ਯੁ.ਕੇ.

ਮਾਨਚੈਸਟਰ, ਜੂਨ 2020-(ਅਮਨਜੀਤ ਸਿੰਘ ਖਹਿਰਾ/ਗਿਆਨੀ ਅਮਰੀਕ ਸਿੰਘ ਰਾਠੌਰ )-

ਪੰਜਾਬ ਦੀ ਰੀਤਾ ਜੌਹਲ ਪੰਜਾਬ ਦੀ ਹੀ ਨਹੀਂ ਸਗੋਂ ਦੇਸ਼ ਦੀ ਪਹਿਲੀ ਮੁਟਿਆਰ ਹੈ, ਜਿਸ ਦਾ ਪਤੀ ਫੀਫਾ ਵਰਲਡ ਕੱਪ ਖੇਡ ਚੁੱਕਾ ਹੈ। ਰੀਤਾ ਜੌਹਲ ਦੇ ਪਤੀ ਦਾ ਨਾਂ ਰਿਆਦ ਮਹਰੇਜ਼ ਹੈ। ਉਹ ਅਲਜੀਰੀਅਨ ਮੂਲ ਦਾ ਕੌਮਾਂਤਰੀ ਫੁੱਟਬਾਲਰ ਹੈ। ਪੰਜਾਬ ਦੇ ਜੱਟ ਪਰਿਵਾਰ ਦੀ ਧੀ ਰੀਤਾ ਜੌਹਲ ਦਾ ਪੂਰਾ ਨਾਂ ਰਾਜਿੰਦਰ ਕੌਰ ਰੀਤਾ ਹੈ ਪਰ ਅਲਜੀਰੀਅਨ ਨੈਸ਼ਨਲ ਸਾਕਰ ਟੀਮ ਦੇ ਅਟੈਕਿੰਗ ਵਿੰਗਰ ਰਿਆਦ ਮਹਰੇਜ਼ ਦੀ ਜੀਵਨ ਸਾਥਣ ਨਾਮਜ਼ਦ ਹੋਣ ਉਪਰੰਤ ਉਸ ਨੇ ਆਪਣਾ ਨਾਂ ਰੀਤਾ ਜੇਨੇਤ ਮਹਰੇਜ਼ ਜੌਹਲ ਰੱਖ ਲਿਆ ਹੈ। 27 ਸਾਲਾ ਰੀਤਾ ਜੌਹਲ ਦਾ ਜਨਮ ਇੰਗਲੈਂਡ ਦੇ ਸਿਟੀ ਲੈਸਟਰ 'ਚ ਅਗਸਤ-2, 1992 'ਚ ਪੰਜਾਬੀ ਜੱਟ ਪਰਿਵਾਰ 'ਚ ਹੋਇਆ। ਪੋ੍ਫੈਸ਼ਨਲ ਮਾਡਲ ਹੋਣ ਦੇ ਬਾਵਜੂਦ ਰੀਤਾ ਜੌਹਲ ਫੁੱਟਬਾਲ ਖੇਡ ਦੀ ਵੱਡੀ ਪ੍ਰਸ਼ੰਸਕ ਹੈ। ਇਸੇ ਦਿਲਚਸਪੀ ਕਰਕੇ ਰੀਤਾ ਜੌਹਲ ਇੰਗਲਿਸ਼ ਪ੍ਰਰੀਮੀਅਰ ਸਾਕਰ ਲੀਗ ਦਾ ਮੈਚ ਵੇਖਣ ਲੈਸਟਰ ਗਈ ਸੀ। ਉਦੋਂ ਰਿਆਦ ਮਹਰੇਜ਼ ਲੈਸਟਰ ਫੁੱਟਬਾਲ ਕਲੱਬ ਦੀ ਟੀਮ ਦਾ ਪੇਸ਼ੇਵਰ ਖਿਡਾਰੀ ਸੀ ਪਰ ਹੁਣ ਰਿਆਦ ਮਹਰੇਜ਼ ਇੰਗਲੈਂਡ ਦੇ ਮੌਜੂਦਾ ਕਲੱਬ ਮਾਨਚੈਸਟਰ ਸਿਟੀ ਐੱਫਸੀ ਵੱਲੋਂ ਇੰਗਲਿਸ਼ ਫੁੱਟਬਾਲ ਲੀਗ ਖੇਡਦਾ ਹੈ। ਲੈਫਟ ਫਾਰਵਰਡ ਮਹਰੇਜ਼ ਨੇ ਮਾਨਚੈਸਟਰ ਸਿਟੀ ਨਾਲ 2018 'ਚ ਵੀਹ ਹਜ਼ਾਰ ਪੌਂਡ ਹਫਤਾਵਾਰੀ ਸੈਲਰੀ ਉਗਰਾਹੁਣ ਦਾ ਕੰਟਰੈਕਟ ਸਾਈਨ ਕੀਤਾ ਹੈ। ਮਹਰੇਜ਼ ਆਪਣੇ ਚਹੇਤੇ ਸਾਕਰ ਕਲੱਬ ਸਿਟੀ ਮਾਨਚੈਸਟਰ ਦੀ ਟੀਮ ਨਾਲ 50 ਮੈਚਾਂ 'ਚ 14 ਗੋਲ ਸਕੋਰ ਕਰਨ ਦਾ ਕਾਰਨਾਮਾ ਕਰ ਚੁੱਕਾ ਹੈ। 2014 'ਚ ਅਲਜੀਰੀਆ ਦੀ ਨੈਸ਼ਨਲ ਟੀਮ 'ਚ ਐਂਟਰੀ ਕਰਨ ਵਾਲੇ ਰਿਆਦ ਮਹਰੇਜ਼ ਨੂੰ ਕਰੀਅਰ ਦਾ ਪਹਿਲਾ ਕੌਮਾਂਤਰੀ ਮੈਚ 31 ਮਈ, 2014 'ਚ ਅਰਮੀਨੀਆ ਦੀ ਟੀਮ ਨਾਲ ਖੇਡਣ ਦਾ ਮੌਕਾ ਨਸੀਬ ਹੋਇਆ। ਬ੍ਰਾਜ਼ੀਲ-2014 ਦਾ ਫੀਫਾ ਫੁਟੱਬਾਲ ਕੱਪ ਖੇਡਣ ਵਾਲੇ ਰਿਆਦ ਮਹਰੇਜ਼ ਨੂੰ 2015 ਤੇ 2016 'ਚ 'ਅਲਜੀਰੀਅਨ ਸਾਕਰ ਪਲੇਅਰ ਆਫ ਦਿ ਯੀਅਰ' ਨਾਮਜ਼ਦ ਕੀਤਾ ਗਿਆ। 2016 'ਚ 'ਅਫਰੀਕਨ ਪਲੇਅਰ ਆਫ ਦਿ ਯੀਅਰ' ਐਵਾਰਡ ਹਾਸਲ ਰਿਆਦ ਮਹਰੇਜ਼ ਕੌਮੀ ਟੀਮ ਵੱਲੋਂ 57 ਕੌਮਾਂਤਰੀ ਮੈਚ ਖੇਡਣ ਸਦਕਾ 15 ਗੋਲ ਆਪਣੇ ਖਾਤੇ 'ਚ ਜਮ੍ਹਾਂ ਕਰ ਚੁੱਕਾ ਹੈ।

ਕੌਮਾਂਤਰੀ ਫੁੱਟਬਾਲਰ ਰਿਆਦ ਮਹਰੇਜ਼ ਨਾਲ ਰੀਤਾ ਜੌਹਲ ਦੀ ਪਹਿਲੀ ਮਿਲਣੀ ਵੀ ਲੈਸਟਰ 'ਚ ਇੰਗਲਿਸ਼ ਪ੍ਰੀਮੀਅਰ ਲੀਗ ਦੇ ਮੈਚ ਦੌਰਾਨ ਹੋਈ ਸੀ। ਇਸੇ ਪਲੇਠੀ ਮੁਲਕਾਤ 'ਚ ਰੀਤਾ ਜੌਹਲ ਲੈਸਟਰ ਫੁੱਟਬਾਲ ਕਲੱਬ ਦੀ ਟੀਮ ਵਲੋਂ ਖੇਡਣ ਵਾਲੇ ਮਹਰੇਜ਼ ਰਿਆਦ ਨੂੰ ਆਪਣਾ ਦਿਲ ਦੇ ਬੈਠੀ। ਪੰਜਾਬਣ ਕੁੜੀ ਰੀਤਾ ਜੌਹਲ ਇੰਗਲੈਂਡ 'ਚ ਪੇਸ਼ੇਵਰ ਮਾਡਲ ਹੈ। ਰਿਆਦ ਅਲਜੀਰੀਆ ਦੀ ਕੌਮੀ ਫੁੱਟਬਾਲ ਟੀਮ ਦੀ 2014 'ਚ ਬ੍ਰਾਜ਼ੀਲ 'ਚ ਖੇਡੇ ਗਏ ਵਿਸ਼ਵ ਫੁੱਟਬਾਲ ਕੱਪ 'ਚ ਨੁਮਾਇੰਦਗੀ ਕਰ ਚੁੱਕਾ ਹੈ। ਅਲਜੀਰੀਆ ਦੀ ਸਾਕਰ ਟੀਮ ਦੇ ਮੌਜੂਦਾ ਕਪਤਾਨ ਰਿਆਦ ਮਹਰੇਜ਼ ਦਾ ਜਨਮ 27 ਫਰਵਰੀ, 1991 'ਚ ਫਰਾਂਸ ਦੇ ਸ਼ਹਿਰ ਸਰਸੇਲਜ਼ 'ਚ ਅਲਜੀਰੀਆ ਦੇ ਮੁਸਲਿਮ ਪਰਿਵਾਰ 'ਚ ਹੋਇਆ। ਰਿਆਦ ਮਹਰੇਜ਼ ਦੀਆਂ ਦੋ ਭੈਣਾਂ ਡੋਨੇਜ਼ ਤੇ ਲੇਨਜ਼ ਹਨ ਜੋ ਰੀਤਾ ਮਹਰੇਜ਼ ਨੂੰ ਬਹੁਤ ਪਿਆਰ ਕਰਦੀਆਂ ਹਨ। ਰਿਆਦ ਮਹਰੇਜ਼ ਦੋ ਲੜਕੀਆਂ ਦਾ ਪਿਤਾ ਬਣ ਚੁੱਕਾ ਹੈ। ਰੀਤਾ ਦੋਵੇਂ ਲੜਕੀਆਂ ਨਾਲ ਅਮਰੀਕਾ ਦੇ ਸ਼ਹਿਰ ਨਿਊਯਾਰਕ 'ਚ ਰਹਿੰਦੀ ਹੈ।

