ਜਗਰਾਓ, 09 ਅਕਤੂਬਰ ( ਗੁਰਕਿਰਤ ਜਗਰਾਓ/ ਮਨਜਿੰਦਰ ਗਿੱਲ)ਸਿਧਵਾਂਬੇਟ ਬਲਾਕ ਅਧੀਨ ਪਿੰਡ ਭਮਾਲ ਵਿਖੇ ਪੇੰਡੂ ਮਜਦੂਰ ਯੂਨੀਅਨ( ਮਸ਼ਾਲ ) ਦੀ ਦਰਜਨ ਦੇ ਕਰੀਬ ਪਿੰਡ ਕਮੇਟੀਆਂ ਦੀ ਇਕੱਤਰਤਾ ਗੁਰੂਦੁਆਰਾ ਮਿੱਡੂ ਮਲ ਵਿਖੇ ਹੋਈ। ਜਿਲਾ ਕਨਵੀਨਰ ਜਸਵਿੰਦਰ ਸਿੰਘ ਭਮਾਲ ਦੀ ਅਗਵਾਈ ਚ ਹੋਈ ਇਸ ਮੀਟਿੰਗ ਚ ਇਨਕਲਾਬੀ ਕੇਂਦਰ ਪੰਜਾਬ ਦੇ ਜਨਰਲ ਸਕੱਤਰ ਕੰਵਲਜੀਤ ਖੰਨਾ ਅਤੇ ਪੇੰਡੂ ਮਜਦੂਰ ਆਗੂ ਮਦਨ ਸਿੰਘ ਜਗਰਾਂਓ ਵਿਸ਼ੇਸ਼ ਤੋਰ ਤੇ ਸ਼ਾਮਲ ਹੋਏ। ਉਨਾਂ ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਸਮਾਜ ਦਾ 32 ਪ੍ਰਤੀਸ਼ਤ ਹਿੱਸਾ ਸਦੀਆਂ ਤੋਂ ਜਾਤੀ ਤੇ ਜਮਾਤੀ ਦਾਬੇ ਦਾ ਸ਼ਿਕਾਰ ਨਰਕੀ ਜਿੰਦਗੀ ਜਿਉਣ ਲਈ ਮਜਬੂਰ ਹੈ। ਪਿਛਲੇ ਛਿੱਹਤਰ ਸਾਲਾਂ ਚ ਹਕੂਮਤੀ ਪਾਰਟੀਆਂ ਨੇ ਸਾਨੂੰ ਮਹਿਜ ਵੋਟ ਪਰਚੀਆਂ ਸਮਝ ਕੇ ਖੁਦੋ ਵਾਂਗ ਵਰਤਿਆ ਹੈ। ਅਤਿਅੰਤ ਦੀ ਮਹਿੰਗਾਈ, ਬੇਰੁਜਗਾਰੀ,ਭਰਿਸ਼ਟਾਚਾਰ ਦੇ ਸਿਕੰਜੇ ਚ ਜਕੜਿਆ ਮਜਦੂਰ ਮੋਜੂਦਾ ਪੂੰਜੀਵਾਦੀ ਪ੍ਰਬੰਧ ਚ ਞਕਤ ਨੂੰ ਧੱਕਾ ਦੇਣ ਲਈ ਮਜਬੂਰ ਹੈ।