ਬੱਸ ਤੈਥੋਂ ਹੀ ਆਸ ਹੈ…….
ਮੇਰਿਆ ਰੱਬਾ ਓ ਰੱਬਾ ਮੇਰਿਆ
ਤੇਰੇ ਚਰਨਾਂ ’ਚ ਅਰਦਾਸ ਹੈ
ਬਖਸ਼ ਜਾਨ ਕਿਰਤੀਆਂ ਦੀ
ਬੱਸ ਤੈਥੋਂ ਹੀ ਆਸ ਹੈ
ਕੁੱਝ ਕਰ ਤੂੰ ,ਕੁੱਝ ਤਾਂ ਕਰ
ਕਿਰਤੀ ਕਾਮਾ ਕਿਸਾਨ ਰਿਹਾ ਮਰ
ਮੁੱਦਾ ਇਹ ਹੱਲ ਹੋਵੇ , ਚੰਗੀ ਕੋਈ ਗੱਲ ਹੋਵੇ
ਤੇਰਾ ਹੀ ਧਰਵਾਸ ਹੈ
ਬੱਸ ਤੈਥੋਂ ਹੀ ਆਸ ਹੈ
ਨਾ ਕੋਈ ਅਣਹੋਣੀ ਹੋਵੇ
ਨਾ ਕੋਈ ਮਾਂ ਹੰਝੂਆਂ ਨਾਲ ਪੁੱਤ ਦਾ ਕਫ਼ਨ ਧੋਵੇ
ਨਾ ਕੱਟੇ ਕੋਈ ਕਮਾਊ ਹੱਥਾਂ ਨੂੰ
ਨਾ ਕੋਈ ਤੋੜੇ ਕਾਮਿਆਂ ਦੀਆਂ ਲੱਤਾਂ ਨੂੰ
ਹੋਵੇ ਨੇਕੀ ਦੀ ਜਿੱਤ, ਬਦੀ ਦਾ ਨਾਸ਼ ਹੈ
ਬੱਸ ਤੈਥੋਂ ਹੀ ਆਸ ਹੈ
ਮੱਤ ਬਖਸ਼ ਜਿਸ ਨੇ ਖਿੱਚ ਤੀ ਲਕੀਰ
ਮਾੜੀ ਕੀਤੀ ਦਿਹਾੜੀਆਂ ਦੀ ਤਕਦੀਰ
ਬੁਰੀ ਕਰਤੀ ਦੇਸ਼ ਦੀ ਗਤ
ਝੂਠ ਫ਼ਕੀਰ ਉਹ, ਨਹੀਂ ਹੈ ਸਤ
ਹਰ ਰੋਜ਼ ਕਾਮਾ ਹੋਇਆ ਲਾਸ਼ ਹੈ
ਬੱਸ ਤੈਥੋਂ ਹੀ ਆਸ ਹੈ
ਖ਼ਤਮ ਹੋਣ ਮੌਤ ਦੇ ਫ਼ੁਰਮਾਨ
ਨਾ ਮਿਟੇ ਕਾਮੇ ਦਾ ਨਾਮੋ ਨਿਸ਼ਾਨ
ਸਭ ਦਾ ਕਲਿਆਣ ਹੋਵੇ
ਲਹਿ ਲਹਿਰਾਉਂਦਾ ਖੇਤ ਖਲਿਆਣ ਹੋਵੇ
ਨਾ ਹੋਵੇ ਅੱਡ ਹੱਡ ਨਾਲੋਂ ਮਾਸ ਹੈ
ਬੱਸ ਤੈਥੋਂ ਹੀ ਆਸ ਹੈ
ਹਿੰਦੁਸਤਾਨ ਦੀ ਹੈ ਸਰਕਾਰ
ਹਿੰਦੁਸਤਾਨ ਦਾ ਕਾਮਾ ਦਿਹਾੜੀਦਾਰ
ਹੋਵੇ ਨਾ ਲੜਾਈ ਆਰ ਪਾਰ
ਗੁਜ਼ਰ ਬਸਰ ਸਭ ਦੀ ਰਲ ਮਿਲ ਹੋਵੇ
ਰਿਸ਼ਤਿਆਂ ਵਿਚ ਨਾ ਕੋਈ ਸਿੱਲ ਹੋਵੇ
ਮਾਂ ਭੋਇੰ ਹੋਈ ਉਦਾਸ ਹੈ
ਬੱਸ ਤੈਥੋਂ ਹੀ ਆਸ ਹੈ
ਇਕ ਦਮ ਤੂੰ ਮਸਲੇ ਨਿਬੇੜੇ
ਮੁੜ ਆਉਣ ਸਾਰੇ ਆਪਣੇ ਵਿਹੜੇ
ਖੁਸ਼ੀਆਂ ਲੈਣ ਪਿੜ ਮੱਲ
ਸੁਹਾਣਾ ਹੋਵੇ ਹਰ ਪਲ
ਪਵੇ ਪਿਆਰ ਦਾ ਮੀਂਹ
