ਲੁਧਿਆਣਾ

ਮੁੱਲਾਂਪੁਰ ਦਾਖਾ 10 ਮਾਰਚ (ਸਤਵਿੰਦਰ ਸਿੰਘ ਗਿੱਲ)  ਹਲਕਾ ਦਾਖਾ ਦੇ ਨਾਮਵਰ ਨਗਰ ਸਵੱਦੀ ਕਲਾਂ ਵਿਖੇ ਮੈਬਰ ਪਾਰਲੀਮੈਟ ਰਵਨੀਤ ਸਿੰਘ ਬਿੱਟੂ ਅੱਜ  ਪਿੰਡ ਦੇ ਚਾਰੇ ਪਾਸੇ ਸੀਸੀਟੀਵੀ ਕੈਮਰੇ ਲਗਵਾਉਣ ਦੀ ਸ਼ੁਰੂਆਤ ਕੀਤੀ। ਐਮ ਪੀ ਬਿੱਟੂ ਨੇ ਲੋਕਾਂ ਨੂੰ ਸੰਬੋਧਨ ਕਰਦਿਆ ਕਿਹਾ ਕਿ ਸਮਾਜ ਵਿਰੋਧੀ ਅਨਸਰਾਂ ਖਿਲਾਫ਼ ਅਤੇ ਗੈਂਗਸਟਰਾਂ ਸਮੇਤ ਨਸ਼ੇੜੀ ਕਿਸਮ ਦੇ ਲੋਕਾਂ ਨੂੰ ਨੱਥ ਪਾਉਣ ਵਾਸਤੇ ਤੇ ਰਾਤ ਨੂੰ ਵਾਰਦਾਤ ਕਰਕੇ ਸੜਕ ਰਾਹੀਂ ਭੱਜਣ ਵਾਲੇ ਲੋਕਾਂ ਨੂੰ ਫੜਨ ਵਾਸਤੇ ਉਹਨਾਂ ਵਲੋਂ ਅੱਜ ਵੱਡੀ ਗਿਣਤੀ ਪਿੰਡਾਂ ਚ ਕੈਮਰੇ ਲਗਾਏ ਜਾ ਰਹੇ ਹਨ।  ਜਿਸ ਕੜੀ ਤਹਿਤ ਉਨ੍ਹਾਂ ਵੱਲੋਂ 8 ਸੀਸੀਟੀਵੀ ਕੈਮਰੇ ਲਗਾਏ ਗਏ ਹਨ।                          
          ਹਲਕਾ ਇੰਚਾਰਜ ਕੈਪਟਨ ਸੰਦੀਪ ਸਿੰਘ ਸੰਧੂ ਨੇ ਵੀ ਮੈਬਰ ਪਾਰਲੀਮੈਟ ਰਵਨੀਤ ਸਿੰਘ ਬਿੱਟੂ ਦਾ ਧੰਨਵਾਦ ਕਰਦਿਆ ਕਿਹਾ ਕਿ ਮਹਰੂਮ ਮੁੱਖ ਮੰਤਰੀ ਬੇਅੰਤ ਸਿੰਘ ਦਾ ਸਹੁਰਾ ਪਿੰਡ ਹੈ।  ਇੱਥੋਂ ਦੇ ਲੋਕ ਹਰ ਇਕ ਚੋਣ ਵਿੱਚ ਖੁਲ੍ਹਕੇ ਹਮਾਇਤ ਕਰਦੇ ਹਨ। ਮੇਜਰ ਸਿੰਘ ਮੁੱਲਾਂਪੁਰ ਪ੍ਰਧਾਨ ਲੁਧਿਆਣਾ ਦਿਹਾਤੀ ਨੇ ਵੀ ਇਹਨਾ ਕੈਮਰਿਆਂ ਦਾ ਜਿਕਰ ਕਰਦਿਆਂ ਕਿਹਾ ਕਿ ਹੁਣ ਵਾਰਦਾਤ ਕਰਕੇ ਭੱਜਣ ਵਾਲੇ ਇਹਨਾ ਗਲਤ ਅਨਸਰਾਂ ਨੂੰ ਜਲਦ ਪੁਲਸ ਫਰਗ ਲਿਆ ਕਰੇਗੀ। 
