16000 ਹਜਾਰ ਵਰਕਰਾਂ ਨੇ ਦਿਨ ਰਾਤ ਮੇਹਨਤ ਕੀਤੀ
ਲੰਡਨ, ਅਪ੍ਰੈਲ 2020 -( ਗਿਆਨੀ ਅਮਰੀਕ ਸਿੰਘ ਰਾਠੌਰ/ਗਿਆਨੀ ਰਵਿੰਦਰਪਾਲ ਸਿੰਘ)-
ਕੋਰੋਨਾ ਵਾਇਰਸ ਦੇ ਪੀੜਤਾਂ ਦੇ ਇਲਾਜ ਲਈ ਲੰਡਨ ਵਿਚ 4000 ਬਿਸਤਰਿਆਂ ਵਾਲੀ ਅਤਿ ਆਧੁਨਿਕ ਐਮਰਜੈਂਸੀ ਹਸਪਤਾਲ ਸਿਰਫ਼ 9 ਦਿਨਾਂ ਦੇ ਰਿਕਾਰਡ ਸਮੇਂ 'ਚ ਬਣਾਇਆ ਗਿਆ ਹੈ। ਨਾਈਟਿੰਗਲ ਨਾਂਅ ਦੇ ਇਸ ਅਸਥਾਈ ਹਸਪਤਾਲ ਦਾ ਉਦਘਾਟਨ ਪਿ੍ੰਸ ਚਾਰਲਸ ਵਲੋਂ 531 ਮੀਲ ਦੂਰੋਂ ਕੀਤਾ ਗਿਆ, ਜਿਨ੍ਹਾਂ ਸਕਾਟਲੈਂਡ ਤੋਂ ਵੀਡੀਓ ਕਾਨਫ਼ਰੰਸ ਰਾਹੀਂ ਸੰਦੇਸ਼ ਜਾਰੀ ਕੀਤਾ। ਪਿ੍ੰਸ ਚਾਰਲਸ ਵੀ ਕੋਰੋਨਾ ਤੋਂ ਪ੍ਰਭਾਵਿਤ ਹੋ ਗਏ ਸਨ ਜੋ ਦੋ ਦਿਨ ਪਹਿਲਾਂ ਹੀ ਇਕਾਂਤਵਾਸ ਤੋਂ ਬਾਹਰ ਆਏ ਹਨ, ਪਰ ਸਿਹਤ ਵਿਭਾਗ ਦੇ ਨਿਰਦੇਸ਼ਾਂ ਤਹਿਤ ਘਰ ਅੰਦਰ ਹੀ ਹਨ । ਇਸ ਮੌਕੇ ਸਿਹਤ ਮੰਤਰੀ ਮੈਟ ਹੈਨਕੁੱਕ ਅਤੇ ਜੂਨੀਅਰ ਸਿਹਤ ਮੰਤਰੀ ਨਦੀਨੇ ਡੌਰੀਜ਼ ਵੀ ਹਾਜ਼ਰ ਸਨ, ਜੋ ਖ਼ੁਦ ਵੀ ਇਸ ਪੀੜਾ ਵਿਚੋਂ ਗੁਜ਼ਰ ਚੁੱਕੇ ਹਨ।ਪੂਰਬੀ ਲੰਡਨ ਦੇ ਡੌਕਲੈਂਡ ਇਲਾਕੇ ਦੇ ਐਕਸਲ ਕਨਵੈੱਨਸ਼ਨ ਨੂੰ ਬਦਲ ਕੇ ਬਣਾਏ ਇਸ ਹਸਪਤਾਲ ਵਿਚ 16000 ਕਰਮਚਾਰੀ ਕੰਮ ਕਰ ਰਹੇ ਹਨ। ਹਸਪਤਾਲ ਨੂੰ ਤਿਆਰ ਕਰਨ ਲਈ ਕਰਨਲ ਐਸ਼ਲੇਗ ਬੋਰੇਮ ਦੀ ਅਗਵਾਈ ਵਿਚ ਫ਼ੌਜ ਦੇ ਨੌਜਵਾਨ ਇੰਜੀਨੀਅਰਾਂ, ਡਾਕਟਰਾਂ ਦੀ ਟੀਮ ਨੇ ਅਹਿਮ ਯੋਗਦਾਨ ਪਾਇਆ ਹੈ।
ਕਰਨਲ ਬੋਰੇਮ ਦੋ ਵਾਰ ਇਰਾਕ ਤੇ ਅਫ਼ਗਾਨਿਸਤਾਨ ਦਾ ਦੌਰਾ ਕਰ ਚੁੱਕੇ ਹਨ। ਉਸ ਨੇ ਦੱਸਿਆ ਕਿ ਉਸ ਦੀ ਜ਼ਿੰਦਗੀ ਦਾ ਸਭ ਤੋਂ ਵੱਡਾ ਮਿਸ਼ਨ ਇਸ ਹਸਪਤਾਲ ਦਾ ਨਿਰਮਾਣ ਕਰਨਾ ਸੀ, ਉਸ ਨੇ ਇਹ ਕੰਮ ਇੰਜੀਨੀਅਰਾਂ, ਡਾਕਟਰਾਂ ਅਤੇ ਸਿਪਾਹੀਆਂ ਨਾਲ ਸ਼ੁਰੂ ਕੀਤਾ ਸੀ। ਕਰਨਲ ਐਸ਼ਲੇਗ ਨੇ ਕਿਹਾ ਕਿ ਬਿ੍ਟੇਨ ਦੀ ਰਾਸ਼ਟਰੀ ਸਿਹਤ ਸੇਵਾ ਇਸ ਪ੍ਰਾਜੈਕਟ ਦੀ ਅਗਵਾਈ ਕਰ ਰਹੀ ਹੈ। ਉਸ ਨੇ ਕਿਹਾ ਕਿ ਫ਼ੌਜੀ ਦਾ ਹਮੇਸ਼ਾ ਇਕ ਉਦੇਸ਼ ਲੋਕਾਂ ਦੀਆਂ ਜ਼ਿੰਦਗੀਆਂ ਬਚਾਉਣ ਲਈ ਕੰਮ ਕਰਨ ਦਾ ਹੁੰਦਾ ਹੈ। ਯੂ. ਕੇ.ਵਿੱਚ ਅਜਿਹੇ ਹੋਰ ਹਸਪਤਾਲ ਬਣਾਉਣ ਲਈ ਤਿਆਰੀ ਕਰ ਰਿਹਾ ਹੈ ।
