ਲੁਧਿਆਣਾ

ਜਗਰਾਓਂ, 29 ਮਈ (ਮਨਜੀਤ ਗਿੱਲ ਸਿੱਧਵਾਂ/ਗੁਰਦੇਵ ਗਾਲਿਬ)। ਇੱਥੋ ਨੇੜਲੇ ਪਿੰਡ ਸੰਗਤਪੁਰਾ (ਢੈਪਈ) ਵਿਖੇ ਅੱਜ ਬਾਬਾ ਲੱਖਾ ਜੀ ਠਾਠ ਨਾਨਕਸਰ ਵਾਲਿਆ ਦੀ ਰਹਿਨੁਮਾਈ ਹੇਠ ਸਰਪੰਚ ਬੀਬੀ ਪਲਵਿੰਦਰ ਕੌਰ ਸਿੱਧੂ ਪਤਨੀ ਟਰੱਕ ਯੂਨੀਅਨ ਜਗਰਾਉ ਪ੍ਰਧਾਨ ਬਿੰਦਰ ਮਨੀਲਾ ਨੇ ਪਹਿਲੀ ਪਾਤਸ਼ਾਹੀ ਧੰਨ ਧੰਨ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550ਵੇਂ ਪ੍ਰਕਾਸ਼ ਉਤਸਵ ਨੂੰ ਮੁੱਖ ਰੱਖਦੇ ਹੋਏ ਧਰਮਿੰਦਰ ਸਿੰਘ ਠਾਠ ਨਾਨਸਰ ਜਗਰਾਉ , ਵਣ ਰੇਂਜ ਅਫਸਰ ਮੋਹਨ ਸਿੰਘ, ਬਲਾਕ ਅਫਸਰ ਤੀਰਥ ਸਿੰਘ , ਸਵਰਨ ਸਿੰਘ ਬਲਾਕ ਅਫਸਰ , ਰਵੀਇੰਦਰ ਸਿੰਘ ,ਕੁਲਵੰਤ ਸਿੰਘ ਵਣ ਗਾਰਡ ਦੇ ਵਿਸ਼ੇਸ ਸਹਿਯੋਗ ਸਦਕਾ ਆਪਣੇ ਨਗਰ ਸੰਗਤਪੁਰਾ (ਢੈਪਈ) ਨੂੰ ਹਰਿਆਂ ਭਰਿਆਂ ਬਣਾਉਣ ਦਾ ਬੀੜਾ ਚੁੱਕਿਆਂ ਜਿਸ ਦਾ ਅਗਾਜ ਬਾਬਾ ਲੱਖਾ ਜੀ ਨੇ ਆਪਣੇ ਕਰ ਕਮਲਾਂ ਨਾਲ ਬੂਟਾ ਲਗਾਕੇ ਕੀਤਾ । ਇਸ ਸਮੇਂ ਬਾਬਾ ਲੱਖਾ ਜੀ ਨੇ ਇੱਕਤਰ ਹੋਏ ਨਗਰ ਵਾਸੀਆ ਨੂੰ ” ਬਲਿਹਾਰੀ ਕੁਦਰਤਿ ਵਸਿਆ , ਤੇਰਾ ਅੰਤੁ ਨ
ਜਾਈ ਲਖਿਆ” ਬਿਆਨ ਕਰਦੇ ਹੋਏ ਕਿਹਾ ਕਿ ਕੁਦਰਤ ਹੀ ਸਾਡਾ ਅਸਲੀ ਸਾਥੀ ਹੈ ਜੇਕਰ ਦਰਖੱਤ ਸਾਨੂੰ ਅਕਸ਼ੀਜਨ ਨਾ ਦੇਣ ਤਾਂ ਅਸੀ ਖਤਮ ਹੋ ਜਾਵਾਂਗੇ ਇਸੇ ਲਈ ਸਾਨੂੰ ਆਪਣੇ ਜੀਵਨ ਨੂੰ ਚੱਲਦਾ ਰੱਖਣ ਲਈ ਆਪਣੇ ਆਸ ਪਾਸ ਦਰਖੱਤ ਲਗਾਕੇ ਹਰਿਆਂ ਭਰਿਆ ਰੱਖਣਾ ਜਰੂਰੀ ਹੈ । ਇਸ ਸਮੇਂ ਪ੍ਰਧਾਨ ਬਿੰਦਰ ਸਿੰਘ ਮਨੀਲਾ ਨੇ ਮੁੱਖ ਮਹਿਮਾਨ ਵਜੋਂ ਸਿਰਕਤ ਕਰਕੇ ਪਹੁੰਚੇ ਬਾਬਾ ਜੀ ਨੂੰ ਅਤੇ ਸਰਕਾਰੀ ਅਫਸਰਾ ਨੂੰ ਜੀ ਆਇਆਂ ਕਹਿੰਦੇ ਹੋਏ ਧੰਨਵਾਦ ਕੀਤਾ । ਇਸ ਸਮੇਂ ਪ੍ਰਧਾਨ ਬਿੰਦਰ ਮਨੀਲਾ ਨੇ ਕਿਹਾ ਕਿ ਉਹਨਾ ਦੇ ਸਿੱਧੂ ਪਰਿਵਾਰ ਦੀ ਤਮੰਨਾ ਹੈ ਕਿ ਉਹਨਾ ਦਾ ਨਗਰ ਹਰਿਆਂ ਭਰਿਆ ਬਣਾਕੇ ਰੱਖਣ ਤਦ ਹੀ ਉਹ ਅੱਜ ਇਸ ਉਪਰਾਲੇ ਨੂੰ ਨੇਪਰੇ ਚੜਾਉਣ ਲਈ ਇੱਕਤਰ ਹੋਏ ਹਨ ਪ੍ਰਮਾਤਮਾ ਦੀ ਮੇਹਰ ਅਤੇ ਆਪਣੇ ਨਗਰ ਵਾਸੀਆਂ ਦੇ ਸਹਿਯੋਗ ਸਕਦਾ ਆਪਣੇ ਨੇਕ ਮਨਸੂਬਿਆ ਨੂੰ ਸਮ੍ਹੂ ਨਗਰ ਵਾਸੀਆ ਅਤੇ ਨੌਜਵਾਨਾ ਦੇ ਸਹਿਯੋਗ ਨਾਲ ਜਲਦ ਪੂਰਾ ਕਰਕੇ ਮਨ ਦੇ ਸੁਫਨੇ ਪੂਰੇ ਕਰਨਗੇ । ਇਸ ਸਮੇਂ ਇੰਨਾ ਦੇ ਨਾਲ ਪੰਚ ਰਾਗਾ ਸਿੰਘ , ਪੰਚ ਗੁਰਜੀਤ ਸਿੰਘ ਗੋਗੀ , ਪੰਚ ਹਰਪਾਲ ਕੌਰ , ਪੰਚ ਸੰਦੀਪ ਸਿੰਘ , ਪੰਚ ਬਲਰਾਜ ਸਿੰਘ , ਪੰਚ ਨਵਜੋਤ ਕੌਰ , ਪੰਚ ਨਸੀਬ ਕੌਰ , ਸਾਬਕਾ ਸਰਪੰਚ ਸੁਰਜੀਤ ਸਿੰਘ , ਸਾਬਕਾ ਪੰਚ ਸੁਲਤਾਨ ਸਿੰਘ ਮੰਨੂੰ , ਸਾਬਕਾ ਪੰਚ ਜਗਜੀਤ ਸਿੰਘ , ਗੁਰਸ਼ਰਨ ਸਿੰਘ , ਮਾਸਟਰ ਚਰਨਜੀਤ ਸਿੰਘ , ਸੂਬੇਦਾਰ ਪਰਮਿੰਦਰ ਸਿੰਘ , ਜਸਵੀਰ ਸਿੰਘ , ਦਰਸ਼ਨ ਸਿੰਘ , ਅਰਸਪ੍ਰੀਤ ਸਿੰਘ ,ਰਾਜਪ੍ਰੀਤ ਸਿੰਘ , ਚਤਰ ਸਿੰਘ , ਹਰਮਨਜੋਤ ਸਿੰਘ , ਚੰਦਨਦੀਪ ਸਿੰਘ , ਰਾਣਾ ਪ੍ਰਾਤਪ ਸਿੰਘ , ਮੋਹਨ ਸਿੰਘ , ਮਨਪ੍ਰੀਤ ਸਿੰਘ , ਰਮਨਦੀਪ ਸਿੰਘ , ਜੋਨੀ , ਗਿੰਦਰ ਸਿੰਘ ਆਦਿ ਹਾਜਰ ਸਨ ।

ਜਗਰਾਓਂ, 29 ਮਈ (ਮਨਜੀਤ ਗਿੱਲ ਸਿੱਧਵਾਂ/ਗੁਰਦੇਵ ਗਾਲਿਬ)। ਬੀਤੀ ਦੇਰ ਰਾਤ ਸਥਾਨਕ ਜਗਰਾਓਂ-ਲੁਧਿਆਣਾ ਜੀਟੀ ਰੋਡ ਮਾਰਗ 'ਤੇ ਪਿੰਡ ਅਲੀਗੜ੍ਹ ਵਾਲੇ ਪੁਲ ਤੋਂ ਇੱਕ ਕਾਰ ਬੇਕਾਬੂ ਹੋ ਕੇ ਪੁਲ ਦੀ ਰੇਲਿੰਗ ਨੂੰ ਤੋੜਦੀ ਹੋਈ ਪੁਲ ਤੋਂ ਥੱਲੇ ਜਾ ਡਿੱਗੀ, ਜਿਸ ਨਾਲ ਉਸ ਵਿੱਚ ਸਵਾਰ ਨੇੜਲੇ ਪਿੰਡ ਗਾਲਿਬ ਕਲਾਂ ਦੇ ਦੋ ਨੌਜਵਾਨਾਂ ਦੀ ਮੌਤ ਹੋ ਗਈ। ਇਸ ਘਟਨਾ ਦੀ ਸੂਚਨਾ ਮਿਲਦੇ ਸਾਰ ਹੀ ਸਾਰੇ ਪਿੰਡ ਵਿੱਚ ਮਾਹੌਲ ਗਮਗੀਨ ਹੋ ਗਿਆ। ਘਟਨਾ ਸਥਾਨ 'ਤੇ ਪੁੱਜੇ ਥਾਣਾ ਸਿਟੀ ਦੇ ਇੰਚਾਰਜ ਨਿਧਾਨ ਸਿੰਘ ਨੇ ਦੱਸਿਆ ਕਿ ਪਿੰਡ ਗਾਲਿਬ ਦੇ ਦੋ ਨੌਜਵਾਨ ਆਪਣੀ ਕਾਰ 'ਚ ਸਵਾਰ ਹੋ ਕੇ ਲੁਧਿਆਣਾ ਵਿਖੇ ਕਿਸੇ ਕੰਮ ਲਈ ਗਏ ਸਨ ਜਦ ਉਹ ਰਾਤ ਕਰੀਬ 10 ਵਜੇ ਵਾਪਿਸ ਆਪਣੇ ਪਿੰਡ ਜਾ ਰਹੇ ਸਨ ਤਾਂ ਪਿੰਡ ਅਲੀਗੜ੍ਹ ਦੇ ਪੁਲ 'ਤੇ ਉਨ੍ਹਾਂ ਦੀ ਕਾਰ ਬੇਕਾਬੂ ਹੋ ਗਈ ਜੋ ਕਿ ਪੁਲ ਦੀ ਰੇਲਿੰਗ ਨੂੰ ਤੋੜਦੀ ਹੋਈ ਪੁਲ ਤੋਂ ਥੱਲੇ ਜਾ ਡਿੱਗੀ ਜਿਸ ਨਾਲ ਉਸ ਵਿੱਚ ਸਵਾਰ ਮਨਜਿੰਦਰ ਸਿੰਘ ਦੀ ਮੋਕੇ 'ਤੇ ਹੀ ਮੌਤ ਹੋ ਗਈ ਅਤੇ ਗੰਭੀਰ ਜਖਮੀ ਹਰਿੰਦਰਪਾਲ ਸਿੰਘ ਨੂੰ ਲੁਧਿਆਣਾ ਦੇ ਡੀਐੱਮਸੀ ਹਸਪਤਾਲ ਵਿਖੇ ਦਾਖਲ ਕਰਵਾਇਆ ਗਿਆ ਜਿਸ ਦੀ ਬਾਅਦ ਵਿੱਚ ਮੌਤ ਹੋ ਗਈ। ਨਿਧਾਨ ਸਿੰਘ ਨੇ ਦੱਸਿਆ ਕਿ ਜਗਰਾਓਂ ਦੇ ਸਿਵਲ ਹਸਪਤਾਲ ਵਿਖੇ ਦੋਵਾਂ ਮ੍ਰਿਤਕਾਂ ਦਾ ਪੋਸਟਮਾਰਟ ਕਰਨ ਤੋਂ ਬਾਅਦ 174 ਦੀ ਕਾਰਵਾਈ ਕਰਕੇ ਮ੍ਰਿਤਕ ਦੇਹਾਂ ਵਾਰਿਸਾਂ ਦੇ ਹਵਾਲੇ ਕਰ ਦਿੱਤੀਆਂ ਗਈਆਂ ਹਨ।
 

ਸੁਧਾਰ ਘਰਾਂ ਤੋਂ ਬਿਗਾੜ ਘਰ ਬਣ ਚੁੱਕੀਆਂ ਜੇਲਾਂ ਦਾ ਮੰਤਰੀ ਅਸਤੀਫਾ ਦੇਵੇ ਅਤੇ ਦੋਸ਼ੀਆਂ ਉੱਤੇ ਪਰਚੇ ਦਰਜ ਕੀਤੇ ਜਾਣ  : ਗੜੀ

ਲੁਧਿਆਣਾ, ਜੂਨ 2019 ( ਮਨਜਿੰਦਰ ਗਿੱਲ )-ਲੁਧਿਆਣਾ ਦੀ ਸੈਂਟਰਲ ਜੇਲ ਵਿੱਚ ਕੈਦੀਆਂ ਅਤੇ ਜੇਲ ਪ੍ਰਸ਼ਾਸਨ ਵਿੱਚ ਹੋਈ ਖੂਨੀ ਝੜਪ ਨੇ ਸਾਬਿਤ ਕਰ ਦਿੱਤਾ ਕਿ ਪੰਜਾਬ ਦੀ ਬਿਗੜੀ ਕਾਨੂੰਨ ਵਿਵਸਥਾ ਦੀ ਸਥਿਤੀ ਜੇਲਾਂ ਵਰਗੀਆਂ ਅਤਿ ਸੁਰੱਖਿਅਤ ਥਾਵਾਂ ਤੇ ਵੀ ਦਰੁਸਤ ਨਹੀਂ ਰਹੀ। ਇੱਕ ਤੋਂ ਬਾਅਦ ਇੱਕ ਕਰਕੇ ਵਾਪਰ ਰਹੀਆਂ ਅਜਿਹੀਆਂ ਘਟਨਾਵਾਂ ਪੰਜਾਬ ਸਰਕਾਰ ਦਾ ਹਰ ਫਰੰਟ ਤੇ ਪੂਰੀ ਤਰਾਂ ਫੇਲ ਹੋਣਾ ਸਾਬਿਤ ਕਰਦੀਆਂ ਹਨ ਇਸ ਲਈ ਪੰਜਾਬ 'ਚ ਗਵਰਨਰੀ ਰਾਜ ਲਾਉਣ ਚਾਹੀਦਾ ਹੈ। ਜੇਲਾਂ ਸੁਧਾਰ ਘਰਾਂ ਦੀ ਬਜਾਏ ਬਿਗਾੜ ਘਰ ਬਣ ਗਈਆਂ ਹਨ ਜਿਸਦੇ ਲਈ ਸਿੱਧੇ ਤੌਰ ਤੇ ਜਿੰਮੇਵਾਰ ਜੇਲ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਤੋਂ ਫੌਰਨ ਅਸਤੀਫਾ ਲੈ ਲੈਣਾ ਚਾਹੀਦਾ ਹੈ। ਇਨਾਂ ਸ਼ਬਦਾਂ ਦਾ ਪ੍ਰਗਟਾਵਾ ਬਹੂਜਨ ਸਮਾਜ ਪਾਰਟੀ ਦੇ ਸੂਬਾ ਪ੍ਰਧਾਨ ਡਾ: ਜਸਵੀਰ ਸਿੰਘ ਗੜੀ ਨੇ ਸਥਾਨਕ ਸਿਵਲ ਹਸਪਤਾਲ ਵਿਖੇ ਕੀਤਾ ਜਿਥੇ ਉਹ ਮ੍ਰਿਤਕ ਕੈਦੀਆਂ ਦੇ ਪਰਿਵਾਰਕ ਮੈਂਬਰਾਂ, ਜਖਮੀਂ ਕੈਦੀਆਂ ਅਤੇ ਪੁਲਿਸ ਮੁਲਾਜਮਾਂ ਦਾ ਹਾਲ ਚਾਲ ਪੁੱਛਣ ਪਹੁੰਚੇ ਸਨ। ਉਨਾਂ ਮ੍ਰਿਤਕ ਅਜੀਤ ਸਿੰਘ ਦੇ ਪਿਤਾ ਅਤੇ ਮਾਤਾ ਦੀ ਹਾਜਰੀ ਵਿੱਚ ਕਿਹਾ ਕਿ ਕਾਂਗਰਸੀਆਂ ਨੇ ਤਾਂ ਉੜਦਾ ਪੰਜਾਬ ਫਿਲਮ ਬਣਾਈ ਸੀ ਪਰ ਏਨਾਂ ਦੀ ਸਰਕਾਰ ਵਿੱਚ ਰੋਂਦਾ ਪੰਜਾਬ ਬਣ ਗਿਆ ਹੈ। ਉਨਾਂ ਕਿਹਾ ਕਿ ਬਸਪਾ ਪਰਿਵਾਰ ਨੂੰ ਹਰ ਪ੍ਰਕਾਰ ਦੀ ਸਹਾਇਤਾ ਦੇਣ ਦਾ ਭਰੋਸਾ ਦਿੰਦੀ ਹੈ ਅਤੇ ਇਸ ਘਟਨਾ ਲਈ ਜਿੰਮੇਂਵਾਰ ਜੇਲ ਅਧਿਕਾਰੀਆਂ ਉੱਤੇ 302 ਅਤੇ 307 ਦਾ ਪਰਚਾ ਦਰਜ ਕਰਨ ਦੀ ਮੰਗ ਕਰਦੀ ਹੈ। ਉਨਾਂ ਕਿਹਾ ਕਿ ਪੰਜਾਬ ਦੇ ਮੁੱਖ ਮੰਤਰੀ ਇਸ ਕਾਂਡ ਦੀ ਮੈਜਿਸਟ੍ਰੇਟ ਜਾਂਚ ਦੇ ਹੁਕਮ ਦੇ ਕੇ ਖੁਦ ਨੂੰ ਅਤੇ ਅਪਣੀ ਸਰਕਾਰ ਨੂੰ ਸਾਫ ਸੁਥਰੇ ਨਹੀਂ ਰੱਖ ਸਕਦੇ। ਇਸ ਮਾਮਲੇ ਵਿੱਚ ਸਰਕਾਰ ਦੇ ਪੂਰੀ ਤਰਾਂ ਨਾਕਾਮੀ ਸਾਬਿਤ ਹੋਣ ਤੇ ਉਹ ਦੋਸ਼ੀ ਹੈ। ਮੈਜਿਸਟ੍ਰੇਟ ਜਾਂਚ ਦੀ ਲਗਾਇਆ ਮੁੱਖੀ ਲੁਧਿਆਣਾ ਦਾ ਡੀ ਸੀ ਅਤੇ ਸਰਕਾਰ ਦੇ ਪ੍ਰਵਾਹ ਹੇਠ ਹੈ ਅਤੇ ਕਿਸੇ ਵੀ ਪੱਖੋਂ ਸਹੀ ਜਾਂਚ ਕਰਨ ਦੀ ਤਾਕਤ ਨਹੀਂ ਰੱਖਦਾ ਇਸ ਲਈ ਪੂਰੇ ਮਾਮਲੇ ਦੀ ਹਾਈ ਕੋਰਟ ਦੇ ਕਿਸੇ ਸਿਟਿੰਗ ਜੱਜ ਤੋਂ ਜਾਂਚ ਕਰਵਾ ਕੇ ਦੋਸ਼ੀਆਂ ਉੱਤੇ ਸਮਾਂ ਵਧ ਕਾਰਵਾਈ ਕੀਤੀ ਜਾਵੇ। ਉਨਾਂ ਕਿਹਾ ਕਿ ਜੇਕਰ ਸਰਕਾਰ ਨੇ ਦੇਰ ਕਰਨ ਦੀ ਕੋਸ਼ਿਸ ਕੀਤੀ ਤਾਂ ਬਸਪਾ ਪੀੜਤਾਂ ਨੂੰ ਇਨਸਾਫ ਦਿਵਾਉਣ ਲਈ ਸੜਕਾਂ ਉੱਤੇ ਉੱਤਰ ਕੇ ਸੰਘਰਸ਼ ਕਰਨ ਤੋਂ ਗੁਰੇਜ ਨਹੀਂ ਕਰੇਗੀ। ਉਨਾਂ ਨਾਲ ਹਾਜਰ ਪਰਿਵਾਰਕ ਮੈਂਬਰਾਂ ਨੇ ਵੀ ਜੇਲ ਮੰਤਰੀ ਦਾ ਫੌਰੀ ਅਸਤੀਫਾ ਅਤੇ ਜੇਲ ਅਧਿਕਾਰੀਆਂ ਉੱਤੇ ਪਰਚੇ ਦਰਜ ਕਰਨ ਦੀ ਮੰਗ ਕੀਤੀ। ਮ੍ਰਿਤਕ ਅਜੀਤ ਦੇ ਪਿਤਾ ਨੇ ਇਨਸਾਫ ਲਈ ਸੁਪਰੀਮ ਕੋਰਟ ਤੱਕ ਜਾਣ ਦੀ ਗੱਲ ਆਖੀ। ਇਸ ਮੌਕੇ ਜਿਲਾ ਪ੍ਰਧਾਨ ਪ੍ਰਗਣ ਬਿਲਗਾ, ਦੇਹਾਤੀ ਪ੍ਰਧਾਨ ਨਿਰਮਲ ਸਿੰਘ ਸਾਇਆ ਜੋਨ ਕੋਆਡੀਨੇਟਰ ਰਾਮ ਸਿੰਘ ਗੋਗੀ ਤੇ ਭੁਪਿੰਦਰ ਸਿੰਘ ਜੌੜਾ, ਯੁਥ ਪ੍ਰਧਾਨ ਹਰਸ਼ਦੀਪ ਸਿੰਘ ਮਹਿਦੂਦਾਂ, ਮਨਜੀਤ ਸਿੰਘ ਬਾੜੇਵਾਲ, ਸੁਖਦੀਪ ਸਿੰਘ ਬੀਜਾ, ਮਨਜੀਤ ਸਿੰਘ ਕਾਹਲੋਂ, ਨਰੇਸ਼ ਬਸਰਾ, ਸੁਰਿੰਦਰ ਹੀਰਾ, ਬਲਵਿੰਦਰ ਕੁਮਾਰ, ਜੋਨ ਗੱਗੜ, ਜਸਵੀਰ ਪੌਲ, ਸੰਜੀਵ ਵਿਸ਼ਵਕਰਮਾ, ਸੁਰਜੀਤ, ਗੁਲਸ਼ਨ ਪੌਲ, ਡਾ ਰਵਿੰਦਰ ਸਰੋਏ ਅਤੇ ਹੋਰ ਹਾਜਰ ਸਨ।

ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਪਹਿਲਾਂ ਸ਼ੂਟਰ ਪਿਸਤੌਲ ਸਮੇਤ ਗਿਰਫਤਾਰ 

ਜਗਰਾਓਂ, ਜੂਨ 2019 ( ਮਨਜਿੰਦਰ ਗਿੱਲ )—ਐਨ. ਆਰ. ਆਈ. ਜੀਜਾ ਵਲੋਂ ਆਪਣੇ ਹੀ ਸਾਲੇ ਨੂੰ ਕਤਲ ਕਰਵਾਉਣ ਲਈ ਪੰਜ ਲੱਖ ਰੁਪਏ ਵਿਚ ਸ਼ਾਰਪ ਸ਼ੂਟਰਾਂ ਨਾਲ ਸੌਦਾ ਤੈਅ ਕਰ ਲਿਆ ਅਤੇ ਇਕ ਲੱਖ ਰੁਪਏ ਦੀ ਪੇਸ਼ਗੀ ਵੀ ਦੇ ਦਿਤੀ। ਇਸਤੋਂ ਪਹਿਲਾਂ ਕਿ ਕਾਤਲ ਵਾਰਦਾਤ ਨੂੰ ਅੰਜਾਮ ਦਿੰਦੇ ਦੋਸ਼ੀ ਪੁਲਿਸ ਦੇ ਹੱਥ ਚੜ੍ਹ ਗਏ। ਇਸ ਸੰਬਧ ਵਿਚ ਡੀ. ਐਸ. ਪੀ. ਦਿਲਬਾਗ ਸਿੰਘ ਨੇ ਪ੍ਰੈਸ ਕਾਨਫਰੰਸ ਦੌਰਾਨ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਜਤਿੰਦਰ ਸਿੰਘ ਉਰਫ ਰਿੰਕੂ ਪੁੱਤਰ ਅਵਤਾਰ ਸਿੰਘ ਵਾਸੀ ਪਿੰਡ ਛੱਜਾਵਾਲ ਨੇ ਪੁਲਿਸ ਨੂੰ ਦਿਤੇ ਬਿਆਨਾਂ ਵਿਚ ਦੋਸ਼ ਲਗਾਇਆ ਕਿ ਉਹ ਪਿੰਡ ਰੂੰਮੀ ਵਿਖੇ ਜੀ.ਐਨ ਸੈਨਟਰੀ ਸਟੋਰ ਨਾਮ ਦੀ ਦੁਕਾਨ ਕਰਦਾ ਹੈ । ਉਸ ਦੀ ਇੱਕ ਭੈਣ ਪਰਵਿੰਦਰ ਕੌਰ ਜੋ ਰੁਪਿੰਦਰ ਸਿੰਘ ਵਾਸੀ ਪਿੰਡ ਤਾਰੇਵਾਲਾ ਜਿਲ੍ਹਾ ਮੋਗਾ ਨਾ ਵਿਆਹੀ ਹੋਈ ਸੀ ਅਤੇ ਉਹ ਵਿਦੇਸ਼ ਅਮਰੀਕਾ ਰਹਿੰਦੇ ਸਨ ।ਪਰਵਿੰਦਰ ਕੌਰ ਦੀ ਆਪਣੀ ਪਤੀ ਨਾਲ ਅਣਬਣ ਹੋਣ ਕਰਕੇ ਕਰੀਬ 05 ਸਾਲ ਪਹਿਲਾਂ ਉਹਨਾਂ ਦਾ ਅਮਰੀਕਾ ਵਿੱਚ ਤਲਾਕ ਹੋ ਗਿਆ ਸੀ। ਉਹਨਾਂ ਦੇ ਤਿੰਨੇ ਬੱਚੇ ਉਸਦੀ ਭੈਣ ਪਰਵਿੰਦਰ ਕੌਰ ਪਾਸ ਹੀ ਰਹਿੰਦੇ ਸਨ। ਰੁਪਿੰਦਰ ਸਿੰਘ ਹਰ ਸਾਲ ਇੰਡੀਆਂ ਆਉਦਾ ਹੈ ਅਤੇ ਹੁਣ ਵੀ ਕਰੀਬ 01 ਮਹੀਨਾ ਪਹਿਲਾਂ ਇੱਥੇ ਆਇਆ ਹੋਇਆ ਸੀ।ਜਦੋਂ ਵੀ ਉਹ ਇੰਡੀਆਂ ਆਉਦਾ ਸੀ ਤਾਂ ਮੁੱਦਈ ਨੂੰ ਮਾਰਨ ਦੀਆਂ ਧਮਕੀਆਂ ਦਿੰਦਾ ਸੀ। ਪਰ ਉਸਨੇ ਰਿਸ਼ੇਤਦਾਰ ਹੋਣ ਕਰਕੇ ਇਹਨਾਂ ਗੱਲਾਂ ਦੀ ਪਰਵਾਹ ਨਹੀ ਕੀਤੀ।ਕੁਝ ਦਿਨ ਪਹਿਲਾਂ ਉਸ ਦੀ ਦੁਕਾਨ ਦੇ ਬਾਹਰ ਇੱਕ ਸਕਾਰਪੀਓ ਗੱਡੀ ।ਜਿਸ ਵਿੱਚੋਂ ਦੋ ਨੌਜਵਾਨ ਉਮਰ ਕਰੀਬ 25 ਤੋ 28 ਸਾਲ ਆਏ।ਜਿਹਨਾਂ ਨੇ ਉਸ ਕੋਲਂੋ 260/- ਦਾ ਸੈਨਟਰੀ ਦਾ ਸਮਾਨ ਖ੍ਰੀਦ ਕੀਤਾ। ਉਹ ਹਰ ਰੋਜ ਹੀ ਪਿੰਡ ਛੱਜਾਵਾਲ ਤੋਂ ਪਿੰਡ ਰੂੰਮੀ ਆਪਣੀ ਦੁਕਾਨ ਪਰ ਜਾਂਦਾ ਹੈ।ਮਿਤੀ 26-06-2019 ਨੂੰ ਸਵੇਰੇ ਦੁਕਾਨ ਤੇ ਜਾਣ ਲਈ ਤਿਆਰ ਸੀ ਤਾਂ ਪਿੰਡ ਵਿੱਚ ਰੋਲਾ ਪੈ ਗਿਆ ਕਿ ਦੋ ਨੌਜਵਾਨ ਜਿਹਨਾਂ ਦੇ ਮੂੰਹ ਬੰਨ੍ਹੇ ਹੋਏ ਹਨ, ਸਪੈਲਡਰ ਮੋਟਰ ਸਾਈਕਲ ਨੰਬਰ ਪਰ ਪਿੰਡ ਛੱਜਾਵਾਲ ਤੋ ਰੂੰਮੀ ਵਾਲੀ ਸੜਕ ਤੇ ਕੱਸੀ ਦੀ ਪੁਲੀ ਤੇ ਸ਼ੱਕੀ ਹਾਲਤ ਵਿੱਚ ਖੜ੍ਹੇ ਹਨ।ਜਿਹਨਾਂ ਪਾਸ ਅਸਲਾ ਵੀ ਹੈ।ਪਿੰਡ ਦੇ ਕੁਝ ਨੌਜਵਾਨ ਸਮੇਤ ਮੁੱਦਈ ਉਹਨਾਂ ਵੱਲ ਗਏ ਤਾਂ ਦੋਵੇ ਨੌਜਵਾਨ ਮੋਟਰ- ਸਾਈਕਲ ਭਜਾਕੇ ਲੈ ਗਏ।ਜਿਹਨਾਂ ਬਾਰੇ ਮੁਦਈ ਨੂੰ ਯਾਦ ਆਇਆ ਕਿ ਇਹ ਦੋਵੇਂ ਉਹੀ ਵਿਆਕਤੀ ਹਨ, ਜੋ ਕੁਝ ਦਿਨ ਪਹਿਲਾਂ ਉਸ ਦੀ ਦੁਕਾਨ ਤੋ ਸਕਾਰਪੀਓ ਗੱਡੀ ਪਰ ਸੈਨਟਰੀ ਦਾ ਸਮਾਨ ਖ੍ਰੀਦਕੇ ਲੈ ਗਏ ਸੀ। ਇਨ੍ਹਾਂ ਦੋਵਾਂ ਨੂੰ ਫੜ ਕੇ ਪੁਲਿਸ ਦੇ ਹਵਾਲੇ ਕਰ ਦਿਤਾ ਗਿਆ। ਡੀ. ਐਂਸ,. ਪੀ ਦਿਲਬਾਗ ਸਿੰਘ ਨੇ ਦੱਸਿਆ ਕਿ ਇਨ੍ਹਾਂ ਦੋਵਾਂ ਤੋਂ ਪੁੱਛ ਗਿਛ ਕੀਤੀ ਗਈ ਤਾਂ ਇਨ੍ਹਾਂ ਮੰਨਿਆ ਕਿ ਜਤਿੰਦਰ ਸਿੰਘ ਨੂੰ ਮਾਰਨ ਲਈ ਉਸਦੇ ਜੀਜਾ ਰੁਪਿੰਦਰ ਸਿੰਘ ਨੇ ਉਨ੍ਹਾਂ ਨੂੰ ਪੰਜ ਲੱਖ ਦੀ ਸੁਪਾਰੀ ਦਿਤੀ ਹੈ। ਜਿਸ ਵਿਚੋਂ ਉਸਨੇ ਇਕ ਲੱਖ ਰੁਪਏ ਪੇਸ਼ਗੀ ਵਜੋਂ ਦਿਤੇ ਹਨ ਅਤੇ ਬਾਕੀ ਕੰਮ ਹੋਣ ਤੋਂ ਬਾਅਦ ਮਿਲਣੇ ਸਨ। ਰੁਪਿੰਦਰ ਸਿੰਘ ਥੋੜੇ ਦਿਨ ਪਹਿਲਾਂ ਹੀ ਅਮਰੀਕਾ ਤੋ ਆਇਆ ਹੈ।ਜਿਸ ਨੇ ਗੁਰਜਿੰਦਰ ਕੌਰ ਪਤਨੀ ਸੁਖਵਿੰਦਰ ਸਿੰਘ ਉਰਫ ਫੌਜੀ ਵਾਸੀ ਰਾਮਗੜ੍ਹ ਭੁੱਲਰ ਨਾਮ ਦੀ ਇੱਕ ਔਰਤ ਨਾਲ ਮਿਲ ਕੇ ਉਸ ਨੂੰ ਮਰਵਾਉਣ ਲਈ 5 ਲੱਖ ਰੁਪਏ ਵਿੱਚ ਅਰਸ਼ਦੀਪ ਸਿੰਘ ਉਰਫ ਅਮਨਾ ਪੁੱਤਰ ਗੁਰਸਵੇਕ ਸਿੰਘ ਵਾਸੀ ਫਰੀਦਕੋਟ ਜੋ ਕਿ ਗੁਰਜਿੰਦਰ ਕੌਰ ਦਾ ਰਿਸ਼ਤੇਦਾਰ ਹੈ ਅਤੇ ਸੰਦੀਪ ਸਿੰਘ ਉਰਫ ਕਾਲਾ ਵਾਸੀ ਹਨੂੰਮਾਨਗੜ੍ਹ ਅਤੇ ਭਿੰਦਾ ਵਾਸੀ ਡੱਬਵਾਲੀ ਨੂੰ ਹਾਇਰ ਕੀਤਾ ਹੈ। ਰੁਪਿੰਦਰ ਸਿੰਘ ਨੇ ਗੁਰਜਿੰਦਰ ਕੌਰ ਅਤੇ ਅਰਸ਼ਦੀਪ ਸਿੰਘ ਨੂੰ ਪਹਿਲਾਂ 01 ਲੱਖ ਰੁਪਏ ਨਕਦ ਪੇਸ਼ਗੀ ਦਿੱਤੀ ਹੈ।