ਸਾਹਿਤ

ਅਦਾਰਾ ਪੈਗ਼ਾਮ-ਏ-ਕਲਮ ਦੇ ਮੁੱਖ ਸੰਪਾਦਕ ਦਿਲਸ਼ਾਨ ਨਾਲ਼ ਵਿਸ਼ੇਸ਼ ਮਿਲਣੀਂ ਕੀਤੀ

ਜਗਜੀਤ ਸਿੰਘ ਝੱਤਰਾ ਪ੍ਰਧਾਨ ਲੇਖਕ ਪੰਜਾਬੀ ਸੱਥ ਝੱਤਰਾ ਅਦਾਰਾ ਪੈਗ਼ਾਮ ਏ ਕ਼ਲਮ ਦੇ ਮੁੱਖ ਸੰਪਾਦਕ ਦਿਲਸ਼ਾਨ ਨਾਲ ਵਿਸ਼ੇਸ਼ ਮਿਲਣੀ ਕਰਨ ਲਈ ਉਹਨਾਂ ਦੇ ਦਫ਼ਤਰ ਪਹੁੰਚੇ ਸਾਹਿਤਕ ਮਿਲਣੀ ਦੌਰਾਨ ਦਿਲਸ਼ਾਨ ਨੇ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਸਾਡਾ ਅਦਾਰਾ ਪੰਜਾਬੀ ਮਾਂ ਬੋਲੀ ਨੂੰ ਪ੍ਰਫੁੱਲਿਤ ਕਰਨ ਲਈ ਅੱਗੇ ਤੋਂ ਅੱਗੇ ਉਪਰਾਲੇ ਕਰ ਰਿਹਾ ਹੈ ਉਹਨਾਂ ਨੇ ਦੱਸਿਆ ਕਿ  ਸਾਹਿਤਕਾਰਾਂ ਨੂੰ ਉੱਪਰ ਚੁੱਕਣ ਲਈ ਯਤਨਸ਼ੀਲ ਹਾਂ ਜਿਸ ਸਦਕਾ ਪੰਜਾਬੀ ਮਾਂ ਬੋਲੀ ਪ੍ਰਫੁੱਲਿਤ ਕਰਨ ਲਈ ਸਾਡੀ ਮਿਹਨਤ ਸਾਰਥਿਕ ਹੋ ਸਕੇ ਅੱਗੇ ਦਿਲਸ਼ਾਨ ਨੇ ਜਾਣਕਾਰੀ ਦਿੱਤੀ ਕਿ ਜੋ ਵੀ ਕੋਈ ਲੇਖਕ ਪੰਜਾਬੀ ਭਾਸ਼ਾ ਤੇ ਰਚਨਾਵਾਂ ਲਿਖਕੇ ਭੇਜਦਾ ਹੈ ਅਦਾਰਾ ਜਲਦੀ ਛਾਪਕੇ ਪੰਜਾਬੀ ਮਾਂ ਬੋਲੀ ਨੂੰ ਪ੍ਰਫੁਲਿਤ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਜਗਜੀਤ ਸਿੰਘ ਝੱਤਰਾ ਨੇ ਵੀ ਆਪਣੀ ਕਾਰਗੁਜ਼ਾਰੀ ਬਾਰੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਲੇਖਕ ਪੰਜਾਬੀ ਸੱਥ ਝੱਤਰਾ ਪਿਛਲੇ ਲੰਬੇ ਸਮੇਂ ਤੋਂ  ਸਾਹਿਤਕਾਰਾਂ ਨੂੰ ਸਨਮਾਨ ਚਿੰਨ੍ਹ ਅਦਾ ਕਰਕੇ ਹੌਂਸਲੇ ਬੁਲੰਦ ਕਰਨ ਵਿਚ ਸਫ਼ਲ ਹੋਣ ਦਾ ਮਾਣ ਹਾਸਲ ਕਰ ਰਹੀ ਹੈ। ਦਿਲਸ਼ਾਨ ਨੇ ਜਾਣਕਾਰੀ ਦਿੱਤੀ ਕਿ ਗੁਰਬਤ ਵਿਚ ਜੀ ਰਹੇ ਗਰੀਬ ਵਰਗ ਦੇ ਲੇਖਕ ਨੂੰ ਅਦਾਰਾ ਪੈਗ਼ਾਮ ਏ ਕ਼ਲਮ ਉਹਨਾਂ ਦੀਆਂ ਰਚਨਾਵਾਂ ਛਾਪ ਕੇ ਉਨ੍ਹਾਂ ਨੂੰ ਖੁਸ਼ੀਆਂ ਖੇੜੇ ਸਤਿਕਾਰ ਦੇਣ ਵਿਚ ਸਫ਼ਲ ਹੋ ਰਿਹਾ ਹੈ । ਅੱਗੇ ਦਿਲਸ਼ਾਨ ਨੇ ਆਖਿਆ ਕਿ ਇਸ ਤਰ੍ਹਾਂ ਅੱਗੇ ਅਦਾਰਾ ਪੈਗ਼ਾਮ ਏ ਕ਼ਲਮ ਪੰਜਾਬੀ ਮਾਂ ਬੋਲੀ ਦੀ ਚੜ੍ਹਤ ਕਰਨ ਲਈ ਯਤਨ ਕਰਦਾ ਰਹੇਗਾ। ਅਖ਼ੀਰ ਵਿੱਚ ਦਿਲਸ਼ਾਨ ਨੇ ਝੱਤਰਾ ਜੀ ਨੂੰ ਦਫ਼ਤਰ ਆਉਣ ਤੇ ਜੀ ਆਇਆਂ ਆਖਿਆ ਤੇ ਵੱਧ ਤੋਂ ਵੱਧ ਪਿਆਰ ਦਿੱਤਾ ਇਹ ਮਿਲਣੀ ਸਾਰਥਕ ਹੋ ਨਿੱਬੜੀ।
ਲੇਖ਼ਕ ਜਗਜੀਤ ਸਿੰਘ ਝੱਤਰਾ
ਲੇਖ਼ਕ ਪੰਜਾਬੀ ਸੱਥ ਝੱਤਰਾ
78144/90249

