ਕਾਹਨੂੰ ਸੱਜਣਾ ਖੇਖਣ ਕਰਦਾ,
ਮਿੱਟੀ ਦਾ ਸੀ, ਮਿੱਟੀ ਹੋਇਆ,
ਹੁਣ ਮੈਂ ਯਾਰਾਂ ਫੌਤ ਜੋ ਹੋਇਆ,
ਉੱਚੀ ਉੱਚੀ ਕਿਓਂ ਕੁਰਲਾਵੇ,
ਫੜ ਫੜ ਮੋਢਾ ਪਿਆ ਜਗਾਵੇ,
ਮਲ ਮਲ ਸਾਬਣ ਨਾਲ ਨੁਹਾਉਕੇ ,
ਸੁਹਣੇ ਸੁਹਣੇ ਵਸਤਰ ਪਾਕੇ
ਫਿਰ ਵੀ ਠਸ ਤੋਂ ਮਸ ਨਾ ਹੋਇਆ ,
ਕਾਹਨੂੰ ਸੱਜਣਾ ਖੇਖਣ ਕਰਦਾ,
ਮਿੱਟੀ ਦਾ ਸੀ, ਮਿੱਟੀ ਹੋਇਆ,
ਮੋਢੇ ਚੱਕ ਲੈ ਤੁਰਿਆ ਜਾਂਦਾ,
ਲਾਕੇ ਤੀਲੀ ਮੁੜਿਆ ਆਉਂਦਾ,
ਮਿਲਣਾ ਕਿਥੇ ਰੂਹਾਂ ਬਣਕੇ,
ਉਡ ਗਿਆ ਬੇਲੀ ਧੂਆਂ ਬਣਕੇ ,
ਜ਼ੋਰ ਲਾਇਆ ਤੈਥੋਂ ਮੋੜ ਨਾ ਹੋਇਆ,
ਕਾਹਨੂੰ ਸੱਜਣਾ ਖੇਖਣ ਕਰਦਾ,
ਮਿੱਟੀ ਦਾ ਸੀ, ਮਿੱਟੀ ਹੋਇਆ,
ਹੁਣ ਮੈਂ ਯਾਰਾਂ ਫੌਤ ਜੋ ਹੋਇਆ,
ਮਿੱਟੀ ਕਿਥੇ ਧਰ ਆਇਆ,
ਪਾਣੀ ਗੰਧਲਾ ਕਰ ਆਇਆ,
ਮੜੀ ਤੇ ਦੀਵਾ ਬਲਦਾਂ ਦਿਸਦਾ
ਤੂੰ ਨੀ ਸੱਜਣਾ ਟਲਦਾ ਦਿਸਦਾ,
ਹੁਣ ਵੀ ਰਹਿੰਦਾ ਔਸੀਆਂ ਪਾਉਂਦਾ,
ਕਿਹਨੂੰ ਸੱਜਣਾ ਖੀਰ ਖੁਆਉਂਦਾ,
ਹਜ਼ਮ ਨਾ ਆਈ ਖੰਡ ਕਾਜ਼ੀ ਨੂੰ,
ਛੱਡ ਯਾਰਾਂ ਪਖੰਡ ਬਾਜ਼ੀ ਨੂੰ,
ਤੁਰ ਗਿਆ ਤੋਂ ਮੁੜ ਨਹੀਂ ਹੋਇਆ,
ਕਾਹਨੂੰ ਸੱਜਣਾ ਖੇਖਣ ਕਰਦਾ,
ਮਿੱਟੀ ਦਾ ਸੀ, ਮਿੱਟੀ ਹੋਇਆ,
ਹੁਣ ਮੈਂ ਯਾਰਾਂ ਫੌਤ ਜੋ ਹੋਇਆ,
ਕੁਲਦੀਪ ਸਿੰਘ ਰਾਮਨਗਰ
9417990040