ਜਿਸ ਨਾਲ ਇਹਨਾਂ ਉਕਤ ਸਕਾਰਪੀਓ ਗੱਡੀ ਮਿਸਤਰੀ ਹਰਨੇਕ ਸਿੰਘ ਵਾਸੀ ਭੰਮੀਪੁਰਾ ਤੋ ਖ੍ਰੀਦ ਕੀਤੀ ਹੈ।ਇਸ ਗੱਡੀ ਰਾਂਹੀ ਹੀ ਰੁਪਿੰਦਰ ਸਿੰਘ, ਅਰਸ਼ਦੀਪ ਸਿੰਘ, ਸੰਦੀਪ ਸਿੰਘ ਅਤੇ ਭਿੰਦਾ ਉਸ ਨੂੰ ਮਾਰਨ ਲਈ ਇੱਕ ਪਿਸਤੌਲ ਵੀ ਰਜਾਸਥਾਨ ਤੋ ਖ੍ਰੀਦ ਕੇ ਲਿਆਏ ਸਨ।ਇਹਨਾਂ ਸਾਰਿਆ ਨੇ ਰਲਕੇ ਉਸ ਨੂੰ ਮਾਰਨ ਦੀ ਸਕੀਮ ਬਣਾ ਕੇ ਉਸ ਦੀ ਦੁਕਾਨ, ਉਸ ਦੇ ਘਰ ਆਉਣ ਜਾਣ ਵਾਲੇ ਰਸਤੇ ਅਤੇ ਸਮੇ ਦੀ ਚੰਗੀ ਤਰ੍ਹਾਂ ਰੈਕੀ ਕੀਤੀ ਅਤੇ ਮਿਤੀ 26-06-2019 ਨੂੰ ਸਵੇਰੇ 08:00 ਵਜੇ ਅਰਸ਼ਦੀਪ ਸਿੰਘ ਉਰਫ ਅਮਨਾ ਅਤੇ ਸੰਦੀਪ ਸਿੰਘ ਉਰਫ ਕਾਲਾ ਦੋਵੇਂ ਜਾਣੇ ਮੋਟਸਾਈਕਲ ਪਰ ਉਸ(ਮੁੱਦਈ) ਨੂੰ ਮਾਰਨ ਦੀ ਨੀਅਤ ਨਾਲ ਖੜ੍ਹੇ ਸਨ।ਜਿਸ ਤੇ ਉਹਨਾਂ ਵਿਰੁੱਧ ਮੁਕੱਦਮਾ ਨੰਬਰ 119 ਮਿਤੀ 28-06-2019 ਅ/ਧ 307/115/120-ਬੀ/506 ਭ/ਦ 25/54/59 ਅਸਲਾ ਐਕਟ ਥਾਣਾ ਸਦਰ ਜਗਰਾਂਉ ਦਰਜ ਰਜਿਸਟਰ ਕੀਤਾ ਗਿਆ।ਦੌਰਾਨੇ ਤਫਤੀਸ਼  ਡੀ. ਐਸ. ਪੀ ਦਿਲਬਾਗ ਸਿੰਘ ਦੇ ਨਿਰਦੇਸ਼ਾਂ ਤੇ ਇੰਸਪੈਕਟਰ ਇਕਬਾਲ ਹੁਸੈਨ, ਇੰਚਾਰਜ ਸੀ.ਆਈ.ਏ ਸਟਾਫ ਜਗਰਾਉ ਦੀ ਨਿਗਰਾਨੀ ਹੇਠ ਏ.ਐਸ.ਆਈ ਜਨਕ ਰਾਜ ਵੱਲੋ ਸਮੇਤ ਪੁਲਿਸ ਪਾਰਟੀ ਦੇ ਅਰਸ਼ਦੀਪ ਸਿੰਘ ਉਰਫ ਅਮਨਾ ਅਤੇ ਸੰਦੀਪ ਸਿੰਘ ਉਰਫ ਕਾਲਾ ਨੂੰ ਸਪੈਲਡਰ ਮੋਟਰਸਾਈਕਲ ਸਮੇਤ ਇੱਕ ਪਿਸਟਲ 12 ਬੋਰ ਅਤੇ 02 ਕਾਰਤੂਸ ਜਿੰਦਾ ਬਰਾਮਦ ਕਰਕੇ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਗ੍ਰਿਫਤਾਰ ਦੋਸ਼ੀਆਂ ਦਾ ਪੁਲਿਸ ਰਿਮਾਂਡ ਹਾਸਿਲ ਕਰਕੇ ਹੋਰ ਪੁੱਛਗਿੱਛ ਕੀਤੀ ਜਾਵੇਗੀ। ਬਾਕੀ ਦੋਸ਼ੀਆਂ ਨੂੰ ਵੀ ਜਲਦੀ ਗ੍ਰਿਫਤਾਰ ਕਰ ਲਿਆ ਜਾਵੇਗਾ।