਹੀ ਸੀ ,ਲੋਕ ਖੁਦ ਅੰਦਾਜ਼ਾ ਲੱਗਾ ਸਕਦੇ ਹਨ ।ਜਿਹੜੇ ਆਗੂ ਸਮਾਜ ਦੇ ਬੱਚਿਆਂ ਦੇ ਭਵਿੱਖ ਨੂੰ ਰੋਲ ਕੇ ਉਨ੍ਹਾਂ ਦੀਆਂ ਨੰਨੀਆ ਜ਼ਿੰਦਗੀਆਂ ਨੂੰ ਤਬਾਹ ਕਰਨ ਦੇ ਭਾਗੀਦਾਰ ਹਨ , ਸਿੱਖ ਕੌਮ ਇਨ੍ਹਾਂ ਨੂੰ ਕਿਉਂ ਮੂੰਹ ਲਾ ਰਹੀ ਹੈ ।ਇਹਨਾਂ ਲਾਰਡ ਦੇ ਪਤਵੰਤੇ ਜੋੜੀਦਾਰਾਂ ਅਤੇ ਘਿਰਣਾਤਕ ਲੱਛਣਾਂ ਦੀ ਪੜਚੋਲ ਕਰਨੀ ਹਰ ਸਿੱਖ ਦਾ ਫ਼ਰਜ਼ ਹੈ । ਜਦੋਂ ਅਪਰਾਧੀ ਸਾਲਾਂ ਬੱਧੀ ਸਮੇਂ ਤੋਂ ਨਾਬਾਲਗ ਮੁੰਡੇ-ਬਾਜ਼ੀ ਅਤੇ ਛੋਟੀ ਨਾਬਾਲਗ ਸਮਾਜ ਦੀ ਬੱਚੀ ਨਾਲ ਜਬਰਜਿਨਾਹ ਬਲਾਤਕਾਰ ਦੇ ਪਾਪ ਨਾਲ ਗਰਸਤ ਸੀ ਤੇ ਜੋਟੀਦਾਰ ਸਿੱਖ ਚਿਹਰੇ ਕਿਹੜੇ ਕਿਰਦਾਰ ਦੇ ਮਾਲਕ ਸਨ ?ਉਸ ਨਾਲ ਇਕ ਜੁਟ ਹੋਏ ਫਿਰਦੇ ਅਤੇ ਖੁਦ ਦੀ ਜਥੇਬੰਦੀ ਦਾ ਅਪਰਾਧੀ ਨੂੰ ਮੁਖੀ ਦੱਸ ਰਹੇ ਸਨ ।ਕੀ ਇਹ ਖੁਦ ਦੱਸ ਸਕਦੇ ਹਨ ਕਿ ਲਾਰਡ ਦੀ ਦੋਸਤੀ ਦਾ ਨਿੱਘ  ਉਸ ਸਮੇਂ ਕਿਉਂ ਮਾਣਿਆ ਜਦ ਉਹ ਖੁਦ ਉਪਰੋਕਤ ਪਾਪ ਅਧੀਨ ਜੇਹਲ ਜਾ ਰਿਹਾ ਸੀ । ਕੀ ਲੋਕ ਇਹਨਾਂ ਤੇ ਵੀ ਅਜਿਹੀ ਨਿੱਗਾ ਰੱਖ ਕੇ ਪੜਚੋਲ ਕਰਨਗੇ ਕਿ ਕੋਈ ਐਸੀ ਕਿਸਮ ਦੀ ਕਮਜ਼ੋਰੀ ਤਾਂ ਨਹੀਂ ? ਸਾਡੀ ਕੌਮ ਦੇ ਬੱਚਿਆਂ ਦੇ ਭਵਿੱਖ ਨੂੰ ਬਚਾਉਣਾ ਸਾਡੀ ਕੌਮੀ ਜ਼ੁੰਮੇਵਾਰੀ ਹੈ । ਉਹ ਤਾਂ ਹੀ ਹੋ ਸਕਦਾ ਹੈ ਜੇਕਰ ਸਮਾਜ ਅਜਿਹੇ ਦਰਿੰਦਗੀ ਟੋਲੇ ਤੋਂ ਸਾਵਧਾਨ ਹੋਵੇ । ਜੋ ਲੋਕ ਜਾਂ ਆਗੂ ਕਿਰਦਾਰ ਤੋਂ ਹੀਣੇ ਪੱਖ ਦੇ ਅਪਰਾਧਾਂ ਦੇ ਕੁੱਛੜ ਸਵਾਰ ਹੋ ਕੇ ਗੁਮਰਾਹ ਕਰਦੇ ਹਨ , ਉਨ੍ਹਾਂ ਨਾਲ ਕੋਈ ਭੀ ਨੇੜਤਾ ਰੱਖਣੀ ਕੌਮ , ਸਮਾਜ ਲਈ ਹਮੇਸ਼ਾ ਬਹੁਤ ਘਾਤਕ ਹੁੰਦੀ ਹੈ । ਇਸ ਤੋਂ ਬਚੋ ਅਤੇ ਸਮਾਜ ਨੂੰ ਬਚਾਓ ।

ਪਰਮਿੰਦਰ ਸਿੰਘ ਬਲ, ਪ੍ਰਧਾਨ ਸਿੱਖ ਫੈਡਰੇਸ਼ਨ ਯੂ ਕੇ

ਸੋਨੇ ਦੇ ਭਾਂਡੇ ਨੂੰ ਦੇਖਣ ਤੇ ਭਾਵੇ ਸੋਨਾ ਲੱਗੇ ਪਰ ਪਰਖ ਤੇ ਚੜਨ ਤੇ ਹੀ ਪਤਾ ਲੱਗਦਾ ਹੈ ਕਿ ਅਸਲ ਸੋਨਾ ਹੈ ਵੀ ਜਾਂ ਨਹੀਂ । 72 ਸਾਲ ਦੀ ਭਾਰਤੀ ਡੈਮੋਕਰੇਸੀ ਅੰਦਰ ਜੋ ਅੱਜ ਕੱਲ ਪੰਜਾਬ ਦੇ ਸਿਆਸਤ ਦਾਨਾਂ ਦੀ ਸੋਚ , ਜੋ 2022 ਦੀਆਂ ਵਿਧਾਨ ਸਭਾ ਵਿੱਚ ਉਘੜ ਕੇ ਸਾਹਮਣੇ ਆਈ ਹੈ , ਸ਼ਾਇਦ ਹੀ ਕਦੇ ਲੋਕਾਂ ਨੇ ਅਜਿਹਾ ਉਜਾਲਾ ਦੇਖਿਆ ਹੋਵੇ । ਬਹੁਤੇ ਅਣਖੀ ਕਲੇਮ ਕਰਦੇ ਆਗੂਆਂ ਦਾ ਅਖਾਉਤੀ ਚਿਹਰਾ ਭੀ ਨੰਗਾ ਹੋ ਸਾਹਮਣੇ ਆ ਗਿਆ ਹੈ । ਜਿਵੇਂ ਸੱਚ ਹੀ ਹੈ ਕਿ “ਪਿਗਲ ਗਿਆ ਜੋ ਖੋਟਾ ਡੱਬੂਆ , ਜਾਂ ਨਜ਼ਰ ਸਰਾਫ਼ੇ ਆਇਆ “। ਕਮਾਲ ਦਾ ਧੋਖਾ ਤੇ ਨਖ਼ਰਾ ਅੱਜ ਤੱਕ ਬਾਦਲਾਂ ਨੇ ਬੀ ਜੇ ਪੀ ਪਾਰਟੀ ਨਾਲ ਵੀਹ ਸਾਲ ਤੋਂ ਉੱਪਰ ਕਰ ਰੱਖਿਆ , ਉਸ ਦਾ ਮੁਕੰਮਲ ਪਰਦਾ ਚੁੱਕਿਆ ਜਾ ਰਿਹਾ ਹੈ । ਇਹੀ ਢੰਗ ਕਾਂਗਰਸ ਅਤੇ ਦੂਜੀਆਂ ਧਿਰਾਂ ਵਰਤਦੀਆਂ ਰਹੀਆਂ ਹਨ । ਪੰਜਾਬ ਦੇ ਲੋਕਾਂ ਨੂੰ ਇਹ ਦੱਸਕੇ , ਕਿ ਹਿੰਦੂ ਸਿੱਖ ਵੱਸੋਂ ਨੂੰ  ਵਿੱਚੋ ਦੋ ਹਿੱਸਿਆਂ ਵਿੱਚ ਇਸਤਰਾਂ ਵੰਡਿਆ ਕਿ ਬੀ ਜੇ ਪੀ ਸਿਰਫ਼ ਪੰਜਾਬ ਦੇ ਕੁਝ ਵੱਡੇ ਸ਼ਹਿਰਾਂ ਅਤੇ ਹਿੰਦੂ ਵੋਟਾਂ ਤੇ ਹੀ ਸੀਮਤ ਰਹੇ ।