ਮੁੱਲਾਂਪੁਰ ਦਾਖਾ 25 ਫਰਵਰੀ ( ਸਤਵਿੰਦਰ ਸਿੰਘ ਗਿੱਲ) ਸ਼ਰੋਮਣੀ ਭਗਤ ਸ਼੍ਰੀ ਗੁਰੂ ਰਵਿਦਾਸ ਮਹਾਰਾਜ ਜੀ ਦੇ 647ਵੇਂ ਪ੍ਰਕਾਸ਼ ਦਿਹਾੜੇ ਦੀ ਖੁਸੀ ਨੂੰ ਮੁਖ ਰੱਖਦਿਆ ਅੱਜ ਸਥਾਨਕ ਕਸਬੇ ਦੇ ਗੁਰਦੁਆਰਾ ਅਜੀਤਸਰ ਵਿਖੇ ਖੁੱਲ੍ਹੇ ਦੀਵਾਨ ਲੱਗੇ ਜਿੱਥੇ ਰਾਗੀ, ਢਾਡੀ, ਕਵੀਸ਼ਰੀ ਜੱਥਿਆ ਨੇ ਗੁਰ ਇਤਿਹਾਸ ਸੁਣਾ ਕੇ ਸੰਗਤਾਂ ਨੂੰ ਬਾਣੀ ਅਤੇ ਬਾਣੇ ਨਾਲ ਜੋੜਨ ਦਾ ਉਪਰਾਲਾ ਕੀਤਾ।
ਭਾਈ ਜਸਵਿੰਦਰ ਸਿੰਘ ਮੁੱਲਾਪੁਰ ਵਾਲੇ ਦੇ ਰਾਗੀ ਜੱਥੇ ਨੇ ‘‘ਐਸੀ ਲਾਲ ਤੁਝ ਬਿਨ ਕੌਣ ਕਰੇ, ਬਹੁਤ ਜਨਮ ਬਿਛੁਰੇ ਥੇ ਮਾਧਉ, ਇਹਿ ਜਨਮ ਤੁਮਾਰ੍ਹੇ ਲੇਖੇ’’ ਆਦਿ ਸ਼ਬਦਾਂ ਨਾਲ ਕੀਰਤਨ ਕਰਕੇ ਸੰਗਤਾਂ ਨੂੰ ਆਪਣੀ ਮਧੁਰ ਅਵਾਜ਼ ਨਾਲ ਕੀਲੀ ਰੱਖਿਆ। ਉਨ੍ਹਾਂ ਦੱਸਿਆ ਕਿ ਕਿਸ ਤਰ੍ਹਾਂ ਗੁਰੂ ਸਾਹਿਬਾਨਾਂ ਦਾ ਜੀਵਨ ਕਠਿਨਾਈਆਂ ਭਰਿਆ ਸੀ ਪਰ ਉਨ੍ਹਾਂ ਦੀ ਟੇਕ ਉਸ ਪਰਮ ਪਿਤਾ ਪ੍ਰਮਾਤਮਾ ਤੇ ਟਿਕੀ ਹੋਈ ਸੀ, ਉਨ੍ਹਾਂ ਦੀ ਪ੍ਰਭੂ ਨਾਲ ਬਿਰਤੀ 9 ਸਾਲ ਦੀ ਉਮਰ ਵਿੱਚ ਲੱਗ ਗਈ ਸੀ ਤੇ ਉਹ ਮਾਮੂਲੀ ਜਿਹੀ ਭੇਟਾ ਤੇ ਲੋਕਾਂ ਦੇ ਜੋੜੇ ਗੰਢਣ ਲੱਗੇ। ਕੀਰਤਨ ਦਾ ਸਾਥ ਉਨ੍ਹਾਂ ਦੇ ਸਾਥੀ ਭਾਈ ਬਲਜੀਤ ਸਿੰਘ ਕਾਕੜਾ ਅਰਮਾਨ ਸਿੰਘ ਜਾਂਗਪੁਰ ਵਾਲਿਆਂ ਨੇ ਦਿੱਤਾ।
ਇਸ ਮੌਕੇ ਗੁ ਅਜੀਤਸਰ ਸਾਹਿਬ ਮੁਲਾਪੁਰ ਪ੍ਰਧਾਨ ਅਵਤਾਰ ਸਿੰਘ ਰਾਜੋਆਣਾ, ਜੋਰਾ ਸਿੰਘ ਭਨੋਹੜ ਦਲਜੀਤ ਸਿੰਘ ਪਿ੍ਰਤਪਾਲ ਸਿੰਘ, ਰਵਿੰਦਰ ਸਿੰਘ ਰਵੀ, ਜਸਵੀਰ ਸਿੰਘ, ਚਰਨਜੀਤ ਸਿੰਘ ਬੀਰਮੀ ਨਿਰੰਜਨ ਸਿੰਘ ਭਨੋਹੜ ਆਦਿ ਹਾਜਰ ਸਨ।
