ਥੈੱਟਫੋਰਡ, 21 ਸਤੰਬਰ (ਗਿਆਨੀ ਰਵਿੰਦਰਪਾਲ ਸਿੰਘ )ਪਿਛਲੇ ਹਫ਼ਤੇ ਬਰਤਾਨੀਆ ਦੇ ਥੈਟਫੋਰਡ ਸ਼ਹਿਰ ਦੇ ਮਸ਼ਹੂਰ ‘ਦਿ ਗਿਲਡਹਾਲ’ ਵਿਖੇ ਪੰਜਾਬ ਸੱਭਿਆਚਾਰ ਵਿਰਾਸਤ ਨਾਲ ਸਬੰਧਤ ਇਕ ਪ੍ਰੋਗਰਾਮ ਦਾ ਆਯੋਜਨ ਕੀਤਾ ਗਿਆ I
ਜਿਸ ਵਿੱਚ ਗਲੋਬਲ ਸਿੱਖ ਵਿਜਨ, ਲੰਡਨ ਵੱਲੋਂ “ਸਰਕਾਰ ਏ ਖਾਲਸਾ ਦੇ ਨਾਨਕ ਸ਼ਾਹੀ ਸਿੱਕਿਆਂ” ਦੀ ਪ੍ਰਦਰਸ਼ਨੀ ਲਗਾਈ ਗਈ। ਗੁਰਬਾਣੀ ਦੇ ਪਵਿੱਤਰ ਮਹਾਂ ਵਾਕ
ਨਾਨਿਕ ਰਾਜੁ ਚਲਾਇਆ ਸਚੁ ਕੋਟੁ ਸਤਾਣੀ ਨੀਵ ਦੈ।। ਅਨੁਸਾਰ ਇਸ ਪ੍ਰਦਰਸ਼ਨੀ ਵਿੱਚ ਗੁਰੂ ਕਾਲ (1469-1708), ਨਾਲ ਸਬੰਧਤ ਹਲੇਮੀਂ ਰਾਜ ਦੇ ਸਿੱਕੇ ,ਪਹਿਲੇ ਸਿੱਖ ਰਾਜ (1710-1716) ਦੇ ਸਿੱਕੇ, ਸਿੱਖ ਰਾਜ ਦੀ ਚੜਤ ( 1801-1849 ) ਅਤੇ ਸਿੱਖ ਰਾਜ ਦੇ ਆਖਰੀ ਬਾਦਸ਼ਾਹ ਮਹਾਰਾਜਾ ਦਲੀਪ ਸਿੰਘ ਅਤੇ ਅੰਗਰੇਜ ਹਕੂਮਤ ਦੇ ਸਮੇਂ ਦੇ ਸਿੱਖ ਇਤਿਹਾਸ ਨਾਲ ਸੰਬੰਧਿਤ ਸਿੱਕਿਆਂ ਦੀ ਪ੍ਰਦਰਸ਼ਨੀ ਲਗਾਈ ਗਈ। ਇਹ ਸਿੱਕੇ ਸੋਨੇ, ਚਾਂਦੀ ਅਤੇ ਕਾਪਰ ਦੇ ਬਣੇ ਹੋਏ ਸਨ ਜੋ ਕਿ ਲੋਕਾਂ ਦੀ ਖਿੱਚ ਦਾ ਕੇਂਦਰ ਸਨ। ਇੰਨਾਂ ਸਿੱਕਿਆਂ ਨੂੰ ਵੇਖਣ ਵਾਲਿਆਂ ਦੀ ਭੀੜ ਇੱਸ ਤਰਾਂ ਉਮੜੀ ਹੋਈ ਸੀ ਜਿਵੇਂ ਕਿ ਯੂਰਪ ਦੇ ਲੋਕ ਫੁੱਟਬਾਲ ਦਾ ਮੈਚ ਵੇਖਣ ਲਈ ਪਹੁੰਚੇ ਹੋਏ ਹੋਣ। ਖਾਲਸਾ ਰਾਜ ਦੇ ਸਿੱਕਿਆਂ ਨੇ ਸੱਭ ਤੋਂ ਵੱਧ ਵਿਦਿਆਰਥੀਆਂ ਨੂੰ ਪ੍ਰਭਾਵਿਤ ਕੀਤਾ। ਨੌਜੁਆਨ ਪੀੜੀ ਨੂੰ ਆਪਣੇ ਅਮੀਰ ਵਿਰਸੇ ਅਤੇ ਇਤਿਹਾਸ ਨਾਲ ਜੁੜਨ ਅਤੇ ਜਾਨਣ ਦਾ ਸੁਨਹਿਰੀ ਮੌਕਾ ਮਿਲਿਆ। ਵਿਦਿਆਰਥੀਆਂ ਨੇ ਇਨ੍ਹਾਂ ਸਿੱਕਿਆਂ ਨੂੰ ਵੇਖਣ ਵਿੱਚ ਡੂੰਘੀ ਦਿਲਚਸਪੀ ਵਿਖਾਈ ਅਤੇ ਉਨ੍ਹਾਂ ਦਾ ਉਤਸ਼ਾਹ ਵੇਖਣ ਵਾਲ਼ਾ ਹੀ ਬਣਿਆ ਹੋਇਆ ਸੀ। ਪ੍ਰਦਰਸ਼ਨੀ ਵੇਖਣ ਲਈ ਯੂ ਕੇ ਤੋਂ ਇਲਾਵਾ ਯੂਰਪ ਦੇ ਹੋਰਨਾਂ ਦੇਸ਼ਾਂ ਦੇ ਲੋਕ ਵੀ ਪਹੁੰਚੇ ਹੋਏ ਸਨ । ਇਸ ਮੌਕੇ ਇੰਗਲੈਂਡ ਦੇ ਬਹੁਤ ਸਾਰੇ ਮੈਂਬਰ ਪਾਰਲੀਮੈਂਟ, ਬਰਤਾਨਵੀ ਪੁਲਿਸ ਦੇ ਸੀਨੀਅਰ ਅਧਿਕਾਰੀ ਅਤੇ ਬਹੁਤ ਸਾਰੀਆਂ ਉੱਘੀਆਂ ਸ਼ਖਸ਼ੀਅਤਾਂ ਪਹੁੰਚੀਆਂ ਹੋਈਆਂ ਸਨ। ਗਲੋਬਲ ਸਿੱਖ ਵੀਜ਼ਨ ਲੰਡਨ ਦਾ ਇਹ ਉਪਰਾਲਾ ਸਿੱਖ ਕੌਮ ਅਤੇ ਵਿਸ਼ੇਸ਼ ਕਰਕੇ ਵਿਦਿਆਰਥੀਆਂ ਅਤੇ ਛੋਟੇ ਬੱਚਿਆਂ ਨੂੰ ਆਪਣੇ ਅਮੀਰ ਵਿਰਸੇ ਅਤੇ ਸੁਨਹਿਰੀ ਇਤਿਹਾਸ ਨਾਲ ਜੋੜਨ ਦਾ ਬਹੁਤ ਵੱਡਾ ਅਤੇ ਨਿਵੇਕਲਾ ਕਾਰਜ ਸੀ ਸੋ ਕਿ ਸ਼ਾਇਦ ਹੀ ਇਸ ਤੋਂ ਪਹਿਲਾਂ ਕਦੇ ਹੋਇਆ ਹੋਵੇ।
ਜੇਕਰ ਤੁਸੀਂ ਚਾਹੁੰਦੇ ਹੋ ਕਿ ਇਹ ਪ੍ਰਦਰਸ਼ਨੀ ਤੁਹਾਡੇ ਗੁਰੂਦੁਆਰਾ ਸਾਹਿਬ ਜਾਂ ਕਮਿਊਨਿਟੀ ਸੈਂਟਰ ਵਿਖੇ ਲਗਾਈ ਜਾਏ ਤਾਂ ਫਿਰ ਕਿਰਪਾ ਹੇਠ ਲਿਖੇ ਪਤੇ ਤੇ ਈਮੇਲ ਕਰੋ contact@globalsikhvision.org
ਨਿਸ਼ਾਨ ਸਿੰਘ ਕਾਹਲੋਂ ਡਾਇਰੈਕਟਰ ਕਮਨੀਕੇਸ਼ਨ ਅਤੇ ਕੰਪੇਨ ਗਲੋਬਲ ਸਿੱਖ ਵਿਜਨ, ਲੰਡਨ ਇੰਗਲੈਂਡ
