ਵਿਦੇਸ਼ ਰਹਿੰਦੀ ਲੜਕੀ ਨੇ ਪ੍ਰੇਮ ਜਾਲ ’ਚ ਫਸਾ ਕੇ ਨੌਜਵਾਨ ਠੱਗਿਆ

ਜਗਰਾਉਂ, ਅਗਸਤ 2020 -(ਸੱਤਪਾਲ ਸਿੰਘ ਦੇਹਰਕਾ/ਮਨਜਿੰਦਰ ਗਿੱਲ)- ਪਿੰਡ ਜਗਰਾਉਂ ਪੱਤੀ ਮਲਕ ਦੇ ਵਸਨੀਕ ਨੌਜਵਾਨ ਨੂੰ ਪ੍ਰੇਮ ਜਾਲ’ਚ ਫਸਾ ਕੇ ਵਿਦੇਸ਼ ਰਹਿੰਦੀ ਲੜਕੀ ਨੇ ਵਿਆਹ ਕਰਵਾ ਕੇ 35 ਲੱਖ ਦੀ ਮਾਰੀ ਠੱਗੀ ਦੀ ਪੁਲੀਸ ਅਧਿਕਾਰੀਆਂ ਵੱਲੋਂ ਮੁਕੰਮਲ ਪੜਤਾਲ ਕਰਨ ਉਪਰੰਤ ਲੜਕੀ ਸਮੇਤ ਚਾਰ ਖਿਲਾਫ ਮਾਮਲਾ ਦਰਜ ਕੀਤਾ ਹੈ । ਪੀੜਤ ਨੌਜਵਾਨ ਪ੍ਰਿਤਪਾਲ ਸਿੰਘ ਨੇ ਦੱਸਿਆ ਕਿ ਇੰਟਰਨੈਟ ਰਾਹੀਂ ਉਸਦੀ ਜਸਪ੍ਰੀਤ ਕੌਰ ਵਾਸੀ ਪਿੰਡ ਬੱਧਨੀ ਕਲਾਂ ਨਾਲ ਦੋਸਤੀ ਹੋ ਗਈ। ਫਿਰ ਜਸਪ੍ਰੀਤ ਕੌਰ ਨਾਲ ਉਸਦਾ 14 ਅਗਸਤ 2016 ਨੂੰ ਵਿਆਹ ਹੋਇਆ ਸੀ। ਪ੍ਰਿਤਪਾਲ ਸਿੰਘ ਨੇ ਦੱਸਿਆ ਕਿ ਜਸਪ੍ਰੀਤ ਦੇ ਕਹਿਣ ਤੇ ਵਿਦੇਸ਼ ਭੇਜਣ ਤੇ ਉਸਦੇ ਮਾਪਿਆਂ ਵੱਲੋਂ ਖਰਚ ਕੀਤੇ 10 ਲੱਖ ਰੁਪਏ ਵੀ ਉਨਾਂ ਨੇ ਦਿੱਤੇ। ਉਸ ਸਮੇਂ ਜਸਪ੍ਰੀਤ ਕੌਰ ਅਮਰੀਕਾ ’ਚ ਸੀ, ਪਰ ਸਟੋਰ ’ਚ ਚੋਰੀ ਹੋਣ ਕਾਰਨ ਉਸ ਨੂੰ ਅਮਰੀਕਾ ਛੱਡਣਾ ਪਿਆ । ਉਕਤ ਮਾਮਲਾ ਅਦਾਲਤ ’ਚ ਚਲਾ ਗਿਆ। ਜਸਪ੍ਰੀਤ ਨੂੰ ਪ੍ਰਿਤਪਾਲ ਦੇ ਪਰਿਵਾਰ ਨੇ ਫਿਰ 17 ਲੱਖ ਰੁਪਏ ਖਰਚ ਕਰਕੇ ਕੈਨੇਡਾ ਭੇਜਿਆ । ਜਸਪ੍ਰੀਤ, ਪ੍ਰਿਤਪਾਲ ਨੂੰ ਕਨੇਡਾ ਲੈ ਜਾਣ ਤੋਂ ਆਨਾਕਾਨੀ ਕਰਨ ਲੱਗੀ ਤਾਂ ਉਸਨੇ ਅਮਰੀਕਾ ਤੋਂ ਆਨਲਾਈਨ ਉਸਦੇ ਉਪਰ ਲੱਗੇ ਦੋਸ਼ਾਂ ਦੇ ਦਸਤਾਵੇਜ਼ ਮੰਗਵਾ ਲਏ। ਇਸੇ ਸਮੇਂ ਦੌਰਾਨ ਹੀ ਜਸਪ੍ਰੀਤ ਕੌਰ ਨੇ ਮਾਪਿਆਂ ਦੀ ਮਿਲੀਭੁਗਤ ਨਾਲ ਪ੍ਰਿਤਪਾਲ ਨੂੰ ਧਮਕੀਆਂ ਦੇਣ ਦੇ ਨਾਲ-ਨਾਲ ਮੋਗਾ ਪੁਲੀਸ ਕੋਲ ਸ਼ਿਕਾਇਤ ਕਰ ਦਿੱਤੀ। ਸਾਰੇ ਦਸਤਾਵੇਜ਼ ਇਕੱਤਰ ਕਰਕੇ ਪ੍ਰਿਤਪਾਲ ਨੇ ਐਸਐਸਪੀ ਜਗਰਾਉਂ ਨੂੰ ਸ਼ਿਕਾਇਤ ਕੀਤੀ। ਪੁਲੀਸ ਨੇ ਜਸਪ੍ਰੀਤ ਕੌਰ, ਉਸਦੀ ਮਾਤਾ ਸੁਖਜੀਤ ਕੌਰ, ਨੰਬਰਦਾਰ ਜਗਮੋਹਨ ਸਿੰਘ ਅਤੇ ਉਸਦੇ ਭਰਾ ਗੁਰਸੇਵਕ ਸਿੰਘ ਖਿਲਾਫ ਮਾਮਲਾ ਦਰਜ ਕਰ ਅਗਲੇਰੀ ਕਾਰਵਾਈ ਅਰੰਭ ਕਰ ਦਿੱਤੀ ਹੈ ।