ਲੰਡਨ, ਜੂਨ 2020-( ਗਿਆਨੀ ਰਵਿਦਾਰਪਾਲ ਸਿੰਘ )-  

ਬਰਤਾਨੀਆ ਦੇ ਸਿੱਖ ਸੰਸਦ ਮੈਂਬਰ ਤਨਮਨਜੀਤ ਸਿੰਘ ਢੇਸੀ ਨੇ ਗੁਰਦੁਆਰਾ ਸ੍ਰੀ ਗੁਰੂ ਸਿੰਘ ਸਭਾ ਸਾਊਥਾਲ ਵਾਲੀ ਯੂਰਪ ਦੀ ਮਹੱਤਵਪੂਰਨ ਸੜਕ ਦਾ ਨਾਂਅ ਹੈਨਰੀ ਹੈਵਲਕ ਰੋਡ ਤੋਂ ਬਦਲ ਕੇ 'ਗੁਰੂ ਨਾਨਕ ਰੋਡ' ਰੱਖਣ ਦੀ ਤਜ਼ਵੀਜ਼ ਦਾ ਸਵਾਗਤ ਕਰਦਿਆਂ ਲੇਬਰ ਪਾਰਟੀ ਅਤੇ ਹੋਰਨਾਂ ਦਾ ਧੰਨਵਾਦ ਕੀਤਾ ਹੈ । ਸਾਡੇ ਪ੍ਰਤੀਨਿਧ ਨਾਲ ਫੋਨ ਤੇ ਗਲਬਾਤ ਦੌਰਾਨ ਢੇਸੀ ਨੇ ਕਿਹਾ ਕਿ ਸਿੱਖ ਸੰਗਤ, ਪੰਜਾਬੀਆਂ ਅਤੇ ਹੋਰ ਗੁਰੂ ਨਾਨਕ ਨਾਮ ਲੇਵਾ ਸੰਗਤ ਦੀ ਲੰਬੇ ਸਮੇਂ ਤੋਂ ਇਹ ਮੰਗ ਸੀ ਜੋ ਗੁਰੂ ਦੀ ਕਿਰਪਾ ਨਾਲ ਪੂਰੀ ਹੋ ਜਾਵੇਗੀ । ਅਸੀਂ ਸਾਰੇ ਇਸ ਤਜਵੀਜ਼ ਦੀ ਪੁਰਜ਼ੋਰ ਸ਼ਲਾਘਾ ਕਰਦੇ ਹਾਂ।

ਮਾਨਚੈਸਟਰ, ਜੂਨ 2020 -(ਗਿਆਨੀ ਅਮਰੀਕ ਸਿੰਘ ਰਾਠੌਰ)-ਬਰਤਾਨੀਆ ਵਿਚ 8 ਜੂਨ ਤੋਂ ਵਿਦੇਸ਼ੀ ਯਾਤਰੀਆਂ ਦੇ 14 ਦਿਨ ਇਕਾਂਤਵਾਸ ਵਿਚ ਰਹਿਣ ਦੇ ਸ਼ੁਰੂ ਹੋਏ ਨਿਯਮ ਨੂੰ 29 ਜੂਨ ਨੂੰ ਖ਼ਤਮ ਕਰ ਦੇਣ ਦੀਆਂ ਚਰਚਾਵਾਂ ਹਨ । ਇਹ ਨੀਤੀ ਕੋਰੋਨਾ ਵਾਇਰਸ ਲਈ ਘੱਟ ਖ਼ਤਰੇ ਵਾਲੇ ਦੇਸ਼ਾਂ ਦੇ ਯਾਤਰੀਆਂ ਲਈ ਖਤਮ ਹੋ ਜਾਵੇਗੀ । ਯੂ.ਕੇ. ਦੀਆਂ ਹਵਾਈ ਯਾਤਰਾ ਕੰਪਨੀਆਂ ਦੇ ਮੁਖੀਆ ਨੇ ਯੂ.ਕੇ. ਦੇ ਮੰਤਰੀਆਂ ਨੂੰ ਕਾਨੂੰਨੀ ਚਣੌਤੀਆਂ ਦਿੱਤੀਆਂ ਹਨ, ਉਨ੍ਹਾਂ ਕਿਹਾ ਕਿ ਹਫ਼ਤਿਆਂ ਵਿਚ ਹੀ ਸਰਕਾਰ ਵਲੋਂ ਇਨ੍ਹਾਂ ਨੀਤੀਆਂ ਨੂੰ ਬਦਲ ਦਿੱਤਾ ਜਾਵੇਗਾ । ਵਿਦੇਸ਼ ਦਫ਼ਤਰ ਵੀ ਬਰਤਾਨਵੀ ਲੋਕਾਂ ਨੂੰ ਗ਼ੈਰ-ਜ਼ਰੂਰੀ ਯਾਤਰਾਵਾਂ ਨਾ ਕਰਨ ਦੀ ਦਿੱਤੀ ਜਾਣ ਵਾਲੀ ਆਪਣੀ ਸਲਾਹ ਜੂਨ ਦੇ ਅੰਤ ਤੱਕ ਖ਼ਤਮ ਕਰਨ 'ਤੇ ਵਿਚਾਰ ਕਰ ਰਿਹਾ ਹੈ । ਬਰਤਾਨੀਆ ਵਿਚ ਲਾਗੂ ਹੋਏ ਇਕਾਂਤਵਾਸ ਦੇ ਨਿਯਮਾਂ ਅਨੁਸਾਰ ਯੂ.ਕੇ. ਪਹੁੰਚਣ ਵਾਲਿਆਂ ਨੂੰ ਸੰਪਰਕ, ਯਾਤਰਾ ਜਾਣਕਾਰੀ ਅਤੇ ਇਕਾਂਤਵਾਸ ਵਾਲੀ ਥਾਂ ਦੀ ਜਾਣਕਾਰੀ ਵਾਲਾ ਫਾਰਮ ਭਰਨਾ ਲਾਜ਼ਮੀ ਹੈ । ਅਜਿਹਾ ਨਾ ਕਰਨ ਵਾਲ਼ਿਆਂ ਲਈ 100 ਦਾ ਜੁਰਮਾਨਾ ਅਤੇ ਨਿਯਮ ਦੀ ਉਲੰਘਣਾ ਕਰਨ ਵਾਲਿਆਂ ਲਈ 1000 ਦੇ ਜੁਰਮਾਨੇ ਦੀ ਵਿਵਸਥਾ ਕੀਤੀ ਗਈ ਹੈ ।
ਸਾਊਥੈਂਡ-ਅਧਾਰਿਤ ਚਾਰਟਰ ਏਅਰਪੋਰਟ ਜੋਟਾ ਐਵੀਏਸ਼ਨ ਦੇ ਮਾਲਕ ਸਾਈਮਨ ਡੋਲਨ ਦੇ ਵਕੀਲਾਂ ਨੇ ਵੀ ਗ੍ਰਹਿ ਮੰਤਰੀ ਪ੍ਰੀਤੀ ਪਟੇਲ ਨੂੰ ਪੱਤਰ ਲਿਖ ਕੇ ਕਿਹਾ ਕਿ ਸਰਕਾਰ ਦੇ ਵਿਗਿਆਨਕ ਮਾਹਿਰਾਂ ਨੇ ਯੋਜਨਾਵਾਂ ਦਾ ਸਮਰਥਨ ਨਹੀਂ ਕੀਤਾ । ਤੀਜੀ ਚੁਣੌਤੀ ਹੁਣ ਕਵਾਸ਼ ਕੁਆਰੰਟੀਨ ਵਲੋਂ ਦਿੱਤੀ ਗਈ ਹੈ ਜੋ 500 ਤੋਂ ਵੱਧ ਹੋਟਲਾਂ, ਸੈਰ-ਸਪਾਟਾ ਕੰਪਨੀਆਂ ਦੀ ਨੁਮਾਇੰਦਗੀ ਕਰਦੀ ਹੈ | ਇਸ ਦੇ ਬੁਲਾਰੇ ਪੌਲਚਾਰਲਸ ਨੇ ਕਿਹਾ ਹੈ ਕਿ ਸੀਨੀਅਰ ਸਰਕਾਰੀ ਸੂਤਰ ਅਨੁਸਾਰ 29 ਜੂਨ ਤੋਂ ਉਕਤ ਨੀਤੀ ਨੂੰ ਖਤਮ ਕਰ ਦਿੱਤਾ ਜਾਵੇਗਾ ਪਰ ਉਨ੍ਹਾਂ ਸਰਕਾਰ ਨੂੰ ਇਸ ਦੀ ਜਲਦੀ ਪੁਸ਼ਟੀ ਕਰਨ ਲਈ ਕਿਹਾ ਹੈ । 

ਸਾਊਥਹਾਲ/ ਲੰਡਨ , ਜੂਨ 2020-(ਗਿਆਨੀ ਰਵਿਦਾਰਪਾਲ ਸਿੰਘ)- 

ਉਸ ਸਮੇ ਦੀ ਭਾਰਤੀ ਸਰਕਾਰ ਨੇ ਜੂਨ 1984 ਨੂੰ ਸ੍ਰੀ ਅਕਾਲ ਤਖ਼ਤ ਸਾਹਿਬ 'ਤੇ ਹਮਲਾ ਕਰਕੇ ਢਹਿ-ਢੇਰੀ ਕਰ ਦਿੱਤਾ ਸੀ, ਸਿੱਖ ਰੈਫਰੈਂਸ ਲਾਇਬ੍ਰੇਰੀ ਸਮੇਤ ਵਡਮੁੱਲਾ ਇਤਿਹਾਸ ਤਬਾਹ ਕਰ ਦਿੱਤਾ ਸੀ। ਇਸ ਮੌਕੇ ਸ਼ਹੀਦ ਹੋਏ ਸੰਤ ਜਰਨੈਲ ਸਿੰਘ ਭਿੰਡਰਾਂਵਾਲਿਆਂ, ਜਨਰਲ ਸੁਬੇਗ ਸਿੰਘ, ਭਾਈ ਅਮਰੀਕ ਸਿੰਘ ਸਮੇਤ ਸੈਂਕੜੇ ਸਿੱਖਾਂ ਦੀ ਯਾਦ 'ਚ ਸ੍ਰੀ ਗੁਰੂ ਸਿੰਘ ਸਭਾ ਸਾਊਥਾਲ ਵਿਖੇ ਸ੍ਰੀ ਅਖੰਡ ਪਾਠ ਸਾਹਿਬ ਦੇ ਭੋਗ ਪਾਏ ਗਏ। ਉਪਰੰਤ ਭਾਈ ਗੁਰਪ੍ਰਤਾਪ ਸਿੰਘ ਸ੍ਰੀ ਹਜ਼ੂਰ ਸਾਹਿਬ ਵਾਲਿਆਂ ਦੇ ਜਥੇ ਨੇ ਗੁਰਬਾਣੀ ਕੀਰਤਨ ਅਤੇ ਗਿਆਨੀ ਅਨੂਪ ਸਿੰਘ ਨੇ ਕਥਾ ਵਿਚਾਰਾਂ ਰਾਹੀਂ ਨਿਹਾਲ ਕੀਤਾ। ਗੁਰਦੁਆਰਾ ਸਾਹਿਬ ਦੇ ਮੁੱਖ ਸੇਵਾਦਾਰ ਸ ਗੁਰਮੇਲ ਸਿੰਘ ਮੱਲੀ ਨੇ ਜਾਣਕਾਰੀ ਸਾਜ਼ੀ ਕਰਦੇ ਦੱਸਿਆ ਕਿ ਗੁਰੂ ਘਰ ਵਲੋਂ ਤਾਲਾਬੰਦੀ ਦੇ ਚਲਦਿਆਂ ਸਾਰੇ ਸਮਾਗਮ ਨੂੰ ਆਨਲਾਈਨ ਵਿਖਾਇਆ ਗਿਆ ਹੈ । 

