ਸਾਹਿਤ

- ਕਿੰਨਾ ਚੰਗਾ ਹੋਵੇ
ਜੇ ਖੇਤ ਕਾਮਿਆਂ,
ਸੀਰੀਆਂ,
ਫਸਲਾਂ 'ਤੇ
ਜਹਿਰੀਲੀਆਂ ਦਵਾਈਆਂ
ਛਿੜਕਣ ਵਾਲਿਆਂ,
ਝੋਨੇ ਦੀ ਲਵਾਈ!
ਕਣਕ ਦੀ ਵਢਾਈ!
ਕਰਨ ਵਾਲਿਆਂ,
ਠਰਦੀਆਂ ਰੁੱਤਾਂ ਵਿਚ
 ਫਸਲਾਂ ਨੂੰ ਪਾਣੀ ਲਗਾਉਂਦੇ ,
ਸੱਪਾਂ ਦੀਆਂ ਸਿਰੀਆਂ
ਮਿੱਧ ਦੇ
ਕਾਮਿਆਂ ਦੀ ਦਿਸ਼ਾ
ਸੁਧਾਰਨ ਲਈ
ਘੱਟੋ-ਘੱਟ ਦਿਹਾੜੀ ਵਾਲੀ
ਐਮ ਐਸ ਪੀ
ਲਾਗੂ ਹੋ ਜਾਵੇ,
ਜਿਵੇਂ ਹਰ ਸਾਲ
ਕਿਸਾਨਾਂ ਦੀਆਂ
ਫਸਲਾਂ ਦਾ ਮੁੱਲ
ਪਾਉਣ ਲਈ,
ਵਧਾਉਣ ਲਈ,
ਸਰਕਾਰਾਂ ਕਰਦੀਆਂ ਨੇ!
ਉਨ੍ਹਾਂ ਦੇ ਮਾਸੂਮਾਂ ਦਾ ਵੀ ਦਿਲ ਕਰਦੈ,
ਟਾਈ ਲਗਾਣ ਲਈ!
ਖੋਏ ਵਾਲੀ ਕੁਲਫੀ ਖਾਣ ਲਈ!
ਕਦੀ ਕਦੀ ਮਸਤੀ ਮਨਾਣ ਲਈ!
-ਸੁਖਦੇਵ ਸਲੇਮਪੁਰੀ
09780620233
9 ਮਈ, 2022.

ਮਾਂ ਦਾ ਕੋਈ ਦਿਨ ਨਹੀਂ ਹੁੰਦਾ,
ਇਹ ਸੋਚੋ ਮਾਂ ਬਿਨ੍ਹਾਂ ਕੋਈ ਦਿਨ ਨਹੀਂ ਹੁੰਦਾ।
ਘਰ ਵਿਚ ਨਾ ਹੋਵੇ ਮਾਂ,
ਵਿਹੜਾ ਜਗਮਗ ਨਹੀਂ ਹੁੰਦਾ।
ਮਾਂ ਦਿਵਸ ਤੇ ਕੱਟਦੇ ਕੇਕ ਤੇ ਵੰਡਦੇ ਮਠਿਆਈਆ,
ਅੱਗੇ ਪਿੱਛੇ ਲੋਕੋ ਮਾਵਾਂ ਯਾਦ ਨਾ ਆਈਆਂ।
ਜੇ ਇਨ੍ਹਾਂ ਪਿਆਰ ਮਾਂ ਪ੍ਰਤੀ ਦਿਲ ਵਿੱਚ ਹੁੰਦਾ,
ਤਾਂ ਪਿੰਡ-ਸ਼ਹਿਰ ਕੋਈ ਬਿਰਧ ਆਸ਼ਰਮ ਨਾ ਹੁੰਦਾ।
ਕਿੰਨੇ ਕਰ ਲਓ ਪਾਠ- ਪੂਜਾ,
ਕਿੰਨੇ ਮਰਜੀ ਕਰ ਲਓ ਦਾਨ।
ਜੇ ਮਾਂ ਪ੍ਰਤੀ ਪਿਆਰ ਨਹੀਂ,
ਤਾਂ ਰੱਬ ਨੂੰ ਵੀ ਇਹ ਸਭ ਮਨਜੂਰ ਨਹੀਂ ਹੁੰਦਾ।
ਪੂਜਾ ਕਹੇ ਮਾਵਾਂ ਨਾਲ ਹੀ ਜਹਾਨ ਹੁੰਦਾ ਇਸਲਈ,
ਮਾਂ ਦਾ ਕੋਈ ਦਿਨ ਨਹੀਂ ਹੁੰਦਾ,
ਇਹ ਸੋਚੋ ਮਾਂ ਬਿਨਾਂ ਕੋਈ ਦਿਨ ਨਹੀਂ ਹੁੰਦਾ।
ਪੂਜਾ 9815591967
 

ਮਾਂ ਤੇਰੀ ਛਾਂ ਹੇਠ ਬੈਠਣ ਨੂੰ ਅੱਜ ਬੜਾ ਹੀ ਦਿਲ ਕਰਦਾ ਏ
ਤੂੰ ਲਾਡ-ਲਡਾਵੇ ਤੇਰੀ ਗੋਦ ਵਿੱਚ
ਸੌਣ ਨੂੰ ਜੀ ਕਰਦਾ ਏ।

ਮੁੜ ਆਵੇ ਉਹ ਵੇਲਾ
ਭੌਰਾ ਵਸਾਹ ਨਹੀਂ ਸੀ ਕਰਦੀ ਮੇਰਾ
ਅੱਜ ਫਿਰ ਉਹ ਗੱਲਾਂ ਕਹਿਣ ਨੂੰ ਦਿਲ ਕਰਦਾ ਏ।

ਤੱਕ ਲੈਂਦੀ ਹਾਂ ਜਦ ਮੋਹ ਮਮਤਾ ਕਿਸੇ ਦੀ
ਤਾਂ ਦਿਲ ਹੌਕਾ ਜਿਹਾ ਭਰਦਾ ਏ
ਲੱਖ ਕੋਸ਼ਿਸ਼ ਕੀਤੀ ਏ ਤੈਨੂੰ ਮਿਲਣੇ ਦੀ
ਪਰ ਬੜਾ ਲੰਮਾ ਪੈਂਡਾ ਤੇਰੇ ਘਰ ਦਾ ਏ
ਕੁੱਟ ਕੇ ਦੇਸੀ ਘਿਓ ਦੀ ਚੂਰੀ ਤੂੰ ਖਵਾਉਂਦੀ ਸੀ
ਨਾ ਹੀ ਉਹ ਛੰਨਾ ਹੁਣ ਚੂਰੀ ਨਾਲ ਭਰਦਾ ਏ ।

ਤੇਰੀਆਂ ਯਾਦਾਂ ਵਿੱਚ ਜਦ ਅੱਖਾਂ ਰੋਣ ਨੀ ਮਾਏ
ਇਹ ਹੰਝੂ ਵੀ ਨਾ ਹਾੜਿਆ ਹੱਟਦਾ ਏ
ਤੇਰੇ ਮੁੜ ਆਉਣ ਦਾ ਵਹਿਮ ਜੋ ਦਿਲ ਅੰਦਰ ਏ
ਨਾ ਉਹ ਮਾਰਿਆ ਮਰਦਾ ਏ ।

ਜਦ ਮੇਰੇ ਕੋਈ ਸੱਟ ਲੱਗ ਜਾਂਦੀ
ਝੱਟ ਤੇਰੇ ਕਲ਼ੇਜੇ ਖੋਹ ਜਿਹੀ ਪੈ ਜਾਂਦੀ
ਬੜਾ ਡੂੰਘਾ ਹੋ ਗਿਆ ਏ ਮਾਂ ਜ਼ਖ਼ਮ ਦਿਲ ਦਾ
ਨਾ ਕਿਸੇ ਦੇ ਭਰਿਆ ਭਰਦਾ ਏ ।

ਮਾਵਾਂ ਬਿਨਾਂ ਜ਼ਿੰਦਾ ਲਾਸ਼ ਹੈ ਜ਼ਿੰਦਗੀ ਬੱਚਿਆਂ ਦੀ
ਹੁਣ ਨਾ ਵਹਿਮ ਮਨ ‘ਚੋਂ ਹਟੱਦਾ ਏ
ਜੇ ਖੁੱਸ ਜਾਵੇ ਕਿਸੇ ਦੀ ਮਮਤਾ
ਤਾਂ ਜੱਗ ਉੱਚੀ ਉੱਚੀ ਹੱਸਦਾ ਏ।

ਧਾਲੀਵਾਲ ਨੂੰ ਤੇਰੇ ਬਾਝੋਂ ਕੁੱਝ ਨਹੀਂ ਭਾਉਂਦਾ ਏ
ਬੱਸ ‘ਗਗਨ’ ਦਾ ਦਿਲ ਤੇਰੇ ਰਾਹੇ ਆ ਖੜਦਾ ਏ
ਬੜਾ ਸਮਾਂ ਹੋ ਗਿਆ ਮਾਂ ਤੇਰੀ ਬੁੱਕਲ ਵਿੱਚ ਬੈਠੀ ਨੂੰ
ਮਾਂ ਤੇਰੀ ਛਾਂ ਹੇਠ ਬੈਠਣ ਨੂੰ ਅੱਜ ਬੜਾ ਹੀ ਦਿਲ ਕਰਦਾ ਏ।

ਪ੍ਰੋ.ਗਗਨਦੀਪ ਕੌਰ ਧਾਲੀਵਾਲ

ਜੱਗ ਤੋਂ ਵਿਛੜੇ, ਕਦੇ ਨਾ ਮਿਲਦੇ
     ਕੌਣ ਮਿਲਾਵੇ ਆਣ
ਬਿਰਹਾ ਨਾਵੇਂ ਕਰ ਗਿਆ
     ਮੇਰਾ ਬਿਰਹਾ ਦਾ ਸੁਲਤਾਨ

ਤੇਰਿਆਂ ਗੀਤਾਂ ਵਿੱਚ ਵੀ ਮੈਨੂੰ
     ਤੇਰੇ ਭੁਲੇਖੇ ਪੈਂਦੇ ਨੇ
ਯਾਦਾਂ ਵਾਲੇ ਪੰਛੀ ਦਿਲ ਦੇ
     ਆਣ ਬਨੇਰੇ ਬਹਿੰਦੇ ਨੇ
ਕੱਖਾਂ ਵਰਗੇ ਸੁਪਨੇ ਸਾਡੇ
     ਉੱਡ ਗਏ ਵਿੱਚ ਤੂਫਾਨ
               ਬਿਰਹਾ ਨਾਵੇਂ….

ਸੱਚ ਹੀ ਕਹਿੰਦਾ ਝੂਠ ਨਾ ਕੋਈ
     ਬੇਕਸੂਰ ਸੀ ਲੂਣਾਂ
ਅੱਗ ਦੀ ਉਮਰੇ ਟੁੱਟੀਆਂ ਰੀਝਾਂ
     ਕੀ ਸੀ ਉਸ ਦਾ ਜਿਉਣਾ
ਜਿਸ ਤਨ ਲੱਗਦੀ, ਓਹ ਤਨ ਜਾਣੇ
     ਟੁੱਟਦੇ ਜਦ ਅਰਮਾਨ
               ਬਿਰਹਾ ਨਾਵੇਂ….

ਜੋਬਨ-ਰੁੱਤੇ ਨਹੀਂ ਸੀ ਕਾਹਲਿਆ
     ਚੰਦਰੀ ਮੌਤ ਵਿਆਉਂਦੇ
ਐਸੇ ਵਿਆਹ ਦੀ ਸਾਲ ਗਿਰਾ ਨੂੰ
     ਬਰਸੀ ਆਖ ਮਨਾਉਂਦੇ
ਹੰਝੂ ਰੌਣਕ ਵੇਖਣ ਦੇ ਲਈ
     ਅੱਖੀਆਂ ਦੇ ਵਿੱਚ ਆਣ
               ਬਿਰਹਾ ਨਾਵੇਂ….

'ਰਮੇਸ਼' ਦੇ ਦਿਲ ਵਿਚ ਲੈਣ ਉਬਾਲੇ
     'ਜਾਨੂੰ' ਇਹੋ ਚਾਵਾਂ
ਸ਼ਿਵ ਦੇ ਵਾਂਗੂੰ ਮੇਰੀਆਂ ਹੋਵਣ
     ਸਿਵਿਆਂ ਦੇ ਵਿੱਚ ਲਾਵਾਂ
ਮੈਂ ਕੰਡਿਆਲੀ ਥੋਰ ਬਣਾ
     ਤੇ ਉੱਘਾਂ ਵਿੱਚ ਸ਼ਮਸ਼ਾਨ
               ਬਿਰਹਾ ਨਾਵੇਂ….
 ਲੇਖਕ-ਰਮੇਸ਼ ਕੁਮਾਰ ਜਾਨੂੰ
 ਫੋਨ ਨੰ:-98153-20080

ਧੀ ਹੈ ਜਗ ਜਨਨੀ ਇਸ ਸੰਸਾਰ ਦੀ,
ਇਸ ਬਿਨ੍ਹਾਂ ਨਾ ਸੰਸਾਰ ਚਲਦਾ।
 ਜਿਵੇਂ ਹੋਵੇ ਦੀਵੇ ਵਿੱਚ ਤੇਲ,
ਪਰ ਬੱਤੀ ਬਿਨ੍ਹਾਂ ਨਾ ਇਹ ਬਲਦਾ।
ਧੀ ਹੈ ਕਈ ਰਿਸ਼ਤੇ ਨਿਭਾਉਂਦੀ,
ਤੇ ਰੱਖਦੀ ਹੈ ਖਿਆਲ ਬਾਬਲ ਦੀ ਪੱਗ ਦਾ।
ਪੁੱਤਰਾਂ ਨਾਲੋਂ ਵੱਧ ਮਾਪਿਆਂ ਦੇ ਦੁੱਖ ਹੈ ਵੰਡਦੀ,
ਕਰੋ ਸਾਹਮਣਾ ਇਸ ਸੱਚ ਦਾ।
ਕਿਉਂ ਕੁੱਖਾਂ ਵਿੱਚ ਮਾਰਦੇ ਹੋ ਧੀਆਂ ਨੂੰ,
ਲੋਕੋ ਤੁਹਾਡਾ ਦਿਲ ਜ਼ਰਾ ਵੀ ਨਹੀਂ
ਕੰਬਦਾ।
ਕਈ ਸਹੁਰੇ ਘਰਾਂ ਵਿਚ ਹੁੰਦੇ ਬੁਰੇ ਸਲੂਕ ਧੀਆਂ ਨਾਲ,
ਕਾਰਣ ਕਿ ਉਹ ਦਾਜ ਮੰਗਦਾ।
ਲੋਕ ਕੁੜੀ ਜੰਮਣ ਤੇ ਸ਼ੋਗ ਮਨਾਉਂਦੇ,
ਮੁੰਡਾ ਜੰਮੇ ਤਾਂ ਲੱਡੂ ਵੰਡਦਾ।
ਪੂਜਾ ਕਹੇ ਰੋਕੋ ਇਸ ਮਹਾਂਪਾਪ ਨੂੰ ਦੁਨੀਆ ਵਾਲਿਓ,
ਧੀ ਬਿਨਾਂ ਨਾ ਸੰਸਾਰ ਚਲਦਾ।
ਧੀ ਬਿਨਾਂ ਨਾ ਸੰਸਾਰ ਚਲਦਾ।
ਪੂਜਾ(9815591967)