ਉਨਾਂ ਕਿਹਾ ਕਿ ਬਦਲਾਅ ਵਾਲੀ ਹਕੂਮਤ ਨੇ ਵੀ ਕਾਂਗਰਸੀਆਂ ਅਕਾਲੀਆਂ ਵਾਲੇ ਰੰਗ ਦਿਖਾ ਕੇ ਕਦੇ ਨੀਲੇ ਕਾਰਡਾਂ ਦਾ ਰਾਸ਼ਨ ਖੋਹ ਲਿਆ ਤੇ ਹੁਣ ਬਿਜਲੀ ਦਰ ਦੀ ਰਿਆਇਤ ਖੋਹ ਲਈ। ਚਿੱਪ ਵਾਲੇ ਮੀਟਰ ਪਿੰਡਾਂ ਚ ਧੱਕੇ ਨਾਲ ਲਗਾ ਕੇ ਸਾਨੂੰ ਬਿਜਲੀ ਵਰਤਣ ਤੋ ਆਤੁਰ ਕਰਨ ਦੀ ਖਤਰਨਾਕ ਸਾਜਿਸ਼ ਨਾਲ ਸਾਨੂੰ ਹਰ ਰੋਜ ਦੋ ਚਾਰ ਹੋਣਾ ਪੈ ਰਿਹਾ ਹੈ।ਉਨਾਂ ਗਰੀਬ ਪੇੰਡੂ ਮਜਦੂਰਾਂ ਨੂੰ ਹੱਕ ਹਾਸਲ ਕਰਨ ਲਈ ਸੂਝਵਾਨ, ਲੜਾਕੂ ਬਨਣ ਦੀ ਅਪੀਲ ਕੀਤੀ। ਇਥੇ ਸਰਵਸੰਮਤੀ ਨਾਲ ਸਿਧਵਾਂਬੇਟ
ਬਲਾਕ ਕਮੇਟੀ ਦੀ ਚੋਣ ਚ ਗੁਰਮੇਲ ਸਿੰਘ ਭੂਪਾ ਸਲੇਮਪੁਰ ਨੂੰ ਪ੍ਰਧਾਨ, ਜਗਰਾਜ ਸਿੰਘ ਰਾਜੂ ਸਿਧਵਾਂਬੇਟ ਨੂੰ ਸੀਨੀਅਰ ਮੀਤ ਪ੍ਰਧਾਨ, ਕਰਮ ਸਿੰਘ ਭਮਾਲ ਮੀਤ ਪ੍ਰਧਾਨ, ਰਣਜੀਤ ਸਿੰਘ ਮਿੱਠਾ ਰਾਊਵਾਲ ਜਨਰਲ ਸਕੱਤਰ , ਗੁਰਸੇਵਕ ਸਿੰਘ ਮਲਸੀਹਾਂ ਭਾਈ ਕਾ ਖਜਾਨਚੀ,ਜਗੀਰ ਸਿੰਘ ਬੱਲ ਮਦਾਰਪੁਰਾ,ਸੁਖਮੰਦਰ ਸਿੰਘ ਤਲਵਾੜਾ, ਮਨਜਿੰਦਰ ਸਿੰਘ ਟਿੱਬਾ,ਜਗਦੀਸ਼ ਸਿੰਘ ਭੈਣੀ ਅਰਾਈਆਂ ਨੂੰ ਬਲਾਕ ਕਮੇਟੀ ਮੈਂਬਰ ਚੁਣਿਆ ਗਿਆ। ਇਸ ਸਮੇਂ ਪਹਿਲੀ ਨਵੰਬਰ 2023 ਨੂੰ ਵੱਡੀ ਗਿਣਤੀ ਚ ਦੇਸ਼ ਭਗਤ ਯਾਦਗਾਰ ਹਾਲ ਜਾਲੰਧਰ ਵਿਖੇ ਗਦਰੀ ਮੇਲੇ ਤੇ ਪੰਹੁਚਣ ਦਾ ਫੈਸਲਾ ਕੀਤਾ ਗਿਆ। ਆਉਂਦੇ ਦਿਨਾਂ ਚ ਜੰਗੀ ਪੱਧਰ ਤੇ ਹੋਰ ਪਿੰਡਾਂ ਚ ਇਕਾਈਆਂ ਖੜੀਆਂ ਕਰਨ ਦਾ ਫੈਸਲਾ ਵੀ ਲਿਆ ਗਿਆ। ਇਸ ਸਮੇਂ ਕਿਸਾਨ ਆਗੂ ਪਿੰਦਰ ਸਿੰਘ ਭਮਾਲ, ਦਲਜੀਤ ਸਿੰਘ ਬਿੱਲੂ ਆਦਿ ਹਾਜਰ ਸਨ।