ਗ਼ਜ਼ਲ

ਇਕ ਪਾਸੇ ਖੂਨੀ ਕਾਵਾਂ ਦੀ ਢਾਣੀ ਹੈ, ਰੱਬ ਖ਼ੈਰ ਕਰੇ।

ਦੂਜੇ ਪਾਸੇ ਕੱਲੀ ਕੂੰਜ ਨਿਮਾਣੀ ਹੈ, ਰੱਬ ਖ਼ੈਰ ਕਰੇ।

ਜਿਸ ਨੂੰ ਮਿਲਦੈ ਚੈਨ ਬੜਾ ਭੋਲੇ ਭਾਲੇ ਲੋਕ ਲੜਾ ਕੇ,

ਸਾਡੇ ਪਿੰਡ 'ਚ ਉਸ ਦੀ ਆਣੀ, ਜਾਣੀ ਹੈ, ਰੱਬ ਖ਼ੈਰ ਕਰੇ।

ਹੁਣ ਤਾਂ ਕਰਮਾਂ ਮਾਰੇ ਰੋਗੀ ਦੀ ਇਹ ਹਾਲਤ ਹੈ ਯਾਰੋ,

ਨਾ ਉਹ ਕੁਝ ਖਾਂਦਾ, ਨਾ ਪੀਂਦਾ ਪਾਣੀ ਹੈ, ਰੱਬ ਖ਼ੈਰ ਕਰੇ।

ਇਕ ਇਕ ਕਰਕੇ ਸਾਰੇ ਦੋਸਤ ਛੱਡ ਗਏ ਮੇਰਾ ਦਾਮਨ,

ਹੁਣ ਮੈਂ ਕੱਲੇ ਨੇ ਉਮਰ ਬਿਤਾਣੀ ਹੈ, ਰੱਬ ਖ਼ੈਰ ਕਰੇ।

ਮੇਰੇ ਦਿਲ ਦਾ ਖਿੜਿਆ ਗੁਲਸ਼ਨ ਇਹਨਾਂ ਤੋਂ ਤੱਕ ਨਾ ਹੁੰਦਾ,

ਅੱਜ ਬੇਦਰਦਾਂ ਨੇ ਇਸ ਨੂੰ ਅੱਗ ਲਾਣੀ ਹੈ, ਰੱਬ ਖ਼ੈਰ ਕਰੇ।

ਗ਼ਮ ਦੇ ਖ਼ਾਰਾਂ ਤੋਂ 'ਮਾਨ' ਕਦੇ ਘਬਰਾਇਆ ਨਹੀਂ ਸੀ ਯਾਰੋ,

ਅੱਜ ਉਸ ਦੇ ਨੈਣਾਂ ਵਿੱਚ ਕਾਹਤੋਂ ਪਾਣੀ ਹੈ, ਰੱਬ ਖ਼ੈਰ ਕਰੇ।

ਮਹਿੰਦਰ ਸਿੰਘ ਮਾਨ

ਕੈਨਾਲ ਰੋਡ

ਸਾਮ੍ਹਣੇ ਅੰਗਦ ਸਿੰਘ ਐੱਮ ਐੱਲ ਏ ਹਾਊਸ

ਨਵਾਂ ਸ਼ਹਿਰ-144514

ਫੋਨ  9915803554

ਸੁਪਨਾ
ਪਲਕਾਂ ਤੇ ਬਿਠਾਇਆ ਸੀ ਜੋ 
ਦਿਲ ਦੇ ਵਿਚ ਵਸਾਇਆ ਸੀ ਜੋ

ਨਜਰਾਂ ਚੋ ਹੀ ਡਿਗ ਗਿਆ 
ਸੁਪਨਾ ਬਣ ਕੇ ਆਇਆ ਸੀ ਜੋ

ਨਵੀਆਂ ਉਮੀਦਾਂ ਦੇਣ ਆਇਆ ਸੀ
ਤਕਲੀਫਾਂ ਸਾਡੀਆਂ ਲੈਣ ਆਇਆ ਸੀ

ਅੱਜ ਖੰਭ ਸਾਡੇ ਉਹਨੇ ਹੀ ਤੋੜੇ