ਲੰਡਨ, ਜੂਨ 2020 -( ਰਾਜੀਵ ਸਮਰਾ/ਗਿਆਨੀ ਰਾਵਿਦਾਰਪਾਲ ਸਿੰਘ)-

ਯੂ. ਕੇ. ਵਿਚ ਵਿਦੇਸ਼ ਤੋਂ ਆਉਣ ਵਾਲੇ ਹਰ ਯਾਤਰੀ ਨੂੰ 14 ਦਿਨ ਲਈ ਇਕਾਂਤਵਾਸ 'ਚ ਰਹਿਣਾ ਲਾਜ਼ਮੀ ਹੋਵੇਗਾ ਅਤੇ ਇਸ ਨਿਯਮ ਦੀ ਉਲੰਘਣਾ ਕਰਨ ਵਾਲੇ ਨੂੰ 1000 ਪੌਡ ਜੁਰਮਾਨਾ ਹੋਵੇਗਾ । ਇਸ ਨਿਯਮ ਦੀ ਪੁਸ਼ਟੀ ਅੱਜ ਬਰਤਾਨੀਆਂ ਦੀ ਸੰਸਦ 'ਚ ਗ੍ਰਹਿ ਮੰਤਰੀ ਪ੍ਰੀਤੀ ਪਟੇਲ ਨੇ ਕੀਤੀ ਹੈ, ਜਦ ਕਿ ਬਾਅਦ 'ਚ ਪ੍ਰੈਸ ਕਾਨਫ਼ਰੰਸ ਦੌਰਾਨ ਪ੍ਰਧਾਨ ਬੌਰਿਸ ਜੌਹਨਸਨ ਨੇ ਵੀ ਇਸ ਬਾਰੇ ਵਿਸਥਾਰ ਸਹਿਤ ਜਾਣਕਾਰੀ ਦਿੱਤੀ । ਪ੍ਰੀਤੀ ਪਟੇਲ ਨੇ ਕਿਹਾ ਕਿ ਯਾਤਰੀਆਂ ਨੂੰ ਆਪਣਾ ਸੰਪਰਕ ਨੰਬਰ, ਪਤਾ ਆਦਿ ਬਾਰੇ ਪੂਰੀ ਜਾਣਕਾਰੀ ਫਾਰਮ ਭਰ ਕੇ ਦੇਣੀ ਹੋਵੇਗੀ । ਯੂ. ਕੇ. ਬਾਰਡਰ ਫੋਰਸ ਵਲੋਂ ਇਸ ਦੀ ਨਿਗਰਾਨੀ ਕੀਤੀ ਜਾਵੇਗੀ । ਯੂ. ਕੇ. 'ਚ ਹੁਣ ਤੱਕ ਸਿਰਫ 273 ਲੋਕਾਂ ਨੂੰ ਹੀ ਇਕਾਂਤਵਾਸ 'ਚ ਰੱਖਿਆ ਗਿਆ ਸੀ, ਜਦ ਕਿ 18 ਮਿਲੀਅਨ ਲੋਕ ਮਹਾਂਮਾਰੀ ਦੌਰਾਨ ਯੂ. ਕੇ. 'ਚ ਦਾਖ਼ਲ ਹੋਏ ਹਨ । ਜਿਨ੍ਹਾਂ 'ਚ ਯਾਤਰੀ ਚੀਨ, ਇਟਲੀ ਅਤੇ ਹੋਰ ਅਜਿਹੀਆਂ ਥਾਵਾਂ ਤੋਂ ਆਏ ਜਿੱਥੇ ਕੋਰੋਨਾ ਦਾ ਜ਼ਿਆਦਾ ਪ੍ਰਭਾਵ ਰਿਹਾ ਹੈ ।  

ਲੰਡਨ/ਨਵੀਂ ਦਿੱਲੀ ,  ਜੂਨ   2020-( ਅਮਨਜੀਤ ਸਿੰਘ ਖਹਿਰਾ/ਜਨ ਸ਼ਕਤੀ ਨਿਊਜ ) -  

ਗਾਇਤਰੀ ਆਈ. ਕੁਮਾਰ ਨੂੰ ਬਰਤਾਨੀਆ 'ਚ ਭਾਰਤ ਦਾ ਅਗਲਾ ਹਾਈ ਕਮਿਸ਼ਨਰ ਨਿਯੁਕਤ ਕੀਤਾ ਗਿਆ ਹੈ ।ਸਾਲ 1986 ਬੈਚ ਦੀ ਭਾਰਤੀ ਵਿਦੇਸ਼ ਸੇਵਾ ਦੀ ਅਧਿਕਾਰੀ ਗਾਇਤਰੀ ਕੁਮਾਰ ਹੁਣ ਰੁਚੀ ਘਨਸ਼ਿਆਮ ਦੀ ਜਗ੍ਹਾ ਲੈਣਗੇ । ਮੌਜੂਦਾ ਸਮੇਂ 'ਚ ਕੁਮਾਰ ਬੈਲਜੀਅਮ, ਲਗਜਮਬਰਗ ਅਤੇ ਯੂਰਪੀਅਨ ਯੂਨੀਅਨ 'ਚ ਬਤੌਰ ਭਾਰਤੀ ਰਾਜਦੂਤ ਦੇ ਆਹੁਦੇ ਤੇ ਕੰਮ ਕਰਨ ਦਾ ਤਜਰਬਾ ਰੱਖਦੇ ਹਨ । ਆਪਣੇ 30 ਸਾਲ ਦੇ ਲੰਬੇ ਕਾਰਜਕਾਲ 'ਚ ਕੁਮਾਰ ਪੈਰਿਸ, ਕਾਠਮੰਡੂ, ਲਿਸਬਨ ਅਤੇ ਜੇਨੇਵਾ ਤੋਂ ਇਲਾਵਾ ਕਈ ਭਾਰਤੀ ਮਿਸ਼ਨ 'ਚ ਸੇਵਾਵਾਂ ਦੇ ਚੁੱਕੇ ਹਨ । ਯੂ ਕੇ ਇਸ ਸਮੇ ਜਦੋ ਕੇ ਯੂਰਪੀਅਨ ਮੁਲਕਾਂ ਦੀ ਸਾਜੇਦਾਰੀ ਛੱਡ ਚੁੱਕਾ ਹੈ ਭਾਰਤੀ ਹਾਈ ਕਮਿਸ਼ਨਰ ਦਾ ਤਜਰਬਾ ਬਹੁਤ ਗਿਣਤੀ ਵਾਲਾ ਹੋਵੇਗਾ ਇਸ ਸਮੇ ਭਾਰਤ ਅਤੇ ਯੂ ਕੇ ਦੇ ਆਪਸੀ ਤਾਲਮੇਲ ਲਈ ।

