ਤੂੰ ਨੂਰਾਨੀ , ਚਿਹਰੇ ਵੱਲ ਕੀ ਤੱਕਦਾ ,
ਕਦੇ ਗੁਰੂ ਨਾਨਕ ਦੇ , ਪੈਰਾਂ ਵੱਲ ਵੀ ਤੱਕ ,
ਚਾਰ ਦਿਸ਼ਾਵਾਂ , ਘੁੰਮੀਆਂ ਜਿਨ੍ਹਾਂ ਨੇ
ਓਹ ਫੇਰ ਵੀ ਨਾ ਹੋਏ ,ਥੱਕ ।
ਤੂੰ ਨੂਰਾਨੀ __________________
ਕਈ ਮਿੱਟੀਆਂ ਨੇ , ਕੀਤਾ ਗੰਦਾ
ਤੇ ਕਈ ਪਾਣੀਆਂ ਨੇ , ਧੋਇਆ
ਧੰਨ ਸੀ , ਓਹ ਮਿੱਟੀ ਪਾਣੀ
ਜਿਨ੍ਹਾਂ , ਗੁਰੂ ਨਾਨਕ ਦੇ ਪੈਰਾਂ ਨੂੰ ਛੋਹਿਆ
ਜਿਊਂਦੇ ਨੇ , ਓਹ ਵਿਚ ਬ੍ਰਹਿਮੰਡ ਦੇ
ਬਣ ਬਣ , ਕਈ ਓਹ ਲੱਖ ।
ਤੂੰ ਨੂਰਾਨੀ ____________________
ਠੇਡੇ ਖਾਦੇ , ਕਈ ਪੱਥਰਾਂ ਤੋਂ
ਪੈਰੀਂ ਕੰਡੇ ਚੁਭੇ , ਕਈ ਹਜ਼ਾਰ
ਚਲਦੇ ਰਹੇ , ਵੱਲ ਮੰਜ਼ਿਲ ਦੇ
ਕਹਿ , ਇਕੋ ਹੈ ਨਿਰੰਕਾਰ
ਹਰ ਪਾਸੇ , ਬਸ ਓਹੀ ਵਸਦਾ
ਜਾ ਮੱਕੇ ਕੱਢਿਆ ਸੱਕ ।
ਤੂੰ ਨੂਰਾਨੀ __________________
ਜਿਥੇ ਗੁਰੂ ਨਾਨਕ ਜੀ ,ਜਨਮ ਲਿਆ
ਨਨਕਾਣਾ ਸਾਹਿਬ ਹੈ , ਲੋਕੋ ਧੰਨ
ਹਲ ਚਲਾਇਆ , ਗੁਰੂ ਨਾਨਕ ਜੀ
ਕਰ ਖੇਤੀ , ਉਗਾਇਆ ਲੋਕੋ ਅੰਨ
ਉਸ ਮਿੱਟੀ ਨੂੰ , ਮੈਂ ਸਿਜਦਾ ਕਰਦਾ
ਮੱਥੇ ਲਾਵਾਂ , ਮੈਂ ਓਹਨੂੰ ਚੱਕ ।
ਤੂੰ ਨੂਰਾਨੀ ______________
ਕੌਡੇ ਰਾਕਸ਼ , ਕਈ ਵਲੀ ਕੰਧਾਰੀ
ਬਾਬੇ ਸਿੱਧੇ ਰਾਹ ਸੀ ਪਾਏ ,
ਆਪਣੀ , ਤੁਸੀਂ ਕਰੋ ਨੇਕ ਕਮਾਈ
ਕਈ ਮਲਕ , ਸੱਜਣ ਜਹੇ ਸਮਝਾਏ
ਹੈਰਾਨ ਹੋਇਆ , ਬਾਬਰ 'ਦਰਦੀ'
ਆਪੇ ਚਲਦੇ , ਦੇਖ ਚੱਕੀ ਦੇ ਚੱਕ ।
ਤੂੰ ਨੂਰਾਨੀ _______________
ਸ਼ਿਵਨਾਥ ਦਰਦੀ
ਸੰਪਰਕ :- 98551/55392
ਬਾਬਾ ਫ਼ਰੀਦ ਯੂਨੀਵਰਸਿਟੀ ਆਫ ਹੈਲਥ ਸਾਇੰਸਜ਼ ਫਰੀਦਕੋਟ ।
