ਭੁੱਖ!
ਬਾਗਾਂ ਵਿੱਚ
ਕੂਕਦੀ ਕੋਇਲ
ਦੇ ਬੋਲ
ਨਾ ਮਿੱਠੇ
ਲੱਗਦੇ ਨੇ!
ਤੇ
ਨਾ ਪੈਲਾਂ ਪਾਉਂਦੇ
ਮੋਰ ਦੇ ਅੰਦਾਜ
ਹੁਣ ਮਨ ਨੂੰ
ਟੁੰਬਦੇ ਨੇ!
' ਖੜਕਾਓ ਥਾਲੀਆਂ'
'ਠੋਕੋ ਤਾਲੀਆਂ'
ਦੇ ਬੋਲ ਤਾਂ
ਹੁਣ ਪੇਟ ਵਿਚ
ਛੁਰਾ ਬਣਕੇ
ਲੰਘਦੇ ਨੇ!
ਸੁਣਿਆ ਸੀ -
ਭੁੱਖੇ ਪੇਟ
ਭਗਤੀ ਕਰਨ
ਨਾਲ
ਦੇਵੀ, ਦੇਵਤੇ
ਬਾਂਹ ਫੜਦੇ ਨੇ!
ਸਿਰ 'ਤੇ
ਹੱਥ ਰੱਖਦੇ ਨੇ!
ਪਰਦੇ ਕੱਜ ਦੇ ਨੇ!
ਪਰ -
ਭੁੱਖ ਨਾਲ
ਤਾਂ ਆਂਦਰਾਂ
ਕੁਰਲਾਉਂਦੀਆਂ ਨੇ!
ਦੁਹਾਈ ਪਾਉੰਦੀਆਂ ਨੇ!
ਤੇ-
ਚੈਨਲਾਂ 'ਤੇ
ਵਿਕਾਸ ਨੂੰ ਲੈ ਕੇ
ਚੱਲਦੇ ਚਰਚੇ
ਵਿਹੁ ਵਾਂਗੂੰ
ਲੱਗਦੇ ਨੇ!
ਡਰਾਉਣੀਆਂ ਨੇ
ਰਾਤਾਂ,
ਨਾ ਸੂਰਜ
ਮੱਘਦੇ ਨੇ!
ਦਿਲ ਤਾਂ ਕਰਦਾ
ਕਿ -
'ਖੁਦਕੁਸ਼ੀ'
ਕਰ ਲਵਾਂ!
ਪਰ-
ਨਹੀਂ ਕਰਾਂਗਾ!
ਨਹੀਂ ਮਰਾਂਗਾ!
ਮੈਂ ਬੁਜਦਿਲ ਨਹੀਂ!
ਭੁੱਖ ਅੱਗੇ
ਗੋਡੇ ਨਹੀਂ ਟੇਕਾਂਗਾ !
ਭਾਵੇਂ ਮਜਬੂਰ ਹਾਂ!
ਪਰ ਮਜਦੂਰ ਹਾਂ!
ਮੈਂ ਲੜਾਂਗਾ!
ਹਾਂ ਲੜਾਂਗਾ!
ਮੈਂ ਸਦੀਆਂ ਤੋਂ
ਲੜਦਾ ਆ ਰਿਹਾ ਹਾਂ!
ਸਿਸਟਮ ਦੇ ਵਿਰੁੱਧ!
ਲੜਦਾ ਰਹਾਂਗਾ!
ਲੜਦਾ ਰਹਾਂਗਾ!
ਲੜਦਾ ਰਹਾਂਗਾ!
-ਸੁਖਦੇਵ ਸਲੇਮਪੁਰੀ
09780620233
29 ਮਈ, 2020