ਮੁਹੱਬਤ ਦੀ ਹੋਵੇ ਜਲ ਥਲ
ਤੇਰੇ ਤੇ ਹੀ ਵਿਸ਼ਵਾਸ ਹੈ
ਬੱਸ ਤੈਥੋਂ ਹੀ ਆਸ ਹੈ
ਗਰਮ ਨਾਅਰੇ ਜੋ ਲਾਉਂਦੇ ਨੇ
ਔਖੇ ਵੇਲੇ ਨਹੀਂ ਥਿਆਉਂਦੇ ਨੇ
ਸਰਕਾਰ ਕਿਰਤੀ ਨੂੰ ਦੁਸ਼ਮਣ ਬਣਾਉਂਦੇ ਨੇ
ਪਹਿਚਾਣ ਇਹ ਤੱਤ
ਖਾਰਜ ਕਰ ਇਨਾਂ ਦੀ ਅੱਤ
ਤੇਰੇ ਚਰਨਾਂ ’ਚ ਨਿਵਾਸ ਹੈ
ਬੱਸ ਤੈਥੋਂ ਹੀ ਆਸ ਹੈ
ਮੇਰਿਆ ਰੱਬਾ ਓ ਰੱਬਾ ਮੇਰਿਆ
ਕਿਉਂ ਕਿਰਤੀ ਦੁੱਖਾਂ ਨੇ ਘੇਰਿਆ
ਸੁਣ ਅਰਜੋਈ, ਬਖਸ਼ ਡਾਢੇ ਨੂੰ ਸੁਮੱਤ
ਰੱਖੇ ਕਾਬੂ ਨੀਤ, ਜਿਹੜੀ ਪਿਆਸੀ ਰੱਤ
ਬੰਜਰ ਹੋਈ ਧਰਤ
ਹਲ ਲਿਆ ਆਖ਼ਰੀ ਸਵਾਸ ਹੈ
ਬੱਸ ਤੈਥੋਂ ਹੀ ਆਸ ਹੈ
ਕੁੱਝ ਕਰ ਤੂੰ, ਕੁੱਝ ਤਾਂ ਕਰ
ਬਖਸ਼ ਕਾਮੇ ਨੂੰ ਜ਼ਿੰਦਗੀ
ਅਰਜ ਇਹ ਖ਼ਾਸ ਹੈ
ਅਰਜ ਇਹ ਖ਼ਾਸ ਹੈ
ਬੱਸ ਤੈਥੋਂ ਹੀ ਆਸ ਹੈ…….
ਚੰਦਰ ਪ੍ਰਕਾਸ਼
ਬਠਿੰਡਾ
98154-37555, 98762-15150
ਜੈ ਹਿੰਦ, ਜੈ ਭਾਰਤ , ਭਾਰਤ ਮਾਤਾ ਦੀ ਜੈ
ਜੈ ਸੰਵਿਧਾਨ ਜੈ ਜਵਾਨ ਜੈ ਕਿਸਾਨ
ਇਹ ਕਵਿਤਾ ਰੱਬ ਨੂੰ ਪੁਰਜ਼ੋਰ ਤੇ ਦਿਲ ਦੀਆਂ ਗਹਿਰਾਈਆਂ ਵਿੱਚੋਂ ਅਰਦਾਸ ਹੈ ਕਿ ਉਹ ਕਿਰਤੀ ਕਾਮਿਆਂ ਦਿਹਾੜੀਦਾਰਾਂ ਅਤੇ ਹੋਰ ਜੁਝਾਰੂਆਂ, ਜੋ ਦਿੱਲੀ ਦੀਆਂ ਸਰਹੱਦਾਂ ’ਤੇ ਆਪਣੇ ਹੌਂਦ ਲਈ ਕਾਨੂੰਨ ਦੀ ਇੱਜਤ ਕਰਦੇ ਹੋਏ ਆਪਣਾ ਸੰਘਰਸ਼ ਕਰ ਰਹੇ ਹਨ ,ਉਨਾਂ ਦੀ ਜਾਨ ਦੀ ਸਲਾਮਤੀ ਹੋਵੇ। ਰੱਬ ਅੱਗੇ ਅਰਦਾਸ ਹੈ ਕਿ ਉਹ ਸਭ ਨੂੰ ਸੁਮੱਤ ਬਖਸ਼ੇ ਅਤੇ ਮਸਲੇ ਹੱਲ ਹੋਣ ਅਤੇ ਸਾਰੇ ਮੁੜ ਆਪਣੇ ਘਰਾਂ ਨੂੰ ਸਹੀ ਸਲਾਮਤ ਪਰਤ ਜਾਣ।
ਵਿਸ਼ੇਸ਼ ਸਹਿਯੋਗੀ ਜਰਨਲਿਸਟ ਇਕਬਾਲ ਸਿੰਘ ਰਸੂਲਪੁਰ