ਦੋਸਤੋਂ ਸੁਪਨੇ ਸਾਰਿਆਂ ਨੂੰ ਆਉਂਦੇ ਹਨ ।ਅਮੀਰ-ਗਰੀਬ ਅੱਖਾਂ ਵਿੱਚ ਸੁਪਨੇ ਬੁਣਦੇ ਹਨ।ਕਈ ਲੋਕ ਸੁਪਨੇ ਦਿਨ ਵੇਲੇ ਖੁੱਲ੍ਹੀਆਂ ਅੱਖਾਂ ਨਾਲ ਦੇਖਦੇ ਹਨ।ਦੋਸਤੋੰਸੁਪਨੇ ਬੜੇ ਅਜੀਬ ਜਿਹੇ ਹੁੰਦੇ ਹਨ ਕਈ ਵਾਰ ਬਹੁਤ ਖੁਸ਼ੀ ਦਿੰਦੇ ਹਨ ਕਈ ਵਾਰ ਬਹੁਤ ਡਰ ਪੈਦਾ ਕਰਦੇ ਹਨ।ਸੁਪਨੇ ਉਹ ਬਿਰਤਾਂਤ ਹਨ ਜੋ ਅਸੀਂ ਗੂੜੀ ਨੀਂਦ ਵਿੱਚ ਦੇਖਦੇ ਹਾਂ,ਅਨੁਭਵ ਕਰਦੇ ਹਾਂ ਅਤੇ ਮਹਿਸੂਸ ਕਰਦੇ ਹਾਂ।ਸੁਪਨੇ ਕਲਪਨਾ ਵਰਗੇ ਹੁੰਦੇ ਹਨ। ਸੁਪਨੇ ਮਨੁੱਖੀ ਜ਼ਿੰਦਗੀ ਦਾ ਖ਼ੂਬਸੂਰਤ ਅਨੁਭਵ ਹੁੰਦੇ ਹਨ।ਜੇਕਰ ਇਹਨਾਂ ਅਨੁਭਵਾਂ ਨੂੰ ਬੂਰ ਨਹੀਂ ਪੈਂਦਾ ਤਾਂ ਸਾਡੇ ਸੁਪਨੇ ਮਰ ਜਾਂਦੇ ਹਨ। ਕਈ ਵਾਰ ਹਾਲਾਤ ਸਾਨੂੰ ਇਹਨਾਂ ਤੋੜ ਦਿੰਦੇ ਹਨ ਕਿ ਸਾਡੇ ਦੇਖੇ ਹੋਏ ਸੁਪਨੇ ਟੁੱਟ ਕੇ ਚਕਨਾਚੂਰ ਹੋਜਾਂਦੇ ਹਨ ।ਕਈ ਵਾਰ ਸੁਪਨੇ ਏਨੇ ਅਨੰਦ ਦਾਇਕ ਹੁੰਦੇ ਹਨ ਕਿ ਰੋਜ਼ ਹੀ ਦਿਲ ਕਰਦਾ ਹੈ ਕਿ ਜਲਦੀ ਸੌ ਜਾਈਏ ਤੇ ਫਿਰ ਸੁਪਨੇ ਲਈਏ।ਪਰ ਸਵੇਰ ਹੋਣ ਤੇ ਫਿਰ ਟੁੱਟ ਜਾਂਦੇ ਹਨ।ਸੁਪਨੇ ਸਿਰਜਣਾਤਮਕ, ਅਜੀਬ, ਸੰਭਾਵਨਾਵਾਂ ਨਾਲ ਭਰੇ ਸਾਡੀ ਪਦਾਰਥਕ ਸੰਸਾਰ ਦੀਆਂ ਸਰੀਰਕ ਸੀਮਾਵਾਂ ਤੋਂ ਪਰੇ ਜਾਂਦੇ ਹਨ।ਸੁਪਨੇ ਇੱਕਪ੍ਰਤੀਬਿੰਬ, ਕਈ ਵਾਰ ਬੇਤਰਤੀਬੇ ਵੀ ਹੁੰਦੇ ਹਨ।ਕਈ ਵਾਰ ਇਨਸਾਨ ਸੁਪਨੇ ਨੀਂਦ ਵਿੱਚ ਦੇਖਦਾ ਹੈ ਤੇ ਉਹਨਾਂ ਨੂੰ ਪੂਰਾ ਕਰਨ ਦੀ ਹੋੜ ਵਿੱਚ ਲੱਗਾ ਰਹਿੰਦਾ ਹੈ ਜੋ ਕਿ ਉਹ ਕਦੇ ਵੀ ਪੂਰੇ ਨਹੀਂ ਹੁੰਦੇ ।