ਪੰਜਾਬ

ਢਲਦੇ ਸੂਰਜ
-ਬਿਨ੍ਹ ਪਾਣੀ ਰੁੱਖ 
ਫਲਦੇ ਵੇਖੇ! 
ਬਿਨ੍ਹ ਮਾਵਾਂ ਪੁੱਤ
ਪਲਦੇ ਵੇਖੇ!
ਲੋਹੇ ਦੇ ਪੁੱਲ
ਗਲ੍ਹਦੇ ਵੇਖੇ!
ਸਾਧੂ ਵੀ ਹੱਥ
ਮਲਦੇ ਵੇਖੇ!
ਚੋਰ ਸਾਧਾਂ ਨਾਲ 
ਰਲਦੇ ਵੇਖੇ! 
ਬਿਨ੍ਹ ਬੋਲਿਆਂ ਬੁੱਲ੍ਹ 
ਹਲਦੇ ਵੇਖੇ! 
ਚੜ੍ਹਦੇ ਸੂਰਜ
ਢਲਦੇ ਵੇਖੇ!
ਚੜ੍ਹਦੇ ਸੂਰਜ 
ਢਲਦੇ ਵੇਖੇ! 
-ਸੁਖਦੇਵ ਸਲੇਮਪੁਰੀ
09780620233
23 ਅਗਸਤ 2022.

ਪੁਰਖਿਆਂ ਮੁਤਾਬਕ ਕਿਸੇ ਖਾਸ ਮਕਸਦ ਲਈ ਵਰਤੀਆਂ ਗੱਲਾਂ ਜਿਨ੍ਹਾਂ ਨੇ ਰਿਵਾਜਾਂ ਦਾ ਰੂਪ ਧਾਰਨ ਕੀਤਾ 

ਦੋਸਤੋ ਸਮਾਂ ਆਪਣੀ ਚਾਲੇ ਚੱਲਦਾ ਰਹਿੰਦਾ ਹੈ, ਤਬਦੀਲੀ ਵੀ ਕੁਦਰਤ ਦਾ ਨਿਯਮ ਹੈ ਇਹ ਹਰ ਹੀਲੇ ਆਉਣੀ ਹੈ,ਇਸ ਤੋਂ ਕਦੇ ਵੀ ਨਾਬਰ ਨਹੀਂ ਹੋਇਆ ਜਾ ਸਕਦਾ, ਅਤੇ ਸਾਨੂੰ  ਨਾ ਚਾਹੁੰਦਿਆਂ ਹੋਇਆਂ ਵੀ ਉਸ ਤਬਦੀਲੀ ਨਾਲ ਤਬਦੀਲ ਹੋਣਾ ਪੈਂਦਾ ਹੈ,ਭਾਵ ਸਮੇਂ ਮੁਤਾਬਿਕ ਢਲਣਾ ਪੈਂਦਾ ਹੈ।

       ਜੇਕਰ ਪੁਰਾਤਨ ਸਮਿਆਂ ਦੀ ਗੱਲ ਕਰੀਏ ਤਾਂ ਪੁਰਖਿਆਂ ਦੇ ਦੱਸਣ ਮੁਤਾਬਿਕ ਓਹ ਗੱਲਾਂ ਦਾ ਮਕਸਦ ਕੁੱਝ ਹੋਰ ਸੀ ਪਰ ਵੇਖੋ ਵੇਖੀ ਕਹੀਏ ਜਾਂ ਫਿਰ ਦੇਸੀ ਬੋਲੀ ਵਿੱਚ ਕਹੀਏ ਜੋ ਆਮ ਚੰਗੀ ਨਹੀਂ ਲਗਦੀ ਭਾਵ ਲਾਈ ਲੱਗ ਵਾਲੀਆਂ ਗੱਲਾਂ ਬਣ ਗਈਆਂ ਜਿਨ੍ਹਾਂ ਦੇ ਪਿਛੋਕੜ ਬਾਰੇ ਕਦੇ ਵੀ ਕਿਸੇ ਨੇ ਜਾਨਣ ਦੀ ਕੋਸ਼ਿਸ਼ ਹੀ ਨਹੀਂ ਕੀਤੀ ਸਗੋਂ ਓਨਾਂ ਗੱਲਾਂ ਨੂੰ ਇੱਕ ਰਿਵਾਜ ਦਾ ਰੂਪ ਦੇ ਦਿੱਤਾ, ਜੇਕਰ ਕਿਸੇ ਬੀਬੀ ਭੈਣ ਮਾਤਾ ਨੂੰ ਜਾਂ ਕਿਸੇ ਨੌਜਵਾਨ ਨੂੰ ਪੁੱਛੀਏ ਤਾਂ ਅੱਗੋਂ ਘੜਿਆ ਘੜਾਇਆ ਇੱਕੋ ਜਵਾਬ ਮਿਲਦਾ ਹੈ ਕਿ ਇਹਦਾ ਪਤਾ ਤਾਂ ਨਹੀਂ ਪਰ ਮੇਰੀ ਸੱਸ ਜਾਂ ਦਾਦੀ ਸੱਸ ਜਾਂ ਸਾਡੇ ਵੱਡੇ ਕਰਦੇ ਰਹੇ, ਕਰਕੇ ਹੀ ਮੈਂ ਓਹਨਾਂ ਦੇ ਹੁਕਮ ਤੇ ਫੁੱਲ ਚੜ੍ਹਾ ਰਹੀ ਹਾਂ,ਇਹੋ ਜਿਹੀਆਂ ਗੱਲਾਂ ਆਮ ਹੀ ਸੁਣਨ ਨੂੰ ਮਿਲਦੀਆਂ ਹਨ। ਅਤੇ ਓਹੀ ਅਜੋਕੇ ਰਿਵਾਜ ਪ੍ਰਚਲਿਤ ਹੋ ਕੇ ਅੱਜ ਤੱਕ ਓਵੇਂ ਹੀ ਚੱਲ ਰਹੀਆਂ ਹਨ।

         ਤਿੰਨ ਗੱਲਾਂ ਜੋ ਪੁਰਖਿਆਂ ਤੋਂ ਜਾਣੀਆਂ ਨੇ ਅੱਜ ਆਪਾਂ ਓਨਾਂ ਦੀ ਗੱਲ ਕਰਦੇ ਹਾਂ। ਵਿਆਹ ਸਮੇਂ ਟੋਕਰੇ ਥੱਲੇ ਬਿੱਲੀ ਤਾੜਨਾ,ਕੌਲੀਂ ਤੇਲ ਪਾਉਣਾ ਅਤੇ ਡੋਲੀ ਤੋਰਨ ਸਮੇਂ ਕਾਰਾਂ ਦੇ ਟਾਇਰਾਂ ਤੇ ਪਾਣੀ ਪਾ ਕੇ ਘਰੋਂ ਡੋਲੀ ਵਿਦਾ ਕਰਨੀ।

         ਪਹਿਲੀ ਗੱਲ ਟੋਕਰੇ ਥੱਲੇ ਬਿੱਲੀ ਤਾੜਨ ਦੀ ਗੱਲ ਹੀ ਕਰਦੇ ਹਾਂ,ਸਿਆਣਿਆਂ ਦੇ ਦੱਸਣ ਮੁਤਾਬਕ ਕਿਸੇ ਪਰਿਵਾਰ ਦੇ ਘਰ ਨਵੀਂ ਵਿਆਹੀ ਜੋੜੀ ਪਹੁੰਚੀ, ਆਪਾਂ ਸਭਨਾਂ ਨੂੰ ਇਸ ਬਾਬਤ ਚੰਗੀ ਤਰ੍ਹਾਂ ਪਤਾ ਹੈ ਕਿ ਇਹ ਮਹੌਲ ਬੜੀ ਖੁਸ਼ੀ ਭਰਿਆ ਹੁੰਦਾ ਹੈ ਤੇ ਸਾਰਾ ਟੱਬਰ ਮੇਲ ਗੇਲ ਆਂਢ ਗੁਆਂਢ ਜਾਂ ਸਾਰੇ ਘਰ ਦੇ ਪਰਿਵਾਰਕ ਮੈਂਬਰ ਨਵੀਂ ਨਿਵੇਲੀ ਵਹੁਟੀ ਜੋ ਘਰ ਵਿੱਚ ਲਛਮੀ ਦੇ ਰੂਪ ਵਿੱਚ ਪ੍ਰਵੇਸ਼ ਕਰਦੀ ਹੈ ਉਸ ਨੂੰ ਨੇੜਿਉਂ ਵੇਖਣ ਦਾ ਚਾਹਵਾਨ ਵੀ ਹੁੰਦਾ ਹੈ ਤੇ ਖਾਸ ਕਰਕੇ ਘਰ ਦੀ ਮੁੱਖ ਬੀਬੀ ਭਾਵ ਵਿਆਂਦੜ ਦੀ ਮਾਂ ਨੇ ਤਾਂ ਪਾਣੀ ਵਾਰਨਾ ਵਿਹਾਰ ਵੀ ਕਰਨਾ ਹੁੰਦਾ ਹੈ। ਹੋਇਆ ਕੀ ਐਨ ਓਸੇ ਵਕਤ ਵਿਹੜੇ ਵਿੱਚ ਇੱਕ ਬਿੱਲੀ ਆ ਗਈ, ਤੇ ਘਰ ਦਿਆਂ ਨੇ ਉਸ ਨੂੰ ਟੋਕਰੇ ਥੱਲੇ ਤਾੜ ਦਿੱਤਾ, ਸਿਰਫ਼ ਇਸ ਕਰਕੇ ਕਿ ਅਸੀਂ ਤਾਂ ਸਾਰੇ ਇਧਰ ਡੋਲੀ ਨੂੰ ਉਤਾਰਨ ਵੱਲ ਰੁੱਝੇ ਹੋਵਾਂਗੇ, ਤੇ ਬਿੱਲੀ ਮਗਰੋਂ ਮਠਿਆਈ ਨੂੰ,ਦੁੱਧ ਨੂੰ ਜਾਂ ਕਿਸੇ ਬਣੀ ਸਬਜ਼ੀ ਭਾਜੀ ਫੁਲਕਿਆਂ ਆਦਿ ਨੂੰ ਮੂੰਹ ਨਾ ਮਾਰ ਜਾਏ, ਸਿਰਫ਼ ਇਸ ਲਈ ਤਾੜੀ ਸੀ, ਜਦੋਂ ਪਰਿਵਾਰ ਨੇ ਆਪਣਾ ਕਾਰ ਵਿਹਾਰ ਕਰ ਲਿਆ ਤਾਂ ਟੋਕਰੇ ਥੱਲਿਓਂ ਬਿੱਲੀ ਕੱਢ ਦਿੱਤੀ।ਪਰ ਇਹ ਅੱਜ ਵੀ ਕਈ ਪਰਿਵਾਰਾਂ ਵੱਲੋਂ ਕਿਸੇ ਖਾਸ ਇਲਾਕਿਆਂ ਚ ਰਿਵਾਜ ਪ੍ਰਚਲਿਤ ਹੈ ਭਾਵ ਡੋਲੀ ਉਤਾਰਨ ਵੇਲੇ ਬਿੱਲੀ ਭਾਲਦੇ ਫਿਰਦੇ ਹਨ, ਇਉਂ ਕਦੇ ਸਮੇਂ ਤੇ ਬਿੱਲੀ ਮਿਲਦੀ ਹੈ?ਜਿਸ ਨੂੰ ਰਿਵਾਜ ਬਣਾ ਲਿਆ ਹੈ।ਅਸਲ ਗੱਲ ਤਾਂ ਓਹ ਜੋ ਉਪਰੋਕਤ ਲਿਖੀ ਹੈ ਓਹੀ ਸੀ ਨਾਹ ਕਿ ਕੋਈ ਰਿਵਾਜ ਸੀ।

