You are here
ਸਲੇਮਪੁਰੀ ਦੀ ਚੂੰਢੀ -
ਉਪਮਾ !
ਹੇ ਗੁਰੂ ਗੋਬਿੰਦ ਸਿੰਘ !
ਤੇਰੀਆਂ ਲਾਸਾਨੀ ਕੁਰਬਾਨੀਆਂ
ਦੀ ਉਪਮਾ ਲਈ
ਸ਼ਬਦ ਕਿੱਥੋਂ ਲੱਭ ਲਿਆਵਾਂ?
ਸਿਆਹੀ ਕਿਹੜੇ ਦੇਸ਼ੋਂ ਮੰਗਵਾਵਾਂ?
ਕਿਥੋਂ ਕਾਗਜ ਢੂੰਡ ਲਿਆਵਾਂ?
ਮਜ਼ਲੂਮਾਂ ਲਈ
ਤੂੰ ਪਿਤਾ ਵਾਰਿਆ!
ਪੁੱਤ ਵਾਰੇ!
ਤੂੰ ਪਰਿਵਾਰ ਵਾਰਿਆ!
ਤੂੰ ਸਰਬੰਸ ਵਾਰਿਆ!
ਸੱਭ ਕੁੱਝ ਵਾਰਿਆ!
ਤੂੰ ਸੱਭ ਕੁੱਝ ਲੁਟਾਇਆ !
ਸੱਭ ਕੁੱਝ ਗੁਆਇਆ!
ਤੂੰ ਗਿੱਦੜਾਂ ਤੋਂ ਸ਼ੇਰ ਮਰਵਾਏ!
ਤੂੰ ਚਿੜੀਆਂ ਤੋਂ ਬਾਜ ਬਣਾਏ!
ਤੂੰ ਕਦੀ 'ਸੀ' ਨਾ ਕੀਤੀ,
ਤੂੰ ਆਪਾ ਵਾਰਿਆ!
ਤੂੰ ਜੰਗਲਾਂ 'ਚ
'ਕੱਲਾ ਘੁੰਮਿਆ ,
ਤੂੰ ਫਿਰ ਵੀ ਨਾ ਹਾਰਿਆ!
ਹੇ! ਦਸਮ ਪਿਤਾ
ਤੇਰੀਆਂ ਕੁਰਬਾਨੀਆਂ
ਦੀ ਉਪਮਾ ਕਿਵੇਂ ਕਰਾਂ?
ਕਾਗਜ਼ ਕਿਥੋਂ ਢੂੰਡ ਲਿਆਵਾਂ?
ਸਿਆਹੀ ਕਿਥੋਂ ਦੱਸ ਮੰਗਵਾਵਾਂ?
ਸ਼ਬਦ ਕਿੱਥੋਂ ਲੱਭ ਲਿਆਵਾਂ?
ਸਾਰੀ ਧਰਤੀ ਕਾਗਜ ਬਣਾਵਾਂ,
ਸੰਸਾਰ ਚੋਂ
ਸਿਆਹੀ ਮੰਗ ਲਿਆਵਾਂ,
ਲਾਇਬ੍ਰੇਰੀਆਂ 'ਚੋਂ ਸ਼ਬਦ ਲਿਆਵਾਂ ,
ਤਾਂ ਵੀ ਉਪਮਾ
ਕਰ ਨਾ ਪਾਵਾਂ!
ਵਾਹ ਤੂੰ!
ਵਾਹ ਤੇਰੀਆਂ ਕੁਰਬਾਨੀਆਂ!!
ਤੇਰੇ ਜਿਹਾ
ਕੋਈ ਹੋਰ ਨਾ ਡਿੱਠਾ!
ਤੂੰ ਹਰ ਭਾਣੇ ਨੂੰ,
ਮੰਨਿਆ ਮਿੱਠਾ!!
ਤੇਰੇ ਜਿਹਾ,
ਕੋਈ ਹੋਰ ਨਾ ਡਿੱਠਾ!!!
- ਸੁਖਦੇਵ ਸਲੇਮਪੁਰੀ