ਬਾਕੀ ਸਾਰੇ ਪੰਜਾਬ ਨੂੰ ਆਪਣੀ ਜਾਗੀਰ ਜਾਣਕੇ , ਇਹ ਅਸੈਬਲੀ ਦੀਆਂ 117 ਸੀਟਾਂ ਦੀ ਘੜਤ ਘੜਦੇ ਰਹੇ , ਵਿੱਚੋਂ ਬੀ ਜੇ ਪੀ ਨੂੰ ਉਪਰਲੇ ਧੋਖੇ ਅਤੇ ਨਖ਼ਰੇ ਅਧੀਨ ਚਾਰ , ਪੰਜ ਸੀਟਾਂ ਦੇ ਕੇ ਆਪਣਾ ਤੇ ਪਰਿਵਾਰ ਦਾ ਉੱਲੂ ਘੋੜਾ ਚਲਾਉਂਦੇ ਰਹੇ । ਕੀ ਕਾਰਨ ਹੈ ਕਿ ਅੱਜ ਜਦ ਬੀ ਜੇ ਪੀ ਨੇ ਬਾਦਲ ਟੱਬਰ ਤੋਂ ਬਗੈਰ ਦੂਜੀਆਂ ਧਿਰਾਂ ਨਾਲ ਗਠਜੋੜ ਪੰਜਾਬ ਵਿੱਚ ਕੀਤਾ ਤਾਂ ਉਹ  ਤੀਹ ਉਮੀਦਵਾਰ ਤੱਕ ਚੋਣ ਵਿੱਚ ਉਤਾਰ ਚੁੱਕੇ ਹਨ । ਬਾਬਾਬਕਾਲਾ ਇਲਾਕੇ ਵਿੱਚੋਂ ਪਿਛਲੇ ਸਮੇਂ ਤੋਂ ਤਿੰਨ ਵਾਰ ਜਿੱਤ ਕੇ ਚਲੇ ਆਉਂਦੇ ਉੱਘੇ ਅਕਾਲੀਆਗੂ(ਭਾਈ ਮਨਜਿੰਦਰ ਸਿੰਘ ਮੰਨਾਂ) ਬੀਜੇ ਪੀ ਵੱਲੋਂ ਚੋਣ ਮੈਦਾਨ ਵਿੱਚ ਹਨ । ਬਟਾਲੇ ਤੋਂ ਫਤਹਿ ਸਿੰਘ ਬਾਜਵਾ , ਇਸ ਤਰਾਂ ਹੋਰ ਭੀ ਉੱਘੇ ਪੇਂਡੂ ਆਗੂ , ਜ਼ਿਹਨਾਂ ਨੇ ਇਹਨਾਂ ਚੋਣਾਂ ਵਿੱਚ ਬੀ ਜੇ ਪੀ ਨੂੰ ਪਾਰਟੀ ਵਜੋਂ ਅਪਣਾਇਆ ਹੈ । ਕਈ ਉੱਗੇ ਕਾਂਗਰਸੀ , ਅਕਾਲੀ ਨੇਤਾਵਾਂ ਨੇ ਜਦ ਉਹਨਾਂ ਦੀ ਪਾਰਟੀ ਵੱਲੋਂ ਟਿਕਟ ਵੱਲੋਂ ਨਾਂਹ ਨੁੱਕਰ ਹੋਈ ਤਾਂ ਉਹਨਾਂ ਬੀ ਜੇ ਪੀ ਵੱਲ ਰੁਖ ਕੀਤਾ , ਅਤੇ ਬਹੁਤੇ ਚਲੇ ਭੀ ਗਏ ।ਕੁੱਲ ਸੀਟਾਂ ਵਿੱਚੋਂ ਕੋਈ 16 ਉਮੀਦਵਾਰ ਪੇਂਡੂ ਹਲਕਿਆਂ ਵਿੱਚੋਂ ਹਨ , ਸਿੱਖ ਅਤੇ ਸਰਦਾਰ ਹਨ , ਸਿੰਘ ਨਾਵਾਂ ਵਾਲੇ ਹਨ । ਜ਼ਿਹਨਾਂ ਬਾਰੇ ਵੀਹ ਸਾਲ ਬਾਦਲਾਂ ਤੇ ਕਾਂਗਰਸ ਨੇ ਆਪਣੀ ਹੀ ਝੋਲੀ ਦੀ ਜਾਗੀਰ ਦੱਸਿਆ ਸੀ ।ਪੇਂਡੂ ਵੱਸੋਂ ਵਾਲੇ ਇਨ੍ਹਾਂ ਉਮੀਦਵਾਰਾਂ ਨੇ ਅਖੌਤੀ ਅਕਾਲੀਆਂ ਤੇ ਕਾਂਗਰਸੀਆਂ ਦੀ ਵੱਰਿਆਂ ਬਧੀ ਮੱਕਾਰੀ ਤੋਂ ਪਰਦਾ ਚੁੱਕਿਆ ਜਾਪਦਾ ਹੈ । ਬੀ ਜੇ ਪੀ ਦਾ ਸੰਯੁਕਤ ਅਕਾਲੀ ਦਲ ਅਤੇ ਪੰਜਾਬ ਲੋਕ ਕਾਂਗਰਸ ਨਾਲ ਤਿੰਨ ਧਿਰ ਗੱਠ ਜੋੜ ਹੋਣ ਕਾਰਨ ਉਹ ਸਿਰਫ਼ ਤੀਹ ਉਮੀਦਵਾਰ ਹੀ ਦੇ ਸਕੇ ਹਨ , ਵਰਨਾਂ ਪੰਜਾਬ ਦੀ ਸਿਰਫ਼ ਦੋ-ਪਾਰਟੀ ਦੀ ਸਿਆਸਤ ਦੇ ਕਿੰਗਰੇ ਧੜਾ ਧੜ ਡਿਗਣ ਦੇ ਕਿਆਸੇ ਹੋ ਸਕਦੇ ਸਨ । ਪਰ ਕੀ ਇਸ ਬਦਲੀ ਰੰਗਤ ਦਾ ਕੋਈ ਹੋਰ ਭੀ ਕਾਰਨ ਹੋ ਸਕਦਾ ਸੀ । ਹਾਂ ਕੁਝ ਪੰਜਾਬ ਦੇ ਲੋਕ ਇਸ ਗੱਲ ਤੋਂ ਭੀ ਖਫੇ ਵਿੱਚ ਹਨ ਕਿ ਜੋ ਫ਼ਿਰੋਜ਼ਪੁਰ ਦੀ 5 ਜਨਵਰੀ ਵਾਲੀ ਘਟਨਾ  , ਪ੍ਰਧਾਨ ਮੰਤਰੀ ਮੋਦੀ ਦੇ ਦੌਰੇ ਦੌਰਾਨ ਹੋਈ , ਉਸ ਨੇ ਪੰਜਾਬ ਦਾ ਕੁਝ ਸੁਆਰਨ ਨਾਲ਼ੋਂ , ਸਗੋਂ ਪੰਜਾਬ ਨੂੰ ਬਦਨਾਮ ਕੀਤਾ ਹੈ । ਬਹੁਤੇ ਤਾਂ ਇਸ ਗੱਲ ਨੂੰ ਅਚੰਭੇ ਅਤੇ ਮੂਰਖਤਾ ਪੱਖੋਂ ਜਾਇਜ਼ਾ ਲੈ ਕੇ ਕਹਿ ਰਹੇ ਹਨ , ਕਿ ਪ੍ਰਧਾਨ ਮੰਤਰੀ ਜੋ 42750 ਕਰੋੜ ਰੁਪਏ ਦਾ ਪ੍ਰਾਜੈਕਟ ਪੰਜਾਬ ਦੇ ਰਹੇ ਸਨ , ਉਸ ਨੂੰ ਪੰਜਾਬ ਦੀ ਇਸ ਸਮੇਂ ਦੀ ਸੱਤਾ ਤੇ ਬੈਠੀ ਕਾਂਗਰਸ ਨੇ ਧ੍ਰੋਹੀ ਚਾਲ ਖੇਡ ਕੇ ਖੱਟੇ ਵਿੱਚ ਮਿਲਾ ਦਿੱਤਾ। ਲੋਕ ਗੱਲ ਕਰਦੇ ਹਨ ਕਿ ਕੀ ਕਦੇ ਪਹਿਲਾਂ ਦੇ 65 ਸਾਲ ਦੇ ਉੱਪਰ ਸਮੇਂ ਵਿੱਚ ਕਦੇ ਕਿਸੇ ਭਾਰਤ ਦੇ ਪ੍ਰਧਾਨ ਮੰਤਰੀ ਨੇ ਪੰਜਾਬ ਜਾ ਕਿਸੇ ਸਟੇਟ ਨੂੰ ਇਸ ਤਰਾਂ ਦਾ ਸੁਨੇਹਾ ਦੇ ਕੇ ਕਦਮ ਪੁੱਟਿਆ ਹੋਵੇ , ਕਿ ਮੈਂ ਕੁਝ ਦੇਣ ਆਇਆ ਹਾਂ ? ਕੀ ਇਹ ਹੀ ਵੱਡਾ ਕਾਰਨ ਤਾਂ ਨਹੀਂ ਕਿ ਪੰਜਾਬ ਦੇ ਲੋਕ ਬੀ ਜੇ ਪੀ ਵੱਲ ਰੁਖ ਕਰ ਰਹੇ ਹਨ ? ਕੁਝ ਹੋਰ ਭੀ ਕਾਰਨ ਹੋ ਸਕਦੇ ਹਨ , ਕਿ ਪੱਜਾਬ ਦੇ ਨੇਤਾਗਿਰੀ ਆਗੂਆਂ ਨੇ ਭੀ ਆਪਣੀਆਂ ਸਿਆਸੀ  ਰੋਟੀਆਂ ਸੇਕਣ ਲਈ ਬੀ ਜੇ ਪੀ ਨੂੰ , ਭਾਰਤੀ ਜਨਤਾ ਪਾਰਟੀ ਕਹਿਣ ਨਾਲ਼ੋਂ , ਹਿੰਦੂ ਪਾਰਟੀ ਜ਼ਿਆਦਾ ਕਹਿਕੇ ਲੋਕਾਂ ਦੇ ਮਨਾਂ ਵਿੱਚ ਜ਼ਹਿਰ ਭਰੀ । ਸ਼ਪਸਟ ਦੇਖੋ , ਜੋ ਨੇਤਾ ਜਾਂ ਬਾਦਲਕੇ ਇਹਨਾਂ ਨਾਲ ਨੂੰਹ - ਮਾਸ ਰਿਸ਼ਤਾ ਦੱਸ ਕੇ ਇਹਨਾਂ ਨੂੰ ਆਪਣੇ ਪਰਵਾਰ ਦੀ ਜਾਗੀਰ ਸਮਜਦੇ ਸਨ , ਉਹਨਾਂ ਨੇ ਅੱਜ ਆਪਣੇ ਉਲਟੇ ਸਵਾਰਥ ਖਾਤਰ , ਜਥੇਦਾਰ ਅਕਾਲ ਤਖਤ ਨੇ ਬੀ ਜੇ ਪੀ ਵਿਰੁੱਧ ਫ਼ਤਵੇ ਜਿਹਾ ਬਿਆਨ ਨੂੰ ਉਸ ਸਮੇਂ ਦਿੱਤਾ  ਜਦੋਂ ਇਹਨਾਂ ਦੀ ਧਿਰ ਦਾ ਦਿੱਲੀ ਵਾਲਾ ਆਗੂ ਸ੍ਰ ਸਿਰਸਾ ਬੀ ਜੇ ਪੀ ਵਿੱਚ ਚਲਾ ਗਿਆ। ਕੀ ਜਥੇਦਾਰ ਸਾਹਿਬ ਦੀ ਸਿਰਸੇ ਨੂੰ ਜੇਹਲ ਡੱਕਣ ਵਾਲੀ ਡਰ ਵਾਲੀ ਕਹਾਣੀ ਵਿੱਚ ਕੋਈ ਸੱਚ ਸੀ? ਭਾਰਤ ਦੀ ਇਕ ਪ੍ਰਮੁਖ ਰੂਲਿੰਗ ਪਾਰਟੀ ਨੂੰ ਹਿੰਦੂ ਪਾਰਟੀ ਕਹਿਕੇ ਲੋਕਾਂ ਵਿਚ ਕਿਵੇ ਗੁਮਰਾਹ ਕੀਤਾ ਗਿਆ ਇਹ ਪੰਜਾਬ ਦੇ ਨੇਤਾਗਿਰੀ ਆਗੂਆਂ ਦੀ ਪੰਜਾਬ ਪ੍ਰਤੀ ਅਕਿਰਤਘਣਤਾ ਹੀ ਤਾਂ ਕਹੀ ਜਾ ਸਕਦੀ ਹੈ । 65 ਸਾਲ ਦਾ ਕਾਂਗਰਸ ਇਤਿਹਾਸ ਦੇਖੀਏ ਤਾਂ , 1955 ਵਿਚ ਦਰਬਾਰ ਸਾਹਿਬ ਵਿਚ ਪੁਲਿਸ ਐਕਸ਼ਨ 150 ਤੋਂ ਵੱਧ ਸਿੱਖ ਮਾਰੇ ਗਏ, 1978 ਦਾ ਸਾਕਾ , ਜੂਨ ਅਤੇ ਨਵੰਬਰ 1984 ਦੇ ਹਜ਼ਾਰਾਂ ਸ਼ਹੀਦਾਂ ਦੀ ਜੁਮੇਵਾਰ ਨਹਿਰੂ ਤੋਂ ਇੰਦਰਾ ਗਾਂਧੀ ਤੱਕ ਸਿਰਫ਼ ਕਾਂਗਰਸ ਹੀ ਜੁਮੇਵਾਰ ਸੀ । ਸਿੱਖਾਂ ਦੀ ਕਾਂਗਰਸ ਵੱਲੋਂ ਕੀਤੇ ਗਏ ਨਰਸੰਘਾਰ ਨੂੰ ਅੱਜ ਸਿੱਖ ਸਮਜ ਚੁੱਕੇ ਹਨ । ਅਜ ਪੰਜਾਬ ਦੀ ਇਸ ਸਿਆਸੀ ਹਥੋਪਾਈ ਵਿੱਚੋਂ ਕੀ ਨਿਕਲਦਾ ਹੈ , ਲੋਕਾਂ ਅਤੇ ਉਨ੍ਹਾਂ ਦੇ ਨੇਤਾਵਾਂ ਦੇ ਆਪਣੇ ਆਪਣੇ ਕਿਆਸੇ ਹਨ । ਪਰੰਤੂ ਅਕਿਰਤਘਣਤਾ ਦੀਆਂ ਰੇਤ ਦੀਆਂ ਕੰਧਾਂ ਜ਼ਰੂਰ ਢਹਿ ਰਹੀਆਂ ਹਨ । ਸਿਆਸੀ ਪਾਰਟੀਆਂ ਦੇ ਅਸਲੀ ਚੇਹਰਿਆਂ ਨੂੰ ਬੜੇ ਔਖੇ ਸਮਿਆਂ ਵਿੱਚੋਂ ਲੰਘ ਕੇ ਅੱਜ ਪੰਜਾਬ ਦੇ ਲੋਕਾਂ ਨੇ ਪਛਾਨਣਾਂ ਸ਼ੁਰੂ ਕਰ ਦਿੱਤਾ ਹੈ । 

—— ਪਰਮਿੰਦਰ ਸਿੰਘ ਬਲ, ਪ੍ਰਧਾਨ ਸਿੱਖ ਫੈਡਰੇਸ਼ਨ ਯੂ ਕੇ

ਲੋਕਾਂ ਦੀ, ਲੋਕਾਂ ਦੁਆਰਾ ਅਤੇ ਲੋਕਾਂ ਲਈ ਸਰਕਾਰ ਲੋਕਤੰਤਰ ਦੀ ਰੀੜ ਹੈ। ਇਸਦਾ ਆਪਣੀ ਸਮਾਜਿਕ ਆਦਰਸ਼ਵਾਦ ਅਤੇ ਨੈਤਿਕਤਾ ਦਾ ਅਕਸ ਬਣਾਏ ਰੱਖਣਾ ਅਤਿ ਜ਼ਰੂਰੀ ਹੈ ਤਾਂ ਜੋ ਲੋਕਾਂ ਦਾ ਲੋਕਤੰਤਰੀ ਵਿਵਸਥਾ ਵਿੱਚ ਯਕੀਨ ਬੱਝਾ ਰਹੇ। ਲੋਕਤੰਤਰ ਵਿੱਚ ਵੱਖੋ ਵੱਖਰੀਆਂ ਵਿਚਾਰਧਾਰਾਵਾਂ ਦੀਆਂ ਪਾਰਟੀਆਂ ਇਸਦੀ ਖੂਬਸੂਰਤੀ ਹੈ ਅਤੇ ਇਹਨਾਂ ਪਾਰਟੀਆਂ ਦੇ ਸੰਵਿਧਾਨ ਲੋਕਤੰਤਰ ਵਿੱਚ ਵਿਸ਼ਵਾਸ ਪ੍ਰਗਟਾਉਂਦੇ ਦੇਸ ਨੂੰ ਹੋਰ ਅੱਗੇ ਤਰੱਕੀ ਦੇ ਰਾਹ ਤੇ ਲਿਜਾਣ ਲਈ ਉਤਸਕ ਹਨ। ਆਦਰਸ਼ ਅਤੇ ਨੈਤਿਕਤਾ ਪੱਖੋਂ ਮਜ਼ਬੂਤ ਨੇਤਾ ਹੀ ਚੰਗੇ ਸਮਾਜ ਦੀ ਸਿਰਜਣਾ ਅਤੇ ਅਗਵਾਈ ਲਈ ਯੋਗ ਹੁੰਦਾ ਹੈ।

ਜੇਕਰ ਮੌਜੂਦਾ ਪਾਰਟੀਆਂ ਅਤੇ ਨੇਤਾਵਾਂ ਨੂੰ ਵੇਖਿਆ ਜਾਵੇ ਤਾਂ ਸਪੱਸ਼ਟ ਹੋ ਜਾਂਦਾ ਹੈ ਕਿ ਨੈਤਿਕਤਾ ਇਹਨਾਂ ਦੇ ਲਾਗੇ-ਤਾਗੇ ਵੀ ਨਹੀਂ। ਨੈਤਿਕਤਾ ਸਿਰਫ਼ ਕਾਗਜ਼ੀ ਬਣ ਕੇ ਰਹਿ ਗਈ ਹੈ ਅਤੇ ਆਪਣੇ ਮੁਫ਼ਾਦ ਲਈ ਵਿਰੋਧੀ ਆਗੂ/ਪਾਰਟੀ ਤੋਂ ਨੈਤਿਕਤਾ ਦੇ ਆਧਾਰ ਤੇ ਅਸਤੀਫ਼ੇ ਦੀ ਮੰਗ ਕਰਨ ਦੀ ਸ਼ਬਦਾਵਲੀ ਦੇ ਬਿਆਨ ਤੱਕ ਸਿਮਟ ਗਈ ਹੈ। ਇਹ ਦੇਸ ਦਾ ਦੁਖਾਂਤ ਹੈ ਕਿ ਰਾਜਨੀਤੀਵਾਨਾਂ ਨੇ ਆਦਰਸ਼ਵਾਦ ਅਤੇ ਨੈਤਿਕਤਾ ਨੂੰ ਪੂਰੀ ਤਰ੍ਹਾਂ ਤਿਲਾਂਜਲੀ ਦੇ ਛੱਡੀ ਹੈ। ਇਹ ਕੁਰਸੀ ਦੀ ਅੰਨ੍ਹੀ ਦੌੜ ਵਿੱਚ ਹਨ ਅਤੇ ਹਰ ਹੀਲ੍ਹੇ ਵਸੀਲੇ ਇਹਨਾਂ ਨੂੰ ਸੱਤਾ ਦੀ ਚਾਬੀ ਤੱਕ ਮਤਲਬ ਹੈ। ਜਿਵੇਂ ਕਿਹਾ ਜਾਂਦਾ ਹੈ ਕਿ ਪਿਆਰ ਅਤੇ ਯੁੱਧ ਵਿੱਚ ਸਭ ਜਾਇਜ਼ ਹੈ ਉਦਾਂ ਹੀ ਨੇਤਾਵਾਂ ਨੇ ਚੋਣਾਂ ਜਿੱਤਣ ਲਈ ਵੀ ਸਭ ਕੁਝ ਜਾਇਜ਼ ਤੇ ਅਮਲ ਸ਼ੁਰੂ ਕਰ ਦਿੱਤਾ ਹੈ। ਪਾਰਟੀਆਂ ਲੋਕ ਮੁੱਦਿਆਂ, ਵਿਕਾਸ ਦੀ ਥਾਂ ਜਿਸ ਤਰ੍ਹਾਂ ਦੇ ਮੁੱਦੇ ਚੋਣਾਂ ਜਿੱਤਣ ਲਈ ਉਛਾਲਦੀਆਂ ਹਨ ਜੋ ਕਿ ਸਮਾਜਿਕ ਵੰਡ ਕਰਦਾ ਹੈ ਕਿਸ ਤਰ੍ਹਾਂ ਨੈਤਿਕ ਤੌਰ ਤੇ ਸਹੀ ਕਿਹਾ ਜਾ ਸਕਦਾ ਹੈ? ਕਿਵੇਂ ਸੱਤਾ ਧਿਰ ਚੋਣਾਂ ਜਿੱਤਣ ਲਈ ਸਿੱਧੇ-ਅਸਿੱਧੇ ਹਥਕੰਡਾ ਅਪਣਾਉਂਦੀ ਹੈ, ਤਾਕਤ ਅਤੇ ਸੰਸਥਾਵਾਂ ਦਾ ਦੁਰਉਪਯੋਗ ਕਰਦੀ ਹੈ, ਕਿਸੇ ਇੱਕ ਪਾਰਟੀ ਨੂੰ ਬਹੁਮਤ ਨਾ ਮਿਲਣ ਤੇ ਕਿਵੇਂ ਅੰਦਰਖਾਤੇ ਇੱਕ-ਦੂਜੀਆਂ ਪਾਰਟੀਆਂ ਵਿੱਚ ਪਾੜ ਲਾਏ ਜਾਂਦੇ ਹਨ, ਕਿਵੇਂ ਵਿਰੋਧੀ ਲੀਡਰਾਂ ਨੂੰ ਪੈਸੇ ਨਾਲ ਖਰੀਦ ਕੇ ਜਾਂ ਡਰਾ ਕੇ ਪਾਲਾ ਬਦਲਾਇਆ ਜਾਂਦਾ ਹੈ, ਕਿਵੇਂ ਇੱਕ ਘੱਟ ਸੀਟਾਂ ਜਿੱਤਣ ਵਾਲੀ ਪਾਰਟੀ ਰਾਤੋਂ ਰਾਤ ਸਰਕਾਰ ਬਣਾਉਣ ਵਿੱਚ ਕਾਮਯਾਬ ਹੋ ਜਾਂਦੀ ਹੈ ਕਿਸੇ ਤੋਂ ਨਹੀਂ ਲੁਕਿਆ। ਰਾਜਨੀਤਿਕ ਪਾਰਟੀਆਂ ਚੋਣਾਂ ਵਿੱਚ ਬਲਾਤਕਾਰ, ਕਤਲ ਵਰਗੇ ਘਿਨੋਣੇ ਜ਼ੁਰਮ ਦੇ ਦਾਗੀਆਂ ਨੂੰ ਵੀ ਟਿਕਟਾਂ ਦੇ ਛੱਡਦੀਆਂ ਹਨ।

ਨੇਤਾਵਾਂ ਨੇ ਆਪਣੇ ਇਖਲਾਕ ਨੂੰ ਲਾਹ ਕੇ ਕਿੱਲੀ ਤੇ ਟੰਗ ਦਿੱਤਾ ਹੈ। ਕਿਵੇਂ ਟਿਕਟਾਂ ਅਤੇ ਆਹੁਦਿਆਂ ਲਈ ਵਫ਼ਾਦਾਰੀਆਂ ਬਦਲ ਜਾਂਦੀਆਂ ਹਨ, ਨਿੱਜੀ ਹਿੱਤਾਂ ਅਨੁਸਾਰ ਇੱਕ-ਦੂਜੀਆਂ ਪਾਰਟੀਆਂ ਵਿੱਚ ਆਉਣਾ ਜਾਣਾ ਲੱਗਿਆ ਰਹਿੰਦਾ ਹੈ। ਚੋਣਾਂ ਦੌਰਾਨ ਕਿਸ ਕਿਸ ਤਰ੍ਹਾਂ ਦੇ ਨਿਚਲੇ ਪੱਧਰ ਤੇ ਭਾਸ਼ਣ ਅਤੇ ਦੂਸ਼ਣਬਾਜ਼ੀ ਕੀਤੀ ਜਾਂਦੀ ਹੈ। ਚੋਣਾਂ ਜਿੱਤਣ ਲਈ ਮੁੱਦਿਆਂ ਦੀ ਥਾਂ ਪੈਸਾ, ਨਸ਼ਾ ਅਤੇ ਹੋਰ ਅਥਕੰਡੇ ਅਪਣਾਏ ਜਾਂਦੇ ਆਮ ਦੇਖੇ ਜਾ ਸਕਦੇ ਹਨ। ਨੇਤਾਵਾਂ ਹੱਥ ਤਾਕਤ ਆਉਣ ਤੇ ਲੋਕਾਂ ਦਾ ਵਿਕਾਸ ਭਾਵੇਂ ਨਾ ਹੋਵੇ ਪਰੰਤੂ ਆਪਣੀਆਂ ਜਾਇਦਾਦਾਂ ਬਿਜਲੀ ਤੋਂ ਤੇਜ ਗਤੀ ਨਾਲ ਵੱਧ ਜਾਂਦੀਆਂ ਹਨ। ਨੇਤਾ ਲੋਕਾਂ ਵਿੱਚ ਪਾਰਟੀ ਅਧਾਰਿਤ ਐਨੀ ਜ਼ਹਿਰ ਘੋਲ ਦਿੰਦੇ ਹਨ, ਸਮਾਜੀ ਵੰਡ ਕਰ ਦਿੰਦੇ ਹਨ ਕਿ ਵਰਕਰ ਪਿੰਡਾਂ, ਮੁਹੱਲਿਆਂ ਵਿੱਚ ਆਪਸੀ ਰਿਸ਼ਤੇ, ਭਾਈਚਾਕ ਸਾਂਝ ਖ਼ਤਮ ਕਰ ਬੈਠਦੇ ਹਨ ਪਰੰਤੂ ਨੇਤਾਵਾਂ ਦੀ ਸਿਹਤ ਤੇ ਕੋਈ ਅਸਰ ਨਹੀਂ ਹੁੰਦਾ ਤੇ ਉਹ ਆਪਣੇ ਹਿੱਤਾਂ ਲਈ ਸਿਆਸਤ ਕਰੀ ਜਾਂਦੇ ਹਨ।

ਹਾਰਵਾਰਡ ਯੂਨੀਵਰਸਿਟੀ ਦੇ ਪ੍ਰੋਫੈਸਰ ਡੈਨਿਸ ਥਾਮਸਨ ਨੇ ਰਾਜਨੀਤੀ ਵਿੱਚ ਨੈਤਿਕਤਾ ਤੇ ਜ਼ੋਰ ਦਿੰਦਿਆਂ ਕਿਹਾ ਹੈ ਕਿ “ਉਹ ਵੋਟਰ ਵੀ ਬੁਹਤ ਵੱਡੇ ਗੁਨਾਹਗਾਰ ਹਨ ਜਿਹੜੇ ਕਿ ਭ੍ਰਿਸ਼ਟ ਲੋਕਾਂ ਨੂੰ ਵੋਟਾਂ ਪਾ ਕੇ ਰਾਜਨੀਤਿਕ ਲੀਡਰ ਬਣਾਉਂਦੇ ਹਨ ਜਿਹੜੇ ਕਿ ਆਪਣੀ ਨਿੱਜੀ ਹਿੱਤਾਂ ਲਈ ਲੋਕਾਂ ਨਾਲ ਹਰ ਤਰ੍ਹਾਂ ਦਾ ਧੋਖਾ ਕਰਦੇ ਹਨ। ” ਸਮੇਂ ਦੀ ਜ਼ਰੂਰਤ ਹੈ ਕਿ ਵੋਟਰ ਚੋਣਾਂ ਦੌਰਾਨ ਸੋਚ ਸਮਝ ਕੇ ਆਪਣੇ ਉੱਜਵਲ ਭਵਿੱਖ ਲਈ ਵੋਟ ਕਰਨ ਅਤੇ ਆਪਣੀ ਭਾਈਚਾਰਕ ਸਾਂਝ ਨੂੰ ਨੇਤਾਵਾਂ ਪਿੱਛੇ ਲੱਗ ਕੇ ਖੋਰ੍ਹਾ ਨਾ ਲਾਉਣ।

ਗੋਬਿੰਦਰ ਸਿੰਘ ਢੀਂਡਸਾ

ਪਿੰਡ ਤੇ ਡਾਕ. ਬਰੜ੍ਹਵਾਲ (ਧੂਰੀ)

ਈਮੇਲ – feedback.gobinder@gmail.com

ਬਾਬਾ ਸਾਹਿਬ ਡਾ ਬੀ ਆਰ ਅੰਬੇਦਕਰ ਨੇ  ਸਮਾਜਿਕ, ਆਰਥਿਕ, ਰਾਜਨੀਤਕ, ਸੱਭਿਆਚਾਰਕ ਅਤੇ ਧਾਰਮਿਕ ਸਮੇਤ ਵੱਖ ਵੱਖ ਪਹਿਲੂਆਂ ਨੂੰ ਮੱਦੇਨਜ਼ਰ ਰੱਖਦਿਆਂ ਬਹੁਤ ਵਿਗਿਆਨਿਕ ਸੋਚ ਨਾਲ ਭਾਰਤੀ ਸੰਵਿਧਾਨ ਦੀ ਸਥਾਪਨਾ ਕੀਤੀ ਸੀ, ਕਿਉਂਕਿ ਉਹ ਇਸ ਗੱਲ ਤੋਂ ਭਲੀ ਭਾਂਤ ਜਾਣੂੰ ਸਨ ਕਿ ਭਾਰਤ ਸੰਸਾਰ ਦਾ ਇਕੋ ਇਕ ਉਹ ਨਿਵੇਕਲਾ ਦੇਸ਼ ਹੈ, ਇਥੇ ਅਨੇਕਾਂ ਧਰਮ ਹਨ, 6000 ਤੋਂ ਵੱਧ ਜਾਤਾਂ ਅਤੇ ਅਨੇਕਾਂ ਕਬੀਲਿਆਂ ਵਿੱਚ ਵੰਡਿਆ ਹੋਇਆ ਸਮਾਜ ਹੈ। ਇਥੇ ਵੱਖ ਵੱਖ ਬੋਲੀਆਂ, ਵੱਖ ਵੱਖ ਰੰਗਾਂ ਅਤੇ ਵੱਖ ਵੱਖ ਨਸਲਾਂ ਵਾਲੇ ਲੋਕ ਰਹਿੰਦੇ ਹਨ, ਜਿਸ ਕਰਕੇ ਉਨ੍ਹਾਂ ਨੂੰ ਅਜਾਦ ਭਾਰਤ ਵਿਚ ਇੱਕ ਥਾਂ ਇਕੱਠੇ ਕਰਕੇ ਰੱਖਣਾ ਬਹੁਤ ਮੁਸ਼ਕਿਲ ਹੈ। ਉਹ ਇਸ ਗੱਲ ਤੋਂ ਵੀ ਪੂਰੀ ਤਰ੍ਹਾਂ ਵਾਕਫ ਸਨ ਕਿ ਭਾਰਤ ਵਿਚ ਹਜਾਰਾਂ ਸਾਲਾਂ ਤੋਂ ਮਨੂ-ਸਿਮਰਤੀ ਦਾ ਵਿਧਾਨ ਲਾਗੂ ਹੈ, ਜਿਸ ਨੂੰ ਤੋੜ ਕੇ ਹੀ ਭਾਰਤ ਨੂੰ ਇਕ ਮੁੱਠ ਰੱਖਿਆ ਜਾ ਸਕਦਾ ਹੈ, ਇਸ ਲਈ ਉਨ੍ਹਾਂ ਨੇ  ਮਰਦ-ਔਰਤਾਂ ਸਮੇਤ ਸਮਾਜ ਦੇ ਹਰੇਕ ਵਰਗ ਦੇ ਲੋਕਾਂ ਨੂੰ  ਸੰਵਿਧਾਨ ਵਿੱਚ ਬਰਾਬਰਤਾ ਪ੍ਰਦਾਨ ਕੀਤੀ । ਭਾਰਤੀ ਸੰਵਿਧਾਨ ਸਦਕਾ ਹੀ ਅਜਾਦੀ ਦੇ 75 ਸਾਲ ਬੀਤ ਜਾਣ ਦੇ ਬਾਵਜੂਦ ਸਮੁੱਚਾ ਦੇਸ਼   ਇੱਕ ਮੁੱਠੀ ਵਿੱਚ ਬੰਦ ਹੈ ਅਤੇ ਇਸ ਦੇ ਸਾਰੇ ਸੂਬੇ ਅਤੇ ਸੂਬਿਆਂ ਦੇ ਲੋਕ ਮੋਤੀਆਂ ਦਾ ਇਕ ਖੂਬਸੂਰਤ ਹਾਰ ਬਣਿਆ ਹੋਇਆ ਹੈ। ਭਾਰਤੀ ਸੰਵਿਧਾਨ ਦੇਸ਼ ਦੇ ਲੋਕਾਂ ਨੂੰ ਆਪਸ ਵਿਚ ਜੋੜ ਕੇ ਰੱਖ ਰਿਹਾ ਹੈ ਜਦਕਿ ਐਨ ਇਸ ਦੇ ਉਲਟ  ਦੇਸ਼ ਦੀਆਂ ਕੌਮੀ ਸਿਆਸੀ ਪਾਰਟੀਆਂ ਸਮੇਤ ਖੇਤਰੀ ਸਿਆਸੀ ਪਾਰਟੀਆਂ ਦੇ ਲਗਭਗ ਸਮੂਹ ਸਿਆਸਤਦਾਨ ਦੇਸ਼ ਵਿਚ ਵੰਡੀਆਂ ਪਾ ਕੇ ਆਪਣੀਆਂ ਰੋਟੀਆਂ ਸੇਕਣ ਦੀ ਤਾਕ ਵਿਚ ਰਹਿੰਦੇ ਹਨ। ਸਿਆਸਤਦਾਨ ਦੇਸ਼ ਦੇ ਲੋਕਾਂ ਨੂੰ ਧਰਮਾਂ,ਜਾਤਾਂ, ਕਬੀਲਿਆਂ, ਬੋਲੀਆਂ ਅਤੇ ਇਲਾਕਿਆਂ ਦੇ ਅਧਾਰ 'ਤੇ ਵੰਡ ਕੇ ਚੋਣਾਂ ਦੌਰਾਨ ਆਪਣੇ ਉਮੀਦਵਾਰਾਂ ਨੂੰ ਟਿਕਟਾਂ ਵੰਡਦੇ ਹਨ ਅਤੇ ਉਹ ਆਪਣੀ ਕੁਰਸੀ ਕਾਇਮ ਕਰਨ ਲਈ ਜਿਥੇ ਹਿੰਦੂ ਵੱਧ ਹੁੰਦੇ ਹਨ, ਉਥੇ ਹਿੰਦੂ ਉਮੀਦਵਾਰ ਨੂੰ ਟਿਕਟ ਦਿੰਦੇ ਹਨ, ਇਸੇ ਤਰ੍ਹਾਂ ਜਿਥੇ ਵੱਧ ਸਿੱਖ ਉਥੇ ਸਿੱਖ ਨੂੰ, ਜਿਥੇ ਮੁਸਲਮਾਨਾਂ ਦੀ ਗਿਣਤੀ ਵਧ ਉਥੇ ਮੁਸਲਮਾਨ ਨੂੰ, ਜਿਥੇ ਇਸਾਈ ਭਾਈਚਾਰੇ ਵੱਧ ਉਥੇ ਇਸਾਈ ਨੂੰ, ਇਸੇ ਤਰ੍ਹਾਂ ਹੀ ਜਿਥੇ ਅਨਸੂਚਿਤ ਜਾਤੀਆਂ /ਪੱਛੜੀਆਂ ਸ਼੍ਰੇਣੀਆਂ ਦੇ ਲੋਕਾਂ ਦੀ ਗਿਣਤੀ ਦਾ ਅੰਕੜਾ ਵੱਧ ਹੁੰਦਾ ਹੈ, ਉਥੇ ਉਨ੍ਹਾਂ ਵਰਗਾਂ ਦੇ ਲੋਕਾਂ ਨੂੰ ਟਿਕਟਾਂ ਦਿੱਤੀਆਂ ਜਾਂਦੀਆਂ ਹਨ, ਜਾਣੀ ਕਿ ਜਿਸ ਹਲਕੇ ਵਿਚ ਜਿਸ ਜਾਤ/ਧਰਮ /ਫਿਰਕੇ ਦੇ ਲੋਕਾਂ ਦੀ ਗਿਣਤੀ ਵਧ ਹੁੰਦੀ ਹੈ, ਉਥੇ ਉਸੇ ਵਰਗ ਨਾਲ ਸਬੰਧਿਤ ਨੂੰ ਉਮੀਦਵਾਰ ਬਣਾਕੇ ਮੈਦਾਨ ਵਿਚ ਉਤਾਰਿਆ ਜਾਂਦਾ ਹੈ। ਗੱਲ ਇਥੇ ਹੀ ਨਹੀਂ ਮੁੱਕਦੀ, ਸਿਆਸਤਦਾਨ  ਸਮੇਂ ਸਮੇਂ 'ਤੇ ਆਪਣੀ ਕੁਰਸੀ ਕਾਇਮ ਰੱਖਣ ਲਈ ਕਈ ਵਾਰ ਤਾਂ ਬਹੁਤ ਹੀ ਥੱਲੇ ਤੱਕ ਗਰਕ ਜਾਂਦੇ ਹਨ। ਜਿਸ ਇਲਾਕੇ ਵਿਚ ਘੱਟ ਗਿਣਤੀ ਦੇ ਲੋਕ ਰਹਿੰਦੇ ਹਨ, ਉਨ੍ਹਾਂ ਦੇ ਘਰਾਂ ਨੂੰ ਅੱਗਾਂ ਲਗਵਾਉਣ ਲਈ ਘਿਨਾਉਣੇ ਕਾਰਨਾਮੇ ਕੀਤੇ ਜਾਂਦੇ ਹਨ। ਦਲਿਤਾਂ ਦੇ ਘਰ ਸਾੜਨੇ / ਆਨੇ-ਬਹਾਨੇ ਕਤਲੇਆਮ ਕਰਨਾ /ਬਲਾਤਕਾਰ ਕਰਕੇ ਮਾਰ ਦੇਣਾ /ਹੱਥ-ਪੈਰ ਵੱਢ ਕੇ ਡਰਾਉਣਾ ਮਾਹੌਲ ਪੈਦਾ ਕਰਨਾ / ਧਾਰਮਿਕ ਗ੍ਰੰਥਾਂ /ਧਾਰਮਿਕ ਸਥਾਨਾਂ ਦੀ ਬੇਅਦਬੀ ਕਰਨਾ / ਬੰਬ ਧਮਾਕੇ ਕਰਵਾਉਣਾ ਸਿਆਸਤਦਾਨਾਂ ਦੀ ਸਿਆਸਤ ਦਾ ਮੁੱਖ ਹਿੱਸਾ ਹੁੰਦਾ ਹੈ। ਇਸ ਤਰ੍ਹਾਂ ਸਿਆਸਤਦਾਨ ਦੇਸ਼ ਅਤੇ ਸਮਾਜ ਨੂੰ ਤੋੜਨ ਲਈ ਕੰਮ ਕਰਦੇ ਹਨ, ਜਦ ਕਿ ਭਾਰਤੀ ਸੰਵਿਧਾਨ ਦੇਸ਼ ਨੂੰ ਜੋੜ ਕੇ ਰੱਖ ਰਿਹਾ ਹੈ।  