ਸਾਹਿਤ

ਬੁੱਲ੍ਹ ਕਿੱਦਾਂ ਮੈਂ,ਸੀਅ ਕੇ ਰੱਖਾਂ,

ਜ਼ਹਿਰ ਅੰਦਰ ਦਾ, ਪੀ ਕੇ ਰੱਖਾਂ,

ਕਦੀ ਤਾਂ ਹੱਕ ਲਈ, ਲੜਣਾ ਪੈਣਾ,

ਤੇ ਆਪਣੇ ਪੈਰੀਂ, ਖੜ੍ਹਨਾ ਪੈਣਾ ,

ਬੇਵੱਸ ਅਤੇ ਲਾਚਾਰ ਜੀ ਬਣਕੇ,

ਲੋਕ ਲੱਜ ਤੋਂ ਰਹੀ ਜੇ ਡਰ ਕੇ,

ਇੰਝ ਤਾਂ ਮੈਨੂੰ ਮਾਰ ਹੀ ਦੇਣਾ,

ਕੁੜੀ ਚਿੜੀ ਦਾ ਨਾਂ ਦੇ ਦੇਣਾ,

ਗਿਰਝ ਬਾਜ਼ ਤੇ ਕਾਂਵਾਂ ਦੇ ਨਾਲ਼,

ਗਿੱਦੜਾਂ ਤੇ ਬਘਿਆੜਾਂ ਦੇ ਨਾਲ਼,

ਕਿਸੇ ਨੂੰ ਤਾਂ ਟਕਰਾਉਣਾ ਪੈਣਾ,

ਆਪਣਾ ਆਪ ਬਚਾਉਣਾ ਪੈਣਾ,

ਪ੍ਰਿੰਸ ਜੇ ਅੱਜ ਵੀ ਕੁਝ ਨਾ ਬੋਲੀ,

ਲੋਕ ਸਮਝਦੇ ਰਹਿਣਗੇ ਗੋਲ਼ੀ,

ਇਸ ਲਈ ਮੌਨ ਤੋੜਨਾ ਪੈਣਾ,

ਜ਼ੁਲਮਾਂ ਦਾ ਮੂੰਹ ਮੋੜਨਾ ਪੈਣਾ,

ਰਣਬੀਰ ਸਿੰਘ ਪ੍ਰਿੰਸ

ਸ਼ਾਹਪੁਰ ਕਲਾਂ ਆਫ਼ਿਸਰ ਕਾਲੋਨੀ

ਸੰਗਰੂਰ 9872299613

ਜਦ ਮਾਰੀ ਝਾਤ ਪੈਗ਼ੰਬਰ ਨੇ।

ਫਿਰ ਹਾਲ ਸੁਣਾਇਆ ਮੰਦਰ ਨੇ।

ਇੱਥੇ ਕਾਬਜ਼  ਇੱਕ ਜੋਗੀ ਏ ।

ਜੋ ਹਵਸ ਦਾ ਪੱਕਾ ਰੋਗੀ ਏ।

ਉਹ ਅੱਖਾਂ ਖੋਲੇ ਨੋਚਣ ਲਈ।

ਕੁਝ ਬੱਚੀਆਂ ਰੱਖੀਆਂ ਸ਼ੋਸ਼ਣ ਲ‌ਈ।

ਮਾਲਿਸ਼ ਦੇ ਲਈ ਰੱਖੀਆਂ ਕੁੜੀਆਂ।

ਨਸ਼ੇ ਦੀਆਂ ਵਰਤਾਵਣ‌ ਪੁੜੀਆਂ।

ਓਹਦੇ ਨਾਲ ਰਲੇ ਪੁਜਾਰੀ ਨੇ ।

ਥਾਂ ਥਾਂ ਜੋ ਲਾਉਂਦੇ ਯਾਰੀ ਨੇ ।

ਨਸ਼ੇ ਦਾ ਇਹ ਸਮੁੰਦਰ ਡੂੰਘਾ।

ਹਰ ਕੋਈ ਇਸ ਦੇ ਅੱਗੇ ਗੂੰਗਾ।

ਇਸਦੇ ਕਹੇ ਤੇ ਦੰਗੇ ਹੁੰਦੇ।

ਕੋਰਟ, ਕਚਹਿਰੀ ਪੰਗੇ ਹੁੰਦੇ।

ਜਿਸਮ ਦਾ ਵੱਡਾ ਵਪਾਰੀ ਬਣਿਆ।

