ਜ਼ਿੰਦਗੀ ਇਨ੍ਹੀਂ ਸੌਖੀ ਵੀ ਨਹੀਂ ਜਿੰਨ੍ਹੀ ਲੱਗਦੀ ਹੈ ਤੇ ਇਨ੍ਹੀ ਔਖੀ ਵੀ ਨਹੀਂ ਜਿੰਨ੍ਹੀ ਮਹਿਸੂਸ ਹੁੰਦੀ ਹੈ। ਇਸਦਾ ਸੌਖਾ ਜਾਂ ਔਖਾ ਹੋਣਾ ਤੁਹਾਡੇ ਤੇ ਨਿਰਭਰ ਹੈ।ਤੁਹਾਡਾ ਜ਼ਿੰਦਗੀ ਪ੍ਰਤੀ ਨਜ਼ਰੀਆ ਕੀ ਹੈ ਇਹ ਮਹੱਤਵਪੂਰਨ ਹੈ।ਜਿਵੇਂ ਤੁਸੀਂ ਸੋਚਦੇ ਹੋ ਉਸੇ ਤਰ੍ਹਾਂ ਦੀ ਜ਼ਿੰਦਗ਼ੀ ਹੋ ਜਾਂਦੀ ਹੈ। ਖੁੱਲ ਕੇ ਜੀਓ ਤਾਂ ਜ਼ਿੰਦਗੀ ਖੁਸ਼ਗਵਾਰ ਹੈ। ਨੱਪ ਨੂੰੜ ਕੇ ਜੀਓ ਤਾਂ ਪਲ ਵੀ ਔਖਾ ਲੰਘਦਾ ਹੈ।ਕਿਸੇ ਨੂੰ ਗਿਲਾਸ ਅੱਧਾ ਖਾਲੀ ਦਿੱਸਦਾ ਹੈ ਤੇ ਕਿਸੇ ਨੂੰ ਅੱਧਾ ਭਰਿਆ।ਬਸ ਨਜ਼ਰੀਏ ਦੀ ਗੱਲ ਹੈ।ਜਦੋਂ ਤੁਸੀਂ ਕਿਸੇ ਨੂੰ ਤਕਲੀਫ਼ ਦਿੰਦੇ ਹੋ ਤਾਂ ਆਪ ਵੀ ਖੁਸ਼ ਨਹੀਂ ਰਹਿੰਦੇ। ਸਿੱਧਾ ਹਿਸਾਬ ਹੈ ਜੋ ਤੁਸੀਂ ਦੂਜਿਆਂ ਨੂੰ ਦੇਵੋਗੇ ਉਹ ਦੋਗੁਣਾ ਹੋ ਕੇ ਤੁਹਾਨੂੰ ਮਿਲੇਗਾ। ਬਸ ਚੰਗਾ ਕਰੋ ਤੇ ਖੁਸ਼ ਰਹੋ। ਕਰਮਾਂ ਦਾ ਹਿਸਾਬ ਕੁਦਰਤ ਆਪ ਕਰਦੀ ਹੈ।ਤੁਸੀਂ ਆਪਣਾ ਕੰਮ ਕਰੋ।ਦੂਜਿਆਂ ਨਾਲ ਓਹੋ ਜਿਹਾ ਵਿਹਾਰ ਕਰੋ ਹੋ ਤੁਸੀਂ ਚਾਹੁੰਦੇ ਹੋ ਕਿ ਦੂਜੇ ਤੁਹਾਡੇ ਨਾਲ ਕਰਨ। ਇੱਕ ਬੱਚਾ ਇੰਗਲੈਂਡ ਦੇ ਇਕ ਪਿੰਡ ਵਿੱਚ ਅੱਗ ਵਿੱਚ ਘਿਰਿਆ ਹੋਇਆ ਸੀ। ਇੱਕ ਕਿਸਾਨ ਨੇ ਉਸਨੂੰ ਬਚਾ ਲਿਆ। ਜਦੋਂ ਉਹ ਬੱਚੇ ਨੂੰ ਘਰ ਛੱਡਣ ਗਿਆ ਤਾਂ ਬੱਚੇ ਦੇ ਪਿਤਾ ਸਰ ਚਰਚਿਲ ਨੇ ਉਸਨੂੰ ਪੈਸੇ ਦੇਣੇ ਚਾਹੇ। ਕਿਸਾਨ ਨੇ ਪੈਸੇ ਲੈਣ ਤੋ ਨਾਂਹ ਕਰ ਦਿੱਤੀ। ਉਸਨੇ ਕਿਹਾ ਕਿ ਮੱਦਦ ਕਰਨਾ ਚਾਹੁੰਦੇ ਹੋ ਤਾਂ ਮੇਰੇ ਬੱਚੇ ਨੂੰ ਪੜ੍ਹਾ ਦਿਓ। ਸਰ ਚਰਚਿਲ ਮੰਨ ਗਏ। ਉਹ ਬੱਚਾ ਵੱਡਾ ਹੋ ਕੇ ਅਲੈਗਜੈਂਡਰ ਫਲੇਮਿੰਗ ਬਣਿਆ ਜਿਸ ਨੇ ਪੈਂਸਿਲਿਨ ਦੀ ਖੋਜ ਕੀਤੀ। ਉਸਦੀ ਇਸ ਦਵਾ ਨੇ ਸਿਰ ਵਿੰਸਟਨ ਚਰਚਿਲ ਦੀ ਜਾਨ ਬਚਾਈ ਜੀ ਕਿ ਸਰ ਚਰਚਿਲ ਦਾ ਬੇਟਾ ਸੀ ਜਿਸਨੇ ਉਸਦੀ ਪੜ੍ਹਾਈ ਦਾ ਖਰਚਾ ਚੁੱਕਿਆ ਸੀ। ਚੰਗਿਆਈ ਘੁੰਮ ਕੇ ਵਾਪਿਸ ਆਉਂਦੀ ਹੈ। ਸੋ ਨੇਕ ਕੰਮ ਕਰੋ ਤੇ ਖੁਸ਼ ਰਹੋ।
ਹਰਪ੍ਰੀਤ ਕੌਰ ਸੰਧੂ