         ਹੁਣ ਜੇ ਅਗਲੀ ਗੱਲ ਕਰੀਏ ਕੌਲੀਂ ਤੇਲ ਪਾਉਣਾ ਓਹ ਵੀ ਪੁਰਖਿਆਂ ਤੋਂ ਕੁੱਝ ਇਸ ਤਰ੍ਹਾਂ ਪਤਾ ਲੱਗਾ ਹੈ ਕਿ ਪੁਰਾਤਨ ਪੰਜਾਬ ਵਿੱਚ ਬਹੁਤ ਵੱਡੇ ਵੱਡੇ ਅਤੇ ਭਾਰੇ ਲੱਕੜ ਦੇ ਗੇਟ ਘਰਾਂ ਨੂੰ ਲਗਾਏ ਜਾਂਦੇ ਸਨ, ਉਨ੍ਹਾਂ ਦੀ ਥੱਲੇ ਜੋ ਚੂਲ ਹੁੰਦੀ ਸੀ ਜਿਸ ਵਿੱਚ ਗੇਟ ਦਾ ਥੱਲਾ ਟਿਕਾਇਆ ਹੁੰਦਾ ਸੀ ਓਹ ਵੀ ਭਾਰੀ ਲੱਕੜ ਵਿੱਚ ਸੁਰਾਖ਼ ਕੱਢਕੇ ਜ਼ਮੀਨ ਵਿੱਚ ਅੱਡਾ ਜਿਹਾ ਬਣਾ ਕੇ ਗੱਡਿਆ ਜਾਂਦਾ ਸੀ ਤੇ ਉਸ ਉਪਰ ਇੱਕ ਪਾਸੇ ਦੇ ਤਖ਼ਤੇ ਦੀ ਚੂਲ ਰੱਖੀ ਜਾਂਦੀ ਸੀ, ਦੂਜੇ ਪਾਸੇ ਵੀ ਇਉਂ ਹੀ ਕੀਤਾ ਜਾਂਦਾ ਸੀ ਗੇਟ ਕਾਫੀ ਭਾਰੇ ਹੁੰਦੇ ਸਨ, ਗੇਟ ਬੰਦ ਕਰਨ ਤੇ ਖੋਲ੍ਹਣ ਵੇਲੇ ਜਦ ਲੱਕੜ ਆਪਸ ਵਿੱਚ ਇੱਕ ਦੂਜੇ ਨਾਲ ਖਹਿੰਦੀ ਸੀ ਤਾਂ ਕਦੇ ਕਦੇ ਬੜੀ ਭੈੜੀ ਜਿਹੀ ਆਵਾਜ਼ ਆਇਆ ਕਰਦੀ ਸੀ, ਤੇ ਉਸ ਨੂੰ ਤਰ ਰੱਖਣ ਲਈ ਅਤੇ ਆਵਾਜ਼ ਨਾ ਆਵੇ ਇਸ ਲਈ ਸਰੋਂ ਦਾ ਤੇਲ ਪਾ ਦਿੱਤਾ ਜਾਂਦਾ ਸੀ ਤਾਂ ਕਿ ਗੇਟ ਰਵਾਂ ਬੰਦ ਹੋਵੇ ਤੇ ਰੈਲਾ ਖੁਲ੍ਹ ਸਕੇ। ਇੱਕ ਵਾਰ ਕੁਦਰਤੀ ਤੇਲ ਪਾਉਂਦਿਆਂ ਤੋਂ ਕਿਸੇ ਘਰ ਵਿੱਚ ਕੋਈ ਮਹਿਮਾਨ ਆ ਗਿਆ ਤੇ ਉਸ ਨੂੰ ਗੇਟ ਤੇ ਦੋ ਕੁ ਮਿੰਟ ਰੁਕਣਾ ਪਿਆ ਕਿਉਂਕਿ ਘਰ ਦਾ ਮੁਖੀਆ ਗੇਟ ਨੂੰ ਰਵਾਂ ਕਰਨ ਲਈ ਤੇਲ ਪਾ ਰਿਹਾ ਸੀ,ਤੇ ਵੇਖੋ ਵੇਖੀ ਇਹ ਰਿਵਾਜ ਪ੍ਰਚਲਿਤ ਹੋ ਗਿਆ, ਜੋ ਅੱਜ ਤੱਕ ਵੀ ਰਿਵਾਜ ਦੇ ਤੌਰ ਤੇ ਪ੍ਰਚੱਲਤ ਹੈ ਕਿ ਘਰ ਕਿਸੇ ਖਾਸ ਮਹਿਮਾਨ ਦੇ ਆਏ ਤੋਂ ਕੌਲੀਂ ਤੇਲ ਪਾਇਆ ਜਾਂਦਾ ਹੈ ਤੇ ਓਸੇ ਸਮੇਂ ਤੋਂ ਹੀ ਇਹ ਵੀ ਇੱਕ ਰਿਵਾਜ ਦੀ ਤਰ੍ਹਾਂ ਪ੍ਰਚੱਲਤ ਹੋ ਗਿਆ, ਜਦੋਂ ਕਿ ਕਿਸੇ ਆਏ ਗਏ ਪ੍ਰਾਹੁਣੇ ਨਾਲ ਇਸ ਦਾ ਕੋਈ ਵੀ ਮਤਲਬ ਨਹੀਂ ਤੇ ਦੂਰ ਦਾ ਵੀ ਸਬੰਧ ਨਹੀ,ਪਰ ਅੱਜ ਵੀ ਅਸੀਂ ਓਵੇਂ ਹੀ ਕਰ ਰਹੇ ਹਾਂ ਜਦੋਂ ਕਿ ਹੁਣ ਆਲੀਸ਼ਾਨ ਕੋਠੀਆਂ ਬਣ ਚੁੱਕੀਆਂ ਹਨ ਪਰ ਅਸੀਂ ਲਕੀਰ ਦੇ ਫਕੀਰ ਬਣੇ ਹੋਏ ਹਾਂ ਤੇ ਆਏ ਕਿਸੇ ਖਾਸ ਮਹਿਮਾਨ ਵੇਲੇ ਕੌਲੀਂ ਤੇਲ ਪਾਉਣਾ ਚਾਲੂ ਰੱਖਿਆ ਹੋਇਆ ਹੈ।

          ਹੁਣ ਆਪਾਂ ਆਉਣੇ ਆਂ ਤੀਜੀ ਗੱਲ ਤੇ ਜੋ ਡੋਲੀ ਤੋਰਨ ਵੇਲੇ ਟਾਇਰਾਂ ਤੇ ਪਾਣੀ ਪਾਉਣਾ।ਸਹੀ ਮਾਅਨਿਆਂ ਚ ਪਹਿਲੇ ਸਮਿਆਂ ਵਿੱਚ ਡੋਲੀਆਂ ਰੱਥ ਜਾਂ ਬਲਦਾਂ ਵਾਲੇ ਗੱਡਿਆਂ ਤੇ ਜਾਂਦੀਆਂ ਰਹੀਆਂ ਹਨ,ਰਥ ਜਾਂ ਗੱਡਿਆਂ ਦੇ ਲੱਕੜ ਤੋਂ ਬਣੇ ਹੋਏ ਪਹੀਏ ਜਦੋਂ ਇੱਕ ਦੂਜੇ ਨਾਲ ਚੱਲਦੇ ਚੱਲਦੇ ਖਹਿੰਦੇ ਸਨ ਤਾਂ ਕਾਫ਼ੀ ਡਰਾਉਣੀ ਜਿਹੀ ਆਵਾਜ਼ ਆਇਆ ਕਰਦੀ ਸੀ ਤੇ ਸਾਡੇ ਪੁਰਖਿਆਂ ਦੇ ਦੱਸਣ ਮੁਤਾਬਿਕ ਓਨਾਂ ਸਮਿਆਂ ਵਿੱਚ ਡੋਲੀ ਨੂੰ ਲੁਟੇਰਿਆਂ ਵੱਲੋਂ ਲੁੱਟਿਆ ਵੀ ਜਾਂਦਾ ਰਿਹਾ ਹੈ, ਪਾਣੀ ਪਾਉਣ ਦਾ ਮਤਲਬ ਸਿਰਫ਼ ਓਹਨਾਂ ਗੱਡਿਆਂ ਜਾਂ ਰਥਾਂ ਦੇ ਪਹੀਆਂ ਵਿੱਚੋਂ ਆਵਾਜ਼ ਨਾ ਆਉਣ ਤੱਕ ਹੀ ਸੀਮਤ ਸੀ, ਸਿਰਫ਼ ਇਸ ਲਈ ਪਾਣੀ ਪਾਇਆ ਜਾਂਦਾ ਰਿਹਾ ਹੈ, ਜਦੋਂ ਕਿ ਅਜੋਕੇ ਅਗਾਂਹਵਧੂ ਅਤੇ ਮਾਡਰਨ ਜ਼ਮਾਨੇ ਵਿੱਚ ਓਹ ਜਗ੍ਹਾ ਮਹਿੰਗੀਆਂ ਕਾਰਾਂ ਤੇ ਇਥੋਂ ਤੱਕ ਕਿ ਹੈਲੀਕਾਪਟਰਾਂ ਅਤੇ ਹਵਾਈ ਜਹਾਜ਼ਾਂ ਨੇ ਲੈ ਲਈ ਹੈ,ਪਰ ਅਸੀਂ ਹਾਲੇ ਵੀ ਲਕੀਰ ਦੇ ਫਕੀਰ ਬਣੇ ਹੋਏ ਆ ਭਾਵ ਕਾਰਾਂ ਦੇ ਟਾਇਰਾਂ ਤੇ ਪਾਣੀ ਪਾ ਕੇ ਡੋਲੀ ਨੂੰ ਵਿਦਾ ਕਰਦੇ ਹਾਂ।ਓਹ ਤਾਂ ਖ਼ੈਰ ਪਹੁੰਚ ਤੋਂ ਬਾਹਰ ਦੀ ਗੱਲ ਹੈ ਨਹੀਂ ਤਾਂ ਅਸੀਂ ਹੈਲੀਕਾਪਟਰਾਂ ਅਤੇ ਹਵਾਈ ਜਹਾਜ਼ਾਂ ਦੇ ਟਾਇਰਾਂ ਤੇ ਵੀ ਪਾਣੀ ਪਾਉਣ ਦੀ ਢਿੱਲ ਨਾ ਕਰੀਏ ਪਰ ਓਥੇ ਪਹੁੰਚਿਆ ਨਹੀਂ ਜਾਂਦਾ।

          ਸੋ ਦੋਸਤੋ ਸਮਾਂ ਬਹੁਤ ਅੱਗੇ ਲੰਘ ਚੁੱਕਿਆ ਹੈ ਸਾਨੂੰ ਸਾਰਿਆਂ ਨੂੰ ਸਮੇਂ ਅਨੁਸਾਰ ਢਲਣਾ ਹੀ ਪਵੇਗਾ।ਇਹ ਕੁੱਝ ਕੁ ਗੱਲਾਂ ਸਨ ਜੋ ਵਡੇਰੀ ਉਮਰ ਦੇ ਸਾਡੇ ਪੁਰਖਿਆਂ ਤੋਂ ਕੁੱਝ ਕੁ ਦਿਨ ਪਹਿਲਾਂ ਹੀ ਸੁਣੀਆਂ ਸਨ ਜੋ ਤੁਹਾਡੇ ਸਭਨਾਂ ਨਾਲ ਸਾਂਝੀਆਂ ਕੀਤੀਆਂ ਨੇ, ਹੋਰ ਵੀ ਜਿਵੇਂ ਜਿਵੇਂ ਕਿਸੇ ਪੁਰਾਤਨ ਰੀਤੀ ਰਿਵਾਜਾਂ ਦਾ ਪੁਰਖਿਆਂ ਤੋਂ ਪਤਾ ਲੱਗੇਗਾ ਓਹ ਤੁਹਾਡੇ ਨਾਲ ਜ਼ਰੂਰ ਸਾਂਝੀਆਂ ਕਰਾਂਗਾ।