ਅਸਲ ਵਿੱਚ ਜੋ ਇਨਸਾਨ ਸੁਪਨੇ ਹੋਸ਼ ਹਵਾਸ ਜਾਂ ਖੁੱਲੀਆਂ ਅੱਖਾਂ ਨਾਲ ਦੇਖਦੇ ਹਨ ਜਿਆਦਾਤਰ ਓਹੀ ਹੀ ਸੁਪਨਿਆਂ ਨੂੰ ਪੂਰਾ ਕਰਨ ਵਿੱਚ ਕਾਮਯਾਬ ਹੁੰਦੇ ਹਨ।ਅਕਸਰ ਇਹੋ ਸੁਣਿਆ ਗਿਆ ਹੈ ਲੋਕਾਂ ਤੋਂ ਕਿ ਸਾਡੇ ਸੁਪਨੇ ਮਰ ਗਏ ਹਨ ਉਹ ਗੂੜੀ ਨੀਂਦ ਵਿੱਚ ਆਏ ਖਿਆਲਾਂ ਨੂੰ ਹੀ ਆਪਣੀ ਜ਼ਿੰਦਗੀ ਦਾ ਜ਼ਰੂਰੀ ਹਿੱਸਾ ਬਣਾ ਲੈਂਦੇ ਹਨ ਤੇ ਜਦੋਂ ਜਾਗ ਆਉੁਦੀ ਹੈ ਫਿਰ ਅਸਲੀਅਤ ਜਾਣ ਕੇ ਉਦਾਸ ਹੋ ਜਾਂਦੇ ਹਨ ।ਪਰ ਉਹ ਦੇਖੇ ਸੁਪਨੇ ਬੜੇ ਹੀ ਰੋਮਾਂਚਿਤ ਹੁੰਦੇ ਹਨ। ਜੋ ਅਲੱਗ ਜਿਹੀ ਖ਼ੁਸ਼ੀ ਦਿੰਦੇ ਹਨ।ਕਈ ਵਾਰ ਸਾਡੇ ਸੁਪਨੇ ਸਾਕਾਰ ਨਹੀਂ ਹੁੰਦੇ ਅਤੇ ਟੀਚੇ ਦੀ ਪ੍ਰਾਪਤ ਨਹੀਂ ਹੁੰਦੀ ਤਾਂ ਅਸੀਂ ਉਦਾਸ ਹੋ ਜਾਂਦੇ ਹਨ।ਹਾਰ ਮੰਨ ਲੈਂਦੇ ਹਾਂ ਕਹਿੰਦੇ ਹਾਂ ਕਿ ਮੇਰੇ ਸੁਪਨੇ ਚਾਅ ਮਰ ਗਏ ਹਨ ਆਪਣੀ ਇੱਛਾ ਨਾ ਪੂਰੀ ਹੋਣ ਤੇ ਜਾਂ ਕਿਸੇ ਚੀਜ ਦੇ ਨਾ ਮਿਲਣ ਤੇ ਅਕਸਰ ਅਸੀਂ ਕਿਸੇ ਨੂੰ ਜਾਂ ਕਿਸੇ ਚੀਜ਼ ਨੂੰ ਦੋਸ਼ੀ ਠਹਿਰਾਉਂਦੇ ਹਾਂ।ਕਈ ਵਾਰ ਅਸੀਂ ਆਪਣੇ ਆਪ ਨੂੰ ਸਵੀਕਾਰ ਨਹੀਂ ਕਰ ਪਾਉਂਦੇ ਕਿ ਇਸ ਸੰਸਾਰ ਵਿੱਚ ਕੁਝ ਅਜਿਹਾ ਹੋ ਸਕਦਾ ਹੈ ਜੋ ਅਸੀ ਆਪਣੇ ਲਈ ਸੋਚਿਆ ਸੀ ਉਹ ਤੁਹਾਨੂੰ ਕੁਝ ਪਤਾ ਨਹੀਂ ਹੋ ਸਕਦਾ; ਕਿ ਇੱਥੇ ਕੁਝ ਅਜਿਹਾ ਹੈ ਜੋ ਸਾਡੇ ਨਿਯੰਤਰਣ ਤੋਂ ਬਗੈਰ ਵਾਪਰਦਾ ਹੈ।