ਲਾ ਦਲਾਲਾਂ ਨਾਲ ਯਾਰੀ ਬਣਿਆ।

ਵਰ ਦਿੰਦਾਂ ਏ ਪੁੱਤਾਂ ਦੇ ਵੀ ।

ਕਤਲ ਕਰਾਉਂਦਾ ਕੱਖਾਂ ਦੇ ਵੀ

ਇਹਦੇ ਮਹਿਲ ਸੋਨੇ ਤੇ ਚਾਂਦੀ ਦੇ।

ਬੜੇ ਢੇਰ ਲੱਗੇ ਨੇ ਗਾਂਧੀ ਦੇ।

ਇਹਨਾ ਜਨਤਾਂ ਮਗਰੇ ਲਾ‌ਈ ਏ।

ਇਹਨਾਂ ਕੀਤੀ ਬੜੀ ਤਬਾ‌ਈ ਏ।

ਜਿਜਸ ,ਅੱਲਾ,ਰਾਮ ਵਾਹਿਗੁਰੂ। 

ਇਹ ਸਭ ਦਾ ਵਰਤੇ ਨਾਮ ਵਾਹਿਗੁਰੂ।

ਜੋ  ਇਸਦੇ ਵਿਰੁੱਧ ਜਾ ਖਲੋ ਜਾਂਦਾ।

ਉਹ ਜ਼ਿੰਦਗੀ ਤੋਂ ਹੱਥ ਧੋ ਜਾਂਦਾਂ।

ਮੁੱਠੀ ਵਿੱਚ ਸਰਕਾਰਾਂ ਇਸਦੇ।

ਨਾਲ ਨੇ ਜੁੜੀਆਂ ਤਾਰਾਂ ਇਸਦੇ।

ਇਸਦਾ ਦਾ ਵਿੰਗਾਂ ਵਾਲ ਨੀ ਹੁੰਦਾ।

ਇਸਦਾ ਮੰਦੜਾ ਹਾਲ ਨੀ ਹੁੰਦਾ।

ਮੈਂ ਤਾਂ ਬੱਸ ਇੱਕ ਨਾਮ ਦਾ ਮੰਦਰ।

ਸਭ ਹੁੰਦਾ ਗਲਤ ਮੇਰੇ ਅੰਦਰ।

ਦੀਪ ਸੈਂਪਲੇ ਨੇ ਸੱਚ ਸੁਣਾਈ।

ਹਾਲ ਮੇਰੇ ਤੇ ਕਲਮ ਚਲਾਈ।

ਦਾਤੇ ਜੀ ਵਰਤਾ ਦਿਓ ਭਾਣੇ । 

ਤੁਸੀਂ ਹੀ ਇਹਨੂੰ ਲਾਓ ਟਿਕਾਣੇ।

ਮੈਂ ਮੰਦਰ ਬੱਸ ਦੇਵਾਂ ਦੁਹਾਈ।

ਦਾਤਾ ਜੀ ਤੁਸੀਂ ਹੋਵੋ ਸਹਾਈ‌।

ਗੀਤਕਾਰ ਦੀਪ ਸੈਂਪਲਾਂ

ਸ੍ਰੀ ਫ਼ਤਹਿਗੜ੍ਹ ਸਾਹਿਬ

6283087924

ਬੇਮੁੱਖ ਹੋ ਕੇ ਬਾਣੀ ਤੋਂ ਤੂੰ ਆਪਣੀ ਕਦਰ ਗਵਾ ਬੈਠਾ....

ਬੇਲੋੜਾ ਹੁਲੜਬਾਜ਼ੀ ਨੂੰ ਤੂੰ ਆਪਣੇ ਗਲ਼ ਲਗਾ ਬੈਠਾ....

ਛੱਡ ਕੇ ਨਿਮਰਤਾ, ਸੂਝ ਬੂਝ ਨੂੰ ਤੂੰ ਬੁੱਲੇਟ ਦੇ ਪਟਾਕੇ ਚਲਾ ਬੈਠਾ....

ਸਿਫ਼ਤਾਂ ਜਿਹਦੀਆਂ ਕਰਦੀ ਦੁਨੀਆਂ ਤੂੰ ਓਸ ਪੰਜਾਬ ਨੂੰ ਥੱਲੇ ਲਾ ਬੈਠਾ....