ਜਸਵੀਰ ਸ਼ਰਮਾਂ ਦੱਦਾਹੂਰ

ਸ੍ਰੀ ਮੁਕਤਸਰ ਸਾਹਿਬ

95691-49556

         ਹਠੂਰ,23,ਅਗਸਤ-(ਕੌਸ਼ਲ ਮੱਲ੍ਹਾ)-ਅੱਜ ਦੇ ਲਾਲਚੀ ਯੁੱਗ ਵਿਚ ਕੁਝ ਅਜਿਹੇ ਵਿਅਕਤੀ ਵੀ ਹਨ ਜਿਨ੍ਹਾ ਨੇ ਇਮਾਨਦਾਰੀ ਨੂੰ ਜ਼ਿੱਦਾ ਰੱਖਿਆ ਹੋਇਆ ਹੈ।ਇਸ ਦੀ ਮਿਸਾਲ ਪਿੰਡ ਗਾਲਿਬ ਖੁਰਦ ਦੇ ਨੌਜਵਾਨ ਕੁਲਵੀਰ ਸਿੰਘ ਤੋ ਮਿਲਦੀ ਹੈ।ਇਸ ਸਬੰਧੀ ਜਾਣਕਾਰੀ ਦਿੰਦਿਆ ਸ੍ਰੋਮਣੀ ਅਕਾਲੀ ਦਲ (ਬਾਦਲ)ਦੇ ਸੀਨੀਆਰ ਆਗੂ ਸਰਗਣ ਸਿੰਘ ਵਾਸੀ ਰਸੂਲਪੁਰ (ਮੱਲ੍ਹਾ) ਨੇ ਦੱਸਿਆ ਕਿ ਕੁਝ ਦਿਨ ਪਹਿਲਾ ਉਨ੍ਹਾ ਦਾ ਸਪੁੱਤਰ ਅਤਿੰਦਰਪਾਲ ਸਿੰਘ ਕਿਸੇ ਕੰਮ ਜਗਰਾਓ ਕਚਹਿਰੀ ਗਿਆ,ਜਿਥੇ ਉਸ ਦਾ ਬਟੂਆ ਡਿੱਗ ਪਿਆ ਜਿਸ ਵਿਚ ਜਰੂਰੀ ਆਈ ਕਾਰਡ ਅਤੇ ਦਸ ਹਜਾਰ ਰੁਪਏ ਸਨ,ਉਸ ਨੇ ਕਚਹਿਰੀ ਵਿਚ ਕਾਫੀ ਭਾਲ ਕੀਤੀ ਪਰ ਉਸ ਨੂੰ ਬਟੂਆ ਨਹੀ ਮਿਿਲਆ।ਬੀਤੀ ਰਾਤ ਪਿੰਡ ਗਾਲਿਬ ਖੁਰਦ ਦੇ ਨੌਜਵਾਨ ਕੁਲਵੀਰ ਸਿੰਘ ਨੇ ਸੋਸਲ ਮੀਡੀਆ ਤੇ ਆਪਣੀ ਵੀ ਡੀ ਓ ਜਾਰੀ ਕੀਤੀ ਕਿ ਮੈਨੂੰ ਜਗਰਾਉ ਕਚਹਿਰੀ ਵਿਚੋ ਇੱਕ ਬਟੂਆ ਮਿਿਲਆ ਹੈ ਜਿਸ ਦਾ ਵੀ ਬਟੂਆ ਹੈ ਉਹ ਵਿਅਕਤੀ ਆਪਣੀ ਨਿਸਾਨੀ ਦੱਸ ਕੇ ਬਟੂਆ ਮੇਰੇ ਤੋ ਪ੍ਰਾਪਤ ਕਰ ਸਕਦਾ ਹੈ।ਇਹ ਵੀਡੀਓ ਦੇਖਣ ਉਪਰੰਤ ਅਤਿੰਦਰਪਾਲ ਸਿੰਘ ਨੇ ਆਪਣਾ ਬਟੂਆ ਪਿੰਡ ਗਾਲਿਬ ਖੁਰਦ ਦੇ ਨੌਜਵਾਨ ਕੁਲਵੀਰ ਸਿੰਘ ਤੋ ਜਰੂਰੀ ਕਾਗਜ ਅਤੇ ਦਸ ਹਜਾਰ ਰੁਪਏ ਸਮੇਤ ਪ੍ਰਾਪਤ ਕਰਕੇ ਧੰਨਵਾਦ ਕੀਤਾ।ਇਸ ਮੌਕੇ ਸ੍ਰੋਮਣੀ ਅਕਾਲੀ ਦਲ (ਬਾਦਲ)ਦੇ ਸੀਨੀਅਰ ਆਗੂ ਸਰਗਣ ਸਿੰਘ ਨੇ ਕਿਹਾ ਕਿ ਸਾਨੂੰ ਨੌਜਵਾਨ ਕੁਲਵੀਰ ਸਿੰਘ ਦੀ ਸੋਚ ਤੋ ਸੇਧ ਲੈਣੀ ਚਾਹੀਦੀ ਹੈ ਜਿਸ ਨੇ ਇਮਾਨਦਾਰੀ ਦਿਖਾਉਦਿਆ ਇਹ ਬਟੂਆ ਵਾਪਸ ਕੀਤਾ ਹੈ।

ਫੋਟੋ ਕੈਪਸ਼ਨ:- ਅਤਿੰਦਰਪਾਲ ਸਿੰਘ ਦਾ ਡਿੱਗਿਆ ਬਟੂਆ ਨੌਜਵਾਨ ਕੁਲਵੀਰ ਸਿੰਘ ਵਾਪਸ ਕਰਦਾ ਹੋਇਆ। 

ਜਗਰਾਉ 22 ਅਗਸਤ (ਅਮਿਤਖੰਨਾ)ਸੰਤ ਬਾਬਾ ਨੰਦ ਸਿੰਘ ਨਾਨਕਸਰ ਵਾਲਿਆਂ ਦੀ ਬਰਸੀ ਸਬੰਧੀ ਗੁਰਦੁਆਰਾ ਨਾਨਕਸਰ ਕਲੇਰਾਂ (ਜਗਰਾਉਂ) ਵਿਖੇ ਚੱਲ ਰਹੀਆਂ ਤਿਆਰੀਆਂ ਤਹਿਤ ਅੱਜ ਸੰਤ ਬਾਬਾ ਅਰਵਿੰਦਰ ਸਿੰਘ ਨਾਨਕਸਰ ਵਾਲਿਆਂ ਨੇ ਡਿਊੜੀ ਦੀ ਸਫ਼ਾਈ ਸੰਗਤਾਂ ਨੂੰ ਨਾਲ ਲੈ ਕੇ ਕਰਵਾਈ | ਇਸ ਡਿਊੜੀ ਨੂੰ ਸੰਤ ਬਾਬਾ ਮੈਂਗਲ ਸਿੰਘ ਨਾਨਕਸਰ ਵਾਲਿਆਂ ਨੇ ਬਣਾਇਆ ਅਤੇ ਇਸ ਡਿਊੜੀ ਨੂੰ ਬਣਾਉਣ ਲਈ ਸੰਤ ਬਾਬਾ ਨੰਦ ਸਿੰਘ ਨਾਨਕਸਰ ਵਾਲਿਆਂ ਨੇ ਬਚਨ ਕੀਤੇ ਸਨ | ਇਸ ਮੌਕੇ ਸੰਤ ਬਾਬਾ ਅਰਵਿੰਦਰ ਸਿੰਘ ਨਾਨਕਸਰ ਵਾਲਿਆਂ ਨੇ ਸੰਗਤਾਂ ਨੂੰ ਬਰਸੀ ਸਮਾਗਮ ਵਿਚ ਤਨ, ਮਨ ਅਤੇ ਧਨ ਨਾਲ ਸੇਵਾ ਕਰਨ ਲਈ ਆਖਿਆ | ਇਸ ਮੌਕੇ ਗੁਰਮੀਤ ਸਿੰਘ ਗੀਤਾ ਡੱਲਾ, ਬਲਜੀਤ ਸਿੰਘ ਏ.ਐੱਸ.ਆਈ, ਮਨਪ੍ਰੀਤ ਸਿੰਘ ਲੁਧਿਆਣਾ, ਲਾਡੀ ਸਿੰਘ ਲੁਧਿਆਣਾ, ਇੰਦਰਪਾਲ ਸਿੰਘ ਸ਼ੇਰਪੁਰ, ਐਡਵੋਕੇਟ ਇੰਦਰਜੀਤ ਸਿੰਘ, ਅਵਤਾਰ ਸਿੰਘ ਬਿੱਟਾ, ਹਰਦੀਪ ਸਿੰਘ ਜਗਰਾਉਂ, ਦਲੇਰ ਸਿੰਘ ਲੁਧਿਆਣਾ, ਭਗਵੰਤ ਸਿੰਘ ਢੁੱਡੀਕੇ, ਗੁਰਜੀਤ ਸਿੰਘ ਕੈਲਪੁਰ, ਮੰਨੀ ਸਿੰਘ ਕੈਲਪੁਰ ਆਦਿ ਹਾਜ਼ਰ ਸਨ |