ਕਈ ਵਾਰ ਆਪਾ ਕਈ ਚੀਜ਼ਾਂ ਜਿੰਨਾਂ ਨੂੰ ਆਪਣੇ ਕੰਟਰੋਲ ਹੇਠ ਕਰਨ ਲਈ ਸੁਪਨੇ ਦੇਖ ਲੈਂਦੇ ਹਾਂ ਜੋ ਕਿ ਪੂਰੇ ਹੋਣੇ ਅਸੰਭਵ ਹਨ ।ਸੁਪਨੇ ਅਸਪਸ਼ਟ ਤੇ ਗੁੰਝਲਦਾਰ ਹੁੰਦੇ ਹਨ। ਮਨੋ ਵਿਗਿਆਨੀਆਂ ਨੇ ਕਿਹਾ ਹੈ ਕਿ ਸੁਪਨੇ ਮਨ ਅੰਦਰ ਦੱਬੀਆਂ ਖੁਆਹਿਸਾਂ ਦੀ ਪੂਰਤੀ ਹੁੰਦੇ ਹਨ । ਮਨੋਚਿਕਿਤਸਕ ਸਿਗਮੰਡ ਫਰਾਇਡ ਅਤੇ ਜੁੰਗ ਦਾ ਵਿਚਾਰ ਸੀ ਕਿ ਸੁਪਨਿਆਂ ਦੁਆਰਾ ਅਸੀਂ ਗੁਪਤ ਖਾਹਿਸ਼ਾਂ ਨੂੰ ਸੁਖਦਾਇਕ ਪ੍ਰਤੀਕਾਂ ਦਾ ਬਦਲ ਦੇ ਦਿੰਦੇ ਹਾਂ। ਇਸ ਤਰ੍ਹਾਂ ਅਸੀਂ ਆਪਣੇ ਮਨ ਨੂੰ ਸਤਾ ਰਹੀਆਂ ਬਿਰਤੀਆਂ ਨੂੰ ਛੁਪਾ ਲੈਂਦੇ ਹਾਂ।ਉਸ ਨੇ ਸੁਪਨਿਆਂ ਨੂੰ ਦੱਬੀਆਂ ਖਾਹਿਸ਼ਾਂ ਦੀ ਪੂਰਤੀ ਦੱਸਿਆ ਹੈ।ਸੁਪਨੇ ਲੈਂਦੇ ਸਮੇਂ ਇੰਝ ਪ੍ਰਤੀਤ ਹੁੰਦਾ ਹੈ ਜਿਵੇਂ ਉਹ ਸਭ ਹੁਬਹੂ ਵਾਪਰ ਰਿਹਾ ਹੋਵੇ ਅਸੀਂ ਅਸਲੀ ਜ਼ਿੰਦਗੀ ਜੀ ਰਹੇ ਹੋਈਏ ਪਰ ਜਦੋਂ ਜਾਗ ਆਉਂਦੀ ਹੈ ਤਾਂ ਇਹ ਕਲਪਨਾ ਜਿਹੀ ਪ੍ਰਤੀਤ ਹੁੰਦੀ ਹੈ।ਤੇ ਜਦੋਂ ਅਸੀਂ ਨੀਂਦ ‘ਚੋ ਬਾਹਰ ਹੋਕੇ ਦੇਖਦੇ ਹਾਂ ਤਾਂ ਸਭ ਕੁੱਝ ਦਿਸਦੇ ਉਲਟ ਹੁੰਦਾ ਹੈ।ਸੋ ਦੋਸਤੋਂ ਸੁਪਨੇ ਕਦੇ ਵੀ ਪੂਰੇ ਨਹੀਂ ਹੁੰਦੇ ਜੋ ਅਸੀਂ ਕਲਪਨਾ ਵਿੱਚ ਦੇਖਦੇ ਹਾਂ ਸੋਚਦੇ ਹਾਂ।ਕਦੇ ਵੀ ਨਰਾਜ਼ ਨਾ ਹੋਵੋ ਸੁਪਨੇ ਹਮੇਸ਼ਾ ਜਾਗਦੇ ਹੋਏ ਦੇਖੋ ਤਾ ਜੋ ਉਹਨਾਂ ਨੂੰ ਪੂਰਾ ਕੀਤਾ ਜਾ ਸਕੇ।