ਤੇਰਿਆਂ ਨਸ਼ਿਆਂ ਦੀ ਆਦਤ ਕਰਕੇ ਪੰਜਾਬ ਸਿੰਹਾਂ ਭੂੰਜੇ ਜਾ ਬੈਠਾ....

ਲੁੱਟ - ਖਸੁੱਟ ਕਰਕੇ ਤੂੰ ਬਾਪੂ ਦੀ ਪੱਗ ਲਵਾ ਬੈਠਾ....

ਦਸ ਕੇ ਖ਼ੁਦ ਨੂੰ ਬੇਰੋਜ਼ਗਾਰ ਤੂੰ ਕਿਰਤ ਦਾ ਫ਼ਲਸਫ਼ਾ ਭੁਲਾ ਬੈਠਾ....

ਤਿਆਗ ਕੇ ਨੇਕੀ ਦੇ ਰਾਹ ਤੂੰ ਬਦੀ ਨੂੰ ਜੱਫ਼ੀ ਪਾ ਬੈਠਾ....

ਹੋ ਕੇ ਊਤਾਰੁ ਹਿੰਸਾ ਤੇ ਤੂੰ ਹੋਲਾ ਮਹੱਲਾ ਮਨਾ ਬੈਠਾ....

ਲੈ ਕੇ ਜਾਨ ਨਿਰਦੋਸ਼ ਦੀ ਤੂੰ ਮੱਥੇ ਤੇ ਕਲੰਕ ਲਗਾ ਬੈਠਾ....

ਸੁਣ ਨੌਜਵਾਨਾਂ ਹੁਣ ਵੀ ਸੰਭਲ ਜਾ ਤੂੰ ਆਹ ਕੀ ਚੰਨ ਚੜ੍ਹਾ ਬੈਠਾ....

ਕਰੇ ਅਰਜੋਈ ਨਿੰਮਾ ਨਿਮਾਣਾ ਆਪਣੀ ਕਲ਼ਮ ਚਲਾ ਬੈਠਾ....

 ਨਿਰਮਲ ਸਿੰਘ ਨਿੰਮਾ (ਸਮਾਜ ਸੇਵੀ)