ਸਿਆਸਤਦਾਨ ਮਨੂ-ਸਿਮਰਤੀ ਸਿਧਾਂਤਾਂ ਉਪਰ ਚੱਲਦੇ ਹੋਏ ਆਪਣੀ ਕੁਰਸੀ ਕਾਇਮ ਰੱਖਣ ਲਈ ਦੇਸ਼ ਦੇ ਲੋਕਾਂ ਵਿਚ /ਸਮਾਜ ਵਿਚ ਵੰਡੀਆਂ ਪਾ ਕੇ ਰੱਖਣ ਨੂੰ  ਆਪਣਾ ਕਰਮ ਅਤੇ ਧਰਮ ਸਮਝਦੇ ਹਨ। ਮਨੂ-ਸਿਮਰਤੀ ਦਾ ਸਿਧਾਂਤ ਸਮਾਜ ਵਿਚ ਵੰਡੀਆਂ ਪਾ ਕੇ ਰੱਖਣਾ ਹੈ। ਆਮਤੌਰ 'ਤੇ ਅਸੀਂ ਅਕਸਰ ਇਹ ਗੱਲ ਕਹਿੰਦੇ ਹਾਂ ਕਿ ਅੰਗਰੇਜ 'ਪਾੜੋ ਤੇ ਰਾਜ ਕਰੋ' ਦੀ ਨੀਤੀ 'ਤੇ ਚੱਲਦੇ ਸਨ ਜਦ ਕਿ ਸੱਚ ਤਾਂ ਇਹ ਜਾਪਦਾ ਹੈ ਕਿ ਅੰਗਰੇਜ਼ਾਂ ਨੇ ਭਾਰਤ ਵਿਚ ਆ ਕੇ ਹੀ  ਇਥੋਂ ਦੇ ਸਮਾਜਿਕ ਢਾਂਚੇ ਨੂੰ ਸਮਝਦਿਆਂ 'ਪਾੜੋ ਅਤੇ ਰਾਜ ਕਰੋ' ਦੀ ਨੀਤੀ ਨੂੰ ਅਪਣਾਇਆ। ਭਾਰਤ ਦਾ ਲੰਬਾ ਸਮਾਂ ਗੁਲਾਮ ਰਹਿਣ ਦਾ ਮੁੱਖ ਕਾਰਨ ਮਨੂ-ਸਿਮਰਤੀ ਹੀ ਸੀ, ਕਿਉਂਕਿ ਭਾਰਤ ਉਪਰ ਅੰਗਰੇਜ਼ਾਂ ਸਮੇਤ ਜਿੰਨ੍ਹੇ ਵੀ ਹਮਲਾਵਰ ਆਏ ਉਨ੍ਹਾਂ ਨੇ ਇਥੋਂ ਦੇ ਸਮਾਜਿਕ ਤਾਣੇ-ਬਾਣੇ ਨੂੰ ਸਮਝ ਕੇ ਹਮਲੇ ਕੀਤੇ ਅਤੇ ਰਾਜ ਕੀਤਾ। ਹਮਲਾਵਰ ਇਹ ਗੱਲ ਭਲੀਭਾਂਤ ਜਾਣ ਗਏ ਸਨ, ਕਿ ਭਾਰਤ ਵੱਖ ਵੱਖ ਵਰਣਾਂ ਵਿਚ ਵੰਡਿਆ ਹੋਇਆ ਹੈ, ਜਿਸ ਕਰਕੇ ਕਮਜੋਰ ਹੈ ਕਿਉਂਕਿ ਇਥੇ ਕੋਈ ਵੀ ਵਰਣ ਇੱਕ ਦੂਜੇ ਨਾਲ ਮਿਲ ਕੇ ਨਹੀਂ ਚੱਲ ਸਕਦਾ, ਸਾਰੇ ਵਰਣਾਂ ਵਿਚ ਮਨੂ-ਸਿਮਰਤੀ ਸਿਧਾਂਤ ਨੇ ਡੂੰਘੀਆਂ ਖਾਈਆਂ ਪਾ ਕੇ ਰੱਖ ਦਿੱਤੀਆਂ ਸਨ। ਹਮਲਾਵਰ ਜਾਣ ਗਏ ਸਨ ਕਿ ਭਾਰਤ ਦੇ ਸਾਰੇ ਵਰਣ ਵੱਖ ਵੱਖ ਹੋਣ ਕਰਕੇ ਬਹੁਤ ਕਮਜੋਰ ਹਨ, ਜਿਸ ਕਰਕੇ ਇਥੋਂ ਦੇ ਲੋਕਾਂ ਨੂੰ ਦਬਾ ਕੇ ਰੱਖਣਾ ਸੌਖਾ ਕੰਮ ਹੈ । ਜਦੋਂ ਅਸੀਂ ਦੇਸ਼ ਦੇ ਸਿਆਸਤਦਾਨਾਂ ਦੀ ਵਿਚਾਰਧਾਰਾ ਨੂੰ ਗਹੁ ਨਾਲ ਵੇਖਦੇ ਹਾਂ ਤਾਂ ਇਹ ਗੱਲ ਉੱਭਰ ਕੇ ਸਾਹਮਣੇ ਆਉਂਦੀ ਹੈ ਕਿ ਉਹ 'ਮਨੂ-ਸਿਮਰਤੀ' ਦੀ ਵਿਚਾਰਧਾਰਾ ਨੂੰ ਅਪਣਾ ਕੇ ਲੋਕਾਂ ਵਿਚ ਵੰਡੀਆਂ ਪਾ ਕੇ ਸਮਾਜ ਨੂੰ ਤੋੜ ਰਹੇ ਹਨ, ਜੋ ਦੇਸ਼ ਲਈ ਬਹੁਤ ਹੀ ਘਾਤਕ ਸਿੱਧ ਹੋਵੇਗਾ।
-ਸੁਖਦੇਵ ਸਲੇਮਪੁਰੀ
09780620233
28 ਜਨਵਰੀ, 2022.

ਹਰੜ ਦੇ ਦਰੱਖਤ ਹੇਠੋਂ ਸੁੱਕੇ ਪੱਤਿਆਂ ਨੂੰ ਸੰਭਰਦਿਆਂ ਇੱਕ ਨਿੱਕਾ ਜਿਹਾ ਚਿੱਟੇ ਰੰਗ ਦਾ ਆਂਡਾ ਬਹੁਕਰ ਨਾਲ ਦੂਰ ਜਾਹ ਰੁੜਿਆ ... ।
ਹਾਏ ਰੱਬਾ ! ਕਹਿ ਕੇ ਉਸ ਆੰਡੇ ਨੂੰ ਗੌਹੁ ਨਾਲ ਵੇਖਿਆ ਤੇ ਵਾਹਿਗੁਰੂ ਦਾ ਲੱਖ ਸ਼ੁਕਰ ਕੀਤਾ ਕੇ ਟੁੱਟਣੋਂ ਬਚ ਗਿਆ . .. !!
ਹਰੜ ਦੇ ਸੰਘਣੇ ਪੱਤਿਆਂ ਵਿੱਚ ਉਤਾਂਹ ਨੂੰ ਨਿਗਾਹ ਮਾਰੀ ਤਾਂ ਇੱਕ ਮੋਟੇ ਜਿਹੇ ਡੱਕਿਆਂ ਦਾ ਖਿੱਲਰਿਆ ਜਿਹਾ ਆਲ੍ਹਣਾ ਵੇਖਿਆ ... ਉਸ ਆਂਡੇ ਨੂੰ ਚੁੱਕ ਕੇ ਉਸ ਆਲਣੇ ਵਿੱਚ ਰੱਖਣ ਦੀ ਕੋਸ਼ਿਸ਼ ਕੀਤੀ ਤਾਂ ਉਸ ਆਲ੍ਹਣੇ ਵਿੱਚ  ਹੋਰ ਆਂਡਾ ਦਿਸ ਗਿਆ ... ਨਿੱਕੀ ਜਿਹੀ ਕਾਲੀ ਚੁੰਝ ਵਾਲੀ ਚਿੜੀ , ਪਤਾ ਨਹੀਂ ਕਿੱਥੋਂ  ਆ ਟਪਕੀ ਤੇ ਆਵਦੀ ਸੁੰਦਰ ਮਨ ਨੂੰ ਮੋਹਣ ਵਾਲੀ ਆਵਾਜ਼ ਕੱਢਣ ਲੱਗੀ .. ਆਸੇ ਪਾਸੇ ਉੱਡਦੀ ਅਖੀਰ ਇੱਕ ਟਾਹਣੀ ਤੇ ਚੁੱਪ ਕਰ ਬੈਠ ਗਈ ... ਸ਼ਾਇਦ
ਉਸ ਨੇ ਹਮਦਰਦੀ ਨੂੰ ਸਮਝ ਲਿਆ ਜਾਂ ਬੇਵੱਸ ਚੁੱਪ ਹੋ ਗਈ ...ਮੈਂ ਉਹ ਆਂਡਾ ਵਿਰਲੇ ਜਿਹੇ ਡੱਕਿਆਂ ਵਿੱਚ ਮਸਾਂ ਟਿਕਦਾ ਕੀਤਾ .. ।
ਚਿੜੀ ਤੇ ਆਂਡਿਆਂ ਵਿਚਕਾਰ ਜੋ ਮੈਂ ਮਹਿਸੂਸ ਕੀਤਾ... ਉੱਥੇ ਉਸ ਅਕਾਲ ਪੁਰਖ ਦੀ ਰਚਨਾ ਅਤੇ ਅਜੀਬ ਵਰਤਾਰਾ ..,ਕਿਸੇ ਅਦਿੱਖ ਸ਼ਕਤੀ ਦਾ ਸਹਾਰਾ ਪ੍ਰਤੱਖ ਪ੍ਰਤੀਤ ਹੋਇਆ ... ।
ਦਰੱਖਤਾਂ ਦੇ ਪੱਤਿਆਂ ਦੀ ਛੱਤ ਹੇਠ ਮੀਂਹ ,ਝੱਖੜ ,ਠੰਡ , ਗਰਮੀ ਹਨੇਰੀ ਤੇ ਬੇੁਜ਼ਾਬਾਨੇ  ਪੰਛੀ ਕਿੰਝ ਬੱਚੇ  ਕੱਢਦੇ ਹਨ , ਪਾਲਦੇ ਹਨ , ਭੋਜਨ ਦੀ ਤਲਾ਼ਸ਼ ਕਰਦੇ ਹਨ ਤੇ ਜਿੰਦਾ ਰਹਿੰਦੇ ਹਨ....ਖਿਆਲੀ ਸਵਾਲ ਬਹੁਤ ਆਣ ਖੜੋਏ ...??