ਜੋ ਉਡਾਰੀ ਦੇਣ ਆਇਆ ਸੀ

ਅੰਬਰੀ ਉੱਡਦੀ ਪਤੰਗ ਵਾਂਗ ਸੀ
ਉਹ ਜੀਣ ਦੀ ਉਮੰਗ ਵਾਂਗ ਸੀ

ਰੰਗ ਭਰਨ ਦੀ ਗੱਲ ਸੀ ਕਰਦਾ 
ਆਪ ਜੋ ਕਾਲੇ ਰੰਗ ਵਾਂਗ ਸੀ

ਹਕੀਕਤ ਤੋਂ ਜਾਣੂ ਕਰਵਾ ਗਿਆ 
ਢਿੱਲੋਂ ਨੂੰ ਵੀ ਜੀਣਾ ਸਿਖਾ ਗਿਆ 
 ਸਰਬਜੀਤ ਕੌਰ ਢਿੱਲੋਂ

ਨਵਾਂ ਸਾਲ ਮੁਬਾਰਕ ਹੋਵੇ...
ਦਿਨ ਵੀ ਉਹੀ ਤੇ ਰਾਤਾਂ ਵੀ ਉਹੀ,
ਪਰ ਬਦਲ ਗਈਆਂ ਤਰੀਕਾਂ ਨੇ।

ਲੰਘ ਗਿਆ ਇੱਕ ਹੋਰ ਸਾਲ,
ਨਵੇਂ ਦੀਆਂ ਬੜੀਆਂ ਉਡੀਕਾਂ ਨੇ।

ਯਾਦਾਂ ਦਾ ਭੰਡਾਰ ਭਰ ਗਿਆ,
ਬੀਤੇ ਦੀਆਂ ਵੀ ਕਈ ਸਿਫ਼ਤਾਂ ਨੇ।

ਆਉਣਾ ਜਾਣਾ ਬਣਿਆ ਰਹਿੰਦਾ,
ਰਹਿ ਜਾਂਦੇ.. ਕੁਝ ਸੁਫ਼ਨੇ, ਕੁਝ ਆਸਾਂ ਨੇ।

ਨਵੇਂ ਸਾਲ ਦੀਆਂ ਨਵੀਆਂ ਵਿਉਂਤਾਂ,
ਸਭ ਲਈ ਬਹੁਤ ਦੁਆਵਾਂ ਨੇ।

ਸ਼ਾਲਾ! ਵਸਦੇ ਰਹਿਣ ਪਿੰਡ-ਗਰਾਂ,
ਭਰੀਆਂ ਰੱਬ ਨੇ ਕੁਦਰਤੀ ਸੌਗਾਤਾਂ ਨੇ।

ਮਿਲ ਜੁਲ ਕੇ ਰਿਹਾ ਕਰੋ ਸੱਜਣੋ,
ਜ਼ਿੰਦਗੀ ਚਾਰ ਦਿਨਾਂ ਦੀਆਂ ਬਾਤਾਂ ਨੇ।

'ਸਿੱਧੂ' ਦੇਵੇ ਦੁਆਵਾਂ ਸਭ ਨੂੰ,
ਨਵੇਂ ਸਾਲ ਦੀਆਂ ਸਭ ਨੂੰ ਮੁਬਾਰਕਾਂ ਨੇ।
     ਪਰਵੀਨ ਕੌਰ ਸਿੱਧੂ
     8146536200

ਖੋਲ੍ਹ ਕੇ ਰੱਖੀੰ ਅੱਖ ਸੱਜਣਾ!
-ਨਵੇਂ ਵਰ੍ਹੇ ਦੀ ਸਰਦਲ ਉੱਤੇ, ਪੈਰ ਟਿਕਾ ਕੇ ਰੱਖ ਸੱਜਣਾ!
ਵਿੰਗੇ-ਟੇਢੇ ਮੋੜ ਆਉਣਗੇ, ਖੋਲ੍ਹ ਕੇ ਰੱਖੀੰ ਅੱਖ ਸੱਜਣਾ!
ਝੱਖੜ ਚੱਲੂ, ਬਿਜਲੀ ਗਰਜੂ, ਬਰਫਾਂ ਦੇ ਤੁਫਾਨ ਆਉਣਗੇ! 
ਟਿੱਬੇ ਆਉਣਗੇ, ਟੋਏ ਆਉਣਗੇ, ਪਰਬਤ ਤੇ ਮੈਦਾਨ ਆਉਣਗੇ!  
ਸਾਧ ਆਉਣਗੇ,ਚੋਰ ਆਉਣਗੇ,ਕਈ ਚੰਗੇ ਇਨਸਾਨ ਆਉਣਗੇ! 
ਤਰ੍ਹਾਂ ਤਰ੍ਹਾਂ ਦੇ ਭੇਸ ਵਟਾ ਕੇ, ਵੇਖੀਂ ਕਈ ਭਗਵਾਨ ਆਉਣਗੇ! 
ਕਈਆਂ ਦਰਦ ਘਟਾਉਣਾ ਤੇਰਾ , ਕਈ ਤਾਂ ਦਰਦ ਵਧਾਣ ਆਉਣਗੇ! 
ਕਈ ਮੰਗਣਗੇ ਖ਼ੈਰ ਤੁਸਾਂ ਦੀ, ਕਈ ਤਾਂ ਲੈ ਕਿਰਪਾਨ ਆਉਣਗੇ! 
ਸ਼ੇਰਾਂ ਵਰਗਾ ਜਿਗਰਾ ਰੱਖੀੰ, ਖਤਰੇ ਦੇ ਨਿਸ਼ਾਨ ਆਉਣਗੇ!
ਜ਼ਿੰਦਗੀ ਐਨੀ ਸਰਲ ਨਹੀਂ ਹੁੰਦੀ, ਕਈ ਤੈਨੂੰ ਸਮਝਾਣ ਆਉਣਗੇ! 
ਸੋਕਿਆਂ ਦੇ ਸੰਗ ਹੜ੍ਹ ਨੇ ਆਉਣਾ , ਕਰਨ ਤੈਨੂੰ ਪ੍ਰੇਸ਼ਾਨ ਆਉਣਗੇ! 
ਪੱਤਝੜ ਪਿਛੋਂ ਬਸੰਤ ਨੇ ਆਉਣਾ, ਦਿਲ ਵਿਚ ਕਈ ਅਰਮਾਨ ਆਉਣਗੇ! 
ਰੋਜ ਬਦਲਦੇ ਰਹਿਣਗੇ ਮੌਸਮ, ਤੈਨੂੰ ਕਰਨ ਹੈਰਾਨ ਆਉਣਗੇ! 
ਰਾਹਾਂ ਦੇ ਵਿਚ ਕੰਡੇ ਆਉਣਗੇ , ਜਿੰਦ ਤੇਰੀ ਮੁਸਕਾਨ ਆਉਣਗੇ! 
ਭੀੜਾਂ ਵਿਚ ਗੁਆਚ ਨਾ ਜਾਵੀਂ, ਹੋਂਦ ਬਣਾਈ ਵੱਖ ਸੱਜਣਾ! 
ਘੋਰ ਹਨੇਰਿਆਂ ਮਰ ਮੁੱਕ ਜਾਣਾ, ਦੀਪ ਜਗਾ ਕੇ ਰੱਖ ਸੱਜਣਾ! 
ਨਵੇਂ ਵਰ੍ਹੇ ਦੀ ਸਰਦਲ ਉੱਤੇ, ਪੈਰ ਟਿਕਾ ਕੇ ਰੱਖ ਸੱਜਣਾ! 
ਵਿੰਗੇ-ਟੇਢੇ ਮੋੜ ਆਉਣਗੇ, ਖੋਲ੍ਹ ਕੇ ਰੱਖੀੰ ਅੱਖ ਸੱਜਣਾ! 
-ਸੁਖਦੇਵ ਸਲੇਮਪੁਰੀ 
ਪਿੰਡ - ਸਲੇਮਪੁਰ 
ਡਾਕਘਰ - ਨੂਰਪੁਰ ਬੇਟ 
ਜਿਲ੍ਹਾ - ਲੁਧਿਆਣਾ 
ਮੋਬਾਈਲ ਨੰਬਰ - 9780620233

ਇੱਜਤ, ਸਤਿਕਾਰ ਵੀ ਕਿਹੜਾ, ਹਰ ਕਿਸੇ ਨੂੰ ਰਾਸ ਆਉਂਦੇ,
ਤੂੰ ਥੋੜ੍ਹਾ ਦੇਖ ਲਿਆ ਕਰ, ਕੌਣ, ਕਿੱਥੇ, ਤੇ ਕਿਵੇਂ ਬੋਲਦਾ ਆ? 

ਇੱਥੇ ਹਰ ਚੀਜ਼ ਦਾ ਵਿਪਾਰੀ, ਤੇ ਹਰ ਇੱਕ ਚੀਜ਼ ਵਿੱਕਦੀ, 
ਮੁੱਕਦੀ ਗੱਲ, ਕੌਣ ਤੁਲਦਾ, ਤੇ ਕਿਹੜਾ ਕਿਵੇਂ ਤੋਲਦਾ ਆ? 

ਹਿਸਾਬ, ਕਿਤਾਬ ਜਿਹੇ ਨਾਲ, ਜੁਵਾਬ ਦੇ ਛੱਡਿਆ ਕਰ,
ਹਰ ਕੋਈ ਪਤੇ ਦੀ ਗੱਲ ਵੀ, ਕਿਹੜਾ ਗੌਲਦਾ ਆ?

ਨੀਵਾਂ ਹੋ ਕੇ ਤੁਰਿਆ ਰਹਿ, ਬੱਸ ਤੂੰ, ਸਿੱਖਦਾ ਸਿੱਖਦਾ,
ਗੱਲ ਚੁੱਕਣਾ, ਟੁੱਕਣਾ, ਚੁੱਭਣਾ, ਅਸਰ ਮਹੌਲ ਦਾ ਆ! 

ਉਂਝ, ਹਰ ਇੱਕ ਨਾਲ ਤਾਂ, ਆਢਾ ਲਾ ਵੀ ਨਹੀਂ ਹੋਣਾ,
ਫਰੋਲੀ ਜਾਣ ਦੇ ਜਿਹੜ੍ਹਾ, ਜਿਵੇਂ ਦੀ ਖ਼ਾਕ ਫਰੋਲਦਾ ਆ!

ਆਪਣੇ ਕੰਮ ਨਾਲ ਮਤਲਬ ਰੱਖਿਆ ਕਰ ਜਿੰਨਾ ਹੋ ਸਕੇ,
ਜੇ ਵਾਧੂ ਬੋਲੇਗਾਂ,  ਤਾਂ ਕਹਿਣਗੇ ਹੀ, ਕਿ ਬੋਲਦਾ ਆ! 