ਮਾਲੇਰਕੋਟਲਾ 21ਅਗਸਤ (ਡਾਕਟਰ ਸੁਖਵਿੰਦਰ ਬਾਪਲਾ ) ਆਮ ਆਦਮੀ ਕਲੀਨਿਕ ਖੁੱਲ੍ਹਣ ਨਾਲ ਸਿਹਤ ਸੇਵਾਵਾਂ ਦੇ ਖੇਤਰ ਵਿਚ ਕ੍ਰਾਂਤੀਕਾਰੀ ਬਦਲਾਅ ਆਇਆ ਹੈ ।ਮਾਲੇਰਕੋਟਲਾ ਦੇ ਲੋਕਾਂ ਨੂੰ ਬਿਹਤਰੀਨ ਸਿਹਤ ਸੁਵਿਧਾਵਾਂ ਬਿਨਾਂ ਕਿਸੇ ਦਿੱਕਤ ਦੇ ਮਿਲ ਰਹੀਆਂ ਹਨ। ਮੁੱਖ ਮੰਤਰੀ ਪੰਜਾਬ ਸ ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਵਾਲੀ ਪੰਜਾਬ ਸਰਕਾਰ ਸਿਹਤ ਅਤੇ ਪੜ੍ਹਾਈ ਦੇ ਖੇਤਰ ਵਿੱਚ ਲਗਾਤਾਰ ਨਵੇਂ ਉਪਰਾਲੇ ਕਰਕੇ ਨਵੇਂ ਖ਼ੁਸ਼ਹਾਲ ਅਤੇ ਸਿਹਤਮੰਦ ਪੰਜਾਬ ਦੀ ਰਚਨਾ ਚ’ ਆਪਣਾ ਅਹਿਮ ਰੋਲ ਅਦਾ ਕਰ ਰਹੀ ਹੈ। ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਹਲਕਾ ਵਿਧਾਇਕ ਡਾਕਟਰ ਜਮੀਲ ਉਰ ਰਹਿਮਾਨ ਨੇ ਮਾਲੇਰਕੋਟਲਾ ਵਿਖੇ ਸਥਾਪਿਤ ਆਮ ਆਦਮੀ ਕਲੀਨਿਕ ਦੀ ਕਾਰਗੁਜ਼ਾਰੀ ਦੀ ਸਮੀਖਿਆ ਕਰਨ ਲਈ ਕੀਤੇ ਦੌਰੇ ਦੌਰਾਨ ਕੀਤਾ। ਇੱਥੇ ਵਰਣਨਯੋਗ ਹੈ ਕਿ ਜ਼ਿਲ੍ਹੇ ਦੇ ਵਸਨੀਕਾਂ ਨੂੰ ਬਿਹਤਰ ਸਿਹਤ ਸਹੂਲਤਾਂ ਪ੍ਰਦਾਨ ਕਰਨ ਲਈ ਪੰਜਾਬ ਸਰਕਾਰ ਵੱਲੋਂ ਬਣਾਏ ਗਏ ਦੋ ਆਮ ਆਦਮੀ ਕਲੀਨਿਕ ਪਿਛਲੇ ਦਿਨੀਂ ਲੋਕਾਂ ਨੂੰ ਸਮਰਪਿਤ ਕੀਤੇ ਗਏ ਸਨ ਜਿਨ੍ਹਾਂ ਵਿੱਚ ਇੱਕ ਕਲੀਨਿਕ ਪੁਰਾਣੀ ਤਹਿਸੀਲ ਕੰਪਲੈਕਸ ਅਤੇ ਦੂਜਾ ਆਮ ਆਦਮੀ ਕਲੀਨਿਕ ਲਾਲ ਬਜ਼ਾਰ ਨੇੜੇ ਯੂ.ਪੀ.ਐਚ.ਸੀ.-01 ਵਿਖੇ ਸਥਾਪਿਤ ਕੀਤਾ ਗਿਆ ਹੈ । ਇਸ ਮੌਕੇ ਵਿਧਾਇਕ ਮਾਲੇਰਕੋਟਲਾ ਡਾਕਟਰ ਜਮੀਲ-ਉਰ-ਰਹਿਮਾਨ ਦੇ ਸੁਪਤਨੀ ਫ਼ਰਿਆਲ ਰਹਿਮਾਨ ਵੀ ਉਨ੍ਹਾਂ ਨਾਲ ਮੌਜੂਦ ਸਨ ।
                   ਹਲਕਾ ਵਿਧਾਇਕ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੀ ਸਰਕਾਰ ਵਲੋਂ ਚੋਣਾਂ ਦੇ ਪ੍ਰਚਾਰ ਦੌਰਾਨ ਕੀਤੇ ਵਾਅਦੇ ਇੱਕ ਇੱਕ ਕਰਕੇ ਪੂਰੇ ਕਰਨੇ ਸ਼ੁਰੂ ਕਰ ਦਿੱਤੇ ਹਨ । ਆਉਣ ਵਾਲੇ ਦਿਨਾਂ ਵਿੱਚ ਪੰਜਾਬ ਵਿੱਚ ਵੱਡੇ ਪੱਧਰ ਤੇ ਸਕਾਰਾਤਮਿਕ ਬਦਲਾਅ ਦੇਖਣ ਨੂੰ ਮਿਲਣਗੇ। ਆਮ ਆਦਮੀ ਕਲੀਨਿਕ ਲੋਕਾਂ ਨੂੰ ਸੁਚੱਜੇ ਢੰਗ ਨਾਲ ਮਿਆਰੀ ਦਰਜੇ ਦਾ ਮੁੱਢਲਾ ਇਲਾਜ ਮੁਹੱਈਆ ਕਰਵਾਉਣ  ਵਿੱਚ ਮੀਲ ਦਾ ਪੱਥਰ ਸਾਬਤ ਹੋਣਗੇ । ਕਲੀਨਿਕ ਖੋਲ੍ਹਣ ਨਾਲ ਆਮ ਲੋਕਾਂ ਨੂੰ ਘਰਾਂ ਦੇ ਨੇੜੇ ਹੀ ਬੁਨਿਆਦੀ ਅਤੇ ਉੱਚ ਮਿਆਰੀ ਦੀਆਂ ਸਿਹਤ ਸਹੂਲਤਾਂ ਮਿਲਣੀਆਂ ਸ਼ੁਰੂ ਹੋ ਗਈਆਂ ਹਨ। ਉਨ੍ਹਾਂ ਹੋਰ ਕਿਹਾ ਕਿ ਇਨ੍ਹਾਂ ਕਲੀਨਿਕਾਂ ਦੇ ਖੁੱਲਣ ਨਾਲ ਸਰਕਾਰੀ ਵੱਡੇ ਹਸਪਤਾਲ ਦਾ ਬੋਝ ਘਟਿਆ ਹੈ ਅਤੇ ਸਰਕਾਰੀ ਹਸਪਤਾਲਾਂ ਵਿਚ ਲੱਗਣ ਵਾਲੀਆਂ ਲੰਮੀਆਂ ਲਾਈਨਾਂ ਤੋਂ ਵੀ ਲੋਕਾਂ ਨੂੰ ਨਿਜਾਤ ਮਿਲਣੀ ਸ਼ੁਰੂ ਹੋ ਗਈ ਹੈ
                        ਸਿਵਲ ਸਰਜਨ ਮਾਲੇਰਕੋਟਲਾ ਡਾਕਟਰ ਮੁਕੇਸ਼ ਚੰਦਰ ਨੇ ਦੱਸਿਆ ਕਿ ਮਾਲੇਰਕੋਟਲਾ ਵਿਖੇ ਦੋ ਕਲੀਨਿਕ ਸਥਾਪਿਤ ਕੀਤੇ ਗਏ ਆਮ ਆਦਮੀ ਕਲੀਨਿਕਾਂ ਵਿਚ ਜ਼ਿਲ੍ਹਾ ਵਾਸੀਆਂ ਦਾ ਮੁਫ਼ਤ ਇਲਾਜ ਦੇ ਨਾਲ ਨਾਲ ਮੁਫ਼ਤ ਦਵਾਈਆਂ ਮੁਹੱਈਆ ਕਰਵਾਈਆਂ ਜਾ ਰਹੀਆਂ ਹਨ ਉਨ੍ਹਾਂ ਦੱਸਿਆ ਕਿ ਆਮ ਆਦਮੀ ਕਲੀਨਿਕਾਂ ਵਿਚ  ਓ.ਪੀ.ਡੀ. ਸੇਵਾਵਾਂ, ਪਰਿਵਾਰ ਨਿਯੋਜਨ ਸੇਵਾਵਾਂ ਦੇ ਨਾਲ ਨਾਲ ਲੋਕਾਂ ਦੇ 41 ਤਰ੍ਹਾਂ ਦੇ ਕਲੀਨੀਕਲ ਟੈੱਸਟ  ਅਤੇ 73 ਤਰ੍ਹਾਂ ਦੀਆਂ ਦਵਾਈਆਂ ਮੁਫ਼ਤ ਦਿੱਤੀਆਂ ਜਾ ਰਹੀਆਂ ਹਨ ।                               
               ਉਨ੍ਹਾਂ ਦੱਸਿਆ ਕਿ ਪੁਰਾਣੀ ਤਹਿਸੀਲ ਕੰਪਲੈਕਸ ਵਿਖੇ ਸਥਾਪਿਤ ਆਮ ਆਦਮੀ ਕਲੀਨਿਕ ਵਿਖੇ ਮੈਡੀਕਲ ਅਫ਼ਸਰ ਡਾਕਟਰ ਮੁਹੰਮਦ ਨਦੀਨ ਸਲੀਮ ,ਫਾਰਮਾਸਿਸਟ ਸ੍ਰੀ ਗੁਰਪ੍ਰੀਤ ਸਿੰਘ ਅਤੇ ਕਲੀਨਿਕ ਸਹਾਇਕ ਸ੍ਰੀ ਮਨਜੀਤ ਕੌਰ ਨੂੰ ਅਤੇ ਲਾਲ ਬਜ਼ਾਰ ਨੇੜੇ ਯੂ.ਪੀ.ਐਚ.ਸੀ.-01 ਵਿਖੇ ਮੈਡੀਕਲ ਅਫ਼ਸਰ ਡਾਕਟਰ ਆਸ਼ੀਆ ,ਫਾਰਮਾਸਿਸਟ ਸ੍ਰੀ ਸ਼ਿਵ ਕੁਮਾਰ ਅਤੇ ਕਲੀਨਿਕ ਸਹਾਇਕ ਸ੍ਰੀਮਤੀ ਜਸਵੀਰ ਕੌਰ ਨੂੰ ਤਾਇਨਾਤ ਕੀਤਾ ਗਿਆ ਹੈ। ਹੁਣ ਤੱਕ ਕੁਲ  154 ਓ.ਪੀ.ਡੀ ਅਤੇ  06 ਲੈਬ ਟੈੱਸਟ ਕੀਤੇ ਗਏ ਹਨ ਜਿਨ੍ਹਾਂ ਵਿਚੋਂ ਪੁਰਾਣੀ ਤਹਿਸੀਲ ਕੰਪਲੈਕਸ ਵਿਖੇ ਸਥਾਪਿਤ ਆਮ ਆਦਮੀ ਕਲੀਨਿਕ ਵਿਖੇ ਅੱਜ ਤੱਕ 86 ਓ.ਪੀ.ਡੀ. ਅਤੇ 04 ਟੈੱਸਟ ਅਤੇ ਆਮ ਆਦਮੀ ਕਲੀਨਿਕ ਲਾਲ  ਬਜ਼ਾਰ ਨੇੜੇ ਯੂ.ਪੀ.ਐਚ.ਸੀ.-01 ਵਿਖੇ  68 ਓ.ਪੀ.ਡੀ ਅਤੇ 02 ਟੈੱਸਟ ਕੀਤੇ ਜਾ ਚੁੱਕੇ ਹਨ । ਉਨ੍ਹਾਂ ਦੱਸਿਆ ਕਿ ਇਹ ਕਲੀਨਿਕ ਸੋਮਵਾਰ ਤੋਂ ਸ਼ਨੀਵਾਰ ਤੱਕ ਖੁੱਲ੍ਹੇ ਰਹਿਣਗੇ, ਕੇਵਲ ਹਫ਼ਤੇ ਦੇ ਐਤਵਾਰ ਨੂੰ ਜਾ ਗਜ਼ਟਿਡ ਛੁੱਟੀ ਵਾਲੇ ਦਿਨ ਹੀ ਬੰਦ ਰਹਿਣਗੇ।