 ਸਾਡੇ ਕੋਲ ਅਨੇਕਾਂ ਸਹੂਲਤਾਂ ਖਾਣ-ਪੀਣ .. ਪਦਾਰਥ ਸਾਧਨ ਤੇ ਕੁਦਰਤੀ ਆਫਤਾਂ ਦਾ ਮੁਕਾਬਲਾ ਕਰਨ ਲਈ ਹਸਪਤਾਲ ,ਦਵਾਈਆਂ , ਵਹੀਕਲ ਪਤਾ ਨਹੀਂ ਕੀ ਕੁਝ ਹੈ ਪਰ ਅਸੀਂ ਫਿਰ ਵੀ ਉਸ ਅਕਾਲ ਪੁਰਖ ਦੀ ਰਜ਼ਾ  ਤੇ ਨਾਖੁਸ਼ ਭਟਕਣਾ ਵਾਲਾ ਜੀਵਨ ਬਤੀਤ ਕਰ ਰਹੇ ਹੈ... ।
ਮਨੁੱਖ ਦੀ ਪਦਾਰਥਾਂ ਦੀ ਦੌੜ ਨੇ ਸ਼ੈਤਾਨੀ ਆਤਮਾ ਦਾ ਰੂਪ ਧਾਰਨ ਕਰ ਲਿਆ ਹੈ ਤੇ ਦਿਨ ਰਾਤ ਬੇਚੈਨ ਹਿੱਲ੍ਹੇ ਹੋਏ ਦਿਮਾਗ ਵਾਲਿਆਂ ਵਾਂਗ ਭੱਜਿਆ ਜਾ ਰਿਹਾ ਹੈ ਅਤੇ ਦੂਜੇ ਪਾਸੇ ਉਹਨਾਂ ਬੇਜੁਬਾਨਿਆਂ , ਜੀਵ ਪਰਿੰਦਿਆ ਕੋਲ ਸਕੂਨ ਹੀ ਸਕੂਨ ਹੈ  .. ਉਸ ਸਿਰਜਹਾਰ ਦੇ ਭੈਅ ਵਿੱਚ ਹਨ ...ਸ਼ਾਤੀ ਵਿੱਚ ਰਹਿਕੇ ਹੱਦਾਂ ਸਰਹੱਦਾਂ ਤੋਂ ਬੇਪ੍ਰਵਾਹ ਮੌਜ ਆਨੰਦ ਵਿੱਚ ਹਨ ..!
ਸਾਰੀ ਕੁਦਰਤ ਉੱਤੇ ਮਨੁੱਖ ਨੇ ਕਬਜ਼ਾ ਕਰ ਖਿਲਵਾੜ ਕਰਨਾ ਸਿੱਖ ਲਿਆ ਹੈ ...ਹੋਰਜੀਵਾਂ  ਦੇ ਰੈਣ ਬਸੇਰੇ ਨੂੰ ਆਪਣੇ ਮਤਲਬ ਲਈ ਖਤਮ ਕਰਦਾ ਜਾ ਰਿਹਾ ਹੈ ..,ਜਦੋਂ ਕੇ ਉਸ ਸਿਰਜਣਹਾਰ ਨੇ ਇਹਨਾਂ ਨੂੰ ਵੀ ਬਰਾਬਰ ਦੇ ਹੱਕਦਾਰ ਬਣਾਇਆ ਹੈ ...।
ਹੋ ਸਕਦਾ ਹੈ , ਸਾਡੀ ਆਤਮਾ ਨੇ ਵੀ ਕਦੇ ਇਹਨਾਂ ਆਲ੍ਹਣਿਆਂ ਵਿੱਚ ਜੀਵਨ ਬਸਰ ਕੀਤਾ ਹੋਵੇ ਜਾਂ ਅਗਾੰਹ ਦੀ ਤਿਆਰੀ ਹੋਵੇ ਰੱਬ ਜਾਣਦਾ ਹੈ , ਪਰ .. ਅਸੀਂ ਮਖਮਲੀ ਪੁਸ਼ਾਕਾਂ ਵਾਲੇ , ਚਤੁਰ ਸਿਆਣੇ ਉਸ ਕਾਦਰ ਦੀ ਕੁਦਰਤ ਮੂਹਰੇ ਬਹੁਤ ਛੋਟੇ ਤੇ ਨਾ-ਸ਼ੁਕਰੇ ਲੱਗੇ ...ਜਿਹੜੇ ਉਸ ਸਿਰਜਣਹਾਰ  ਨੂੰ ਸਮਝ ਨਹੀਂ ਸਕੇ ਅਤੇ ਖੁਦ ਰੱਬ ਬਣ ਬੈਠੇ ਹਾਂ ....!!
 ਸਭ ਦਾ ਪਾਲਣਹਾਰ ਉਹ ਸਰਬ ਅਕਾਲ ਪੁਰਖ ਹੈ .. ਪਰ ਅਸੀਂ ਬੇਵਜ੍ਹਾ ਹੀ ਭਟਕਣਾ ਵਿੱਚ ਫਸੇ ਹੋਏ ਹਾਂ ...।
ਮਨ ਇਹੀ ਕਾਮਨਾ ਕਰਦਾ ਹੈ , ਐ  ਰੱਬਾ !
ਕਿਤ੍ਹੇ ਮਨੁੱਖ ਨੂੰ ਵੀ ਇਹਨਾਂ ਬੇਜ਼ੁਬਾਨ ਧਰਤੀ ਦੇ ਹੱਕਦਾਰ ਜਾਨਵਰਾਂ  ਪੰਛੀਆਂ ਜਿੰਨਾਂ ਸਬਰ ਸਿਦਕ ਦੇ.. ਅਸੀਂ ਵੀ ਇਹਨਾਂ ਵਾਂਗ ਸ਼ਾਤ ਚਿੱਤ ਰਹਿ  ਕੇ ਜੀਵਨ ਬਸਰ ਕਰਕੇ ਤੁਰਦੇ ਬਣੀਏ ...ਉਹਨਾਂ ਦੇ ਰਹਿਣ ਲਈ ਵੀ ਬਣਦਾ ਹੱਕ ਛੱਡੀਏ

-- ਹਰਨਰਾਇਣ ਸਿੰਘ ਮੱਲੇਆਣਾ

ਗਿਆਨੀ,ਪੰਡਤ, ਮੌਲਵੀ ,ਇਨਸਾਨ - ਕੀ ਇਹ ਸਾਰੇ ਇਕ ਰੂਪ ਹਨ ਜਾਂ ਚਾਰ ਵੱਖਰੇ ਜਾਂ ਇਕ ਇਨਸਾਨ ਹੀ ਵੱਖਰਾ ਹੈ , ਸਗੋਂ ਕਿਸੇ ਵੱਖਰੇ ਮੁੱਦੇ ਦੀ ਗੱਲ ਤੇ ਪਦਾਰਥਵਾਦੀ ਯੁੱਗ ਵਿੱਚ ਗਿਆਨੀ , ਪੰਡਤ , ਮੌਲਵੀ ਤਿੰਨੋਂ ਇੱਕੋ ਰੂਪ ਹਨ । ਗਿਆਨ ਬਹਾਨੇ ਵੱਖਰੇ ਰੰਗ ਬਦਲ ਕੇ ਸਮਾਜ ਨਾਲ ਚੰਗੇ ਜਾਂ ਮਾੜੇ ਦਾ ਬਦਲ ਕਰਨ ਦੇ ਜ਼ਿੰਮੇਵਾਰ ਹਨ ਅਤੇ ਇਸ ਦਾ ਅਸਰ ਇਨਸਾਨ ਦੀ ਹੀ ਜ਼ਿੰਦਗੀ ਤੇ ਪਾਉਂਦੇ , ਕਈ ਹਾਲਤਾਂ ਵਿੱਚ ਕਹਿਰ ਭੀ ਢਾਉਣ ਦੇ ਜੁਮੇਵਾਰ ਹੋ ਨਿਕਲਦੇ ਹਨ । ਜੇ ਸਿਰਫ਼ ਪੰਡਤ ਦੀ ਗੱਲ ਲੈ ਲਈਏ ਤਾਂ ਹਿੰਦੁਸਤਾਨ ਵਿੱਚ ਬਦੇਸੀ ਜੜ ਲੱਗਣ ਸਮੇਂ ,ਪੰਡਤ ਹੀ ਸੀ ਜਿਸ ਨੇ ਪਹਿਲਾਂ ਗੁਲਾਮੀ ਨੂੰ ਗਲੇ ਲਾਇਆ ਤੇ ਰਾਹ ਪੱਧਰਾ ਕੀਤਾ । ਲਾਹੌਰੀ ਰਾਮ ਨੇ ਇਸੇ ਆਧਾਰ ਆਪਣੀ ਪੁਸਤਕ ਵਿੱਚ ਲਿਖਿਆ ਹੈ , ਕਿ ਜਦ ਉੱਤਰ , ਪੱਛਮ ਤੋਂ ਹਮਲਾਵਰ ਹਿੰਦੁਸਤਾਨ ਦੀ ਧਰਤੀ ਤੇ ਹਾਵੀ ਹੋਏ ਤਾਂ ਪੰਡਤ ਅੱਗੇ ਹੋ ਕੇ ਉਨ੍ਹਾਂ ਦਾ ਦਰਬਾਰੀ ਬਣਿਆ। ਅੰਗਰੇਜ਼ ਤੇ ਪੁਰਤਗੇਜ਼ੀ ਆਮਦ ਸਮੇਂ ਵੀ ਇਸ ਪੰਡਤ ਨੇ ਆਪਣੇ ਪਹਿਰਾਵੇ ਨੂੰ ਤਿਲਾਂਜਲੀ ਦੇ ਕੇ ਅੰਗਰੇਜ਼ੀ ਚੱਪਲ ਤੇ ਪਤਲੂਨ ਨੂੰ ਕਬੂਲ ਕੀਤਾ ਸੀ । ਮੌਜੂਦਾ ਪੰਜਾਬ ਦੇ ਚੋਣ ਘੋਲ ਵਿੱਚ ਹਾਲਾਤ ਕੀ ਹਨ ਨਜ਼ਰ ਮਾਰੋ ਤਾਂ ਕਿਵੇਂ ਇਕ ਨਾਮੀ ਪਾਰਟੀ ਨੇ   ਸਿਖਾਂ ਅਤੇ ਪੰਜਾਬੀਆਂ ਨੂੰ ਮੁੱਖ ਮੰਤਰੀ ਦਾ ਚਿਹਰਾ ਦਿਖਾਇਆ ਹੈ ਤਾਂ ਇਕ ਪੇਂਡੂ ਬੋਲੀ ਦਾ ਗੀਤ ਸੁਣੀਦਾ ਸੀ ਕਿ “ਪੰਡਤ ਜੀ ਮੇਰੇ ਮਰਨ ਕੇ ਬਾਅਦ , ਇਕ ਬੋਤਲ ਨਾਲ ਟਿਕਾ ਦੇਨਾ “ ।  