ਮੋਬਾ:9914721831

ਔਰਤ ਹਾਂ ਤੂੰ ਔਰਤ ਸਮਝ ਕੇ ,

ਐਦਾਂ ਅੱਤਿਆਚਾਰ ਨਾ ਕਰ,

ਅਬਲਾ ਤੇ ਕੰਮਜ਼ੋਰ ਆਖ ਕੇ,

ਮੇਰਾ ਤੂੰ ਤ੍ਰਿਸਕਾਰ ਨਾ ਕਰ,

ਨਾਜ਼ੁਕ ਕਲੀ, ਮਾਸੂਮ ਜਿਹੀ ਦੇ,

ਰਾਹਾਂ ਵਿੱਚ ਅੰਗਿਆਰ ਨਾ ਧਰ,

ਬੇਵਫ਼ਾ ,ਬੇਸ਼ਰਮ ਨਹੀਂ ਮੈਂ,

ਤੂੰ ਥੋੜ੍ਹਾ ਜਿਹਾ ਇਤਬਾਰ ਤਾਂ ਕਰ,

ਕਦੇ ਬੇਅਕਲ, ਬੇ ਗ਼ੈਰਤ ਕਹਿ ਕੇ,

ਕੱਖੋਂ ਹੌਲ਼ਾ ਕਿਰਦਾਰ ਨਾ ਕਰ

ਚੀਰ ਹਰਨ ਕਦੇ, ਅਗਨਿ ਪ੍ਰੀਖਿਆ,

ਸਿਤਮ ਮੇਰੇ ਤੇ ਹਰ ਵਾਰ ਨਾ ਕਰ,

ਪ੍ਰਿੰਸ ਨਿਮਾਣਿਆ ,ਬਣ ਜਾ ਸਿਆਣਾ,

ਆ ਮਰਦਪੁਣੇ ਦਾ ਹੰਕਾਰ ਨਾ ਕਰ,

ਜਣਨੀ ਹੋ ਜੇ, ਤੈਨੂੰ ਜਣ ਸਕਦੀ ਹਾਂ,

ਲੋੜ ਪਵੇ ਤਾਂ ਲਵਾਂ ਪ੍ਰਾਣ ਵੀ ਹਰ ,

ਰਣਬੀਰ ਸਿੰਘ ਪ੍ਰਿੰਸ

ਸ਼ਾਹਪੁਰ ਕਲਾਂ ਆਫ਼ਿਸਰ ਕਾਲੋਨੀ

ਸੰਗਰੂਰ 9872299613

ਸਭ ਤੋਂ ਵੱਡੀ ਦਵਾਈ

ਓਹੜ-ਪੋਹੜ ਸਭ ਕਰ ਕੇ ਦੇਖ ਲਏ ,

ਕੋਈ  ਰਾਸ  ਨਾ  ਆਈ  ਦਵਾਈ।

ਸਲਾਹਾਂ ਨਿਤ ਨਵੀਆਂ ਮਿਲਦੀਆਂ ਰਹਿਣ,

ਬੁਢਾਪੇ ਵਿੱਚ ਕੋਈ ਪੇਸ਼ ਨਾ ਜਾਈਂ ।

ਸਾਰੀ ਉਮਰ ਲਈਆਂ ਕੀਮਤੀ ਸਲਾਹਾਂ,

ਐਮਰਜੈਂਸੀ 'ਚ ਐਲੋਪੈਥੀ ਰਾਮਬਾਣ ।

ਆਯੁਰਵੇਦ ਪੁਰਾਣੇ ਤਜਰਬਿਆਂ ਤੇ ਆਧਾਰਿਤ,

ਕੋਈ  ਮਾਰੂ  ਪ੍ਰਭਾਵ  ਨਾ ਪਵੇ ਆਣ  ।

ਹੋਮਿਓਪੈਥੀ ਦਵਾਈ ਕਹਿੰਦੇ ਪੱਕਾ ਇਲਾਜ,

ਪਰ  ਇਲਾਜ  ਹੁੰਦਾ  ਹੌਲੀ  ਹੌਲੀ ।

ਜਵਾਨੀ ਪਹਿਰੇ ਲਈ ਕਾਫੀ ਸਮਾਂ,

ਪੁਸ਼ਤੈਨੀ ਰੋਗਾਂ ਦੀ ਜੜ੍ਹ ਪੱਟ ਪੱਟ ਰੋਲੀ।

ਗੁਰੂ ਸਾਹਿਬ ਦਾ ਚੜ੍ਹਦੀ ਕਲਾ ਵਾਲਾ ਨੁਸਖਾ,