 ਹਾਕਮਾਂ ਦਾ ਹੁਕਮ!
- ਦੇਸ਼ ਵਿਚ ਸ਼ਾਇਦ ਇਹ ਪਹਿਲੀ ਵਾਰ ਹੋਇਆ ਹੈ ਕਿ ਜਦੋਂ ਦੇਸ਼ ਦੇ ਹਾਕਮਾਂ ਨੇ ਅਜਾਦੀ ਦਿਵਸ ਮੌਕੇ ਲੋਕਾਂ ਨੂੰ ਜਬਰੀ ਕੌਮੀ ਝੰਡਾ ਵੇਚ ਕੇ ਘਰ ਘਰ ਤਿਰੰਗਾ ਲਹਿਰਾਉਣ ਲਈ ਹੁਕਮ ਦਿੱਤਾ। ਇਸ ਵਿਚ ਕੋਈ ਸ਼ੱਕ ਨਹੀਂ ਹੈ ਕਿ ਤਿਰੰਗਾ ਝੰਡਾ ਸਾਡਾ ਮਾਣ ਹੈ, ਸ਼ਾਨ ਹੈ, ਜਾਨ ਹੈ!
ਫਿਰ ਸਰਕਾਰ ਨੂੰ ਇਹ ਹੁਕਮ ਜਾਰੀ ਕਰਨ ਲਈ ਮਜਬੂਰ ਕਿਉਂ ਹੋਣਾ ਪਿਆ, ਕਿ ਹਰ ਘਰ ਤਿਰੰਗਾ ਲਹਿਰਾਇਆ ਜਾਵੇ? ਹੁਕਮਰਾਨਾਂ ਨੇ ਕੌਮੀ ਤਿਰੰਗਾ ਝੰਡਾ ਕਿਸੇ ਨੂੰ ਮੁਫਤ ਨਹੀਂ ਦਿੱਤਾ, ਸਗੋਂ ਵੇਚਿਆ ਹੈ, ਵੇਚਿਆ ਵੀ ਪਿਆਰ ਨਾਲ ਨਹੀਂ, ਜਬਰੀ ਵੇਚਿਆ ਹੈ। ਝੰਡੇ ਨੂੰ ਲੈ ਕੇ ਹੁਕਮਰਾਨਾਂ ਨੇ ਹੁਕਮ ਦਿੱਤਾ ਕਿ ਮੁਲਾਜ਼ਮਾਂ ਦੀਆਂ ਤਨਖਾਹਾਂ ਵਿਚੋਂ ਪੈਸੇ ਕੱਟੇ ਜਾਣ, ਦੇਸ਼ ਦੇ ਕਈ ਹਿੱਸਿਆਂ ਵਿਚ ਤਾਂ ਮੁਫਤ ਦਾਲ ਆਟਾ ਲੈਣ ਵਾਲੇ ਗਰੀਬ ਲੋਕਾਂ ਜਿਨ੍ਹਾਂ ਕੋਲ ਪੈਸੇ ਨਹੀਂ ਸਨ, ਦੇ ਰਾਸ਼ਨ ਵਿਚੋਂ ਕਟੌਤੀ ਕਰਕੇ ਜਬਰੀ ਉਨ੍ਹਾਂ ਦੇ ਹੱਥਾਂ ਵਿਚ ਝੰਡਾ ਫੜਾ ਦਿੱਤਾ। ਗਰੀਬ ਲੋਕਾਂ ਨੇ ਵਾਸਤਾ ਪਾਇਆ ਕਿ ਉਨ੍ਹਾਂ ਨੂੰ ਝੰਡਾ ਨਹੀਂ , ਭੁੱਖੇ ਢਿੱਡ ਨੂੰ ਝੁਲਕਾ ਦੇਣ ਲਈ ਰੋਟੀ ਚਾਹੀਦੀ ਆ, ਝੰਡਾ ਲਹਿਰਾਉਣ ਲਈ ਘਰ ਚਾਹੀਦਾ! ਘਰ!! 
 ਪੰਜਾਬ ਦੀ ਆਰਥਿਕਤਾ ਦਾ ਧੁਰਾ ਦੇ ਨਾਂ ਨਾਲ ਜਾਣੇ ਜਾਂਦੇ ਲੁਧਿਆਣਾ ਸ਼ਹਿਰ ਦੇ ਵੱਖ ਵੱਖ ਇਲਾਕਿਆਂ ਖਾਸ ਕਰਕੇ ਪਾਸ਼ ਇਲਾਕਿਆਂ ਵਿਚ ਲੋਕਾਂ ਦੀਆਂ ਘਰਾਂ ਦੀਆਂ ਛੱਤਾਂ ਉਪਰ  ਹਜਾਰਾਂ ਘਰਾਂ ਪਿਛੇ ਕਿਤੇ ਕਿਤੇ ਕੋਈ ਝੰਡਾ ਲਹਿਰਾਉਂਦਾ ਦਿਸਿਆ! ਹਾਂ ਝੁੱਗੀਆਂ ਉਪਰ ਕਈ ਥਾਈਂ ਤਿਰੰਗਾ ਜਰੂਰ ਦਿਖਾਈ ਦਿੱਤਾ, ਕੁੱਝ ਕੁ ਗਰੀਬਾਂ ਦੇ ਆਪਣੇ ਸਾਇਕਲਾਂ, ਮੋਟਰਸਾਈਕਲਾਂ ਉਪਰ  ਤਿਰੰਗੇ ਝੰਡੇ ਲੱਗੇ ਹੋਏ ਵੀ ਸਾਹਮਣੇ ਆਏ!
ਜਿਹੜੇ ਲੋਕ ਅਜਾਦੀ ਦਾ ਅਨੰਦ ਮਾਣ ਰਹੇ ਹਨ, ਉਨ੍ਹਾਂ ਕੋਲ ਵੱਡੇ ਵੱਡੇ ਮਹੱਲ-ਨੁਮਾ ਘਰ ਹਨ, ਮਹਿੰਗੀਆਂ ਕਾਰਾਂ ਰੱਖੀਆਂ ਹੋਈਆਂ ਹਨ, ਉਨ੍ਹਾਂ ਦੇ ਘਰਾਂ ਉਪਰ ਤਾਂ ਕਿਤੇ ਵੀ ਝੰਡਾ ਦਿਖਾਈ ਹੀ ਨਹੀਂ ਦਿੱਤਾ। ਟਾਵੇਂ ਟੱਲੇ ਘਰ ਉਪਰ ਤਿਰੰਗੇ ਦੇ ਨਾਲ ਨਾਲ ਕੇਸਰੀ ਝੰਡਾ ਵੀ ਝੂਲਦਾ ਦਿਖਾਈ ਦਿੱਤਾ। ਹਾਕਮਾਂ ਵਲੋਂ ਕਰੋੜਾਂ ਦੀ ਗਿਣਤੀ ਵਿਚ ਆਪਣੇ ਮੁਲਾਜ਼ਮਾਂ ਅਤੇ ਲੋਕਾਂ ਨੂੰ ਕੌਮੀ ਝੰਡੇ ਵੇਚੇ ਗਏ, ਪਰ ਘਰਾਂ ਦੀਆਂ ਛੱਤਾਂ ਉਪਰ ਝੂਲਦੇ ਕਿਤੇ ਵੀ ਦਿਖਾਈ ਨਹੀਂ ਦਿੱਤੇ, ਕਿਉਂ?
ਜਾਪਦਾ ਹੈ ਕਿ ਦੇਸ਼ ਦੇ ਗੰਧਲੇ ਹੋਏ ਸਿਸਟਮ ਵਿਰੁੱਧ ਲੋਕਾਂ ਦੇ ਦਿਲਾਂ ਵਿਚ ਰੋਸ ਦੀ ਅੱਗ ਭਾਂਬੜ ਬਣ ਕੇ ਮੱਚ ਰਹੀ ਹੈ। ਮਹਿੰਗਾਈ ਨੇ ਲੋਕਾਂ ਦਾ ਲੱਕ ਤੋੜ ਕੇ ਰੱਖ ਦਿੱਤਾ ਹੈ, ਦੇਸ਼ ਦੇ ਰੋਮ ਰੋਮ ਵਿਚ ਫੈਲੇ ਭ੍ਰਿਸ਼ਟਾਚਾਰ ਤੋਂ ਲੋਕ ਬਹੁਤ ਦੁਖੀ ਹਨ, ਜਾਤ-ਪਾਤ ਦਾ ਬੋਲਬਾਲਾ ਘਟਣ ਦੀ ਬਜਾਏ ਦਿਨ-ਬ-ਦਿਨ ਵੱਧਦਾ ਜਾ ਰਿਹਾ, ਭੁੱਖਮਰੀ ਅਤੇ ਬੇਰੁਜ਼ਗਾਰੀ ਨੇ ਲੋਕਾਂ ਦਾ ਜੀਣਾ ਦੁੱਭਰ ਕਰਕੇ ਰੱਖ ਦਿੱਤਾ ਹੈ, ਫਿਰਕਾਪ੍ਰਸਤੀ ਭੂਸਰੇ ਹੋਏ ਸਾਨ੍ਹ ਵਾਗੂੰ ਢੁੱਡਾਂ ਮਾਰਦੀ ਫਿਰਦੀ ਹੈ। ਦੇਸ਼ ਵਿਚ ਅੰਬਾਨੀਆਂ-ਅਡਾਨੀਆਂ ਸਮੇਤ ਹੋਰ ਕਈ ਵੱਡੇ ਵੱਡੇ ਸਰਮਾਏਦਾਰ ਘਰਾਣਿਆਂ ਦਾ ਕਬਜਾ ਹੋਣ ਕਰਕੇ ਗਰੀਬ ਅਤੇ ਮੱਧ ਵਰਗ ਦੇ ਲੋਕਾਂ ਦੇ ਨਾਸੀੰ ਧੂੰਆਂ ਆ ਗਿਆ ਹੈ, ਜਿਸ ਕਰਕੇ ਹੁਕਮਰਾਨਾਂ ਪ੍ਰਤੀ ਰੋਸ ਹੈ, ਹਾਲਾਂਕਿ  ਦੇਸ਼ ਵਿਚ ਹੋ ਰਹੀ ਲੁੱਟ ਖਸੁੱਟ ਦਾ ਉਨ੍ਹਾਂ ਨੂੰ ਬਹੁਤ ਦਰਦ ਹੈ, ਪੀੜ੍ਹਾ ਹੈ । ਉਹ ਦੇਸ਼ ਨੂੰ ਪਿਆਰ ਕਰਦੇ ਹਨ, ਤਿਰੰਗੇ ਦਾ ਸਤਿਕਾਰ ਕਰਦੇ ਹਨ, ਪਰ ਉਹ ਆਪਣੇ ਹੀ ਦੇਸ਼ ਵਿਚ ਆਪਣੇ ਆਪ ਨੂੰ ਲੁੱਟਿਆ, ਕੁੱਟਿਆ ਅਤੇ ਟੁੱਟਿਆ, ਟੁੱਟਿਆ ਮਹਿਸੂਸ ਕਰ ਰਹੇ ਹਨ।
ਅਜਾਦੀ ਤੋਂ ਪਹਿਲਾਂ ਗੋਰਿਆਂ ਨੇ ਦੇਸ਼ ਨੂੰ ਲੁੱਟਿਆ, ਪਰ ਅਜਾਦੀ ਤੋਂ ਬਾਅਦ ਆਪਣੇ ਹੀ ਘਰ ਵਿਚ ਆਪਣਿਆਂ ਨੇ ਆਪਣਿਆਂ ਨੂੰ ਕੇਵਲ ਲੁੱਟਿਆ ਹੀ ਨਹੀਂ ਬਲਕਿ ਕੁੱਟਿਆ ਵੀ ਬਹੁਤ ਹੈ, ਜੋ ਹੁਣ ਵੀ ਜਾਰੀ ਹੈ। ਹੁਕਮਰਾਨ ਅਤੇ ਉਨ੍ਹਾਂ ਦੇ ਭਾਈਵਾਲ ਦੇਸ਼ ਨੂੰ ਲੁੱਟਣ ਲਈ ਜੁੱਟੇ ਹੋਏ ਹਨ, ਕਰਜੇ ਦੇ ਰੂਪ ਵਿਚ ਬੈਂਕਾਂ ਲੁਟਾਈਆਂ ਜਾ ਰਹੀਆਂ ਹਨ। ਹਾਕਮਾਂ ਨੇ ਕਦੀ ਵੀ ਦੇਸ਼ ਦੇ ਲੋਕਾਂ ਦੀਆਂ ਭਾਵਨਾਵਾਂ ਦੀ ਕਦਰ ਦੀ ਪ੍ਰਵਾਹ ਨਹੀਂ ਕੀਤੀ, ਜਿਸ ਕਰਕੇ ਲੋਕ ਟੁੱਟ ਚੁੱਕੇ ਹਨ। ਹੁਕਮਰਾਨ ਲੋਕ ਵਿਰੋਧੀ ਨੀਤੀਆਂ ਅਖਤਿਆਰ ਕਰਕੇ ਆਮ ਲੋਕਾਂ ਨੂੰ ਦੇਸ਼ ਨਾਲੋਂ ਤੋੜ ਰਹੇ ਹਨ ਅਤੇ ਆਪਸੀ ਸਮਾਜਿਕ ਰਿਸ਼ਤਿਆਂ ਵਿਚ ਦੂਰੀਆਂ ਵਧਾ ਰਹੇ ਹਨ। ਦੇਸ਼ ਵੇਚਿਆ ਜਾ ਰਿਹਾ ਹੈ, ਕੌਮੀ ਝੰਡਾ ਵੇਚਿਆ ਜਾ ਰਿਹਾ। ਹਾਲਾਂਕਿ ਦੇਸ਼ ਦੇ ਲੋਕ ਭਲੀਭਾਂਤ ਜਾਣਦੇ ਹਨ ਕਿ ਤਿਰੰਗਾ ਝੰਡਾ ਬਹੁਤ ਕੁਰਬਾਨੀਆਂ ਦੇਣ ਪਿੱਛੋਂ ਮਿਲਿਆ ਹੈ। ਇਹ ਤਿੱਖੇ ਸੰਘਰਸ਼ ਵਿਚੋਂ ਨਿਕਲਿਆ 'ਜਿੱਤ ਦਾ ਪ੍ਰਤੀਕ' ਹੈ। ਪਰ ਸਮੇਂ ਸਮੇਂ 'ਤੇ ਦੇਸ਼ ਵਿਚ ਆਈਆਂ ਸਰਕਾਰਾਂ ਨੇ, ਹਾਕਮਾਂ ਨੇ ਲੋਕਾਂ ਵਿਚ ਦੇਸ਼ ਅਤੇ ਤਿਰੰਗੇ ਪ੍ਰਤੀ ਅਪਣੱਤ ਪੈਦਾ ਹੀ ਨਹੀਂ ਕੀਤੀ, ਜਿਸ ਦਾ ਸਿੱਟਾ ਇਹ ਨਿਕਲਿਆ ਹੈ ਕਿ ਲੋਕ ਆਪਣੇ ਘਰਾਂ ਉਪਰ ਝੰਡਾ ਲਹਿਰਾਉਣ ਲਈ ਕਿਸੇ ਹਾਕਮ ਦੇ ਹੁਕਮਾਂ ਦੇ ਮੁਹਤਾਜ ਨਹੀਂ ਰਹੇ! ਜਦੋਂ ਲੋਕਾਂ ਦੇ ਹੱਕਾਂ ਅਤੇ ਹਿੱਤਾਂ ਉਪਰ ਸੱਟ ਵੱਜਦੀ ਹੈ, ਤਾਂ ਉਨ੍ਹਾਂ ਦੀਆਂ ਭਾਵਨਾਵਾਂ ਤੇ ਜਜਬੇ ਚਕਨਾਚੂਰ ਹਨ, ਤੇ ਜਦੋਂ ਕਿਸੇ ਦੀਆਂ ਭਾਵਨਾਵਾਂ ਅਤੇ ਜਜ਼ਬੇ ਚਕਨਾਚੂਰ ਹੁੰਦੇ ਹਨ ਤਾਂ ਉਹ ਹਾਕਮ ਦੇ ਹੁਕਮ ਦੇ ਪਾਬੰਦ ਹੋਣ ਤੋਂ ਪਾਸਾ ਵੱਟਣ  ਲਈ ਮਜਬੂਰ ਹੋ ਜਾਂਦੇ ਹਨ। ਸੱਚੀ ਗੱਲ ਤਾਂ ਇਹ ਹੈ ਕਿ ਜਦੋਂ ਤੱਕ ਦੇਸ਼ ਦੇ ਹਰੇਕ ਨਾਗਰਿਕ ਨੂੰ ਕੁੱਲੀ, ਗੁੱਲੀ ਤੇ ਜੁੱਲੀ ਦੀ ਸਹੂਲਤ ਨਸੀਬ ਹੋਵੇਗੀ ਤਾਂ ਉਦੋਂ ਤੱਕ ਦੇਸ਼ ਦੀ ਅਜਾਦੀ ਦਾ ਮੰਤਵ ਅਧੂਰਾ ਹੀ ਰਹੇਗਾ। 
-ਸੁਖਦੇਵ ਸਲੇਮਪੁਰੀ 
09780620233 
22 ਅਗਸਤ, 2022.

ਦੇਸ਼-ਭਗਤੀ!
-ਜੇ ਤਿਰੰਗਾ ਵੇਚ ਕੇ 
ਪੈਸੇ ਕਮਾਉਣਾ 
ਵੱਡੀ ਦੇਸ਼  ਭਗਤੀ ਹੈ 
ਤਾਂ ਫਿਰ 
ਚੋਣਾਂ ਵੇਲੇ 
ਮੁਫਤ  ਨਸ਼ਾ ਵੰਡਣਾ! 
ਪੈਸੇ ਦੇ ਕੇ 
ਵੋਟਾਂ ਖਰੀਦਣਾ!
ਝੰਡਾ ਵੇਚਣ ਨਾਲੋਂ 
ਵੀ ਸ਼ਾਇਦ 
ਬਹੁਤ ਵੱਡੀ
 ਦੇਸ਼ ਭਗਤੀ ਹੈ! 
ਬੈਂਕਾਂ 'ਚ 
ਲੋਕਾਂ ਦੀ ਕਿਰਤ ਕਮਾਈ 
ਦਾ ਪਿਆ ਪੈਸਾ 
ਖਾਸ ਬੰਦਿਆਂ ਨੂੰ 
ਲੁਟਾਉਣਾ, 
ਸੰਸਾਰ ਭਰ ਵਿੱਚ 
 ਸਭ ਤੋਂ ਵੱਡੀ 
ਦੇਸ਼ ਭਗਤੀ ਦੀ ਮਿਸਾਲ 
ਹੋ ਨਿਬੜੀ ਆ! 
ਜਿਨ੍ਹਾਂ 28 ਦੇਸ਼ ਭਗਤਾਂ ਨੇ 
ਭਾਰਤੀ ਬੈਂਕਾਂ ਦੇ 
ਸੌ ਕੁ ਖਰਬ ਰੁਪਈਏ 
ਸਾਂਭੇ ਨੇ 
ਉਨ੍ਹਾਂ ਦਾ ਨਾਂ 
ਲਾਲ ਕਿਲ੍ਹੇ ਦੀਆਂ 
ਕੰਧਾਂ 'ਤੇ 
ਸੋਨੇ ਦੀਆਂ ਤਖਤੀਆਂ 
ਬਣਾ ਕੇ 
 'ਦੇਸ਼ ਭਗਤ' ਵਜੋਂ 
ਲਿਖ ਦੇਣਾ ਵੀ 
ਦੇਸ਼ ਭਗਤੀ ਹੋਵੇਗਾ! 
-ਸੁਖਦੇਵ ਸਲੇਮਪੁਰੀ 
09780620233 
22 ਅਗਸਤ, 2022.