ਦੀਪ ਸੰਧੂ
+61 459 966 392

 " ਕਿਤਾਬਾਂ"

ਪਾਪਾ ਜੀ ਨਾ ਪੀਓ ਸ਼ਰਾਬਾਂ,

ਲੈਣ ਦਿਓ ਮੈਨੂੰ ਚਾਰ ਕਿਤਾਬਾ।

ਗ਼ੁਰਬਤ ਦੇ ਵਿੱਚ ਡੂਬੀ ਜੂਨੀ,

ਕਰ ਦੇਣ ਸ਼ਾਇਦ ਪਾਰ ਕਿਤਾਬਾਂ।

ਵਿਦਿਆ ਜੋਤ ਜਗਾ ਦੇਵਣ,

ਅਨਪੜ੍ਹਤਾ ਨੂੰ ਮਾਰ ਕਿਤਾਬਾਂ।

ਮਨ ਵਿੱਚੋ ਜੰਗ ਲਹਿ ਜਾਂਦੀ ਏ,

ਪੜ ਲਈਏ ਜੇ ਚਾਰ ਕਿਤਾਬਾਂ।

ਜਿੱਤਾਂ ਦੇ ਇਹ ਗੱਡਣ ਝੰਡੇ,

ਮੰਨਣ ਕਦੇ ਨਾ ਹਾਰ ਕਿਤਾਬਾਂ।

ਚੰਨ ਤੱਕ ਵੀ ਜਾ ਪਹੁੰਚਿਆ ਏ,

ਪੜ੍ਹ ਪੜ੍ਹ ਕੇ ਸੰਸਾਰ ਕਿਤਾਬਾਂ ।

ਇਨ੍ਹਾਂ ਦੇ ਨਾਲ ਯਾਰੀ ਪਾ ਲੈ,

ਸਭ ਤੋਂ ਚੰਗੀਆਂ ਯਾਰ ਕਿਤਾਬਾਂ।

ਪਿਆਰ ਨਾਲ ਜੇ ਪੜਦੇ ਜਾਇਏ,

ਦਿੰਦੀਆਂ ਸੀਨਾ ਠਾਰ ਕਿਤਾਬਾਂ।

ਗ਼ੁਰਬਤ ਵਿਚੋਂ ਕੱਢ ਲਿਆਵਣ,

ਕੁਲਾਂ ਦੇਵਣ ਤਾਰ ਕਿਤਾਬਾਂ।

ਗਿਆਨ ਕਟੋਰੇ ਭਰ ਭਰ ਵੰਡਣ ,

ਦੇਵਣ ਬੜਾ ਪਿਆਰ ਕਿਤਾਬਾਂ।

ਵਰਕਿਆਂ ਉਪਰ ਕਾਲੇ ਅੱਖਰ,

ਛਪਕੇ ਦੇਣ ਨਿਖਾਰ ਕਿਤਾਬਾਂ ।

ਸੋਚ ਸਮਝ ਕੇ ਵੋਟ ਪਾਉਣਗੇ,

ਪੜੀਆਂ ਹੋਣ ਜੇ ਯਾਰ ਕਿਤਾਬਾਂ।

ਪੜ੍ਹੀਏ ਆਓ ਯਾਰ ਕਿਤਾਬਾਂ ,

ਗਿਆਨ ਦੀਆਂ ਭੰਡਾਰ ਕਿਤਾਬਾਂ,

ਆਓ ਥੋੜਾ ਵਕਤ ਕੱਡੀਏ

ਪੜ੍ਹੀਏ ਇਕਸਾਰ ਕਿਤਾਬਾਂ।

"ਸਾਹਿਲ" ਕਦੇ ਨਾ ਪੜਕੇ ਥੱਕਿਆ,

ਪੜੀਆਂ ਕਈ ਹਜ਼ਾਰ ਕਿਤਾਬਾਂ।

ਕੁਲਦੀਪ ਸਿੰਘ ਸਾਹਿਲ

9417990040

ਪੈਸਾ

ਪੈਸਾ ਹੁੰਦਾ ਹੈ ਜਿਸ ਦੇ ਕੋਲ ਭਰਾਵਾ,

ਉਸ ਦੀ ਹਰ ਗੱਲ ਹੁੰਦੀ ਹੈ ਗੋਲ ਭਰਾਵਾ।

ਬੱਚੇ ਆਪਣੇ ਨਾਂ ਲਗਵਾ ਲੈਂਦੇ ਸਭ ਕੁੱਝ,

ਅੰਤ 'ਚ ਮਾਂ-ਪਿਉ ਰਹਿ ਜਾਂਦੇ ਖੋਲ ਭਰਾਵਾ।

ਉਸ ਤੋਂ ਹਰ ਕੋਈ ਕੰਨੀ ਕਤਰਾਉਂਦਾ ਹੈ,

ਜੋ ਬੰਦਾ ਬੋਲੇ ਕੌੜੇ ਬੋਲ ਭਰਾਵਾ।

ਫਿਰ ਉਸ ਨੂੰ ਹੱਥਾਂ, ਪੈਰਾਂ ਦੀ ਪੈ ਜਾਵੇ,

ਜਦ ਲੀਡਰ ਦੀ ਖੁੱਲ੍ਹ ਜਾਵੇ ਪੋਲ ਭਰਾਵਾ।

ਦਿਲ ਨਾ ਛੱਡ, ਕਰਕੇ ਹਿੰਮਤ ਖੜ੍ਹ ਜਾ ਉੱਠ ਕੇ,

ਤੈਨੂੰ ਜ਼ਾਲਮ ਜੱਗ ਸਕਦਾ ਰੋਲ ਭਰਾਵਾ।

ਤੈਨੂੰ ਖ਼ੁਦ ਹੀ ਮਿਹਨਤ ਕਰਨੀ ਪੈਣੀ ਹੈ,

ਭਰਨ ਲਈ ਆਪਣੀ ਖਾਲੀ ਝੋਲ ਭਰਾਵਾ।

ਜੇ ਇਹ ਸੁਣ ਗੁੱਸਾ ਹੋਵੇ ਸ਼ਾਂਤ ਕਿਸੇ ਦਾ,

ਦੋ ਮਿੱਠੇ ਬੋਲ ਲਿਆ ਕਰ ਬੋਲ ਭਰਾਵਾ।

ਮਹਿੰਦਰ ਸਿੰਘ ਮਾਨ

ਕੈਨਾਲ ਰੋਡ

ਸਾਮ੍ਹਣੇ ਅੰਗਦ ਸਿੰਘ ਐੱਮ ਐੱਲ ਏ ਹਾਊਸ

ਨਵਾਂ ਸ਼ਹਿਰ-9915803554

 "ਸੱਜਣਾ"

 ਕਿਹਦੇ ਹੱਕਾਂ ਦੀ ਗੱਲ ਕਰਦੇ

 ਤੂੰ ਵੀ ਤੇ ਹੱਕਦਾਰ ਏ ਸੱਜਣਾ,

 ਕੋਠੇ ਚੜ ਗਰੀਬੀ ਚੀਕੇ

 ਅੰਨੀ ਬੋਲੀ ਸਰਕਾਰ ਏ ਸੱਜਣਾ,

 ਖੁਦ ਲਿਖ ਕਿਸਮਤ ਆਪਣੀ

 ਰੱਬ ਤੇ ਕੀ ਇਤਬਾਰ ਏ ਸੱਜਣਾ,

 ਲੈ ਚੱਲ ਜਿਥੇ ਲੈ ਕੇ ਜਾਣਾ

 ਸਾਡਾ ਕੀ ਇਨਕਾਰ ਏ ਸੱਜਣਾ ,

 ਸਾਡਾ ਕੀ ਅਖਤਿਆਰ ਏ ਸੱਜਣਾ

 ਤੇਰੇ ਹੱਥ ਮੁਹਾਰ ਏ ਸੱਜਣਾ,

 ਕਾਹਨੂੰ ਸਾਨੂੰ ਨਫਰਤ ਕਰਦੇ

 ਤੂੰ ਵੀ ਸਾਡਾ ਯਾਰ ਏ ਸੱਜਣਾ,

 ਐਵੇਂ ਇਕ ਫਰੇਬ ਜਿਹਾ

 ਕਿਹਨੂੰ ਕਿਸ ਨਾਲ ਪਿਆਰ ਏ ਸੱਜਣਾ

 ਸਾਡੇ ਬਾਰੇ ਜੋ ਵੀ ਆਖੀਂ

 ਫਿਰ ਵੀ ਤੇਰਾ ਸਤਿਕਾਰ ਏ ਸੱਜਣਾ।

ਕੁਲਦੀਪ ਸਿੰਘ ਸਾਹਿਲ

9417990040