ਸਭ ਰੋਗਾਂ ਦੀ ਇੱਕੋ ਇੱਕ ਦਵਾਈ ।

ਨਾ ਕੋਈ ਅਪਰੇਸ਼ਨ,ਨਾ ਈਕੋ, ਨਾ ਐਕਸ-ਰੇ,

ਖੁਸ਼ੀਆਂ ਖੇੜਿਆਂ ਵਿੱਚ ਭੁਗਤਣੀ ਉਤਨੀ ਉਮਰ,

ਜਿਤਨੀ   ਲੇਖਾਂ   ਵਿੱਚ   ਲਿਖਾਈ  ।

 ਅਮਰਜੀਤ ਸਿੰਘ ਤੂਰ

ਪਿੰਡ ਕੁਲਬੁਰਛਾਂ ਜ਼ਿਲਾ ਪਟਿਆਲਾ

ਫੋਨ ਨੰਬਰ  :  9878469639

ਤੁਰਾਂ ਮੈ ਜਿਸ ਦਿਸ਼ਾ ਨੂੰ ਵੀ,  ਹਵਾਵਾਂ ਚੀਰ ਦੀਆਂ ਨੇ

ਜੁਬਾਨਾਂ ਬੰਦ, ਹੈ ਦਹਿਸ਼ਤ, ਨਿਗਾਹਾਂ ਟੀਰ ਦੀਆਂ ਨੇ

ਸਿਆਲੋਂ ਤੁਰ ਪਈਆਂ ਨੇ,  ਕਿਵੇਂ ਬੇ-ਆਬਰੂ  ਹੋ ਹੋ

ਇਹੇ ਧਾਹਾਂ ਵਿਦੇਸ਼ਾਂ ਵਿਚ, ਰੁਲ਼ੀਆਂ ਹੀਰ ਦੀਆਂ ਨੇ

ਗਈਆਂ ਕਰ ਜਲਾ ਵਤਨੀ, ਤਸ਼ੱਦਦ ਸਹਿ ਹਕੂਮਤ ਦਾ

ਧਰਾਲ਼ਾਂ ਕਿਰ ਗਈਆਂ ਸੁਕ, ਵਗੇ ਇਹ ਨੀਰ ਦੀਆਂ ਨੇ

ਸਵਾਲਾਂ ਦੇ ਜਵਾਬਾਂ 'ਚੋਂ,  ਮਿਲੇਗਾ ਜ਼ਿੰਦਗ਼ੀ ਦਾ ਉਤਰ

ਸਮਾਧਾਂ ਬੇ-ਬਸੀ ਖੰਡਰ ,   ਮਜ਼ਾਰਾਂ ਪੀਰ ਦੀਆਂ ਨੇ

ਧਨਾਡਾਂ ਨਾਲ਼ ਕੀ ਸਾਂਝਾਂ,  ਕਿਹਾ ਰਿਸ਼ਤਾ ਗਰੀਬਾਂ ਦਾ

ਅਖੌਤਾਂ ਨੇ ਪਸੀਜਣ ਨੂੰ,  ਵਖੇਡਾਂ ਤਕਦੀਰ ਦੀਆਂ ਨੇ

ਕਿਵੇਂ ਸੋਸ਼ਣ ਕਰੇ ਜਾਵਣ,   ਤਰੀਕੇ ਚੌਧਰੀ ਲੱਭੇ

ਧੁਰੋਂ ਤੰਦਾਂ ਇਹੇ ਜੁੜੀਆਂ,  ਕਿਸਾਨੀ ਸੀਰ ਦੀਆਂ ਨੇ

ਅਲਾਪੇ ਰਾਗ ਹਰ ਕੋਈ, ਖੁਦਾ ਹੁਣ ਆਦਮੀ ਬਣਿਐ

ਰਬਾਬਾਂ ਤੋੜ ਸੁੱਟੀਆਂ,        ਰਬਾਬੀ ਮੀਰ ਦੀਆਂ ਨੇ

ਜੁਬਾਨਾਂ ਬੰਦ 'ਤੇ ਤਾਲ਼ੇ ,   ਵਿਕਾਊ ਕਲਮ ਅਖ਼ਵਾਰਾਂ

ਕੜੀਆਂ ਸਖ਼ਤ ਤਾਂ ਹੀ ਤਾਂ , ਗਲ਼ੇ  ਜ਼ੰਜ਼ੀਰ ਦੀਆਂ ਨੇ

ਹਲੀਮੀ "ਰੇਤਗੜ " ਅੰਦਰ , ਬੜੀ ਸੁਣਦਾਂ ਦਵੇ ਭਾਸ਼ਣ

ਵਿਅੰਗੀਂ ਫ਼ੂਕਦੈ ਦਿਲ ਨੂੰ , ਚਾਲਾਂ ਤਕਰੀਰ ਦੀਆਂ ਨੇ

         ਬਾਲੀ ਰੇਤਗੜ

     +919465129168

ਅੱਜ ਕੱਲ ਆਰਟੀਫਿਸ਼ਲ ਜਿਹੇ ਹੋ ਗਏ ਨੇ ਕੋਕੇ ਕੁੜੀਏ,

ਪਹਿਲਾਂ ਵਾਂਗ ਨਹੀਂ ਦਿੱਤੇ ਜਾਂਦੇ ਗਲੀ ਵਿਚ ਹੋਕੇ ਕੁੜੀਏ।

ਦਾਜ ਵਰੀ ਦੇ ਮਹਿੰਗੇ ਸੂਟ ਕਹਿੰਦੀਆਂ ਸਾਨੂੰ ਭਾਰੀ ਲਗਦੇ,

ਪੰਜਾਬੀ ਸਰਦਾਰ ਗੱਭਰੂ ਮੁਟਿਆਰਾਂ ਨੂੰ ਘੱਟ ਸੋਹਣੇ ਲੱਗਦੇ।

ਪੰਜਾਬੀ ਪਹਿਰਾਵੇ ਤੋਂ ਕਿਉਂ ਦੂਰ ਭੱਜ ਰਹੀਆਂ ਨੇ ਮੁਟਿਆਰਾ,

ਪਾ ਕੇ ਪੈਂਟ ਕਮੀਜ਼ਾਂ ਪਿੱਛੇ ਛੱਡ ਗਈਆਂ ਇਹ ਬਾਂਕੀਆਂ ਨਾਰਾਂ।

ਗਿੱਧੇ ਅਤੇ ਭੰਗੜੇ ਤੋਂ ਅੱਜਕੱਲ੍ਹ ਦੂਰ ਭੱਜ ਰਹੀਆਂ ਨੇ ਮੁਟਿਆਰਾ,

ਜੀਪਾਂ ਥਾਰਾਂ ਚਲਾ ਕੇ ਇਹ ਅਖਵਾਉਂਦੀਆਂ ਨੇ ਅੜਬ ਮੁਟਿਆਰਾਂ

ਮੁੰਡੇ ਵੀ ਕਿਹੜਾ ਘੱਟ ਨੇ ਉਹ ਵੀ ਆਪਣਾ ਵਿਰਸਾ ਭੁਲਦੇ ਜਾਂਦੇ,

ਛੱਡ ਕੇ ਮਾਂ ਦੀਆਂ ਪੱਕੀਆਂ ਬਰਗਰ, ਪੀਜ਼ੇ ਉਹ ਰੇਹੜੀ ਤੇ ਖਾਂਦੇ।

ਹੱਥ ਵਟਾ ਦਿਉ ਖੇਤ  ਪਿਉ ਦਾ ਮਾਂਵਾਂ ਪੁੱਤਾਂ ਨੂੰ ਦੇਣ  ਦੁਹਾਈਆਂ,

ਛੱਡ ਪਜਾਮੇ ਕੁੜਤੇ,  ਉਹਨਾਂ ਕਮੀਜ਼ਾਂ ਪੈਂਟਾਂ ਦੇ  ਵਿੱਚ  ਪਾਈਆਂ।

ਬਿਨਾ ਕਿਸੇ ਨੂੰ ਜਾਣੇ ਫੇਸਬੁੱਕ ਤੇ ਦੋਸਤੀ ਦੀ ਰਿਕੁਐਸਟ ਪਾਈ ਜਾਂਦੇ,

ਕਰਕੇ ਆਈਲਟਸ ਉਹ ਬਾਪੂ ਵਾਲੀ ਜਮੀਨ ਦਾ ਰਕਬਾ ਘਟਾਈ ਜਾਂਦੇ।

ਬਾਹਰ ਜਾਂਦੇ ਹੋ ਦੋਸਤੋ ਉੱਥੇ ਦੋਲਤ ਸ਼ੋਹਰਤ  ਤੁਸੀਂ ਬਹੁਤ ਕਮਾਓ

ਪੰਜਾਬੀ ਹੋਣ ਦੇ ਨਾਤੇ ਤੁਸੀ ਪੰਜਾਬ ਦਾ ਵਿਰਸਾ ਭੁੱਲ ਨਾ ਜਾਇਓ।

ਜਸਪਾਲ ਸਿੰਘ ਮਹਿਰੋਕ 

ਸਨੌਰ (ਪਟਿਆਲਾ)