ਗਗਨਦੀਪ ਕੌਰ ਧਾਲੀਵਾਲ ਝਲੂਰ , ਬਰਨਾਲਾ ।

- ਖਾਣ-ਪੀਣ ਵਾਲੀਆਂ ਵਸਤੂਆਂ ਵਿਚ ਮਿਲਾਵਟ ਕਰਕੇ ਵੇਚਣ ਵਾਲੇ ਮਾਮਲੇ ਤਾਂ ਆਮ ਵੇਖਣ ਨੂੰ ਮਿਲਦੇ ਹਨ। ਦੁੱਧ ਵਿਚ ਪਾਣੀ, ਦੇਸੀ ਘਿਓ ਵਿਚ ਬਨਸਪਤੀ ਘਿਓ ਅਤੇ ਦਹੀਂ / ਪਨੀਰ ਅਤੇ ਖੋਏ ਵਿਚ ਮਿਲਾਵਟ ਕਰਨਾ ਆਮ ਗੱਲ ਹੈ, ਪਰ ਪਸ਼ੂਆਂ ਵਿੱਚ ਮਿਲਾਵਟ ਕਰਕੇ ਵੇਚਣ ਦੀ ਗੱਲ ਪਹਿਲੀ ਵਾਰ ਸਾਹਮਣੇ ਆਈ ਹੈ। ਸੋਸ਼ਲ ਮੀਡੀਆ ਉਪਰ ਘੁੰਮ ਰਹੀ ਇਕ ਵੀਡੀਓ ਵੇਖ ਕੇ ਮੈਂ ਦੰਗ ਰਹਿ ਗਿਆ ਕਿ ਪਸ਼ੂਆਂ ਵਿਚ ਵੀ ਮਿਲਾਵਟ ਹੋਣ ਲੱਗ ਪਈ ਹੈ। ਘੋੜਿਆਂ ਦਾ ਵਪਾਰ ਕਰਨ ਵਾਲੇ ਵਪਾਰੀਆਂ ਨੇ  ਕੱਪੜਿਆਂ ਦੇ ਇਕ ਵਪਾਰੀ ਨੂੰ ਲਾਲ ਘੋੜੇ ਦੀ ਥਾਂ ਕਾਲੇ /ਨੀਲੇ ਰੰਗ ਦਾ ਉੱਤਮ ਨਸਲ ਦਾ ਘੋੜਾ ਕਹਿ ਕੇ ਲਗਭਗ 23 ਲੱਖ ਰੁਪਏ ਦੀ ਠੱਗੀ ਮਾਰੀ ਹੈ । ਇਹ ਕਹਾਣੀ ਲਹਿਰਾਗਾਗਾ ਸ਼ਹਿਰ ਦੇ ਕੱਪੜਿਆਂ ਦੇ ਇਕ ਵਪਾਰੀ ਨਾਲ ਵਾਪਰੀ ਹੈ। ਠੱਗਾਂ ਦੇ ਧੱਕੇ ਚੜ੍ਹ ਚੁੱਕੇ ਕੱਪੜੇ ਦੇ ਵਪਾਰੀ ਨੇ ਸਬੰਧਿਤ ਪੁਲਿਸ ਸਟੇਸ਼ਨ ਵਿਚ ਦਰਜ ਕਰਵਾਈ ਇੱਕ ਸ਼ਿਕਾਇਤ ਵਿਚ ਦੱਸਿਆ ਕਿ ਉਸ ਨੇ ਘੋੜਿਆਂ ਦੇ ਵਪਾਰੀ ਕੋਲੋਂ ਸ਼ੌਕ ਨਾਲ ਘਰ ਵਿਚ ਰੱਖਣ ਲਈ ਇਕ ਵਧੀਆ ਨਸਲ ਦਾ ਕਾਲਾ /ਨੀਲਾ ਘੋੜਾ ਖਰੀਦਿਆ ਸੀ ਅਤੇ ਜਦੋਂ ਉਹ ਖ੍ਰੀਦੇ ਘੋੜੇ ਨੂੰ ਜਿਲ੍ਹਾ ਮਾਨਸਾ ਦੇ ਇਕ ਪਿੰਡ ਵਿਚੋਂ ਸ਼ਹਿਰ ਲਹਿਰਾਗਾਗਾ ਆਪਣੇ ਘਰ ਵਲ ਲਿਆ ਰਿਹਾ ਸੀ ਤਾਂ ਗਰਮੀ ਹੋਣ ਕਾਰਨ ਘੋੜੇ ਨੂੰ ਰਸਤੇ ਵਿਚ ਪਾਣੀ ਪਿਲਾਇਆ ਅਤੇ  ਬਾਲਟੀ ਵਿਚ ਜਿੰਨਾ ਪਾਣੀ ਬਚਿਆ   ਘੋੜੇ ਉਪਰ ਪਾ ਦਿੱਤਾ। ਪੀੜਤ ਵਪਾਰੀ ਨੇ ਦੱਸਿਆ ਕਿ ਜਿਉਂ ਪਾਣੀ ਘੋੜੇ ਉਪਰ ਪਾਇਆ ਤਾਂ  ਘੋੜੇ ਉਪਰ ਮਲਿਆ /ਪੇਂਟ ਕੀਤਾ ਸਾਰਾ ਕਾਲਾ/ਨੀਲਾ ਰੰਗ ਚੋ ਕੇ ਥੱਲੇ ਆ ਗਿਆ ਅਤੇ ਘੋੜਾ ਲਾਲ ਰੰਗ ਦਾ ਨਿਕਲਿਆ। ਲਾਲ ਰੰਗ ਦਾ ਦੇਸੀ ਘੋੜਾ ਵੇਖ ਕੇ ਖਰੀਦਦਾਰ ਦੇ ਪੈਰਾਂ ਹੇਠੋਂ ਜਮੀਨ ਖਿਸਕ ਗਈ। ਜਾਣਕਾਰੀ ਅਨੁਸਾਰ ਪੁਲਿਸ ਨੇ ਧੋਖਾਧੜੀ ਕਰਨ ਵਾਲੇ ਵਪਾਰੀਆਂ ਵਿਰੁੱਧ ਮਾਮਲਾ ਦਰਜ ਕਰਕੇ ਉਨ੍ਹਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਉਪਰਲੀ ਘਟਨਾ ਨੂੰ ਵੇਖ ਕੇ ਹੈਰਾਨੀ ਇਸ ਗੱਲ ਦੀ ਹੈ ਕਿ ' ਇਸ ਤਰ੍ਹਾਂ ਦੀ ਵੀ ਠੱਗੀ ਵੱਜ ਸਕਦੀ ਐ ਅਤੇ ਇੰਝ ਵੀ ਹੋ ਸਕਦੈ!'
-ਸੁਖਦੇਵ ਸਲੇਮਪੁਰੀ
09780620233
24 ਅਪ੍ਰੈਲ, 2022.

