ਸ੍ਰੀ ਮੁਕਤਸਰ ਸਾਹਿਬ (ਜਨ ਸ਼ਕਤੀ ਨਿਊਜ਼ ਬਿਊਰੋ) ਪਿਛਲੇ ਦਿਨੀਂ ਮੇਲਾ ਰੂਹਾਂ ਦਾ ਸਾਹਿਤਕ ਪਰਿਵਾਰ ਮੁੰਬਈ ਵੱਲੋਂ ਸ੍ਰੀ ਗੰਗਾਨਗਰ ਵਿਖੇ, ਭੰਗਚੜੀ ਸਾਹਿਤ ਸਭਾ ਵੱਲੋਂ ਮੋਗਾ ਵਿਖੇ ਅਤੇ ਕਲਮਾਂ ਦੇ ਰੰਗ ਸਾਹਿਤ ਸਭਾ ਫ਼ਰੀਦਕੋਟ ਅਤੇ ਮੇਲਾ ਰੂਹਾਂ ਦੇ ਪਰਿਵਾਰ(ਦੋ ਸਭਾਵਾਂ)ਵੱਲੋਂ ਫਰੀਦਕੋਟ ਵਿਖੇ ਸਾਹਿਤਕ ਸਮਾਗਮ ਕਰਵਾਏ ਗਏ।ਦੋ ਥਾਈਂ ਪੁਸਤਕ ਰਿਲੀਜ਼ ਸਮਾਗਮ ਅਤੇ ਸਨਮਾਨ ਸਮਾਰੋਹ ਸੀ, ਜਦੋਂ ਕਿ ਗੰਗਾਨਗਰ ਵਿਖੇ ਸਨਮਾਨ ਸਮਾਰੋਹ ਦੇ ਨਾਲ ਨਾਲ ਪੰਜਾਬੀ ਮਾਂ ਬੋਲੀ ਦੀ ਪ੍ਰਫੁੱਲਤਾ ਲਈ ਵਿਸ਼ੇਸ਼ ਸਮਾਗਮ ਕਰਵਾਇਆ ਗਿਆ। ਇਨ੍ਹਾਂ ਉਪਰੋਕਤ ਸਾਰੀਆਂ ਥਾਵਾਂ ਤੇ ਹੀ ਦਾਸ ਨੇ ਆਪਣੀ ਬਣਾਈ ਹੋਈ ਪਹਿਚਾਣ ਅਨੁਸਾਰ ਵਿਰਸੇ ਦੀਆਂ ਰਚਨਾਵਾਂ ਹੀ ਸੁਣਾਈਆਂ,ਜਿਸ ਨੂੰ ਕਿ ਸਰੋਤਿਆਂ ਅਤੇ ਵਧੀਆ ਸਾਹਿਤਕਾਰਾਂ ਅਤੇ ਬੁੱਧੀਜੀਵੀ ਵਰਗ ਵੱਲੋਂ ਅਤਿਅੰਤ ਸ਼ਲਾਘਾ ਕੀਤੀ ਗਈ। ਹੈਰਾਨੀ ਹੋਈ ਕਿ ਐਨੀ ਅਗਾਂਹ ਵਧੂ ਦੁਨੀਆਂ ਵਿੱਚ ਹਾਲੇ ਵੀ ਵਿਰਸੇ ਨੂੰ ਦਿਲੋਂ ਮੁਹੱਬਤ ਕਰਨ ਵਾਲੇ ਬੈਠੇ ਹਨ,ਕਿ ਜਦੋਂ ਸਾਰੇ ਥਾਈਂ ਸਟੇਜ ਸਕੱਤਰਾਂ ਵੱਲੋਂ ਵੀ ਵਿਰਸੇ ਦੇ ਲੇਖਕ ਕਹਿ ਕੇ ਸੰਬੋਧਨ ਕੀਤਾ ਗਿਆ ਅਤੇ ਵਿਰਸੇ ਪ੍ਰਤੀ ਹੀ ਰਚਨਾ ਬੋਲਣ ਲਈ ਉਚੇਚੇ ਤੌਰ ਤੇ ਫਰਮਾਇਸ਼ ਕੀਤੀ। ਅਤੇ ਸਾਰੀਆਂ ਰਚਨਾਵਾਂ ਤੇ ਭਰਪੂਰ ਤਾੜੀਆਂ ਨਾਲ ਦਾਦ ਦਿੱਤੀ ਗਈ। ਕਿਸੇ ਵੀ ਸਾਹਿਤਕਾਰ ਜਾਂ ਲੇਖਕ ਦੀ ਖੁਸ਼ੀ ਹਮੇਸ਼ਾ ਓਦੋਂ ਦੁਗਣੀ ਚੌਗੁਣੀ ਹੋ ਜਾਂਦੀ ਹੈ ਜਦੋਂ ਉਸ ਨੂੰ ਓਹਦੀ ਲਿਖੀ ਅਤੇ ਬੋਲੀ ਰਚਨਾ ਤੇ ਭਰਪੂਰ ਤਾੜੀਆਂ ਅਤੇ ਸ਼ਾਬਾਸ਼ ਮਿਲਦੀ ਹੈ ਅਤੇ ਲੇਖਕ ਦੋਸਤ ਬੁਲਾ ਕੇ ਪੁਸਤਕਾਂ ਵੀ ਭੇਟ ਕਰਦੇ ਹਨ,ਸੱਚ ਜਾਣਿਓ ਇਹੀ ਕਿਸੇ ਲੇਖਕ ਲਈ ਟੌਣਕ ਦਾ ਕੰਮ ਕਰਦੀ ਹੈ ਅਤੇ ਹੋਰ ਵੀ ਲੇਖਣੀ ਵਿੱਚ ਪ੍ਰਪੱਕਤਾ ਲਈ ਪ੍ਰੇਰਿਤ ਵੀ ਕਰਦੀ ਹੈ। ਆਪਣੇ ਦਿਲ ਦੇ ਇਹ ਵਲਵਲੇ ਵਿਰਸੇ ਦੇ ਲੇਖਕ ਜਸਵੀਰ ਸ਼ਰਮਾਂ ਦੱਦਾਹੂਰ ਨੇ ਇਸ ਪੱਤਰਕਾਰ ਨਾਲ ਸਾਂਝੇ ਕੀਤੇ।