         ਬਲਾਕ ਪ੍ਰਧਾਨ ਪਰੇਮ ਸਿੰਘ ਸੇਖੋਂ ਨੇ ਰਵਨੀਤ ਬਿੱਟੂ ਨੂੰ ਜੀ ਆਇਆਂ ਆਖਿਆ ਤੇ ਦਸਿਆ ਕਿ ਲੁਧਿਆਣਾ ਲੋਕ ਸਭਾ ਹਲਕੇ ਦੇ ਸਭ ਤੋਂ ਵੱਧ ਕੈਮਰੇ ਹਲਕਾ ਦਾਖਾ ਨੂੰ ਮਿਲੇ ਹਨ ਜਿਸ ਕਰਕੇ ਉਹ ਐਮ,ਪੀ ਬਿੱਟੂ ਦਾ ਧੰਨਵਾਦ ਕਰਦੇ ਹਨ। ਸਮਾਗਮ ਦੌਰਾਨ ਸਰਪੰਚ ਲਾਲ ਸਿੰਘ, ਸਰਪੰਚ ਦਲਜੀਤ ਸਿੰਘ, ਸੀਨੀਅਰ ਕਾਂਗਰਸੀ ਆਗੂ ਜਗਦੀਪ ਸਿੰਘ ਜੱਗਾ ਗਿੱਲ ਸਵੱਦੀ ਕਲਾਂ, ਹਰਮਿੰਦਰਪਾਲ ਸਿੰਘ ਬਿੱਟੂ ਸਵੱਦੀ ਕਲਾਂ, ਸੁਖਮੰਦਰ ਸਿੰਘ ਜੱਗਾ, ਗੁਰਸੇਵਕ ਸਿੰਘ ਸੋਨੀ ਸਿੱਧੂ, ਗੁਰਵਿੰਦਰ ਸਿੰਘ ਤੂਰ ਤੇ ਪ੍ਰਧਾਨ ਬੂਟਾ ਸਿੰਘ ਅਦਿ ਨੇ ਸਵੱਦੀ ਕਲਾਂ ਨਗਰ ਵਲੋਂ ਮੈਬਰ ਪਾਰਲੀਮੈਟ ਰਵਨੀਤ ਸਿੰਘ ਬਿੱਟੂ ਦਾ ਵਿਸ਼ੇਸ਼ ਸਨਮਾਨ ਕੀਤਾ।

ਲੁਧਿਆਣਾ, 10 ਮਾਰਚ (ਟੀ. ਕੇ. ) - ਡਿਪਟੀ ਕਮਿਸ਼ਨਰ ਸਾਕਸ਼ੀ ਸਾਹਨੀ ਵੱਲੋਂ ਲੋਧੀ ਕਲੱਬ ਦੇ ਮੈਂਬਰਾਂ ਲਈ ਫੂਡ ਆਰਡਰਿੰਗ ਐਪ, ਵਟਸਐਪ ਚੈਟਬੋਟ ਅਤੇ ਕੁਝ ਹੋਰ ਸੁਵਿਧਾਵਾਂ ਲਾਂਚ ਕੀਤੀਆਂ।

ਡਿਪਟੀ ਕਮਿਸ਼ਨਰ ਸਾਹਨੀ ਜੋ ਕਿ ਕਲੱਬ ਦੇ ਪ੍ਰਧਾਨ ਵੀ ਹਨ, ਵੱਲੋਂ ਸਥਾਨਕ ਲੋਧੀ ਕਲੱਬ ਵਿਖੇ ਆਯੋਜਿਤ ਅੰਤਰਰਾਸ਼ਟਰੀ ਮਹਿਲਾ ਦਿਵਸ ਸਮਾਗਮ ਮੌਕੇ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ।

ਸਮਾਗਮ ਦੀ ਸ਼ੁਰੂਆਤ ਵਿਸ਼ੇਸ਼ ਜੀਵਨ ਸ਼ੈਲੀ ਪ੍ਰਦਰਸ਼ਨੀ ਨਾਲ ਹੋਈ ਜਿਸ ਤੋਂ ਬਾਅਦ ਵੱਖ-ਵੱਖ ਮਜ਼ੇਦਾਰ ਖੇਡਾਂ, ਬੰਪਰ ਕੈਸ਼ ਤੰਬੋਲਾ ਗੇਮਾਂ, ਸੰਗੀਤ ਅਤੇ ਹੋਰ ਬਹੁਤ ਕੁਝ ਸ਼ਾਮਲ ਕੀਤਾ ਗਿਆ। ਪਹਿਲੀਆਂ 200 ਔਰਤਾਂ ਲਈ ਵਿਸ਼ੇਸ਼ ਤੋਹਫ਼ੇ ਹਿਆਵ ਸੈਲੂਨ ਅਤੇ ਐਸਥੈਟਿਕ ਸੈਂਟਰ ਦੁਆਰਾ ਸਪਾਂਸਰ ਕੀਤੇ ਗਏ ਸਨ। ਇਸ ਤੋਂ ਇਲਾਵਾ ਲੱਕ ਡਰਾਅ ਲਈ ਵਿਸ਼ੇਸ਼ ਤੋਹਫ਼ੇ ਈਵੋਕ ਅਤੇ ਫੋਰੈਸਟ ਫਾਰਮਜ਼ ਦੁਆਰਾ ਸਪਾਂਸਰ ਕੀਤੇ ਗਏ ਸਨ।

ਬਾਅਦ ਵਿੱਚ ਡਿਪਟੀ ਕਮਿਸ਼ਨਰ ਨੇ ਮੈਂਬਰਾਂ ਦੀ ਸਹੂਲਤ ਲਈ ਇੱਕ ਫੂਡ ਐਪ, ਸਮਾਗਮਾਂ ਸਬੰਧੀ ਅਤੇ ਹੋਰ ਜਾਣਕਾਰੀ ਸਾਂਝੀ ਕਰਨ ਲਈ ਵਟਸਐਪ ਚੈਟਬੋਟ ਵੀ ਲਾਂਚ ਕੀਤਾ।
 
ਇਸ ਤੋਂ ਬਾਅਦ ਕੇਕ ਕੱਟਣ ਦੀ ਰਸਮ ਵੀ ਅਦਾ ਕੀਤੀ ਗਈ। ਕਲੱਬ ਦੇ ਲਗਭਗ 1000 ਮੈਂਬਰਾਂ ਨੇ ਹਾਜ਼ਰੀ ਭਰੀ ਅਤੇ ਸਮਾਗਮ ਦਾ ਆਨੰਦ ਮਾਣਿਆ। ਕਲੱਬ ਦੀ ਮੈਨੇਜਮੈਂਟ ਨੇ ਜੇਤੂਆਂ ਅਤੇ ਪ੍ਰਤੀਯੋਗੀਆਂ ਨੂੰ ਤੋਹਫੇ ਦਿੱਤੇ।

ਡਿਪਟੀ ਕਮਿਸ਼ਨਰ ਸਾਕਸ਼ੀ ਸਾਹਨੀ ਦੇ ਨਾਲ ਵਧੀਕ ਡਿਪਟੀ ਕਮਿਸ਼ਨਰ ਓਜਸਵੀ ਅਲੰਕਾਰ, ਐਸ.ਡੀ.ਐਮਜ਼ ਵਿਕਾਸ ਹੀਰਾ, ਦੀਪਕ ਭਾਟੀਆ, ਗੁਰਬੀਰ ਸਿੰਘ ਕੋਹਲੀ, ਸਹਾਇਕ ਕਮਿਸ਼ਨਰ (ਜਨਰਲ) ਉਪਿੰਦਰਜੀਤ ਕੌਰ ਬਰਾੜ ਵੀ ਮੌਜੂਦ ਸਨ।

ਇਸ ਮੌਕੇ ਮੀਤ ਪ੍ਰਧਾਨ ਡਾ. ਸਰਜੂ ਰਲਹਨ, ਜਨਰਲ ਸਕੱਤਰ ਸੀ.ਏ. ਨਿਤਿਨ ਮਹਾਜਨ, ਸੱਭਿਆਚਾਰਕ ਸਕੱਤਰ ਨਿਸ਼ਿਤ ਸਿੰਘਾਨੀਆ, ਖੇਡ ਸਕੱਤਰ ਰਾਮ ਸ਼ਰਮਾ, ਮੈੱਸ ਸਕੱਤਰ ਹਰਿੰਦਰ ਸਿੰਘ, ਜੋਤੀ ਗਰੋਵਰ, ਕਾਰਜਕਾਰਨੀ ਮੈਂਬਰ ਰਾਜੀਵ ਗੁਪਤਾ ਅਤੇ ਮਹਿਲਾ ਕਾਰਜਕਾਰਨੀ ਮੈਂਬਰ ਰਿਤੂ ਚੰਦਨਾ ਤੇ ਹੋਰ ਵੀ ਮੌਜੂਦ ਸਨ।