ਇੰਗਲੈਂਡ ਸਰਕਾਰ ਵਲੋਂ ਕਿਸੇ ਹੋਰ ਦੇ ਘਰ ਆਉਣ-ਜਾਣ 'ਤੇ ਪਾਬੰਦੀ 

ਮਾਨਚੈਸਟਰ, ਜੂਨ 2020 -(ਗਿਆਨੀ ਅਮਰੀਕ ਸਿੰਘ ਰਾਠੌਰ )-

ਇੰਗਲੈਂਡ ਵਿਚ ਕਿਸੇ ਬਾਹਰੀ ਵਿਅਕਤੀ ਦੇ ਕਿਸੇ ਘਰ ਆਉਣ ਤੋਂ ਮਨਾਹੀ ਹੈ। ਤਾਲਾਬੰਦੀ ਦੌਰਾਨ ਸਰਕਾਰ ਵਲੋਂ ਬਣਾਏ ਕਾਨੂੰਨ ਅਨੁਸਾਰ ਦੋ ਵੱਖ-ਵੱਖ ਘਰਾਂ 'ਚ ਰਹਿਣ ਵਾਲੇ ਲੋਕ ਨਿੱਜੀ ਜਗ੍ਹਾ 'ਤੇ ਨਹੀਂ ਮਿਲ ਸਕਣਗੇ । ਦਰਅਸਲ, ਪਹਿਲੇ ਨਿਯਮਾਂ ਵਿਚ 'ਪ੍ਰਾਈਵੇਟ ਸਪੇਸ' ਸ਼ਬਦ ਨਹੀਂ ਵਰਤਿਆ ਜਾਂਦਾ ਸੀ । ਸਰਕਾਰ ਨੇ ਇਹ ਵੀ ਕਿਹਾ ਕਿ ਪੁਲਿਸ ਅਜਿਹੇ ਮਾਮਲਿਆਂ ਨਾਲ ਨਜਿੱਠਣ ਲਈ ਸਮਝਦਾਰੀ ਦਿਖਾਵੇਗੀ । ਨਵੇਂ ਨਿਯਮ ਤੋਂ ਬਾਅਦ, ਕੋਈ ਵੀ ਹੁਣ ਆਪਣੇ ਘਰ 'ਚ ਕਿਸੇ ਬਾਹਰੀ ਵਿਅਕਤੀ ਨੂੰ ਉਦੋਂ ਹੀ ਮਿਲ ਸਕਦਾ ਹੈ ਜਦੋਂ ਉਸ ਕੋਲ ਇਕ ਉਚਿਤ ਕਾਰਨ ਹੋਵੇਗਾ । ਸਰਕਾਰ ਨੇ ਇਹ ਵੀ ਸਪੱਸ਼ਟ ਕਰ ਦਿੱਤਾ ਹੈ ਕਿ ਨਵਾਂ ਕਾਨੂੰਨ ਕਿਸੇ ਵੀ ਤਰ੍ਹਾਂ ਦੇ ਸਰੀਰਕ ਸਬੰਧਾਂ 'ਤੇ ਪਾਬੰਦੀ ਨਹੀਂ ਲਗਾਉਂਦਾ ਪਰ ਕੋਈ ਵੀ ਵਿਅਕਤੀ ਘਰ ਦੇ ਅੰਦਰ ਦੋ ਜਾਂ ਦੋ ਤੋਂ ਵੱਧ ਲੋਕਾਂ ਨਾਲ ਇਕੱਠਾ ਨਹੀਂ ਹੋ ਸਕਦਾ । ਨਵੇਂ ਕਨੂੰਨ ਦੇ ਅਨੁਸਾਰ ਕੋਈ ਵਿਅਕਤੀ ਰਾਤ ਕਿਸੇ ਹੋਰ ਘਰ 'ਚ ਨਹੀਂ ਗੁਜ਼ਾਰ ਸਕਦਾ ।  

