ਬਹੁਤ ਵੱਡੀ ਗੱਲ ਹੁੰਦੀ ਹੈ ਦਿਨ ਰਾਤ ਡੱਟ ਕੇ ਨਾਲ ਖੜਣਾ। ਦਿਨ ਰਾਤ ਸੇਵਾ ਕਰਣੀ। ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਪਾਰਟੀ ਦੇ ਮੈਂਬਰ ਵਾਰਿਸ ਪੰਜਾਬ ਦੇ ਜਥੇਬੰਦੀ ਨਾਲ ਚਟਾਣ ਵਾਂਗ ਖੜੇ ਹਨ। ਜਿਸ ਦਿਨ ਦੇ ਭਾਈ ਅੰਮ੍ਰਿਤਪਾਲ ਸਿੰਘ ਖਾਲਸਾ ਜੀ ਦੇ ਮਾਤਾ ਜੀ ਅਤੇ ਹੋਰ ਸਿੰਘਾਂ ਦੇ ਪਰਿਵਾਰਕ ਮੈਂਬਰ ਭੁੱਖ ਹੜਤਾਲ ਉੱਤੇ ਸ਼੍ਰੀ ਦਰਬਾਰ ਸਾਹਿਬ ਦੇ ਬਾਹਰ ਬੈਠੇ ਹਨ। ਉਸ ਦਿਨ ਤੋਂ ਹੀ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਦੀ ਸਾਰੀ ਟੀਮ ਨੇ ਸੰਪੂਰਨ ਸਮਰਥਨ ਦਿੱਤਾ ਹੈ। ਅੰਮ੍ਰਿਤਸਰ ਅਤੇ ਤਰਨਤਾਰਨ ਦੇ ਸਾਰੇ ਅਹੁੱਦੇਦਾਰਾਂ ਨੇ ਖੁਦ ਆਪਣੀਆਂ ਡਿਉਟੀਆਂ ਲਗਾ ਰੱਖੀਆਂ ਹਨ। ਸਾਰਾ ਦਿਨ ਸਾਰੀ ਰਾਤ ਇੰਨ੍ਹਾਂ ਦੀ ਪਾਰਟੀ ਦੇ ਅਹੁੱਦੇਦਾਰ ਸਾਰੇ ਪਰਿਵਾਰਾਂ ਦੀ ਸੇਵਾ ਵਿੱਚ ਹਾਜ਼ਿਰ ਰਹਿੰਦੇ ਹਨ।
ਮੈਂ ਖੁਦ ਦਿਨ ਵਿੱਚ ਕੁਝ ਸਮਾਂ ਕੱਢ ਕੇ 23 ਫਰਵਰੀ ਤੋਂ ਲਗਾਤਾਰ ਪਰਿਵਾਰਾਂ ਦੇ ਦਰਸ਼ਨ ਕਰਣ ਚਲੀ ਜਾਂਦੀ ਹਾਂ। ਬਹੁਤ ਸਾਰੇ ਸਾਡੇ ਸਿਆਸੀ ਆਗੂ, ਬਹੁਤ ਸਾਰੇ ਸਾਡੇ ਸਿੱਖ ਆਗੂ, ਬਹੁਤ ਸਾਰੇ ਸਾਡੇ ਸਮਾਜ ਸੇਵੀ ਰੋਜ਼ ਆਪਣੇ ਰੁਝੇਵਿਆਂ ਵਿੱਚੋਂ ਸਮਾਂ ਕੱਢ ਕੇ ਭੁੱਖ ਹੜਤਾਲ ਵਿੱਚ ਬੈਠੇ ਪਰਿਵਾਰਾਂ ਨੂੰ ਸਮਰਥਣ ਦੇਣ ਆਉਂਦੇ ਹਨ ਅਤੇ ਦੋ ਤਿੰਨ ਘੰਟੇ ਬੈਠ ਕੇ ਚਲੇ ਜਾਂਦੇ ਹਨ। ਸਮਰਥਣ ਵਿੱਚ ਆਉਣ ਵਾਲੀਆਂ ਸਭ ਸ਼ਖਸਿਅਤਾਂ ਸਤਿਕਾਰਤ ਹਨ।
