ਲੁਧਿਆਣਾ, 06 ਅਗਸਤ (ਟੀ. ਕੌਰ) - "ਰੁੱਖਾਂ ਤੋਂ ਬਿਨਾਂ ਸਾਡਾ ਜੀਵਨ ਖਤਮ ਹੋ ਜਾਵੇਗਾ, ਰੁੱਖ ਤਾਂ ਸਾਡਾ ਜੀਵਨ ਦਾਤਾ ਹਨ"। ਇਹ ਵਿਚਾਰ ਪਰਮਜੀਤ ਕੌਰ ਸਲੇਮਪੁਰੀ ਪ੍ਰਬੰਧ ਅਫਸਰ ਨੇ ਪਿੰਡ ਸਲੇਮਪੁਰ ਨੇੜੇ ਹੰਬੜਾਂ ਲੁਧਿਆਣਾ ਵਿਚ ਬਾਬਾ ਸਾਹਿਬ ਡਾ: ਭੀਮ ਰਾਓ ਅੰਬੇਦਕਰ ਨੂੰ ਸਮਰਪਿਤ ਮਨਾਏ ਗਏ ਵਣ-ਮਹਾਉੱਤਸਵ ਦਾ ਅਗਾਜ ਕਰਦਿਆਂ ਪ੍ਰਗਟ ਕੀਤੇ। ਇਸ ਮੌਕੇ ਉਨ੍ਹਾਂ ਇੱਕ ਅੰਬ ਦਾ ਰੁੱਖ ਲਗਾਉਂਦਿਆਂ ਅੱਗੇ ਕਿਹਾ ਕਿ ਹਰੇਕ ਮਨੁੱਖ ਨੂੰ ਸਾਲ ਵਿਚ ਘੱਟੋ-ਘੱਟ ਇਕ ਰੁੱਖ ਜਰੂਰ ਲਗਾਉਣਾ ਚਾਹੀਦਾ ਹੈ, ਕਿਉਂਕਿ ਰੁੱਖਾਂ ਤੋਂ ਬਿਨਾਂ ਜਿੰਦਗੀ ਜਿਉਣਾ ਅਸੰਭਵ ਹੈ। ਉਹਨਾਂ ਕਿਹਾ ਕਿ ਜੇਕਰ ਰੁੱਖ ਨਾ ਲਗਾਏ ਤਾਂ ਸਾਹ ਲੈਣ ਲਈ ਆਕਸੀਜਨ ਨਹੀਂ ਮਿਲੇਗੀ, ਅਮੀਰ ਲੋਕ ਤਾਂ ਆਕਸੀਜਨ ਦਾ ਸਲੰਡਰ ਖਰੀਦ ਕੇ ਆਪਣੇ ਨਾਲ ਬੰਨ੍ਹ ਕੇ ਰੱਖ ਲੈਣਗੇ ਪਰ ਆਮ ਲੋਕਾਂ ਦੀ ਪਹੁੰਚ ਤੋਂ ਬਾਹਰ ਹੋਵੇਗਾ, ਜਿਸ ਕਰਕੇ ਉਨ੍ਹਾਂ ਲਈ ਜਿੰਦਗੀ ਜਿਉਣੀ ਮੁਸ਼ਕਿਲ ਹੋ ਜਾਵੇਗਾ। ਅੱਜ ਜਿੰਨੇ ਰੁੱਖਾਂ ਦੀ ਅੰਨ੍ਹੇਵਾਹ ਕਟਾਈ ਕੀਤੀ ਜਾ ਰਹੀ ਹੈ, ਉਸ ਅਨੁਪਾਤ ਵਿੱਚ ਰੁੱਖ ਨਹੀਂ ਲਗਾਏ ਜਾ ਰਹੇ ਜਦ ਕਿ ਅਬਾਦੀ ਦਾ ਅੰਕੜਾ ਨਿਰੰਤਰ ਵੱਧ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਅੱਜ ਹੜ੍ਹਾਂ ਵਲੋਂ ਕੀਤੀ ਬਰਬਾਦੀ, ਕੁਦਰਤ ਨਾਲ ਕੀਤਾ ਜਾ ਰਿਹਾ ਖਿਲਵਾੜ ਦਾ ਸਿੱਟਾ ਹੈ। ਜੇਕਰ ਕੁਦਰਤ ਨਾਲ ਇਸੇ ਤਰ੍ਹਾਂ ਖਿਲਵਾੜ ਚਲਦਾ ਰਿਹਾ ਤਾਂ ਭਵਿੱਖ ਵਿੱਚ ਇਸ ਤੋਂ ਵੀ ਜਿਆਦਾ ਭਿਆਨਕ ਸਿੱਟੇ ਭੁਗਤਣ ਲਈ ਸਾਨੂੰ ਤਿਆਰ ਰਹਿਣਾ ਚਾਹੀਦਾ ਹੈ। ਇਸ ਤੋਂ ਪਹਿਲਾਂ ਅਸੀਂ ਕੋਰੋਨਾ ਦੇ ਦਰਦਨਾਕ ਦੌਰ ਦਾ ਦਰਦ ਹਿੰਡਾ ਚੁੱਕੇ ਹਾਂ। ਇਸ ਮੌਕੇ ਸਾਬਕਾ ਸਰਪੰਚ ਮੇਵਾ ਸਿੰਘ, ਸਾਬਕਾ ਸਰਪੰਚ ਹਰਜੀਤ ਕੌਰ ਸਲੇਮਪੁਰੀ, ਆਂਗਣਵਾੜੀ ਅਧਿਆਪਕ ਜਥੇਬੰਦੀ ਦੀ ਆਗੂ ਰਣਜੀਤ ਕੌਰ, ਆਮ ਆਦਮੀ ਪਾਰਟੀ ਦੇ ਸੀਨੀਅਰ ਯੂਥ ਆਗੂ ਮੋਹਨ ਸਿੰਘ ਵਿਰਕ ਹੰਬੜਾਂ ਤੋਂ ਇਲਾਵਾ ਵੱਡੀ ਗਿਣਤੀ ਵਿਚ ਇਲਾਕਾ ਭਰ ਦੇ ਸੀਨੀਅਰ ਪੱਤਰਕਾਰ ਜਿਸ ਵਿਚ ਵਿਸ਼ੇਸ਼ ਕਰਕੇ ਸਤਿਨਾਮ ਸਿੰਘ ਹੰਬੜਾਂ, ਮਲਕੀਤ ਸਿੰਘ ਭੱਟੀਆਂ , ਹਰਵਿੰਦਰ ਸਿੰਘ ਮੱਕੜ, ਮਨਜੀਤ ਸਿੰਘ ਲੀਲਾਂ, ਮਨਜੀਤ ਸਿੰਘ ਚੱਕ, ਮਨਜਿੰਦਰ ਸਿੰਘ, ਸਮਾਜ ਸੇਵਕ ਮਾਨ ਸਿੰਘ ਗੌਂਸਪੁਰੀ, ਕੁਲਦੀਪ ਮਾਨ ਭੂੰਦੜੀ, ਜਰਨੈਲ ਸਿੰਘ ਸਿੱਧੂ ਸਿੱਧਵਾਂ ਬੇਟ, ਰਾਣਾ ਮੱਲ ਤੇਜੀ, ਜਸਵਿੰਦਰ ਸਿੰਘ ਮੋਗਾ, ਹਰਬੰਸ ਸਿੰਘ ਰੌਲੀ ਤੋਂ ਇਲਾਵਾ ਵੱਡੀ ਗਿਣਤੀ ਪੱਤਰਕਾਰ, ਬੁਧੀਜੀਵੀ ਅਤੇ ਕਈ ਨਾਮੀ ਸਖਸ਼ੀਅਤਾਂ ਹਾਜ਼ਰ ਸਨ।