ਭਾਰਤ ਇੱਕ ਧਰਮ ਨਿਰਪੱਖ ਦੇਸ਼-ਜੌਹਲ ,ਸੰਘਾ

ਲੰਡਨ ,  ਜੂਨ 2020 -(ਰਾਜੀਵ ਸਮਰਾ)-

-ਪ੍ਰਸਿੱਧ ਕਬੱਡੀ ਪ੍ਰਮੋਟਰ ਸਭਿਆਚਾਰ ਪ੍ਰੋਮਟਰ ਜਸਕਰਨ ਸਿੰਘ ਜੌਹਲ ਤੇ ਇੰਡੀਅਨ ਓਵਰਸੀਜ਼ ਕਾਂਗਰਸ ਯੂ ਕੇ ਦੇ ਪ੍ਰਧਾਨ ਰਛਪਾਲ ਸਿੰਘ ਸੰਘਾ  ਨੇ  ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ   ਕਿਹਾ ਕਿ ਇੱਕ ਨਿੱਜੀ ਤੰਬਾਕੂ ਕੰਪਨੀ ਦੁਆਰਾ ਤੰਬਾਕੂ ਦੇ ਡੱਬੀ ਉੱਤੇ ਰਵਿਦਾਸ ਸਮਾਜ ਦੇ ਮਹਾਂਪੁਰਖ ਸ੍ਰੀ ਗੁਰੂ ਰਵਿਦਾਸ ਜੀ ਦੀ ਤਸਵੀਰ ਲਗਾਈ ਗਈ ਹੈ। ਜੋ ਕਿ ਬਹੁਤ ਹੀ  ਗੰਦੀ ਸੋਚ ਦਾ ਪ੍ਰਤੀਕ ਹੈ।  ਉਕਤ ਆਗੂਆਂ ਨੇ  ਤੰਬਾਕੂ ਦੀ ਡੱਬੀ ਦੇ ਉੱਪਰ ਗੁਰੂ ਰਵਿਦਾਸ ਦੀ ਤਸਵੀਰ ਲਗਾਉਣ ਦੀ ਸਖ਼ਤ ਸ਼ਬਦਾਂ ਵਿੱਚ ਨਿਖੇਧੀ ਕੀਤੀ। ਉਹਨਾਂ ਕਿਹਾ ਕਿ ਕੰਪਨੀ ਦੁਆਰਾ ਇਸ ਤਰ੍ਹਾਂ ਕਰਨ ਨਾਲ ਦੇਸ਼ਾਂ ਅਤੇ ਵਿਦੇਸ਼ਾਂ ਵਿੱਚ ਰਹਿੰਦੇ ਰਵਿਦਾਸ ਭਾਈਚਾਰੇ ਦੇ ਮਨਾਂ  ਠੇਸ ਪਹੁੰਚੀ ਹੈ । ਸਮੁੱਚੇ ਭਾਈਚਾਰੇ ਦੇ ਅੰਦਰ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ। ਉਨ੍ਹਾਂ ਨੇ ਰੋਸ ਪ੍ਰਗਟ ਕਰਦੇ ਹੋਏ ਕਿਹਾ ਕਿ ਨਸ਼ੇ ਵਾਲੀਆਂ ਵਸਤੂਆਂ ਤੇ  ਮਹਾਂਪੁਰਖਾਂ ਦੀਆਂ ਤਸਵੀਰਾਂ ਲਗਾਉਣਾ ਸਰਾਸਰ ਗਲਤ ਹੈ। ਭਾਰਤ ਇੱਕ ਧਰਮ ਨਿਰਪੱਖ ਦੇਸ਼ ਹੈ ਅਤੇ ਦੇਸ਼ ਦਾ ਸੰਵਿਧਾਨ ਕਿਸੇ ਨੂੰ ਵੀ ਕਿਸੇ ਵੀ ਧਰਮ ਦੀ ਧਾਰਮਿਕ ਭਾਵਨਾ ਨੂੰ ਠੇਸ ਪਹੁੰਚਾਉਣ ਦੀ ਆਗਿਆ ਨਹੀਂ ਦਿੰਦਾ ਕੰਪਨੀ ਦੁਆਰਾ  ਇਸ ਤਰ੍ਹਾਂ ਕਰਕੇ ਕੰਪਨੀ ਨੇ ਭਾਰਤ ਦੀ ਏਕਤਾ ਤੇ ਅਖੰਡਤਾ ਨੂੰ ਅੱਗ ਲਾਉਣ ਦੀ ਕੋਸ਼ਿਸ਼ ਕੀਤੀ ਹੈ । ਉਕਤ ਆਗੂਆਂ ਨੇ ਭਾਰਤ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਇਸ ਤੰਬਾਕੂ ਕੰਪਨੀ ਦੇ ਖਿਲਾਫ ਸਖਤ ਕਾਰਵਾਈ ਕੀਤੀ ਜਾਵੇ ਅਤੇ   ਇਸ ਤੰਬਾਕੂ ਕੰਪਨੀ ਦਾ ਲਾਇਸੈਂਸ ਰੱਦ ਕੀਤਾ ਜਾਵੇ, ਤਾਂ ਕਿ ਭਵਿੱਖ ਵਿਚ ਕੋਈ ਵੀ ਇਸ ਤਰ੍ਹਾਂ ਕਿਸੇ ਦੀਆਂ ਧਾਰਮਿਕ ਭਾਵਨਾ ਨਾਲ ਖਿਲਵਾੜ ਨਾ ਕਰ ਸਕੇ  ।

ਲੰਡਨ,  ਜੂਨ 2020(ਰਾਜਵੀਰ ਸਮਰਾ )- 

ਬ੍ਰਿਟੇਨ ਵਿਚ ਜ਼ਿਆਦਾ ਜੋਖਮ (ਕਮਜ਼ੋਰ) ਲੋਕਾਂ ਨੂੰ ਵੀ ਆਪਣੇ ਘਰਾਂ ਤੋਂ ਬਾਹਰ ਜਾਣ ਦੀ ਆਗਿਆ ਦਿੱਤੀ ਗਈ ਹੈ । ਬ੍ਰਿਟੇਨ ਵਿਚ ਹੁਣ ਕਰੋੜਾਂ ਲੋਕ ਜਿਨ੍ਹਾਂ ਨੂੰ ਕੋਰੋਨਾ ਵਾਇਰਸ ਦੀ ਇਨਫੈਕਸ਼ਨ ਦਾ ਜ਼ਿਆਦਾ ਖ਼ਤਰਾ ਸੀ। ਉਹ ਆਪਣੇ ਘਰਾਂ ਨੂੰ ਛੱਡ ਸਕਣਗੇ। ਉਹ ਪਿਛਲੇ 10 ਹਫ਼ਤਿਆਂ ਤੋਂ ਘਰਾਂ ਵਿੱਚ ਕੈਦ ਸਨ। ਹੁਣ ਸਰਕਾਰ ਦੀ ਇਜਾਜ਼ਤ ਤੋਂ ਬਾਅਦ ਉਹ ਆਪਣੇ ਘਰਾਂ ਤੋਂ ਬਾਹਰ ਆ ਸਕਣਗੇ। ਇਹ ਇਜਾਜ਼ਤ ਮਾਹਰਾਂ ਨਾਲ ਗੱਲਬਾਤ ਤੋਂ ਬਾਅਦ ਪ੍ਰਾਪਤ ਕੀਤੀ ਗਈ ਹੈ। ਮਾਹਰਾਂ ਨੇ ਦੱਸਿਆ ਹੈ ਕਿ ਬ੍ਰਿਟੇਨ ਵਿਚ ਹੁਣ ਇਕ ਹਜ਼ਾਰ ਲੋਕਾਂ ਵਿਚੋਂ ਇਕ ਨੂੰ ਹੀ ਕੋਰੋਨਾ ਇਨਫੈਕਸ਼ਨ ਹੋਣ ਦੀ ਸੰਭਾਵਨਾ ਹੈ।