ਪਰ ਜੋ ਮੈਂ 23 ਫਰਵਰੀ ਤੋਂ ਲਗਾਤਾਰ ਰੋਜ਼ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਦੇ ਪਾਰਟੀ ਮੈਂਬਰਾਂ ਦੀ ਸੇਵਾ ਅੱਖੀਂ ਦੇਖ ਰਹੀ ਹਾਂ ਉਹ ਸ਼ਲਾਘਾਯੋਗ ਹੈ। ਸਾਰਾ ਦਿਨ ਵੀ ਇੰਨ੍ਹਾਂ ਦੀ ਪਾਰਟੀ ਦੇ ਮੈਂਬਰ ਪਰਿਵਾਰਾਂ ਨਾਲ ਰਹਿੰਦੇ ਹਨ ਅਤੇ ਸਾਰੀ ਰਾਤ ਵੀ। ਸ: ਹਰਪਾਲ ਸਿੰਘ ਬਲੇਰ-ਜਨਰਲ ਸਕੱਤਰ, ਚਾਨਣ ਸਿੰਘ ਘਰਿਆਲਾ-ਮੀਤ ਪ੍ਰਧਾਨ ਜ਼ਿਲਾ ਤਰਨਤਾਰਨ, ਜਸਬੀਰ ਸਿੰਘ ਬਚੜ੍ਹੇ-ਜਥੇਬੰਦਕ ਸਕੱਤਰ ਮਾਝਾ ਜ਼ੋਨ ਨਾਲ ਮੈਂ ਅੱਜ ਕਾਫੀ ਵਿਚਾਰ ਚਰਚਾ ਕੀਤੀ।
ਸ: ਹਰਪਾਲ ਸਿੰਘ ਬਲੇਰ ਜੀ ਨੇ ਬਹੁਤ ਗਹਿਰੀ ਚਿੰਤਾ ਪ੍ਗਟ ਕਰਦਿਆਂ ਦੱਸਿਆ ਕਿ ਉ੍ਨ੍ਹਾਂ ਦੀ ਪਾਰਟੀ ਦੇ ਪ੍ਰਧਾਨ ਸ: ਸਿਮਰਨਜੀਤ ਸਿੰਘ ਮਾਨ ਜੀ ਨੇ ਅੰਮ੍ਰਿਤਸਰ ਅਤੇ ਤਰਨਤਾਰਨ ਦੇ ਸਾਰੇ ਅਹੁੱਦੇਦਾਰਾਂ ਦੀ ਡਿਊਟੀ ਲਗਾਈ ਹੈ ਕਿ ਭੁੱਖ ਹੜਤਾਲ ਉੱਤੇ ਬੈਠੇ ਸਾਰੇ ਪਰਿਵਾਰਾਂ ਨੂੰ ਇੱਕ ਦਿਨ ਵੀ ਇਕੱਲਾ ਨਹੀਂ ਛੱਡਣਾ ਅਤੇ ਦਿਨ ਰਾਤ ਸਾਰੇ ਅਹੁੱਦੇਦਾਰ ਇੰਨਾਂ ਪਰਿਵਾਰਾਂ ਨਾਲ ਰਹਿਣਗੇ। ਉੱਨਾਂ ਦੱਸਿਆ ਕਿ ਅਸੀਂ ਸਾਰੇ ਅਹੁੱਦੇਦਾਰ ਪਾਰਟੀ ਦੇ ਦਿਸ਼ਾ ਅਨੁਸਾਰ ਅਤੇ ਆਪਣਾ ਇਖਲਾਕੀ ਹੱਕ ਸਮਝਦੇ ਹੋਏ ਪਰਿਵਾਰਾਂ ਦੇ ਦੁੱਖ ਵਿੱਚ ਪਹਿਲੇ ਦਿਨ ਤੋਂ ਹੀ ਸ਼ਾਮਿਲ ਹਾਂ ਅਤੇ ਜਦੋਂ ਤੱਕ ਪਰਿਵਾਰਾਂ ਦੀ ਭੁੱਖ ਹੜਤਾਲ ਖਤਮ ਨਹੀਂ ਹੋ ਜਾਂਦੀ ਉਹ ਸਾਰੇ ਅਹੁੱਦੇਦਾਰ ਇਸ ਤਰਾਂ ਹੀ ਇੱਥੇ ਸੇਵਾ ਵਿੱਚ ਰਹਿਣਗੇ। ਸ: ਹਰਪਾਲ ਸਿੰਘ ਬਲੇਰ ਜੀ ਨੇ ਪਰਿਵਾਰਾਂ ਦੀ ਸਹਿਤ ਨੂੰ ਲੈ ਕੇ ਵੀ ਗਹਿਰੀ ਚਿੰਤਾ ਜ਼ਾਹਿਰ ਕੀਤੀ, ਉੱਨਾਂ ਕਿਹਾ ਕਿ ਕਈ ਪਰਿਵਾਰਕ ਮੈਂਬਰਾਂ ਦੀ ਸਹਿਤ ਕਮਜ਼ੋਰ ਹੋ ਰਹੀ ਹੈ, ਮੌਸਮ ਵੀ ਕਈ ਵਾਰ ਖਰਾਬ ਹੋ ਜਾਂਦਾ ਹੈ, ਭੁੱਖ ਹੜਤਾਲ ਵਿੱਚ ਬੈਠੇ ਪਰਿਵਾਰਾਂ ਦੇ ਸਮਰਥਨ ਵਿੱਚ ਦਿਨੋਂ ਦਿਨ ਸੰਗਤ ਆਪਣੇ ਪਰਿਵਾਰ ਲੈ ਕੇ ਇਸ ਮੋਰਚੇ ਵਿੱਚ ਪਹੁੰਚ ਰਹੇ ਹਨ ਜੋ ਇੱਥੇ ਸਾਰੇ ਪਰਿਵਾਰਾਂ ਨਾਲ ਰਹਿੰਦੇ ਹਨ। ਉੱਨਾਂ ਨਾਲ ਛੋਟੇ ਛੋਟੇ ਬੱਚੇ ਵੀ ਹਨ। ਉੱਨਾਂ ਚਿੰਤਾ ਜ਼ਾਹਿਰ ਕੀਤੀ ਕਿ ਸਰਕਾਰ ਅਤੇ ਪ੍ਰਸ਼ਾਸਨ ਨੂੰ ਜਲਦ ਤੋਂ ਜਲਦ ਇੰਨਾਂ ਦੀਆਂ ਮੰਗਾਂ ਵੱਲ ਧਿਆਨ ਦੇਣਾ ਚਾਹੀਦਾ ਹੈ ਨਹੀਂ ਤਾਂ ਭੁੱਖ ਹੜਤਾਲ ਉੱਤੇ ਬੈਠੇ ਪਰਿਵਾਰਕ ਮੈਂਬਰਾਂ ਦੀ ਸਹਿਤ ਖ਼ਰਾਬ ਹੋਣਾ ਲਾਜ਼ਮੀ ਹੈ। ਉੱਨਾਂ ਦੱਸਿਆ ਕਿ ਉੱਨਾਂ ਦੀ ਹੀ ਪਾਰਟੀ ਦੇ ਅਹੁੱਦੇਦਾਰ ਭਾਈ ਹਰਮੇਲ ਸਿੰਘ ਜੋਧੇ ਵੀ ਅੰਮ੍ਰਿਤਸਰ ਜ਼ੇਲ੍ਹ ਵਿੱਚ ਭਾਈ ਅੰਮ੍ਰਿਤਪਾਲ ਸਿੰਘ ਜੀ ਨਾਲ ਨਜ਼ਰਬੰਦ ਕੀਤੇ ਹੋਏ ਹਨ। ਉੱਨਾਂ ਨੇ ਦੱਸਿਆ ਕਿ ਸਿਰਫ ਡਿਬਰੂਗੜ ਜ਼ੇਲ੍ਹ ਵਿੱਚ ਬੰਦ ਸਿੰਘਾਂ ਨੇ ਭੁੱਖ ਹੜਤਾਲ ਨਹੀਂ ਕੀਤੀ ਬਲਕਿ ਅੰਮ੍ਰਿਤਸਰ ਜ਼ੇਲ੍ਹ ਵਿੱਚ ਬੰਦ 30 ਸਿੰਘਾਂ ਨੇ ਵੀ ਭੁੱਖ ਹੜਤਾਲ ਕੀਤੀ ਹੋਈ ਹੈ। ਜਿੰਨਾਂ ਵਿੱਚੋਂ ਕਈ ਸਿੰਘਾਂ ਦੀ ਹਾਲਤ ਦਿੰਨੋਂ ਦਿਨ ਖ਼ਰਾਬ ਹੋ ਰਹੀ ਹੈ ਅਤੇ ਮਜੂਦਾ ਸਰਕਾਰ ਇਨਸਾਨੀਅਤ ਦਾ ਘਾਣ ਕਰਦੀ ਹੋਈ ਦਿੱਸ ਰਹੀ ਹੈ। ਸ: ਹਰਪਾਲ ਸਿੰਘ ਬਲੇਰ ਜੀ ਨੇ ਜੋ ਸਥਿਤੀ ਦੱਸੀ ਉਹ ਸੁਣ ਕੇ ਬਹੁਤ ਮਨ ਉਚਾਟ ਹੋਇਆ। ਮਜੂਦਾ ਸਰਕਾਰ ਅਤੇ ਪ੍ਰਸ਼ਾਸਨ ਦਾ ਇਹ ਰਵੱਈਆ ਆਉਣ ਵਾਲੇ ਸਮੇਂ ਵਿੱਚ ਜਨਤਾ ਲਈ ਕਿਸ ਕਦਰ ਘਾਤਕ ਹੋਵੇਗਾ ਇਹ ਸਾਰੀ ਜਨਤਾ ਨੂੰ ਵਿਚਾਰਣ ਦੀ ਲੋੜ ਹੈ।
ਰਸ਼ਪਿੰਦਰ ਕੌਰ ਗਿੱਲ
ਐਕਟਰ, ਲੇਖਕ, ਐਂਕਰ, ਸੰਪਾਦਕ, ਸੰਸਥਾਪਕ, ਪ੍ਰਧਾਨ- ਪੀਂਘਾਂ ਸੋਚ ਦੀਆਂ ਸਾਹਿਤ ਮੰਚ, ਪਬਲੀਕੇਸ਼ਨ, ਮੈਗਜ਼ੀਨ +91-9888697078