ਕੀ ਇਹ ਚਿਹਰਾ ਕਿੱਥੋਂ ਤੱਕ ਜਾਇਜ਼ ਹੈ ? ਕਿ ਬੰਦੇ ਨੂੰ ਆਪਣੇ ਆਪ ਨੂ ਸਿੱਖ ਅਖਵਾਉਣ ਤੋਂ ਭੀ ਸ਼ਰਮ ਆਉਦੀ ਹੋਵੇ ।1947 ਦਾ ਸਮਾਂ ਪੰਜਾਬੀ ਤੇ ਸਿਖਾਂ ਦਾ ਭਿਆਨਕ ਉਜਾੜੇ ਦਾ ਸਮਾਂ ਜਿਸ ਵਿੱਚ ਦੱਸ ਲੱਖ ਤੋਂ ਵੱਧ ਕਤਲੋਗਾਰਤ , ਜਾਨ ਮਾਲ ਦਾ ਇਹ ਉਜਾੜਾ ਹੋਇਆ । ਇਨਸਾਨ ਨੇ ਹੀ ਭੁਗਤਿਆ ਜਿਵੇਂ ਕੁਦਰਤ ਨੇ ਉਸ ਲਈ ਕੁਝ ਦੁਖਾਂਤ ਹਮੇਸ਼ਾ ਰਾਖਵੇ਼ ਹੀ ਰੱਖ ਛੱਡੇ ਹੁੰਦੇ ਹਨ । ਦੇਸ਼ ਦੀ ਅਸਹਿ ਵੰਡ ਤੋਂ ਬਾਅਦ ਹਰ ਕਸ਼ਟ ਵਿੱਚੋਂ ਵਿਚਰ ਕੇ ਲੋਕ ਆਪਣੀ ਨਵੀਂ ਕਿਸਮਤ ਨੂੰ ਘੜਨ ਵਿੱਚ ਰੁੱਝ ਗਏ।
ਸਿੱਖ ਕੌਮ ਨੇ ਆਪਣੇ ਬਚੇਖੁਚੇ ਹੱਥਾਂ ਨਾਲ ਭਾਣਾ ਮੰਨਦਿਆਂ ਨਵੇਂ ਕਦਮਾਂ ਨੂੰ ਜ਼ਿੰਦਗੀ ਦਾ ਰਾਹ ਦੱਸਣਾ ਸੁਰੂ ਕੀਤਾ । ਪੰਜਾਬੀ ਬੋਲੀ ,  ਸੱਭਿਆਚਾਰ , ਸਿੱਖੀ ਪਹਿਚਾਣ ਦੇ ਬਚਾ ਲਈ ਕਦਮ ਪੁੱਟੇ । ਜਿਨਾਂ ਵਿੱਚੋਂ ਪੰਜਾਬੀ ਸੂਬਾ ਲਹਿਰ ਨੇ ਜਨਮ ਲਿਆ । ਇਤਿਹਾਸ ਗਵਾਹ ਹੈ ਕਿ ਸਮੇਂ ਦੀਆਂ ਕਾਂਗਰਸ ਸਰਕਾਰਾਂ ਦੀਆਂ ਕਰੋਪੀਆਂ ਕਾਰਨ ਕਈ ਕੁਝ ਅਧੂਰਾ ਅਜੇ ਭੀ ਹੈ । ਪਰ ਜਜੱਦੋ-ਜਹਿਦ ਤੇ ਕੁਰਬਾਨੀਆਂ ਕਰਕੇ ਜੋ ਹਾਸਲ ਹੋਇਆ , ਉਸ ਨੂੰ ਅਸੀਂ ਪੰਜਾਬੀ ਬੋਲਦੇ ਇਲਾਕਿਆਂ ਦਾ ਖ਼ਿੱਤਾ ਕਬੂਲ ਕਰਕੇ ਮਾਣ ਨਾਲ ਮੰਨ ਰਹੇ ਹਾਂ । ਅਕਾਲੀ ਸੱਤਾ ਵਿੱਚ ਆਉਣ , ਕਾਂਗਰਸੀ ਆਉਣ , ਭਾਵੇ ਕੋਈ ਹੋਰ , ਪਰ ਪੰਜਾਬ ਦੇ ਲੋਕ ਕਿਸੇ ਹੱਦ ਤੱਕ ਤਸੱਲੀ ਰੱਖਦੇ ਰਹੇ ਕਿ ਜਾਣੇ ਪਹਿਚਾਣੇ ਪੰਜਾਬੀ ਤੇ ਸਿੱਖ ਚਿਹਰੇ ਹੀ ਤਾਂ ਹੈਨ । ਪਰ ਜੋ ਆਮ ਪਾਰਟੀ ਨੇ ਭਗਵੰਤ ਮਾਨ ਦੇ ਚਿਹਰੇ ਦੀ ਚੀਫ ਮਨਿਸਟਰ ਦੇ ਚਿਹਰੇ ਪੱਖੋਂ ਘੁੰਡ ਚੁਕਾਈ ਕੀਤੀ ਹੈ , ਕੀ ਇਹ ਦਿੱਲੀ ਦੇ ਪੰਡਤ ਸ਼੍ਰੀ ਕੇਜਰੀਵਾਲ ਵੱਲੋਂ ਇਕ ਭੱਦਾ ਮਜ਼ਾਕ ਹੈ ? ਜਾਂ ਪੰਜਾਬ , ਸਿੱਖ ਧਰਮ ਅਤੇ ਸੱਭਿਆਚਾਰ ਤੇ ਇਕ ਮਖੌਲ ਮੰਨ ਲਈਏ ? ਕੀ ਸ੍ਰੀ ਮਾਨ ਜੀ ਜੋ ਹਮੇਸ਼ਾ ਆਪਣੇ ਨਾਮ ਵਿੱਚੋਂ “ਸਿੰਘ” ਨਾਮ ਨੂੰ ਨਹੀਂ ਮੰਨਦੇ , ਅਜਿਹਾ ਖੁਦ ਨੂੰ “ਸਿੰਘ” ਅਖਵਾਉਣਾ , ਜੇ ਉਹ ਖੁਦ ਦੀ ਹਾਨੀ ਸਮਜਦੇ ਹਨ , ਤਾਂ ਪੰਜਾਬ ਦੇ ਖ਼ਿੱਤੇ ਵਿੱਚ ਉਹ  ਅਜਿਹਾ ਸੀ . ਐਮ. ਦਾ ਚਿਹਰਾ ਕਿਉਂ ਤੇ ਕਿਵੇਂ ਕਬੂਲ ਹੋਵੇਗਾ ?ਅਸੀਂ ਅਜਿਹਾ ਕਬੂਲ ਕਰੀਏ ਭੀ ਕਿਉਂ ? ਵੈਸੇ ਵੀ ਅਸੀਂ ਕਿਸੇ ਹੋਰ ਸ਼ਰਾਬ ਦੀ ਭੱਠੀ ਵਿੱਚ ਵਾਧਾ ਕਿਉਂ ਕਰੀਏ ? ਸ਼੍ਰੀ ਕੇਜਰੀਵਾਲ ਜੀ ਤਾਂ ਇਹ ਵੀ ਕਹਿ ਚੁੱਕੇ ਹਨ ਕਿ ਜੇਕਰ ਪੰਜਾਬ ਵਿੱਚ ਆਮ ਪਾਰਟੀ ਦੀ ਸਰਕਾਰ ਬਣਦੀ ਹੈ , ਤਦ ਉਹ ਗਰਬਚਨੇ ਨਿਰੰਕਾਰੀ ਦੇ ਪੁੱਤਰ ਹਰਦੇਵ ਦਾ ਉੱਚਾ ਬੁੱਤ ਖੜਾ ਕਰਨਗੇ ਅਤੇ ਅਨੁਮਾਨ ਤੌਰ ਤੇ ਕਹਿ ਚੁੱਕੇ ਹਨ ਕਿ ਉਹ ਬੁੱਤ ਤੇ ਇਕ ਸੌ ਕਰੋੜ ਰੁਪਿਆ ਖਰਚ ਕਰਨਗੇ ? ਕੀ ਉਹ 1978 ਦੇ ਸਾਕੇ ਨੂੰ ਯਾਦ ਕਰਵਾ ਰਹੇ ਹਨ ਜਾਂ ਅਜਿਹੀ ਕਿਸੇ ਹੋਰ ਕਰੋਪੀ ਨੂੰ ਸਿੱਖਾਂ , ਪੰਜਾਬੀਆਂ ਦੇ ਸਿਰ ਫਿਰ ਕਿਸੇ ਆਫ਼ਤ ਦੇ ਰੂਪ ਵਿੱਚ ਮੜਨ ਦੇ ਇੱਛਕ ਹਨ । ਪੰਡਤ ਜੀ ਇਹ ਕੈਂਸੀ ਨੇਤਾਗਿਰੀ ਹੈ , ਜਾਂ ਪੰਜਾਬੀਆ ਦੇ ਮਾਣ ਸਨਮਾਨ , ਸੱਭਿਆਚਾਰ ਤੇ ਗਿਣੀ ਮਿਥੀ ਸਾਜ਼ਿਸ਼ ਦਾ ਆ ਰਿਹਾ ਹਮਲਾ ਹੈ । ਕੀ ਤੁਸੀਂ ਸਾਨੂੰ ਬੁੱਤ-ਪੂਜ ਸਮਝਦੇ ਹੋ , ਜਾਂ ਦੱਸਣਾ ਚਾਹੁੰਦੇ ਹੋ ? ਪੰਜਾਬ ਸਿਰਫ਼ ਇਨਸਾਨੀਅਤ ਦੀ ਗਵਾਹੀ ਭਰਦਾ ਹੈ , ਚੰਗੇ ਇਨਸਾਨ ਦੇ ਤੌਰ ਤੇ ਅੱਗੇ ਆਓ । ਇਹੀ ਕਾਰਨ ਹੈ ਕਿ ਇਕ ਚੰਗੇ ਇਨਸਾਨ ਦੀ ਹੀ ਅਸੀਂ ਪਛਾਣ ਕਰਦੇ ਹਾਂ । ਸਾਡਾ ਕਹਿਣਾ ਭੀ ਸਹੀ ਹੈ ਕਿ ਇਨਸਾਨ ਹੀ ਚੰਗਾ  ਹੈ ਅਤੇ ਉਸ ਦੇ ਵਖਰੇਪਨ ਦੀ ਹੋਂਦ ਤੇ ਅਸਲੀਅਤ ਭੀ ਇਹੀ ਹੈ । —- ਪਰਮਿੰਦਰ ਸਿੰਘ ਬਲ , ਪ੍ਰਧਾਨ ਸਿੱਖ ਫੈਡਰੇਸ਼ਨ ਯੂ ਕੇ ।