22 ਲੱਖ ਲੋਕਾਂ ਲਈ ਰਾਹਤ ਦਾ ਸਾਹ
ਦਿ ਸਨ ਦੀ ਇਕ ਰਿਪੋਰਟ ਦੇ ਅਨੁਸਾਰ, ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਬੋਰਿਸ ਜਾਨਸਨ ਕੱਲ੍ਹ ਘੋਸ਼ਣਾ ਕਰ ਸਕਦੇ ਹਨ ਕਿ 2.2 ਮਿਲੀਅਨ ਬ੍ਰਿਟਿਸ਼ ਲੋਕ, ਜਿਨ੍ਹਾਂ ਨੂੰ ਕੋਰੋਨਾ ਵਾਇਰਸ ਕਾਰਨ ਵਧੇਰੇ ਜੋਖਮ ਵਿੱਚ ਸੀ। ਆਪਣੇ ਘਰਾਂ ਤੋਂ ਬਾਹਰ ਆ ਸਕਦੇ ਹਨ। ਪ੍ਰਧਾਨ ਮੰਤਰੀ ਬਜ਼ੁਰਗਾਂ ਲਈ ਵੀ ਇਸ ਦਾ ਐਲਾਨ ਕਰ ਸਕਦੇ ਹਨ। ਬ੍ਰਿਟਿਸ਼ ਬਜ਼ੁਰਗ ਜੋ ਆਪਣੇ ਘਰਾਂ ਵਿਚ ਇਕੱਲੇ ਰਹਿੰਦੇ ਹਨ ਹੁਣ ਬਾਹਰ ਜਾ ਸਕਦੇ ਹਨ ਅਤੇ ਆਪਣੇ ਦੋਸਤ ਨੂੰ ਜਾਣ ਸਕਦੇ ਹਨ। ਉਹ ਇੱਕ ਜਗ੍ਹਾ ਤੋਂ ਦੂਜੀ ਥਾਂ ਜਾ ਸਕਦੇ ਹਨ। ਹਾਲਾਂਕਿ, ਇਸ ਸਮੇਂ ਦੌਰਾਨ, ਉਨ੍ਹਾਂ ਨੂੰ ਸਮਾਜਿਕ ਦੂਰੀਆਂ ਦੇ ਨਿਯਮਾਂ ਦੀ ਪਾਲਣਾ ਕਰਨੀ ਪਏਗੀ।
ਲੋਕ 10 ਹਫ਼ਤਿਆਂ ਬਾਅਦ ਆਜ਼ਾਦੀ ਮਹਿਸੂਸ ਕਰਨਗੇ
ਇਸ ਨਵੀਂ ਐਲਾਨ ਤੋਂ ਬਾਅਦ ਵੱਡੀ ਗਿਣਤੀ ਵਿਚ ਲੋਕ ਰਾਹਤ ਦਾ ਸਾਹ ਲੈ ਸਕਦੇ ਹਨ। ਬਹੁਤ ਸਾਰੇ ਲੋਕ ਸਨ ਜੋ ਹੋਰ ਬਿਮਾਰੀਆਂ ਨਾਲ ਜੂਝ ਰਹੇ ਹਨ ਪਰ ਕੋਰੋਨਾ ਦੇ ਡਰ ਕਾਰਨ ਉਨ੍ਹਾਂ ਨੂੰ ਆਪਣੇ ਘਰਾਂ ਵਿੱਚ ਕੈਦ ਰਹਿਣਾ ਪਿਆ। ਲਾਕਡਾਊਨ ਤੋਂ ਬਾਅਦ ਉਨ੍ਹਾਂ ਨੂੰ ਆਪਣੇ ਘਰਾਂ ਵਿਚ ਬੰਦ ਕਰ ਦਿੱਤਾ ਗਿਆ। ਇਸ ਤੋਂ ਪਹਿਲਾਂ ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਬੋਰਿਸ ਜਾਨਸਨ ਨੇ ਕੋਰੋਨਾ ਨਾਲ ਲੜ ਰਹੇ ਸਿਹਤ ਕਰਮਚਾਰੀਆਂ ਦਾ ਧੰਨਵਾਦ ਕੀਤਾ। ਨਾਲ ਹੀ ਉਸਨੇ ਇਹ ਵੀ ਕਿਹਾ ਕਿ ਉਹ ਉਨ੍ਹਾਂ ਸਾਰੇ ਲੋਕਾਂ ਦਾ ਧੰਨਵਾਦ ਕਰਨਾ ਚਾਹੁੰਦੇ ਹਨ ਜੋ ਆਦੇਸ਼ਾਂ ਦੀ ਪਾਲਣਾ ਕਰਦਿਆਂ ਆਪਣੇ ਘਰਾਂ ਵਿੱਚ ਰਹੇ। ਉਨ੍ਹਾਂ ਕਿਹਾ ਕਿ ਇਹ ਤੁਹਾਡੇ ਲੋਕਾਂ ਦੀ ਕੁਰਬਾਨੀ ਦਾ ਨਤੀਜਾ ਹੈ ਕਿ ਹਜ਼ਾਰਾਂ ਲੋਕਾਂ ਦੀ ਜਾਨ ਬਚਾਈ ਜਾ ਸਕਦੀ ਹੈ। ਬੋਰਿਸ ਜੌਨਸਨ ਨੇ ਕਿਹਾ ਹੈ ਕਿ ਮੈਂ ਸਮਝ ਸਕਦਾ ਹਾਂ ਕਿ ਪਿਛਲੇ 10 ਹਫ਼ਤਿਆਂ ਤੋਂ ਘਰਾਂ ਵਿਚ ਕੈਦ ਰਹਿਣਾ ਕਿੰਨਾ ਮੁਸ਼ਕਿਲ ਰਿਹਾ ਹੋਵੇਗਾ। ਤੁਹਾਡੇ ਸਾਰਿਆਂ ਲਈ ਇਹ ਮੁਸ਼ਕਲ ਸਮਾਂ ਸੀ। ਮੈਂ ਤੁਹਾਡੇ ਸਾਰੇ ਸਬਰ ਦੀ ਕਦਰ ਕਰਦਾ ਹਾਂ।

Rajveer samra,07412970999