ਊਂਝਾਂ ਵਿਰੋਧੀਆਂ ਲਾਉਣੀਆਂ ਬਹੁਤ ਤੈਨੂੰ,

ਮਸਤ ਚਾਲ ਨਾਲ ਚੱਲਦਾ ਰਹੀਂ ਮਾਨਾ।

ਰੱਖੀਂ ਆਸਰਾ ਇੱਕ ਅਕਾਲਪੁਰਖ ਦਾ ਤੂੰ,

ਲਾਜ ਰੱਖਣ ਲਈ ਓਸੇ ਨੂੰ ਕਹੀਂ ਮਾਨਾ।

ਵਾਅਦੇ ਚਹੇਤਿਆਂ ਦੇ ਰੱਖੀਂ ਵਸਾ ਹਿਰਦੇ,

ਬਿਲਕੁਲ ਧੌਂਸ ਨਾ ਕਿਸੇ ਦੀ ਸਹੀਂ ਮਾਨਾ।

ਰਿਆਇਤਾਂ ਚਹੇਤਿਆਂ ਨੂੰ ਨਾ ਸਾਰੀਆਂ ਵੰਡ ਦੇਵੀਂ,

ਸੱਭ ਨੂੰ ਭਰੋਸਾ ਦੇ ਵਿੱਚ ਤੂੰ ਲਈਂ ਮਾਨਾ।

ਨਿਵੇਕਲੇ ਕਾਜ ਕਰ ਵਿਖਾਈਂ ਪੰਜਾਬੀਆਂ ਨੂੰ,

ਆਖਿਰ ਯੋਧਿਆ ਬੱਲੇ ਬੱਲੇ ਹੋਣੀ ਐਂ ਤਾਂ ਤੇਰੀ।

ਪੰਜਾਬ ਲਈ ਸੱਭ ਕੁਰਬਾਨ ਕਰਦੀਂ ਇਹੀ ਪਿਓ ਤੇ ਇਹੀ ਹੈ ਮਾਂ ਤੇਰੀ।

ਜਸਵੀਰ ਸ਼ਰਮਾਂ ਦੱਦਾਹੂਰ

ਸ੍ਰੀ ਮੁਕਤਸਰ ਸਾਹਿਬ

95691-49556

23 ਅਪ੍ਰੈਲ 2022 ਨੂੰ ਸ਼ਾਇਰ ਹਰਮਿੰਦਰ ਸਿੰਘ ਨੂੰ 2 ਸਾਲ ਹੋ ਗਏ ਕੱਲਮ ਦੇ ਲਾਲ ਆਪਣੇ ਜਜ਼ਬਾਤ ਲਿਖਦਿਆਂ ਨੂੰ। ਉਹਨਾਂ ਨੇ ਆਪਣੀ ਪਹਿਲੀ ਰਚਨਾ 23 ਅਪ੍ਰੈਲ 2020 ਨੂੰ ਲਿਖੀ ਸੀ। ਜੋ ਕਿ ਇੱਕ ਤਾਰੇ ਉਪਰ ਲਿਖੀ ਗਈ ਰਚਨਾ ਹੈ। ਇਨ੍ਹਾਂ ਦੋ ਸਾਲਾਂ ਦੇ ਵਿੱਚ ਸ਼ਾਇਰ ਹਰਮਿੰਦਰ ਸਿੰਘ ਨੇ 237 ਰਚਨਾਵਾਂ ਲਿਖ ਦਿੱਤੀਆਂ ਹਨ। ਜਦੋਂ ਕਿ ਹੁਣ ਤਕ ਸਿਰਫ 42 ਰਚਨਾਵਾਂ ਹੀ ਛਪਾਈਆਂ ਹਨ। ਨਿੱਕੀ ਉਮਰ ਵਿਚ ਕਲਮ ਦੇ ਨਾਲ ਸਫ਼ਰ ਸ਼ੁਰੂ ਕਰਨਾ ਇੱਕ ਰੱਬ ਵੱਲੋਂ ਦਿੱਤੀ ਗਈ ਵੱਡਮੁੱਲੀ ਦਾਤ ਹੁੰਦੀ ਹੈ। ਇਹਨਾਂ ਨੂੰ ਲਿਖਣ ਦਾ ਸ਼ੌਕ ਡਾਕਟਰ ਸਤਿੰਦਰ ਸਰਤਾਜ ਤੋਂ ਹੀ ਪਿਆ। ਅਕਸਰ ਦੇਖਣ ਵਿਚ ਆਉਂਦਾ ਹੈ ਕਿ ਅੱਜਕਲ ਦੀ ਨੌਜਵਾਨ ਪੀੜ੍ਹੀ ਨਸ਼ਿਆਂ ਵੱਲ ਵਧ ਰਹੀ ਹੈ। ਪ੍ਰੰਤੂ ਇਸ ਤਰ੍ਹਾਂ ਦੇ ਨੌਜਵਾਨ ਵੀ ਹਨ ਜੋ ਕਲਮ ਦਾ ਨਸ਼ਾ ਹੀ ਕਰਦੇ ਹਨ ਇਹ ਦੇਖ ਕੇ ਆਪਣੀ ਖੁਸ਼ੀ ਮਹਿਸੂਸ ਹੁੰਦੀ ਹੈ। ਇਨ੍ਹਾਂ ਨੂੰ 7 ਅਕਤੂਬਰ ਤੋਂ 2021 ਨੂੰ ਰਾਮਗੜ੍ਹੀਆ ਸਿੱਖ ਫਾਊਡੇਸ਼ਨ ਤਾਰਿਓ ਕਨੇਡਾ ਵੱਲੋਂ ਭਾਈ ਲਾਲੋ ਜੀ ਅਵਾਰਡ ਨਾਲ ਨਿਵਾਜਿਆ ਗਿਆ। ਹੋਰ ਵੀ ਕਈ ਪੰਜਾਬ ਦੀਆਂ ਸਾਹਿਤਕ ਸੰਸਥਾਵਾਂ ਵੱਲੋਂ ਵੱਖ ਵੱਖ ਸਨਮਾਨ ਪੱਤਰ ਦੇ ਕੇ ਇਹਨਾਂ ਨੂੰ ਸਨਮਾਨਿਤ ਕੀਤਾ ਜਾ ਚੁੱਕਾ ਹੈ। ਇਹਨਾ ਦੀ ਖੁਸ਼ਕਿਸਮਤੀ ਹੈ ਕਿ ਛੋਟੀ ਉਮਰ ਵਿੱਚ ਹੀ ਇਨ੍ਹਾਂ ਨੂੰ ਸਾਹਿਤਕ ਸਮਾਂ ਪੱਤਰ ਲੈਣ ਦਾ ਮੌਕਾ ਮਿਲਿਆ। ਜੋ ਕਿ ਹਰੇਕ ਲੇਖਕ ਦੀ ਇਕ ਦਿਨ ਦੀ ਇੱਛਾ ਹੁੰਦੀ ਹੈ। ਪ੍ਰਮਾਤਮਾ ਅੱਗੇ ਅਰਦਾਸ ਕਰਦੇ ਹਾਂ ਕਿ ਆਉਣ ਵਾਲੇ ਸਮੇਂ ਵਿੱਚ ਇਹ ਹੋਰ ਸਾਹਿਤਕ ਪ੍ਰਾਪਤੀਆਂ ਕਰਨ ਤੇ ਉਸ ਮੁਕਾਮ ਤੇ ਪਹੁੰਚਣ।