ਹਿੰਦੂ ਰਾਸ਼ਟਰ ਸੰਵਿਧਾਨ! 
ਭਾਰਤ ਨੂੰ ਹਿੰਦੂ ਰਾਸ਼ਟਰ ਬਣਾਉਣ ਲਈ ਆਰ. ਐਸ. ਐਸ. ਸਮੇਤ ਹੋਰ ਵੱਖ ਹਿੰਦੂਤਵ ਸੰਗਠਨਾਂ ਵਲੋਂ ਲਗਾਤਾਰ ਵਿਉਂਤਬੰਦੀ ਕੀਤੀ ਜਾ ਰਹੀ ਹੈ ਅਤੇ ਜਿਸ ਵਿਚ ਮੁੱਖ ਤੌਰ 'ਤੇ 'ਹਿੰਦੂ ਸੰਵਿਧਾਨ' ਦੀ ਸਿਰਜਣਾ ਕਰਨਾ ਸ਼ਾਮਲ ਹੈ। ਹਿੰਦੂਤਵ ਨਾਲ ਸਬੰਧਿਤ ਸਾਧੂਆਂ ਵਲੋਂ ਸੁਪਰੀਮ ਕੋਰਟ ਦੇ ਵਕੀਲਾਂ ਅਤੇ ਹੋਰ ਚੋਣਵੇਂ ਸਾਧੂਆਂ /ਲੋਕਾਂ ਦੀ ਮਦਦ ਨਾਲ ਜਿਹੜਾ ਸੰਵਿਧਾਨ ਤਿਆਰ ਕੀਤਾ ਜਾ ਰਿਹਾ ਹੈ , ਨੂੰ 'ਹਿੰਦੂ ਰਾਸ਼ਟਰ ਸੰਵਿਧਾਨ' ਦਾ ਨਾਂ ਦਿੱਤਾ ਜਾ ਰਿਹਾ ਹੈ। ਹਿੰਦੂ ਸੰਵਿਧਾਨ ਦਾ ਜੋ ਖਰੜਾ ਤਿਆਰ ਕੀਤਾ ਜਾ ਰਿਹਾ ਹੈ, ਨੂੰ ਵਾਰਾਨਸੀ/ ਪਰਿਆਗਰਾਜ ਵਿਚ ਜਨਵਰੀ, 2023 ਨੂੰ ਕਰਵਾਏ ਜਾ ਰਹੇ ਧਰਮ ਸੰਸਦ ਵਿੱਚ ਪੇਸ਼ ਕੀਤਾ ਜਾਵੇਗਾ। ਵਾਰਾਨਸੀ ਸਥਿਤ ਸ਼ੰਕਰਾਚਾਰੀਆ ਪ੍ਰੀਸ਼ਦ ਦੇ ਮੁੱਖੀ ਸੁਆਮੀ ਅਨੰਦ ਸਵਰੂਪ ਦੀ ਅਗਵਾਈ ਹੇਠ 30 ਲੋਕਾਂ ਵਲੋਂ  ਹਿੰਦੂ ਸੰਵਿਧਾਨ ਦੇ ਖਰੜੇ ਦੇ 30 ਸਫੇ ਤਿਆਰ ਕਰ ਲਏ ਗਏ ਹਨ। ਹਿੰਦੂ ਰਾਸ਼ਟਰ ਸੰਵਿਧਾਨ ਦੇ ਕੁੱਲ 756 ਸਫਿਆਂ ਦੀ ਪ੍ਰਸਤਾਵਨਾ ਰੱਖੀ ਗਈ ਹੈ ਅਤੇ ਇਨ੍ਹਾਂ ਵਿਚੋਂ 300 ਸਫਿਆਂ ਦਾ ਖਰੜਾ ਅਗਲੇ ਸਾਲ 2023 ਦੇ ਮਾਘ ਮਹੀਨੇ ਵਿਚ ਹਿੰਦੂ ਸਾਧੂਆਂ ਵਲੋਂ ਕਰਵਾਏ ਜਾ ਰਹੇ 'ਧਰਮ ਸੰਸਦ'  ਪੇਸ਼ ਕੀਤਾ ਜਾਵੇਗਾ। ਹਿੰਦੂ ਸੰਵਿਧਾਨ ਦਾ ਖਰੜਾ ਹਿੰਦੂ ਧਾਰਮਿਕ ਗ੍ਰੰਥਾਂ ਦੇ ਅਧਾਰਿਤ ਤਿਆਰ ਕੀਤਾ ਜਾ ਰਿਹਾ ਹੈ। ਸੰਵਿਧਾਨ ਦੇ ਮੁੱਢਲੇ ਪਹਿਲੂਆਂ ਵਿਚ ਸਿੱਖਿਆ, ਕਾਨੂੰਨ ਵਿਵਸਥਾ, ਰੱਖਿਆ ਅਤੇ ਮੱਤਦਾਨ ਦੀਆਂ ਤਜਵੀਜ਼ਾਂ ਰੱਖੀਆਂ ਗਈਆਂ ਹਨ। ਦੇਸ਼ ਦੇ 547 ਸੰਸਦ ਮੈਂਬਰਾਂ ਦੀ ਥਾਂ 'ਤੇ 'ਧਰਮ ਸੰਸਦ' ਹੋਣਗੇ। ਦਿੱਲੀ ਸਥਿਤ ਸੰਸਦ ਭਵਨ ਦੀ ਤਰਜ 'ਤੇ ਕਾਸ਼ੀ ਵਿਚ 'ਧਰਮ ਸੰਸਦ ਭਵਨ' ਬਣਾਇਆ ਜਾਵੇਗਾ ਅਤੇ ਇਸ ਭਵਨ ਲਈ ਸ਼ੂਲਟੰਕੇਸ਼ਵਰ ਦੇ ਕੋਲ 48 ਏਕੜ ਜਮੀਨ ਦੀ ਚੋਣ ਕੀਤੀ ਗਈ ਹੈ। 'ਧਰਮ ਸੰਸਦ' ਬਣਨ ਲਈ 25 ਸਾਲ ਦੀ ਉਮਰ ਜਦਕਿ ਵੋਟਰ ਬਣਨ ਲਈ 16 ਸਾਲ ਦੀ ਉਮਰ ਦਾ ਪ੍ਰਸਤਾਵ ਰੱਖਿਆ ਗਿਆ ਹੈ। ਹਿੰਦੂ ਰਾਸ਼ਟਰ ਸੰਵਿਧਾਨ ਦੇ ਹੋਂਦ ਵਿਚ ਆਉਣ 'ਤੇ ਦੇਸ਼ ਦੀ ਰਾਜਧਾਨੀ ਦਿੱਲੀ ਦੀ ਥਾਂ ਵਾਰਾਨਸੀ / ਪਰਿਆਗਰਾਜ ਸ਼ਹਿਰ ਹੋਵੇਗਾ। ਹਿੰਦੂ ਰਾਸ਼ਟਰ ਸੰਵਿਧਾਨ ਨਾਲ ਸਬੰਧਿਤ ਜੋ ਖਰੜਾ ਤਿਆਰ ਕੀਤਾ ਜਾ ਰਿਹਾ ਹੈ, ਦੇ ਅਨੁਸਾਰ ਮੁਸਲਮਾਨਾਂ ਅਤੇ ਇਸਾਈਆਂ ਨੂੰ ਮੱਤਦਾਨ ਦੇ ਅਧਿਕਾਰ ਨੂੰ ਵੰਚਿਤ ਰੱਖਿਆ ਗਿਆ ਹੈ,, ਜਦਕਿ ਉਨ੍ਹਾਂ ਨੂੰ ਬਾਕੀ ਸਾਰੇ ਅਧਿਕਾਰ ਦੇਸ਼ ਦੇ ਦੂਸਰੇ ਨਾਗਰਿਕਾਂ ਦੀ ਤਰ੍ਹਾਂ ਉਪਲੱਬਧ ਹੋਣਗੇ। ਤਿਆਰ ਕੀਤੇ ਜਾ ਰਹੇ ਖਰੜੇ ਮੁਤਾਬਿਕ ਗੁਰੂਕੁਲ ਪ੍ਰਣਾਲੀ ਨੂੰ ਲਾਗੂ ਕੀਤਾ ਜਾਵੇਗਾ। ਸੰਵਿਧਾਨ ਦਾ ਖਰੜਾ ਵੱਖ ਵੱਖ ਹਿੰਦੂ ਗ੍ਰੰਥਾਂ ਜਿੰਨ੍ਹਾਂ ਵਿਚ ਮਨੂਸਿਮਰਤੀ ਵੀ ਸ਼ਾਮਿਲ ਹੈ, ਦੀ ਵਿਚਾਰਧਾਰਾ ਅਨੁਸਾਰ ਹੋਵੇਗਾ, ਜਿਸ ਦਾ ਭਾਵ ਇਹ ਹੈ ਕਿ ਦੇਸ਼ ਵਿਚ ਵਰਣ-ਵਿਵਸਥਾ ਮੁੜ ਸੁਰਜੀਤ ਕੀਤੀ ਜਾਵੇਗੀ। ਦੇਸ਼ ਵਿਚ ਚਾਰ ਵਰਣ ਹੋਣਗੇ ਜਿਸ ਵਿਚ ਬ੍ਰਾਹਮਣ, ਖੱਤਰੀ, ਵੈਸ਼ ਅਤੇ ਸ਼ੂਦਰ ਅਨੁਸਾਰ ਪ੍ਰਣਾਲੀ ਵੰਡ ਕੀਤੀ ਜਾਵੇਗੀ। ਤਿਆਰ ਕੀਤੇ ਜਾ ਰਹੇ ਹਿੰਦੂ ਸੰਵਿਧਾਨ ਦੇ ਮੁੱਖ ਸਫੇ 'ਤੇ ' ਅਖੰਡ ਭਾਰਤ' ਦਾ ਨਕਸ਼ਾ ਹੋਵੇਗਾ।ਇਥੇ ਦੱਸਣਯੋਗ ਹੈ ਕਿ ਹਿੰਦੂ ਸਾਧੂਆਂ ਵਲੋਂ 'ਹਿੰਦੂ ਰਾਸ਼ਟਰ ਸੰਵਿਧਾਨ' ਜੋ ਸਿਰਜਿਆ ਜਾ ਰਿਹਾ ਹੈ, ਭਾਵੇਂ ਅਜੇ ਸਿਰਫ ਇਕ ਪ੍ਰਸਤਾਵ ਹੈ, ਪਰ ਫਿਰ ਵੀ ਦੇਸ਼ ਦੇ ਵੱਖ ਵੱਖ ਵਰਗਾਂ /ਧਰਮਾਂ ਦੇ ਲੋਕਾਂ ਉਪਰ  ਇਸ ਪ੍ਰਸਤਾਵ ਦਾ  ਅਸਰ ਪੈਣਾ ਲਾਜ਼ਮੀ ਹੈ। 
-ਸੁਖਦੇਵ ਸਲੇਮਪੁਰੀ
09780620233
22 ਅਗਸਤ, 2022

