ਚੋਣ ਕਮਿਸ਼ਨ
ਕਿਤੇ ਡੋਲ ਨਾ ਜਾਵੀਂ!
ਲਗਾਮ ਖਿੱਚ ਕੇ ਰੱਖੀੰ!
ਤੇਰੀ ਲਗਾਮ ਨੇ
ਖਰਚੇ ਘਟਾਉਣੇ ਨੇ!
ਜੇ ਉਮੀਦਵਾਰਾਂ ਦੇ ਖਰਚਿਆਂ 'ਤੇ
ਵਿਸਰਾਮ ਚਿੰਨ੍ਹ ਲੱਗੇਗਾ
ਤਾਂ ਉਹ-
ਨਾ ਲੋਕਾਂ ਦਾ ਗਲਾ
ਵੱਢਣਗੇ!
ਨਾ ਸਰਕਾਰੀ ਖਜ਼ਾਨਾ
ਚੱਟਣਗੇ!
ਤੂੰ ਬਣਕੇ ਰਹੀਂ ਲੋਕ ਪੱਖੀ!
ਲਾਜ ਫਰਜਾਂ ਦੀ ਰੱਖੀੰ !
ਧਨਾਢਾਂ 'ਤੇ
ਬਾਜ ਅੱਖ ਰੱਖੀੰ!
ਉਹ ਦਾਰੂ, ਭੁੱਕੀ ਵੰਡਣਗੇ!
ਨਾਲੇ 'ਚਿੱਟਾ' ਥਾਂ ਥਾਂ ਸੁੱਟਣਗੇ!
ਗ੍ਰੰਥਾਂ 'ਤੇ
ਹੱਥ ਰਖਾਕੇ!
ਸਹੁੰਆਂ ਖੁਆਕੇ
ਦੁੱਕੀ, ਤਿੱਕੀ ਵੰਡਣਗੇ!
ਕਾਣੇ ਕਰਕੇ ਰੱਖਣਗੇ!
ਜੁੱਤੀ ਥੱਲੇ ਰੱਖਣਗੇ!
ਪਸ਼ੂਆਂ ਵਾਂਗੂੰ ਹੱਕਣਗੇ!
ਵੇਖੀਂ ਚੋਣ ਕਮਿਸ਼ਨ
ਕਿਤੇ ਡੋਲ ਨਾ ਜਾਵੀਂ!
ਤੇਰੇ 'ਤੇ ਦਬਾਅ ਪਵੇਗਾ!
ਬਚਾ ਲੈ ਲੋਕਾਂ ਨੂੰ!
ਬਚਾ ਲੈ ਦੇਸ਼ ਨੂੰ!
ਉਹ -
ਵਿਧਾਇਕ ਬਣਕੇ,
ਐਮ ਪੀ ਬਣਕੇ,
ਮੰਤਰੀ ਬਣਕੇ,
ਐਸ਼ ਪ੍ਰਸਤੀ ਕਰਦੇ ਨੇ!
ਨਾਲੇ ਲੁੱਟਦੇ ਨੇ ,
ਗਾਲ੍ਹਾਂ ਕੱਢਦੇ ਨੇ!
ਚੋਣ ਕਮਿਸ਼ਨ
ਤਕੜਾ ਹੋ ਕੇ ਰਹੀਂ!
ਕਿਤੇ ਡੋਲ ਨਾ ਜਾਵੀਂ!
ਚੋਣ ਕਮਿਸ਼ਨ -
ਨਵਿਆਂ ਨੂੰ
ਨਸ਼ਿਆਂ ਦੀ ਦਲਦਲ 'ਚੋਂ
ਗਰਕਣੋੰ ਬਚਾ ਲੈ!
ਚੋਣਾਂ ਦੇ ਚੱਲਦਿਆਂ
ਸ਼ਰੇਆਮ ਵਗਦੀ
ਨਸ਼ਿਆਂ ਦੀ ਹਨੇਰੀ
ਕਈਆਂ ਦੇ ਘਰ-ਬਾਰ
ਉਡਾਉਂਦੀ ਆ!
ਬੇ-ਮੌਸਮੇ ਸੱਥਰ ਵਿਛਾਉੰਦੀ ਆ!
ਗੋਲੀਆਂ ਚਲਦੀਆਂ ਨੇ!
ਸਿਰ ਪਾਟ ਦੇ ਨੇ!
ਥਾਣਿਆਂ, ਕਚਹਿਰੀਆਂ 'ਚ
ਉਮਰਾਂ ਗਾਲ਼ਦੇ ਨੇ!
ਫਿਰ ਮੱਥੇ 'ਤੇ ਹੱਥ ਮਾਰਦੇ ਨੇ,
ਹੱਥ ਅੱਡ ਅੱਡ ਕੇ,
ਰੋਟੀ ਭਾਲਦੇ ਨੇ!
ਹੱਥ ਅੱਡ ਅੱਡ ਕੇ,
ਰੋਟੀ ਭਾਲਦੇ ਨੇ!
ਫਿਰ ਪਛਤਾਉਂਦੇ ਨੇ
ਮੱਥੇ 'ਤੇ ਹੱਥ ਮਾਰ ਦੇ ਨੇ!
- ਸੁਖਦੇਵ ਸਲੇਮਪੁਰੀ
09780620233
1 ਫਰਵਰੀ, 2022
