ਕੇਂਦਰ ਦੀ ਪੰਜਾਬ ਅਤੇ ਸਿੱਖਾਂ ਪ੍ਰਤੀ ਨਫਰਤ ਨੇ ਬੇਵਿਸ਼ਵਾਸ਼ੀ ਅਤੇ ਪੱਖਪਾਤ ਨੂੰ ਵੀ ਜੱਗ ਜਾਹਰ ਕੀਤਾ : ਦੇਵ ਸਰਾਭਾ
ਮੁੱਲਾਪੁਰ ਦਾਖਾ 1 ਮਾਰਚ (ਸਤਵਿੰਦਰ ਸਿੰਘ ਗਿੱਲ )-ਕੇਂਦਰ ਸਰਕਾਰ ਵਿਚਲੀ ਸਿਆਸੀ ਧਿਰ ਕੋਈ ਵੀ ਹੋਵੇ ਉਸਦਾ ਰਵੱਈਆ ਪੰਜਾਬ ਅਤੇ ਸਿੱਖਾਂ ਪ੍ਰਤੀ ਸਹੀ ਨਹੀਂ ਰਿਹਾ। ਅਜ਼ਾਦੀ ਤੋਂ ਪਹਿਲਾਂ ਅਤੇ ਬਾਅਦ ਦੇ ਬਦਲੇ ਹਾਲਾਤਾਂ ‘ਚ ਵੀ ਕੇਂਦਰ ਦੀ ਨਫਰਤੀ ਸੋਚ ਨੇ ਆਪਣਾ ਵਤੀਰਾ ਨਹੀਂ ਬਦਲਿਆ, ਸਗੋਂ ਅਜਿਹਾ ਕੁਝ ਵੀ ਕੀਤਾ ਜਿਸ ਨਾਲ ਨਫਰਤ ਅਤੇ ਬੇਵਿਸ਼ਵਾਸੀ ਵਧੇ।
ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੇ ਬੁੱਤ ਸਾਹਮਣੇ ਮੋਰਚੇ 'ਚ ਬਲਜੀਤ ਸਿੰਘ ਬਾਰ੍ਹਮੀ ,ਮਨਪ੍ਰੀਤ ਸਿੰਘ ਬਾਰ੍ਹਮੀ,ਸਰਬਜੀਤ ਸਿੰਘ ਅੱਬੂਵਾਲ,ਬਹਾਦਰ ਸਿੰਘ ਟੂਸੇ ਆਦਿ ਸਹਿਯੋਗੀਆਂ ਨਾਲ ਅੱਜ ਭੁੱਖ ਹੜਤਾਲ ਦੇ ਨੌਵੇਂ ਦਿਨ ਬਲਦੇਵ ਸਿੰਘ ‘ਦੇਵ ਸਰਾਭਾ’ ਤੇ ਬਲਦੇਵ ਸਿੰਘ ਢੱਟ ਨੇ ਮੀਡੀਏ ਸਨਮੁੱਖ ਗੱਲਬਾਤ ਕਰਦਿਆਂ ਦੱਸਿਆ ਦੇਸ਼ ਦੀਆਂ ਵੱਖ-ਵੱਖ ਜੇਲ੍ਹਾਂ ‘ਚ ਸਜਾਵਾਂ ਪੂਰੀਆਂ ਕਰਨ ਤੋਂ ਬਾਅਦ ਵੀ ਕਾਲ ਕੋਠੜੀਆਂ ‘ਚ ਰਹਿੰਦੀ ਜਿੰਦਗੀ ਦੇ ਦਿਨ ਕੱਟਦੇ ‘ਬੰਦੀ ਸਿੰਘਾਂ’ ਨਾਲ ਵੀ ਲਗਾਤਾਰ ਵਿਤਕਰਾ ਹੀ ਮੰਨਿਆ ਜਾਣਾ ਚਾਹੀਦਾ ਹੈ। ਜਦਕਿ ਵੱਖ-ਵੱਖ ਸੰਗੀਨ ਧਰਾਵਾਂ ਅਧੀਨ ਸੁਨਾਰੀਆ ਜੇਲ੍ਹ ‘ਚ ਸਜਾ ਭੁਗਤਣ ਵਾਲੇ ਨੂੰ ਪਰੋਲ ਦਿੱਤੀ ਗਈ। ਸ੍ਰ: ਸਰਾਭਾ ਨੇ ਕਿਹਾ ਇਮਾਨਦਾਰੀ ਨਾਲ ਸੋਚਿਆ ਜਾਣਾ ਚਾਹੀਦਾ ਹੈ ਕਿ ਬੰਦੀ ਸਿੰਘ ਵੀ ਇਸ ਦੇਸ਼ ਦੇ ਨਾਗਰਿਕ ਨੇ, ਉਨ੍ਹਾਂ ਲਈ ਵੱਖਰਾ ਪੱਖ ਕਿਉਂ? ਉਨ੍ਹਾਂ ਜਜ਼ਬਾਤੀ ਹੁੰਦਿਆਂ ਸਪੱਸ਼ਟ ਕੀਤਾ ਕਿ ਜੇਲ੍ਹਾਂ ‘ਚ ਬੰਦ ਬੰਦੀ ਸਿੰਘਾਂ ‘ਚ ਮੇਰਾ ਕੋਈ ਨਜ਼ਦੀਕੀ ਰਿਸ਼ਤੇਦਾਰ ਨਹੀ, ਨਾ ਹੀ ਕਿਸੇ ਨਾਲ-ਲੈਣਾ-ਦੇਣਾ ਹੈ। ਪਰ, ਯਾਰ ਮਾਨਵਤਾ ਪ੍ਰਤੀ ਸਾਡਾ ਵੀ ਕੋਈ ਫਰਜ਼ ਤਾਂ ਹੈ, ਜੇ ਸਰਕਾਰਾਂ ਆਪਣੇ ਫਰਜ਼ਾਂ ਨਾਲੋਂ ਨਫਰਤੀ ਸੋਚ ਨੂੰ ਹੀ ਭਾਰੂ ਬਣਾਈ ਰੱਖਣਗੀਆਂ ਤਾਂ ਅਸੀਂ ਸ਼ਾਂਤਮਈ ਆਪਣਾ ਰੋਸ ਪ੍ਰਗਟਾਉਣ ਦਾ ਅਧਿਕਾਰ ਵੀ ਤਾਂ ਰੱਖਦੇ ਹੀ ਹਾਂ। ਇਹ ਦੱਸਣ ਲਈ ਕਿ ਕੇਂਦਰ ਦੀ ਪੰਜਾਬ ਅਤੇ ਸਿੱਖਾਂ ਪ੍ਰਤੀ ਨਫਰਤ ਨੇ ਬੇਵਿਸ਼ਵਾਸ਼ੀ ਅਤੇ ਪੱਖਪਾਤ ਨੂੰ ਵੀ ਜੱਗ ਜਾਹਰ ਕੀਤਾ।ਉਨ੍ਹਾਂ ਆਖ਼ਰ ਵਿੱਚ ਆਖਿਆ ਕਿ ਚਾਰ ਮਾਰਚ ਦਿਨ ਸ਼ੁੱਕਰਵਾਰ ਵਾਲੇ ਦਿਨ ਪੰਥ ਦਰਦੀਆਂ ਦਾ ਇੱਕ ਵੱਡਾ ਕੱਠ ਕੀਤਾ ਜਾਵੇਗਾ ਤਾਂ ਜੋ ਬੰਦੀ ਸਿੰਘਾਂ ਨੂੰ ਰਿਹਾਅ ਕਰਵਾਉਣ ਲਈ ਕੋਈ ਅਗਲੀ ਰਣਨੀਤੀ ਘੜੀ ਜਾਵੇ।ਇਸ ਮੌਕੇ ਇੰਦਰਜੀਤ ਸਿੰਘ ਸਹਿਜਾਦ ,ਸਾਬਕਾ ਸਰਪੰਚ ਜਗਤਾਰ ਸਿੰਘ ਸਰਾਭਾ,ਮਨਪ੍ਰੀਤ ਸਿੰਘ ਜੋਨੂੰ ਸਰਾਭਾ,ਗਿਆਨੀ ਸੁਰਜੀਤ ਸਿੰਘ ਸਰਾਭਾ ,ਸਾਬਕਾ ਸਰਪੰਚ ਜਸਬੀਰ ਸਿੰਘ ਟੂਸੇ ,ਰਿੰਕੂ ਰੰਗੂਵਾਲ ,ਰਵਿੰਦਰ ਸਿੰਘ ਦਿੱਲੀ,ਗੁਰਜੀਤ ਸਿੰਘ ਠੁੱਲੀਵਾਲ,ਜਸਕਰਨ ਸਿੰਘ ਢੈਪਈ,ਗਿਆਨੀ ਸੁਰਜੀਤ ਸਿੰਘ ਸਰਾਭਾ ਤੇਜਿੰਦਰ ਸਿੰਘ ਖੰਨਾ ਜੰਡ,ਜਤਿੰਦਰ ਸਿੰਘ ਖੰਨਾ ਜੰਡ ਮਨਪ੍ਰੀਤ ਸਿੰਘ ਅਕਾਲਗਡ਼੍ਹ ਗਿਆਨੀ ਸੁਰਜੀਤ ਸਿੰਘ ਸਰਾਭਾ,ਮਨਪ੍ਰੀਤ ਸਿੰਘ ਅਕਾਲਗਡ਼੍ਹ,ਮੇਜਰ ਸਿੰਘ ਸੁਖਾਣਾ ,ਦਰਸ਼ਨ ਸਿੰਘ ਦਰਸੀ ,ਪਰਮਜੀਤ ਸਿੰਘ ਪੰਮੀ ਆਦਿ ਹਾਜ਼ਰ ਸਨ।