ਲੁਧਿਆਣਾ, 10 ਮਾਰਚ (ਟੀ. ਕੇ.) ਪੰਜਾਬ ਸਰਕਾਰ ਵੱਲੋਂ ਸੋਧੀ ਗਈ ਡਰੱਗ ਨੀਤੀ ਵਿੱਚ ਹੋਏ ਬਦਲਾਅ ਕਾਰਣ ਹੋ ਰਹੀ ਪਰੇਸ਼ਾਨੀ ਦੇ ਹੱਲ ਲਈ ਪੰਜਾਬ ਕੈਮਿਸਟ ਅਸੋਸੀਏਸ਼ਨ (ਪੀ. ਸੀ. ਏ. ) ਦਾ ਵਫਦ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਅਤੇ ਸਿਹਤ ਮੰਤਰੀ ਡਾ. ਬਲਬੀਰ ਸਿੰਘ ਨੂੰ ਮਿਲੇਗਾ। ਲੁਧਿਆਣਾ ਵਿੱਚ  ਹੋਈ ਅਸੋਸੀਏਸ਼ਨ ਦੀ ਸੂਬਾ ਪੱਧਰੀ ਮੀਟਿੰਗ ਦੌਰਾਨ ਮੌਜੂਦ 20 ਜਿਲਿਆਂ ਦੇ ਪ੍ਰਧਾਨਾਂ ਅਤੇ ਜਨਰਲ ਸਕੱਤਰਾਂ ਵਲੋਂ ਇਸ ਸੰਬੰਧੀ ਸਰਵ ਸਹਿਮਤੀ ਨਾਲ ਮਤਾ ਪਾਸ ਕੀਤਾ ਗਿਆ। ਇਸ ਮੌਕੇ 
ਚੇਅਰਮੈਨ ਭਗਵਾਨ ਸਿੰਘ  ਦੀ ਮੌਜੂਦਗੀ ਵਿੱਚ ਹੋਈ ਮੀਟਿੰਗ ਤੋਂ ਬਾਅਦ ਹੋਈ ਪ੍ਰੈਸ ਵਾਰਤਾ ਵਿੱਚ ਜਥੇਬੰਦੀ ਦੇ ਸੂਬਾ ਦੇ ਪ੍ਰਧਾਨ ਸੁਰਿੰਦਰ ਦੁੱਗਲ ਅਤੇ ਜਨਰਲ ਸਕੱਤਰ ਜੀ.ਐਸ. ਚਾਵਲਾ ਨੇ ਦੱਸਿਆ ਕਿ ਪੰਜਾਬ ਸਰਕਾਰ ਵੱਲੋਂ ਸੋਧੀ ਗਈ ਡਰੱਗ ਨੀਤੀ ਕਾਰਣ ਰਾਜ ਦੇ 27 ਹਜਾਰ ਦਵਾ ਵਿਕਰੇਤਾ ਪ੍ਰਭਾਵਿਤ ਹੋ ਰਹੇ ਹਨ। ਸਰਕਾਰ ਰਿਟੇਲ, ਹੋਲਸੇਲਰ ਅਤੇ ਦਵਾ ਕਾਰੋਬਾਰ ਵਿੱਚ ਸ਼ਾਮਿਲ ਕਾਰਪੋਰੇਟ ਕੰਪਨੀਆਂ ਲਈ ਵੱਖ-ਵੱਖ ਨੀਤੀ ਅਪਣਾ ਰਹੀ ਹੈ। ਦਵਾਈ ਦੀ ਰਿਟੇਲ ਜਾਂ ਹੋਲਸੇਲ ਦੀ ਦੁਕਾਨ ਖੋਲਣ ਲਈ ਜਿੱਥੇ ਡਿਪਲੋਮਾ ਇਨ ਫਾਰਮੇਸੀ (ਡੀ-ਫਾਰਮਾ), ਬੈਚਲਰ ਆਫ ਫਾਰਮੇਸੀ (ਬੀ-ਫਾਰਮਾ) ਅਤੇ ਮਾਸਟਰ ਆਫ ਫਾਰਮੇਸੀ (ਐਮ-ਫਾਰਮਾ) ਦੀਆਂ ਡਿਗਰੀਆਂ ਜਰੂਰੀ ਕਰਾਰ ਦਿੱਤੀਆਂ ਗਈਆਂ ਹਨ, ਓਥੇ ਕਾਰਪੋਰੇਟ ਘਰਾਣਿਆਂ 'ਤੇ ਇਹ ਸ਼ਰਤ ਲਾਗੂ ਨਹੀਂ ਹੁੰਦੀ। ਇਸਦੇ ਨਾਲ ਹੀ ਦਵਾਈ ਦੀ ਰਿਟੇਲ ਵਿਕਰੀ ਵਾਲੀ ਦੁਕਾਨ ਖੋਲਣ ਲਈ ਦੋ ਦੁਕਾਨਾਂ ਵਿਚਾਲੇ ਘੱਟੋ-ਘੱਟ 100 ਮੀਟਰ ਦਾ ਫਾਸਲਾ ਜਰੂਰੀ ਕੀਤਾ ਗਿਆ ਹੈ, ਪਰੰਤੁ ਕਾਰਪੋਰੇਟ ਦੁਕਾਨਾਂ ਲਈ ਇਹ ਸ਼ਰਤ ਲਾਗੂ ਨਹੀਂ ਹੁੰਦੀ। ਉਹਨਾਂ ਦੱਸਿਆ ਕਿ ਜਥੇਬੰਦੀ ਸਰਕਾਰ ਤੋਂ ਮੰਗ ਕਰਦੀ ਹੈ ਕਿ ਜੇਕਰ ਕੋਈ ਰਿਟੇਲ ਵਿਕਰੇਤਾ ਦੀ ਦੁਕਾਨ  'ਤੇ ਪਿਛਲੇ 20 ਸਾਲ ਤੋਂ ਇਹੀ ਕੰਮ ਕਰ ਰਿਹਾ ਹੈ ਤਾਂ ਉਸਨੂੰ ਵੱਖਰੀ ਦੁਕਾਨ ਖੋਲਣ ਦੀ ਇਜਾਜਤ ਦਿੱਤੀ ਜਾਵੇ, ਓਥੇ ਹੀ ਹੋਲ ਸੇਲਰ ਲਈ ਇਹ ਸਮਾਂ 5 ਸਾਲ ਤੱਕ ਦਾ ਰੱਖਿਆ ਜਾਣਾ ਚਾਹੀਦਾ ਹੈ। 
ਸੂਬਾ ਪ੍ਰਧਾਨ  ਅਤੇ ਜਨਰਲ ਸਕੱਤਰ ਨੇ ਦੱਸਿਆ ਕਿ ਫਾਰਮੇਸੀ ਕਰਨ ਤੋਂ ਬਾਅਦ ਵੀ ਫਾਰਮਾਸਿਸਟ ਨੂੰ ਦੁਕਾਨ ਖੋਲਣ ਲਈ ਆਸਾਨੀ ਨਾਲ ਲਾਇਸੈਂਸ ਨਹੀਂ ਮਿਲਦਾ, ਪ੍ਰੰਤੂ ਜੇਕਰ ਉਹ ਪ੍ਰਧਾਨ-ਮੰਤਰੀ ਜਨ ਔਸਧੀ ਵਿੱਚ ਅਪਲਾਈ ਕਰਦਾ ਹੈ ਤਾਂ ਉਸਨੂੰ ਤੁਰੰਤ ਲਾਇਸੈਂਸ ਮਿਲ ਜਾਂਦਾ ਹੈ। ਏੇਨਾ ਹੀ ਨਹੀਂ ਜਨ ਔਸਧੀ ਦਾ ਲਾਇਸੈਂਸ ਲੈ ਕੇ ਜਿਆਦਾਤਰ ਦੁਕਾਨਦਾਰ ਉਹ ਦਵਾਈਆਂ ਵੀ ਵੇਚਦੇ ਹਨ, ਜਿਹੜੀ ਜਨ ਔਸਧੀ ਅਧੀਨ ਨਹੀਂ ਆਉਂਦੀਆਂ। ਇਸ ਨਾਲ ਰਿਟੇਲ ਕੈਮਿਸਟ ਦਾ ਕਾਰੋਬਾਰ ਪ੍ਰਭਾਵਿਤ ਹੁੰਦਾ ਹੈ। ਉਹਨਾਂ ਕਿਹਾ ਕਿ ਚੇਨਈ ਅਤੇ ਦਿੱਲੀ ਹਾਈ ਕੋਰਟ ਨੇ ਆਨਲਾਈਨ ਦੁਕਾਨਾਂ ਵੇਚਣ ਵਾਲੀਆਂ ਕੰਪਨੀਆਂ ਤੇ ਚੈਕ ਰੱਖਣ ਲਈ ਸਰਕਾਰ ਨੂੰ ਕਿਹਾ ਹੈ, ਕਿਓੰਕਿ ਡਰੱਗ ਐਂਡ ਕੌਸਮੈਟਿਕ ਐਕਟ ਦੇ ਤਹਿਤ ਬੈਨ ਕੀਤੀਆਂ ਗਈਆਂ ਦਵਾਈਆਂ ਦੀ ਆਨਲਾਈਨ ਵਿਕਰੀ ਨਹੀਂ ਹੋ ਸਕਦੀ। ਇਸ ਸੰਬੰਧੀ ਵੀ ਮੁੱਖ ਮੰਤਰੀ ਤੋਂ ਮੰਗ ਕੀਤੀ ਜਾਵੇਗੀ।

ਤਰਕਸ਼ੀਲ ਸੁਸਾਇਟੀ (ਲੁਧਿਆਣਾ) ਜ਼ੋਨ ਦੀ ਮੀਟਿੰਗ ਵਿੱਚ ਮੈਗਜ਼ੀਨ ਜਾਰੀ ਕੀਤਾ ਤੇ ਵਿੱਤ ਮੁਖੀ ਦੀ ਚੋਣ ਕੀਤੀ ਗਈ

ਲੁਧਿਆਣਾ, 10 ਮਾਰਚ (ਗੁਰਕਿਰਤ ਜਗਰਾਓਂ /ਮਨਜਿੰਦਰ ਗਿੱਲ) ਅੱਜ ਤਰਕਸ਼ੀਲ ਸੁਸਾਇਟੀ ਪੰਜਾਬ (ਜ਼ੋਨ ਲੁਧਿਆਣਾ) ਦੀ ਮੀਟਿੰਗ ਜ਼ੋਨ ਦੇ ਜਥੇਬੰਦਕ ਮੁਖੀ ਜਸਵੰਤ ਜ਼ੀਰਖ ਦੀ ਪ੍ਰਧਾਨਗੀ ਹੇਠ ਸਥਾਨਕ ਜ਼ੋਨ ਦਫਤਰ ਵਿੱਖੇ ਹੋਈ।ਮੀਟਿੰਗ ਦੀ ਕਾਰਵਾਈ ਪ੍ਰੈਸ ਨੂੰ ਜਾਰੀ ਕਰਦਿਆਂ ਮੀਡੀਆ ਮੁੱਖੀ ਹਰਚੰਦ ਭਿੰਡਰ ਨੇ ਦੱਸਿਆ ਕਿ  ਇਸ ਵਿੱਚ ਸਮੁੱਚੇ ਲੁਧਿਆਣਾ ਜ਼ੋਨ ਦੀਆਂ ਕੁਹਾੜਾ, ਮਲੇਰ ਕੋਟਲਾ, ਜਗਰਾਂਓ, ਸੁਧਾਰ ਅਤੇ ਲੁਧਿਆਣਾ ਇਕਾਈਆਂ ਦੇ ਅਹੁਦੇਦਾਰ ਅਤੇ ਡੈਲੀਗੇਟਾਂ ਨੇ ਭਾਗ ਲਿਆ। ਮੀਟਿੰਗ ਵਿੱਚ ਸਭ ਤੋਂ ਪਹਿਲਾਂ ਪਿੱਛਲੇ ਦਿਨੀ ਸਦੀਵੀ ਵਿਛੋੜਾ ਦੇ ਗਏ ਜ਼ੋਨ ਦੇ ਵਿੱਤ ਮੁੱਖੀ ਤੇ ਸੀਨੀਅਰ ਆਗੂ ਆਤਮਾ ਸਿੰਘ ਬਾਰੇ ਅਫਸੋਸ ਜਾਹਰ ਕਰਦਿਆਂ ਦੋ ਮਿੰਟ ਦਾ ਮੋਨ ਰੱਖ ਕੇ ਸਰਧਾਂਜਲੀ ਦਿੱਤੀ ਗਈ। ਇਸ ਉਪਰੰਤ ਕਾਰਵਾਈ ਸ਼ੁਰੂ ਕਰਦਿਆਂ ਜਥੇਬੰਦਕ ਮੁੱਖੀ ਜਸਵੰਤ ਜ਼ੀਰਖ ਨੇ ਕਿਹਾ ਕਿ ਸਮੇਂ ਦੇ ਮੌਜੂਦਾ ਦੌਰ ਵਿੱਚ ਜਦੋਂ ਰਾਜ ਕਰਤਾ ਸ੍ਰੇਣੀ ਦਾ , ਲੋਕਾਂ ਨੂੰ ਅੰਧਵਿਸ਼ਵਾਸੀ ਬਣਾਈ ਰੱਖਣ ਅਤੇ ਤਰਕਸ਼ੀਲ ਵਿਚਾਰਾਂ ਨੂੰ ਦਬਾਉਣ ਲਈ ਬਿਨਾ ਸੋਚੇ ਸਮਝੇ ਧਾਰਮਿਕ ਆਸਥਾ ਨੂੰ ਠੇਸ ਪਹੁੰਚਣ ਦੇ ਬਹਾਨੇ ਤਰਕਸ਼ੀਲ ਕਾਰਕੁੰਨਾਂ ਉੱਪਰ ਕੇਸ ਦਰਜ ਕਰਨ ਤੇ ਪੂਰਾ ਜ਼ੋਰ ਲੱਗਿਆ ਹੋਇਆ ਹੈ। ਇਸ ਕਰਕੇ ਤਰਕਸ਼ੀਲਤਾ ਦੇ ਪ੍ਰਚਾਰ ਅਤੇ ਪ੍ਰਸਾਰ ਦੇ ਯਤਨਾ ਵਿੱਚ ਹੋਰ ਤੇਜੀ ਨਾਲ ਵਿਚਰਨ ਲਈ ਸਾਡੀ ਜੁੰਮੇਵਾਰੀ ਹੋਰ ਵਧ ਜਾਂਦੀ ਹੈ।ਇਸ ਮੁਹਿੰਮ ਨੂੰ ਜਾਰੀ ਰੱਖਦੇ ਹੋਏ ਤਹਿ ਕੀਤਾ ਗਿਆ ਕਿ ਸੁਸਾਇਟੀ ਦੇ ਜ਼ੋਨ ਲੁਧਿਆਣਾ ਵੱਲੋਂ , ਹਰ ਸਾਲ ਦੀ ਤਰ੍ਹਾਂ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਦੇ 14-15 ਮਾਰਚ ਨੂੰ ਹੋ ਰਹੇ ਕਿਸਾਨ ਮੇਲੇ ਵਿੱਚ ਸੂਬਾ ਪੱਧਰੀ ਸਟਾਲ ਲਾ ਕੇ ਤਰਕਸ਼ੀਲ ਸਾਹਿਤ ਨੂੰ ਆਮ ਲੋਕਾਂ ਤੱਕ ਪੁੱਜਦਾ ਕੀਤਾ ਜਾਵੇਗਾ। ਇਸ ਮੌਕੇ ਬੁਲਾਰਿਆਂ ਵੱਲੋਂ ਕਿਸਾਨ ਮੇਲੇ ਵਿੱਚ ਪਹੁੰਚੇ ਲੋਕਾਂ ਨੂੰ ਅੰਧ-ਵਿਸ਼ਵਾਸ ,ਜੋਤਿਸ਼ ਅਤੇ ਗੈਰ ਵਿਗਿਆਨਿਕ ਰੂੜੀਵਾਦੀ ਵਿਚਾਰਾਂ ਤੋਂ ਦੂਰ ਰਹਿਣ ਲਈ ਜਾਗਰੁਕ ਕਰਕੇ ਤਰਕਸ਼ੀਲਤਾ ਅਪਣਾਉਂਣ ਲਈ ਪ੍ਰੇਰਿਆ ਜਾਵੇਗਾ। ਇਸ ਸਮੇਂ ਜੋਨ ਦੀਆਂ ਸਾਰੀਆਂ ਇਕਾਈਆਂ ਦੇ ਆਗੂਆਂ ਲਈ ਦੋਵੇਂ ਦਿਨ ਹਾਜ਼ਰ ਰਹਿਣ ਲਈ ਜੁੰਮੇਵਾਰੀਆਂ ਤਹਿ ਕੀਤੀਆਂ ਗਈਆਂ। ਮੀਟਿੰਗ ਵਿੱਚ ਪੁਲਿਸ ਵੱਲੋਂ ਬਿਨਾ ਕਿਸੇ ਪੁੱਛ ਪੜਤਾਲ ਕੀਤਿਆਂ ਕੁੱਝ ਫਿਰਕਾਪ੍ਰਸਤ ਮੂਲਵਾਦੀਆਂ ਦੇ ਦਬਾਅ ਹੇਠ ਤਰਕਸ਼ੀਲ ਕਾਰਕੁੰਨਾਂ ਖਿਲਾਫ ਧਾਰਾ 295 ਏ ਅਧੀਨ ਦਰਜ ਕੀਤੇ ਕੇਸਾਂ ਦੀ ਸਖਤ ਅਲੋਚਨਾ ਕਰਦਿਆਂ ਇਹਨਾਂ ਨੂੰ ਰੱਦ ਕਰਨ ਦੀ ਮੰਗ ਕੀਤੀ ਗਈ। 
ਇਸ ਸਮੇਂ ਵਿੱਛੜ ਚੁੱਕੇ ਸਾਥੀ ਆਤਮਾ ਸਿੰਘ ਦੀ ਥਾਂ ਜੋਨ ਦੇ ਵਿੱਤ ਮੁਖੀ ਦੀ ਚੋਣ ਹੋਈ,ਜਿਸ ਵਿੱਚ ਸਰਬਸਮਤੀ ਨਾਲ ਇਕਾਈ ਲੁਧਿਆਣਾ ਦੇ ਧਰਮਪਾਲ ਸਿੰਘ ਨੂੰ ਜ਼ੋਨ ਦਾ ਵਿੱਤ ਮੁੱਖੀ ਚੁਣ ਲਿਆ ਗਿਆ। ਧਰਮਪਾਲ ਸਿੰਘ ਨੇ ਇਹ ਜੁੰਮੇਵਾਰੀ ਕਬੂਲਦਿਆਂ ਕਿਹਾ ਕੇ ਉਹ ਇਸ ਨੂੰ ਪੂਰੀ ਤਨਦੇਹੀ ਨਾਲ ਨਿਭਾਉਣ ਦਾ ਯਤਨ ਕਰਨਗੇ। ਇਸ ਉਪਰੰਤ ਤਰਕਸੀਲ ਮੈਗਜ਼ੀਨ ਦੇ ਮਾਰਚ-ਅਪ੍ਰੈਲ ਅੰਕ ਨੂੰ ਜਾਰੀ ਕਰਦਿਆਂ ਸਮਸ਼ੇਰ ਨੂਰਪੁਰੀ ਨੇ ਕਿਹਾ ਸ਼ਹੀਦ ਭਗਤ ਸਿੰਘ , ਰਾਜਗੁਰੂ, ਸੁਖਦੇਵ ਦਾ ਸ਼ਹੀਦੀ ਦਿਵਸ ਵੀ ਇਸ ਮਹੀਨੇ ਹੋਣ ਕਾਰਣ , ਇਸ ਅੰਕ ਵਿੱਚ ਉਹਨਾਂ ਨਾਲ ਸਬੰਧਤ ਲੇਖ ਅਤੇ ਅੰਧਵਿਸ਼ਵਾਸੀ ਵਿਚਾਰਾਂ ਨੂੰ ਭਾਂਜ ਦੇਣ ਬਾਰੇ ਹੋਰ ਬਹੁਤ ਸਾਰੀ ਸਮਗਰੀ ਪੜ੍ਹਨਯੋਗ ਹੈ। ਇਸ ਦੇ ਨਾਲ ਹੀ ਇਹ ਅੰਕ ਸਾਰੀਆਂ ਇਕਾਈਆਂ ਨੂੰ ਵੰਡਿਆ ਗਿਆ। ਇਸ ਮੀਟਿੰਗ ਵਿੱਚ ਹੋਰਨਾਂ ਤੋਂ ਇਲਾਵਾ ਕਰਤਾਰ ਵਿਰਾਨ, ਸੁਰਜੀਤ ਦੌਧਰ, ਬਲਵਿੰਦਰ ਸਿੰਘ, ਹਰਚੰਦ ਭਿੰਡਰ, ਕਮਲਜੀਤ ਸਿੰਘ, ਗੁਰਮੀਤ ਮੱਲਾ, ਮੋਹਨ ਬਡਲਾ, ਰਜਿੰਦਰ ਜੰਡਿਆਲੀ ਤੇ ਗੁਰਮੇਲ ਸਿੰਘ ਵਿਸ਼ੇਸ਼ ਤੌਰ ਤੇ ਹਾਜ਼ਰ ਸਨ।