 ਕੌਮਾਂਤਰੀ ਕੌਮਾਂ ਦੇ ਧਾਰਮਿਕ ਅਤੇ ਸਿਆਸੀ ਝੰਡਿਆਂ ਦੁਆਰਾ ਉਹਨਾਂ ਦੇ ਦੇਸ਼ਾਂ ਅਤੇ ਖ਼ਿੱਤਿਆਂ ਦੀ ਆਪੋ ਆਪਣੀ ਪਹਿਚਾਣ ਦਰਸਾਉਂਦੀ ਹੈ । ਇਸ ਪਹਿਚਾਣ ਦੀ ਹੋਂਦ ਲਈ ਧਾਰਮਿਕ ਅਤੇ ਦੇਸ਼ਾਂ ਦੇ ਸਿਆਸੀ ਝੰਡੇ ਹਮੇਸ਼ਾ ਵੱਖਰੇ ਹੀ ਰੱਖੇ ਜਾਂਦੇ ਹਨ । ਜਿਵੇਂ ਸਿੱਖਾਂ ਦਾ ਕੇਸਰੀ ਨਿਸ਼ਾਨ , ਕਰਿਚੀਅਨ ਦਾ ਕਰਾਸ ਵਾਲਾ , ਇਸਲਾਮ ਦਾ ਹੈਦਰੀ(ਹਰਾ )ਹਿੰਦੂਆਂ ਦੇ ਭੰਗਵੇ ਰੰਗ ਇਤਆਦਕ ਝੰਡੇ ਕੌਮਾਂਤਰੀ ਹਨ , ਇਹਨਾਂ ਦਾ ਦੇਸ਼ਾਂ ਤੇ ਖਿਤਿਆਂ ਨਾਲ ਧਾਰਮਿਕ ਅਗਵਾਈ ਦਾ ਹੀ ਸੰਬੰਧ ਹੀ ਰੱਖਿਆ ਜਾਂਦਾ ਹੈ । ਕਿਸੇ ਸਿਆਸੀ ਮਨੋਰਥ ਲਈ ਧਰਮ ਦੇ ਝੰਡੇ ਨੂੰ ਵਰਤਣਾ ਗੈਰ ਜ਼ਰੂਰੀ,ਮਨਮਤ ਅਤੇ ਸਬੰਧਤ ਧਰਮ ਦੇ ਝੰਡੇ ਦੀ ਬੇਅਦਬੀ ਦੇ ਤੁਲ ਹੈ । ਸਿੱਖਾਂ ਵਾਸਤੇ ਨਿਸ਼ਾਨ ਸਾਹਿਬ ਇਕ ਪਵਿੱਤਰ ,ਅਕਾਲ ਪੁਰਖ ਦੀ ਓਟ ਦੀ ਅਗਵਾਈ ਅਤੇ ਸੰਸਾਰ ਦੇ ਸਿੱਖਾਂ ਲਈ ਹੈ । ਪਰ ਜਿਵੇਂ ਕੁਝ ਅਖੌਤੀ ਆਗੂਆਂ ਦੀ ਸਾਜ਼ਿਸ਼ ਅਧੀਨ ਪੰਜਾਬ ਵਿੱਚ ਕੇਸਰੀ ਨਿਸ਼ਾਨ ਦੀ ਬਰਾਬਰਤਾ ਭਾਰਤ ਦੇ ਸਾਂਝੇ ਕੌਮੀ ਝੰਡੇ ਤਿਰੰਗੇ ਨਾਲ ਕੀਤੀ ਗਈ ,ਅਤਿ ਨਿੰਦਣ ਯੋਗ ਹੀ ਹੈ । ਅਕਾਲ ਪੁਰਖ ਵੱਲੋਂ ਮੰਨੀ ਗਈ ਬਖ਼ਸ਼ਸ਼ ਕੇਸਰੀ ਨਿਸ਼ਾਨ ਦੇ ਬਰਾਬਰ ਕੋਈ ਝੰਡਾ ਨਹੀਂ ਅਤੇ ਨਾ ਹੀ ਇਸ ਨੂੰ ਨੀਵਾਂ ਕੀਤਾ ਜਾ ਸਕਦਾ ਹੈ । ਤਿਰੰਗਾ ਭੀ ਭਾਰਤ ਵਿੱਚ ਕਿਸੇ ਇਕ ਫ਼ਿਰਕੇ ਜਾਂ ਪਾਰਟੀ ਦਾ ਨਹੀਂ , ਇਹ ਸਿੱਖਾਂ ਦਾ ਭੀ ਉਤਨਾ ਹੀ ਹੈ ਜਿਤਨਾ ਬਾਕੀ ਦੇਸ਼ ਵਾਸੀਆਂ ਦਾ ਹੈ । ਕੇਸਰੀ ਨਿਸ਼ਾਨ ਗੁਰਦੁਆਰਿਆਂ ,ਤਖਤਾਂ ਅਤੇ ਉਹਨਾਂ ਕੇਂਦਰਾਂ ਤੇ ਹਮੇਸ਼ਾ ਝੂਲਦਾ ਸ਼ਸੋਬਤ ਹੈ ਜਿੱਥੇ ਗੁਰੂ ਗ੍ਰੰਥ ਸਾਹਿਬ ਦਾ ਪ੍ਰਕਾਸ਼ ਹੁੰਦਾ ਹੈ । ਇਸ ਨੂੰ ਆਮ ਘਰਾਂ ਬਿਲਡਿੰਗਾਂ ਤੇ ਲਾਉਣਾ ਬੇਅਦਬੀ ਕਰਨਾ  , ਮੂਰਖਤਾ ਤੇ ਮਨਮਤ ਹੈ । ਅਖੌਤੀ ਆਗੂਆਂ ਦੇ ਅਖੌਤੀ ਰੂਪ ਹੁੰਦੇ ਹਨ , ਜੋ ਆਪਣੀ ਹਊਮੇ , ਚੌਧਰ , ਗਦਾਰੀ ਨੂੰ ਛੁਪਾਉਣ ਲਈ ਧਰਮ ਦੇ ਨਿਸ਼ਾਨਾ ਨੂੰ ਇਕ ਢਾਲ ਦੀ ਤਰਾਂ ਇਸਤੇਮਾਲ ਕਰਦੇ ਹਨ । ਅਕਾਲ ਤਖਤ ਤੇ ਮੀਰੀ ਪੀਰੀ ਦੇ ਕੇਸਰੀ ਨਿਸ਼ਾਨਾਂ ਨੂੰ ਹੀ ਢਾਲ ਬਣਾ ਕੇ , 1919 ਵਿੱਚ ਬਰਿਟਸ਼ ਰਾਜ ਦੀ ਪਿੱਠ ਪੂਰਦੇ ਜਥੇਦਾਰ ਅਰੂੜ੍ਹ ਸਿੰਘ ਨੇ ਜਨਰਲ ਡਾਇਰ ਨੂੰ  ਸਿਰੋਪਾ ਦਿੱਤਾ ਸੀ । ਜਿਸ ਡਾਇਰ ਨੇ ਇਕ ਦਿਨ ਪਹਿਲਾਂ ਹੀ ਜਲਿਆਂ ਵਾਲੇ ਬਾਗ ਵਿਖੇ ਹਜਾਂਰਾਂ ਸਿੱਖਾਂ , ਪੰਜਾਬੀਆਂ ਦਾ ਕਤਲੇ ਆਮ ਕੀਤਾ ਸੀ । ਅੱਜ ਫਿਰ ਅਰੂੜ੍ਹ ਸਿੰਘ ਦੇ ਦੋਹਤੇ ਸਰਦਾਰ ਮਾਨ ਨੇ ਭਗਤ ਸਿੰਘ ਦੀ ਸ਼ਹਾਦਤ ਤੇ ਉਂਗਲ ਧਰੀ ,ਨਾਨੇ ਅਤੇ ਬਰਿਟਿਸ਼ ਸਾਮਰਾਜ ਦੀ ਪਿੱਠ ਪੂਰੀ ਹੈ । ਇਸ ਰਜਵਾੜਾ ਸ਼ਾਹੀ ਖ਼ਾਨਦਾਨ ਦੇ ਉਪੱਦਰ ਤੋਂ ਹੋਰ ਪਰਦਾ ਉਦੋਂ ਲਾਹਿਆ ਗਿਆ , ਜਦ ਚੰਡੀਗੜ੍ਹ ਵਿਖੇ 150 ਏਕੜ ਸ਼ਾਮਲਾਟ ਜ਼ਮੀਨ ਦਾ , ਮੌਜੂਦਾ ਪੰਜਾਬ ਸਰਕਾਰ ਨੇ ਇਹਨਾਂ ਲੋਟੀਆਂ ਤੋਂ ਕਬਜਾ ਤੁੜਵਾਇਆ । ਇਹੀ ਆਗੂ ਪੰਜਾਬ ਦੇ ਲੋਕਾਂ ਨੂੰ ਇਸ 15 ਅਗਸਤ ਦੀ ਆਜ਼ਾਦੀ ਦਿਵਸ ਤੇ ਗੁਮਰਾਹ ਕਰਦੇ ਹਨ ਕਿ ਘਰ ਘਰ ਤੇ ਸਿੱਖ ਤਿਰੰਗੇ ਦੀ ਥਾਂ ਕੇਸਰੀ ਨਿਸ਼ਾਨ ਝੁਲਾਉਣ । ਇਹ ਮਨਮਤ ਨਾਲ਼ੋਂ ਜ਼ਿਆਦਾ ਗਦਾਰੀ ਕਹੀ ਜਾ ਸਕਦੀ ਹੈ , ਜੋ ਇਹ ਕੇਸਰੀ ਨਿਸ਼ਾਨ ਨੂੰ ਘਟੀਆ ਸਿਆਸਤ ਦੀ ਲੋੜ ਦੱਸ ਕੇ ਇਸ ਪੱਧਰ ਤੇ ਨੀਵਾਂ ਕਰ ਰਹੇ ਹਨ । ਹੁਣੇ ਹੀ ਕੁਝ ਦਿਨ ਪਹਿਲਾਂ ਸੰਗਰੂਰ ਚੋਣ ਪਿੱਛੋਂ ਸਰਦਾਰ ਮਾਨ ਖੁਦ ਹੀ ਦਿੱਲੀ ਜਾ ਕੇ ਭਾਰਤੀ ਵਿਧਾਨ, ਭਾਰਤ ਦੀ ਅਖੰਡਤਾ ਤੇ ਕੌਮੀ ਝੰਡੇ ਤਿਰੰਗੇ ਲਈ ਤਨ ਮਨ ਧਨ ਵਾਰਨ ਦੀ ਸਹੁੰ ਚੁੱਕ ਕੇ ਆਏ ਹਨ । ਕੀ ਇਹ ਆਗੂ ਇਸ ਤਰਾਂ ਦੇ ਹਨ ਕਿ ਗੰਗਾ ਗਏ ਗੰਗਾ ਰਾਮ , ਜਮਨਾ ਗਏ ਜਮਨਾ ਦਾਸ ? ਦੋਹਰੇ ਕਿਰਦਾਰ ਦੇ ਇਹ ਆਗੂ ਪੰਜਾਬ ਵਿੱਚ ਲੋਕਾਂ ਨੂੰ ਤਿਰੰਗਾ ਝੰਡਾ ਝੁਲਾਉਣ ਤੋਂ ਬੰਦ ਕਰਦੇ ਹਨ ਅਤੇ ਖੁਦ ਦਿੱਲੀ ਜਾ ਕੇ ਤਿਰੰਗੇ ਦੀ ਸਲਾਮਤੀ ਲਈ ਸਹੁੰ ਚੁੱਕ ਰਿਹਾ ਹੈ । ਇਸੇ ਤਰਾਂ ਇਕ ਹੋਰ ਅਮਰੀਕਾ ਦਾ ਜੈਚੰਦੀਆ ਪੰਨੂ ਵੀ ਜਿਸ ਤਰਾਂ ਭਾਰਤੀ ਝੰਡੇ ਤਿਰੰਗੇ ਵਿਰੁੱਧ ਬੋਲਦਾ ਹੈ , ਉਹ ਤਾਂ ਸਿੱਖ ਵੀ ਨਹੀਂ ਹੈ , ਨਾ ਹੀ ਉਸ ਦੇ ਸਿਰ ਤੇ ਪੱਗ ਹੈ , ਪਗੜੀ ਕੇਸ  ਬਿਨਾ ਪਗੜੀ ਗੁੱਤ ਵਾਲਾ ਇਹ ਆਗੂ ਆਂਡ ਗੁਆਂਡ ਦੇ ਦੇਸ਼ ਦੀ ਜ਼ਰ ਖਰੀਦ ਹੈ । ਉਹ ਵੀ ਮਾਨ ਵਾਂਗੂ ਕੇਸਰੀ ਨਿਸ਼ਾਨ ਨੂੰ ਢਾਲ ਬਣਾ ਕੇ ਲੋਕਾਂ ਨੂੰ ਗੁਮਰਾਹ ਕਰਕੇ ਚੰਦੇ ਉਗਰਾਹ ਕੇ , ਪੇਟ ਪਾਲ ਰਿਹਾ ਹੈ । ਉਸ ਬਾਰੇ ਆਮ ਰਾਏ ਸ਼ਪਸ਼ਟ ਹੈ ਕਿ ਉਸ ਦੀ1947  ਤੋਂ ਦਸ਼ਮਣੀ ਰਖ ਰਹੇ ਗੁਆਂਢੀ ਦੇਸ਼ ਦੇ ਝੰਡੇ ਨਾਲ ਸ਼ਾਝ ਦੀ ਲੈਣ ਦੇਣ ਹੈ । ਆਮ ਲੋਕਾਂ ਖਾਸ ਕਰਕੇ ਸਿੱਖਾਂ ਨੂੰ ਕੇਸਰੀ ਨਿਸ਼ਾਨ ਦੀ ਸ਼ਾਨ ਨੂੰ ਬਰਕਰਾਰ ਰੱਖਣ ਲਈ ਸਿਆਸੀ ਝੰਡਿਆਂ ਨਾਲ ਮਿਲਗੋਭੇ ਤੋਂ ਖ਼ਬਰਦਾਰ ਰਹਿਣ ਦੀ ਲੋੜ ਹੈ । ਸੰਸਾਰ ਦੇ ਬੀਤੇ ਇਤਿਹਾਸ ਵਿੱਚ ਕਦੇ ਵੀ ਧਰਮ ਦੇ ਨਿਸ਼ਾਨ ਸਿਆਸੀ ਝੰਡਿਆਂ ਲਈ ਨਹੀਂ ਵਰਤੇ ਗਏ । ਸਿੱਖਾਂ ਲਈ ਜ਼ਰੂਰੀ ਹੈ ਕਿ ਉਹ ਇਤਿਹਾਸ ਦੀ ਰੋਸ਼ਨੀ ਵਿੱਚੋਂ ਪਛਾਣ ਕਰਨ । ਸਿੱਖ ਰਾਜ ਵਿੱਚ ਰਾਜਸੀ ਝੰਡਾ ਕੋਈ ਧਾਰਮਿਕ ਚਿੰਨ ਵਾਲਾ ਨਹੀਂ ਸੀ । ਮਹਾਰਾਜਾ ਰਣਜੀਤ ਸਿੰਘ ਦੇ ਰਾਜ ਵਾਲਾ ਝੰਡਾ ਤਿਕੋਣਾ ਅਤੇ ਸਿਰਫ਼ ਦੋ ਰੰਗਾਂ ਦਾ ਸੀ । ਉਸ ਦਾ ਬਾਹਰਲਾ ਬਾਰਡਰ ਹਰਾ ਤੇ ਅੰਦਰਲਾ ਸਾਰਾ ਹਿੱਸਾ ਲਾਲ ਰੰਗ ਦਾ ਸੀ । ਝੰਡੇ ਵਿੱਚ ਕਿਧਰੇ ਕੋਈ ਭੀ ਧਾਰਮਿਕ ਚਿੰਨ ਨਹੀਂ ਹੈ । ਇਹ ਝੰਡਾ 1790 ਤੋਂ 1849 ਤੱਕ ਦੇ 59 ਸਾਲ ਸਿੱਖ ਰਾਜ ਵਜੋਂ ਉਸ ਸਮੇਂ ਪੰਜਾਬ ਤੇ ਝੂਲਦਾ ਰਿਹਾ । ਇਸੇ ਤਰਾਂ ਸਿੱਖ ਰਾਜ ਦਾ ਫ਼ੌਜੀ ਝੰਡਾ ਤਿਕੋਣਾ ਸਾਰਾ ਲਾਲ ਰੰਗ ਦਾ ਰਿਹਾ ਹੈ । ਇਸ ਵਿੱਚ ਵੀ ਕੋਈ ਧਾਰਮਿਕ ਚਿੰਨ ਨਹੀਂ ਹੈ । ਇਸ ਦੇ ਵਿਚਕਾਰ ਚਿੱਟੇ ਰੰਗ ਵਿੱਚ ਸੂਰਜ ਦੀ ਛਪਾਈ ਹੈ । ਫ਼ੌਜ ਦੀ ਗਿਣਤੀ 120000 ਤੋਂ ਡੇੜ ਲੱਖ ਤੱਕ ਦੀ ਦੱਸੀ ਗਈ ਹੈ । ਸਿੱਖ , ਹਿੰਦੂ , ਮੁਸਲਮਾਨ ਅਤੇ ਹੋਰ ਜਾਗੀਰਦਾਰੀ ਕਬੀਲਿਆਂ ਦੀਆਂ ਵੱਖਰੀਆਂ ਫ਼ੌਜੀ  ਰੈਜਮੈਟਾਂ ਦੇ ਆਪੋ  ਆਪਣੇ ਵੱਖਰੇ ਝੰਡੇ ਸਨ । ਜੋ ਸਰਦਾਰ ਬਘੇਲ ਸਿੰਘ ਦੇ ਲਾਲ ਕਿਲੇ ਤੇ ਝੰਡਾ ਝੁਲਾਉਣ ਦਾ ਇਤਿਹਾਸ ਹੈ , ਉਹ ਵੀ ਖੰਡਿਆਂ ਵਾਲਾ ਕੇਸਰੀ ਨਿਸ਼ਾਨ ਦੇ ਸੁਨਹਿਰੀ ਪੰਨਿਆਂ ਤੇ ਕਾਲੇ ਦਾਗ਼ ਲਾਉਣ ਦੀ ਨਾਕਾਮ ਕੋਸ਼ਿਸ਼ ਕਰ ਰਹੀ ਹੈ । ਸਿਖ ਹਮੇਸ਼ਾ ਨਿਸ਼ਾਨਾ ,ਝੰਡਿਆਂ ,ਬੁੰਗਿਆਂ ਦੀ ਜੁਗੋ ਜੁਗ ਅਰਦਾਸ ਦੀ ਅਟੱਲ ਸਚਾਈ ਨਾਲ ਬਝਾ ਹੋਇਆ ਹੈ ਅਤੇ ਸੱਦਾ ਰਹੇਗਾ । ਆਜਾਦੀ ਦੀ ਪ੍ਰਾਪਤੀ ਲਈ ਕੀਤੀਆਂ ਕੁਰਬਾਨੀਆਂ ਨੂੰ ਜਦੋ ਸਿਖ ਦਰਸਾਉਂਦੇ ਹਨ ਤਾਂ ਤਿਰੰਗੇ ਦੀ ਰਾਜਸੀ ਸੱਤਾ ਵਿੱਚ ਉਸੇ ਤਰਾਂ ਸਿਖਾਂ ਦੀ ਹੋਂਦ ਬਰਕਰਾਰ ਦਿਸਦੀ ਹੈ । ਤਿਰੰਗੇ ਨਾਲ ਇਸ ਇਤਿਹਾਸਕ ਸਾਂਝ ਨੂੰ ਬਾਬਾ ਖੜਕ ਸਿੰਘ (ਬਾਬਾ ਖੜਕ ਸਿੰਘ ਨੂੰ ਸਿੱਖ ਕੌਮ ਦਾ ਬੇਤਾਜ ਬਾਦਸ਼ਾਹ ਮੰਨਦੇ ਰਹੇ ਹਨ ) ਨੇ  ਵੀ ਇਹ ਕਹਿ ਕੇ ਪੂਰਾ ਕਰਵਾਇਆ ਕਿ ਤਿਰੰਗੇ ਦਾ ਉੱਪਰਲਾ ਰੰਗ ਕੇਸਰੀ ਰੱਖਿਆ ਜਾਏ , ਜੋ ਖਾਲਸਈ ਰੰਗ ਤੇ ਕੁਰਬਾਨੀਆਂ ਦੀ ਪਛਾਣ ਅੱਜ ਤੱਕ ਚੱਲਿਆ ਆ ਰਿਹਾ ਹੈ । 15 ਅਗਸਤ 1947 ਸਮੇਂ ਬਾਬਾ ਖੜਕ ਸਿੰਘ ਨੇ ਦੇਸ਼ ਵਿੱਚ ਤਿਰੰਗਾ ਝੁਲਾਉਣ ਦੀ ਰਸਮ ਅਦਾ ਕੀਤੀ ਸੀ । ਉਸ ਸਮੇਂ ਭਾਰਤ ਸਰਕਾਰ ਨੇ ਬਾਬਾ ਖੜਕ ਸਿੰਘ ਦੀ ਤਸਵੀਰ ਵਾਲੀ ਇਕ ਡਾਕ ਟਿਕਟ ਜਾਰੀ ਕੀਤੀ ਸੀ। ਪਰੰਤੂ ਜਦੋਂ ਅੱਜ ਦੋਗਲੀ ਨੀਤੀ ਦੇ ਆਗੂ ਸਿੱਖਾਂ ਨੂੰ ਗੁਮਰਾਹ ਕਰਦੇ ਹਨ , ਇਹ ਕਦੇ ਵੀ ਸਿਖਾਂ ਦੇ ਨਹੀਂ ਬਣੇ ਨਾ ਹੀ ਤਿਰੰਗੇ ਦੇ ਬਣ ਸਕਦੇ ਹਨ । ਕੇਸਰੀ ਨਿਸ਼ਾਨ ਨੂੰ ਜੋ ਇਹ ਜਾਤੀ ਖ਼ੁਦਗ਼ਰਜ਼ੀ ਭਰੀ ਨਿਕੰਮੀ ਸਿਆਸਤ ਲਈ ਜੂਏ ਤੇ ਲਾਉਣ ਦੇ ਰਾਹ ਪੈਂਦੇ ਹਨ , ਇਹਨਾਂ ਦੇ ਇਹ ਬੇਅਦਬੀ ਭਰੇ ਸੁਪਨੇ ਕਦੇ ਪੂਰੇ ਨਹੀਂ ਹੋਣਗੇ । ਬਾਹਰ ਵੱਸਦੇ ਸਿੱਖਾਂ ਲਈ ਭੀ ਇਹ ਜ਼ਰੂਰੀ ਹੈ ਕਿ ਉਹ ਰਜਵਾੜਾ ਸ਼ਾਹੀ ਮੌਕਾਪਰਸਤਾਂ ਦੀ ਪਛਾਣ ਕਰਨ । ਭਾਵੇ ਕੁਝ ਅਜਿਹੇ ਭੀ ਮੋਹਰੀ ਹਨ , ਜੋ ਸਿਰਫ਼ ਪੰਜਾਬ ਦੇ ਦੁਖਾਂਤ ਆਸਰੇ ਕੋਝੀ ਖੇਡ ਖੇਡਦੇ ਆਂਢ ਗੁਆਂਢ ਦੇ ਦੇਸ਼ ਦੀ ਝੋਲੀ ਦਾ ਖਿਡੌਣਾ ਬਣ ਰਹੇ ਹਨ । ਪੰਜਾਬ ਤੇ ਉੱਥੇ ਦੇ ਲੋਕਾਂ ਦੀ ਜ਼ਿੰਦਗੀ ਨੂੰ ਬੇਹਤਰ ਬਣਾਉਣ ਵਿੱਚ ਇਹ ਕੋਈ ਇਕ ਟਕਾ ਨਹੀਂ ਲਾਉਂਦੇ । ਪੰਜਾਬ ਇਹ ਜਾਂਦੇ ਨਹੀਂ ਉੱਥੇ ਦੀ ਮਿੱਟੀ ਨਾਲ ਇਹਨਾਂ ਦਾ ਕੋਈ ਲਗਾਵ ਨਹੀਂ ਰਹਿ ਗਿਆ । ਇਕ ਲੋਕ ਗਦਰੀ ਬਾਬਿਆਂ ਦੇ ਇਤਿਹਾਸ ਨੂੰ ਭੁੱਲ ਰਹੇ ਹਨ , ਜ਼ਿਹਨਾਂ ਫ਼ਰੰਗੀ (ਅੰਗਰੇਜ਼) ਦਾ ਝੰਡਾ ਲਾਹ ਕੇ , ਤਿਰੰਗਾ  ਝੁਲਾਉਣ ਖਾਤਰ , ਦੇਸ਼ ਦੀ ਆਜ਼ਾਦੀ ਲਈ ਕੈਨੇਡਾ , ਅਮਰੀਕਾ ਤੋਂ ਡੇਰਾ ਕੂਚ ਕਰਕੇ ਕਲਕੱਤੇ (ਬਜਬਜਘਾਟ ) ਜਾ ਉਤਾਰਾ ਕੀਤਾ, ਸ਼ਹਾਦਤਾਂ ਤੇ ਫਾਂਸੀਆਂ ਨੂੰ ਗਲੇ ਲਾਇਆ । —-ਪਰਮਿੰਦਰ ਸਿੰਘ ਬਲ , ਪ੍ਰਧਾਨ , ਸਿੱਖ ਫੈਡਰੇਸ਼ਨ ਯੂ . ਕੇ . Email: psbal46@gmail.co

ਖਾਲਸਾ ਫ਼ੌਜ ਦਾ ਝੰਡਾ- ਐਂਗਲੋ ਸਿੱਖ ਮਿਊਜ਼ੀਅਮ