ਉਸ ਨੂੰ ਗੀਤ ਸੰਗੀਤ ਸੁਣਨ ਦਾ ਸ਼ੌਕ ਸੀ । ਮਾਂ ਪਿਓ ਬਾਰੇ ਲਿਖੇ / ਗਾਏ ਗੀਤਾਂ ਨੂੰ ਉਹ ਜ਼ਿਆਦਾ ਪਸੰਦ ਕਰਦਾ ਸੀ । ਟ੍ਰੈਕਟਰ ਦੀ ਟੇਪ ਉੱਤੇ ਉਹ ਸਭ ਤੋਂ ਵੱਧ ਜਿਹੜਾ ਗੀਤ ਵਜਾਉਂਦਾ ਸੀ , ਉਹ ਵੀ ਬਾਪੂ ਨਾਲ਼ ਯਾਰੀ ਬਾਰੇ ਸੀ , ਜਿਸ ਦੇ ਬੋਲ ਸਨ -----
" ਮੈਂ ਇੱਕੀਆਂ ਸਾਲਾਂ 'ਚ ਯਾਰ ਬਹੁਤ ਬਣਾਏ ,
ਕੋਈ ਯਾਰੀ ਨਈਓਂ ਬਾਪੂ ਜੀ ਦੀ ਯਾਰੀ ਵਰਗੀ ।
ਬਾਈਵਾਂ ਸਾਲ ਚੜ੍ਹਦਿਆਂ ਹੀ ਉਸ ਦਾ ਵਿਆਹ ਹੋ ਗਿਆ ਤਾਂ ਪੰਜਾਬੀ ਦੀ ਉਹ ਲੋਕ ਬੋਲੀ ਪੂਰੀ ਤਰ੍ਹਾਂ ਸੱਚ ਸਾਬਤ ਹੋ ਗਈ ।
" ਨਵਿਆਂ ਦੇ ਸੰਗ ਰਲ਼ ਕੇ ,
ਭੁੱਲ ਜਾਂਦੇ ਨੇ ਯਾਰ ਪੁਰਾਣੇ । "
ਅੱਜ ਕੱਲ੍ਹ ਉਸ ਦਾ ਓਹੀ ਬਾਪੂ ਬਿਰਧ ਆਸ਼ਰਮ ਵਿੱਚ ਰਹਿਣ ਲਈ ਮਜ਼ਬੂਰ ਹੈ ।
ਮੂਲ ਚੰਦ ਸ਼ਰਮਾ ਪ੍ਰਧਾਨ ,
ਪੰਜਾਬੀ ਸਾਹਿਤ ਸਭਾ ਧੂਰੀ ਜਿਲ੍ਹਾ ਸੰਗਰੂਰ ।