ਮੋਬਾਈਲ 6284347188

ਮਹਾਂ ਸ਼ਿਵਰਾਤਰੀ ਦਾ ਪੁਰਬ ਮਨਾਇਆ ਜਾਂਦਾ,

ਭਾਰਤ ਵਿਚ ਬੜੀ ਧੂਮ ਧਾਮ ਦੇ ਨਾਲ।

ਸ਼ਿਵ ਜੀ ਮਹਾਰਾਜ ਨੇ ਕੈਲਾਸ਼ ਪਰਬਤ ਤੇ ਲਾਈ ਸਮਾਧੀ,

6638ਮੀਟਰ ਉਚਾਈ ਤੇ ਗੰਗੋਤਰੀ ਗਰੁੱਪ ਦੀਆਂ ਪੱਛਮੀ ਪਹਾੜੀਆਂ ਤੇ ਕੀਤਾ ਕਮਾਲ।

ਹਿੰਦੂ ਸੰਸਕ੍ਰਿਤੀ ਦਾ ਸਭ ਤੋਂ ਮੁੱਖ ਤਿਉਹਾਰ,

ਨੇਪਾਲ ਵਿੱਚ ਵੀ ਸਤਿਕਾਰ ਨਾਲ ਮਨਾਇਆ ਜਾਵੇ।

ਸ਼ਿਵਲਿੰਗ ਦੀ ਆਕ੍ਰਿਤੀ ਵਿੱਚ ਬਣਿਆ ਹੋਇਆ,

ਗੜ੍ਹਵਾਲ ਦੀਆਂ ਪਹਾੜੀਆਂ ਵਿਚ ਮਸ਼ਹੂਰ ਤੀਰਥ ਯਾਤਰਾ ਕਹਾਵੇ।

ਗੌਮੁਖ ਦਾ ਸਥਾਨ ਪਰਬਤਾਰੋਹੀਆਂ ਲਈ ਖਿੱਚ ਦਾ ਕੇਂਦਰ,

ਔਖੀ ਚੜ੍ਹਾਈ ਚੜਣ ਵਾਲਿਆਂ ਨੂੰ ਇਨਾਮੀ ਮੌਕੇ ਦਿੰਦੀਆਂ।

ਭਾਗੀਰਥੀ ਦਰਿਆ ਨਿਕਲਦਾ ਗੌਮੁਖ, ਉਤਰਾਖੰਡ ਤੋਂ,

ਤਪੋਬਨ ਦੇ ਨੇੜੇ, ਜੰਗਲੀ ਝਾੜੀਆਂ, ਫੁੱਲਾਂ ਲੱਦੀਆਂ ਸਕੂਨ ਦਿੰਦੀਆਂ।

ਤਿੰਨ ਚੋਟੀਆਂ ਰਲ ਕੇ ਤ੍ਰਿਸ਼ੂਲ ਦੀ ਸ਼ਕਲ ਬਣਾਉਂਦੀਆਂ,

ਜਿਹੜਾ ਸ਼ਿਵਜੀ ਮਹਾਰਾਜ ਦਾ ਸੀ ਮੁਖ ਹਥਿਆਰ।

ਭਗਵਾਨ ਸ਼ਿਵ ਦਾ ਵਾਸ, ਸਰੋਤ ਹੈ ਕਰਨਾਲੀ,

ਸਤਲੁਜ,ਸਿੰਧ ਤੇ ਬ੍ਰਹਮਪੁੱਤਰ ਦਰਿਆਵਾਂ ਦਾ,

ਜਿਸ ਨੂੰ ਕਿਹਾ ਜਾਂਦਾ ਹੈ ਸੁਰਗ ਦੀ ਪੌੜੀ ਦਾ ਪਾਰ।

ਕੈਲਾਸ਼ ਪਰਬਤ ਦੇ ਉੱਤਰ ਵਾਲੇ ਪਾਸੇ ਨਜ਼ਰ ਨੇ ਆਉਂਦੇ,

ਵੈਸ਼ਨੋ ਦੇਵੀ ਮਾਤਾ, ਹਨੂੰਮਾਨ ਜੀ, ਗਣੇਸ਼ ਭਗਵਾਨ ਤੇ ਹੋਰ।

ਜਦੋਂ ਕਾਲਾ ਪਰਬਤ ਬਰਫ ਨਾਲ ਲੱਦਿਆ ਜਾਂਦਾ

ਮੂੰਹ, ਨੱਕ, ਚਿਹਰਾ, ਸ਼ਿਵ ਜੀ ਮਹਾਰਾਜ ਦਾ ਚਮਕੇ ਚੰਦ ਚਕੋਰ। 

ਸ਼ਿਵ ਜੀ ਭਗਵਾਨ ਨੂੰ ਮੰਨਿਆ ਜਾਂਦਾ ਮਾਇਆ ਜਗਤ ਦਾ ਮੁਖੀ,

ਪਾਰਵਤੀ ਦੇਵੀ, ਜਾਣੀ ਜਾਂਦੀ ਦੁਰਗਾ ਦੇਵੀ, ਕਾਬੂ ਕਰੇ ਮਾਇਆ ਨੂੰ ।

ਤਿੱਬਤ ਵਿਚ ਮਾਨਸਰੋਵਰ ਝੀਲ ਹਿੰਦੂਆਂ, ਜੈਨੀਆਂ ਤੇ ਬੋਧੀਆਂ ਦਵਾਰਾ ਪੂਜੀ ਜਾਂਦੀ,

ਕਹਿੰਦੇ ਨੇ ਮਨੋਕਾਮਨਾ ਪੂਰੀ ਹੁੰਦੀ ਸੱਚੇ ਮਨੋਂ ਜਾਇਆ ਨੂੰ।

ਸ਼ਿਵ ਜੀ ਸਾਧੂ ਭੇਸ ਚ ਹੀ ਰਹਿੰਦੇ ਸਮੇਤ ਪਤਨੀ ਤੇ ਬੱਚੇ,

ਗਣੇਸ਼ ਤੇ ਕਾਰਤਿਕ ਦੋਵੇਂ ਪੁੱਤਰ ਤੇ ਅਸ਼ੋਕਾਸੁੰਦਰੀ ਪੁੱਤਰੀ।

18ਫਰਵਰੀ2023 ਨੂੰ ਮਨਾਈ ਜਾਣੀ ਮਹਾਂ ਸ਼ਿਵਰਾਤਰੀ,

ਪ੍ਰਤੱਖ ਯੋਗੀ ਰੂਪ ਵਿੱਚ ਵਿਚਰਦੇ,ਯੋਗਾ ਦੇ ਮੁੱਖੀ

ਅਮਰਜੀਤ ਸਿੰਘ ਤੂਰ

ਪਿੰਡ ਕੁਲਬੁਰਛਾਂ ਜ਼ਿਲਾ ਪਟਿਆਲਾ

ਫੋਨ ਨੰਬਰ  : 9878469639

ਕੇਂਦਰ ਬਨਾਮ ਪੰਜਾਬ ਸਰਕਾਰ

ਪੰਜਾਬ ਦੀ ਤਰੱਕੀ ਰੋਕਣ ਲਈ,

ਕੇਂਦਰ ਪੂਰੀ ਵਾਹ  ਹੈ ਲਾਉਂਦਾ ।

ਹਰ ਵਧੀਆ ਸਕੀਮ ਨੂੰ ਫੇਲ੍ਹ ਕਰਨ ਲਈ,

ਮੋਦੀ ਸਾਹਬ ਉਹੀ ਪੁਰਾਣੇ ਵਾਜੇ ਵਜਾਉਂਦਾ।

ਨਸ਼ੇ ਬੰਦ ਕਰਨੇ, ਲੱਚਰ ਗਾਇਕੀ ਸ਼ੋਰ ਪ੍ਰਦੂਸ਼ਣ,

ਟੋਲ ਪਲਾਜ਼ੇ ਖੇਤੀ ਅਧਾਰਤ ਉਦਯੋਗ ਤੇ ਹੋਰ।

ਬਿਨਾਂ ਗੱਲ ਤੋਂ ਵਿਰੋਧੀਆਂ ਨੂੰ ਚੱਕ ਦੱਬ ਕਰਕੇ,

ਕਰਨਾ ਚਾਹੁੰਦੇ ਭਗਵੰਤਮਾਨ ਦੀ ਪਕੜ ਕਮਜ਼ੋਰ

ਮੀਡੀਆ ਵੀ ਆਪਣੇ ਵੱਲ ਕਰ ਰੱਖਿਆ ਭੰਡੀ ਪ੍ਰਚਾਰ ਲਈ,

ਮਿੱਟੀ ਪੁਟਦੇ ਮਾਨ ਸਰਕਾਰ ਨੂੰ ਬਦਨਾਮ ਕਰਨ ਵਾਸਤੇ ।

ਮਾਨ ਵੀ ਕੱਚੀਆਂ ਗੋਲੀਆਂ ਨ੍ਹੀਂ ਖੇਡਿਆ ,

ਅੰਕੜਿਆਂ ਸਬੂਤਾਂ ਸਮੇਤ ਕਰੇ ਕਾਰਵਾਈ, ਜਨਤਾ ਨੂੰ ਸਾਵਧਾਨ ਕਰਨ ਵਾਸਤੇ।

ਸਾਰੇ ਪੰਜਾਬੀ ਜਾਗਰੂਕ ਹੋ ਰਹੇ ਬਹਾਦਰੀ ਦੀ ਬਣ ਰਹੇ ਮਿਸਾਲ,

ਆਰਐਸਐਸ ਦੇ ਪੈਂਤੜੇ ਨੂੰ ਹਰ ਫਰੰਟ ਤੇ ਕਰਨ ਨਾਕਾਮ।

ਅਖਬਾਰਾਂ ਤੇ ਮੀਡੀਏ ਚ ਭੰਬਲਭੂਸਾ ਪਾਈ ਰੱਖਦੇ,

ਸਿਆਣੇ ਤੇ ਇਨਕਲਾਬੀ ਲੋਕਾਂ ਨੂੰ ਉਨ੍ਹਾਂ ਦੀ ਹੋ ਗਈ ਪਹਿਚਾਣ।

ਅਮਰਜੀਤ ਸਿੰਘ ਤੂਰ

ਪਿੰਡ ਕੁਲਬੁਰਛਾਂ ਜ਼ਿਲਾ ਪਟਿਆਲਾ 

ਫੋਨ ਨੰਬਰ  :  9878469639