ਅੱਜ ਤੁਹਾਨੂੰ ਗੁਰਦੁਆਰਾ ਜੋਤੀਸਰ ਦੇ ਦਰਸ਼ਨ ਕਰਵਾਉਦੇ ਹਾਂ । ਤੇ ਗੁਰਦੁਆਰਾ ਸਾਹਿਬ ਦੇ ਇਤਿਹਾਸ ਤੇ ਚਾਨਣਾ ਪਾਉਂਦੇ ਹਾਂ।
ਇਤਿਹਾਸ - ਸਰਬ ਸਾਂਝਾ ਧਰਮ ਵਿੱਚ ਧਰਮ ਸਿੱਖ ਧਰਮ ਹੈ।ਦਸ ਗੁਰੂ ਜਿਥੇ - ਜਿਥੇ ਵੀ ਗਏ, ਉਹ ਪੂਜਣ ਯੋਗ ਅਸਥਾਨ ਬਣ ਗਏ। ਲੋਕਾਂ ਦੇ ਕਲਿਆਣ ਲਈ ਜਦੋਂ ਮੀਰੀ ਪੀਰੀ ਦੇ ਮਾਲਕ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ 1616ਈ. ਵਿੱਚ ਗੁਰਦੁਆਰਾ ਨਾਨਕਿਆਣਾ ਸਾਹਿਬ, ਸੰਗਰੂਰ ਤੋਂ ਚਾਲੇ ਪਾ ਕੇ ਪਿੰਡ ਖੁਰਾਣੇ ਪਹੁੰਚੇ ਤਾਂ ਅਗਿਆਨੀ ਲੋਕਾਂ ਨੇ ਜਲ - ਪਾਣੀ ਤਾਂ ਕੀ ਪੁੱਛਣਾ ਸੀ, ਉਹਨਾਂ ਨੂੰ ਪਹਿਚਾਣਿਆਂ ਹੀ ਨਾ, ਨਾ ਕੋਈ ਅਦਬ ਨਾ ਸਤਿਕਾਰ। ਅਜਿਹੇ ਲੋਕਾਂ ਬਾਰੇ ਹੀ ਤਾਂ ਗੁਰੂ ਨਾਨਕ ਦੇਵ ਜੀ ਨੇ ਕਿਹਾ ਸੀ ਕਿ ਵਸਦੇ ਰਹੋ। ਗੁਰੂ ਜੀ ਨੇ ਅੱਗੇ ਚਾਲੇ ਪਾ ਦਿੱਤੇ।ਧਰਮ ਦਾ ਕਦੇ ਬੀਜ ਨਾਸ ਨਹੀਂ ਹੁੰਦਾ। ਜਦੋਂ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਪਿੰਡ ਖੁਰਾਣੇ ਪਹੁੰਚੇ ਤਾਂ ਪਿੰਡ ਦੇ ਲੋਕਾਂ ਨੇ ਗੁਰੂ ਜੀ ਨੂੰ ਜਲ ਪਾਣੀ ਵੀ ਨਾ ਪੁੱਛਿਆ ਤਾਂ ਗੁਰੂ ਜੀ ਨੇ ਖੇਤਾਂ ਵੱਲ ਚਾਲੇ ਪਾ ਦਿੱਤੇ ਜਿਥੇ ਅੱਜਕਲ੍ਹ ਪੁਰਾਤਨ ਬੇਰੀ ਮੋਜੂਦ ਹੈ। ਇਸ ਬੇਰੀ ਥੱਲੇ ਗੁਰੂ ਜੀ ਬੈਠ ਗਏ, ਤਾਂ ਇੱਕ ਸਿਆਣੀ ਮਾਈ ਕਰਮੋਂ ਨੇ ਸੋਚਿਆ ਕਿ ਇਹ ਪੂਰਨ ਮਹਾਂਪੁਰਸ਼ ਜਾਪਦੇ ਹਨ। ਤਾਂ ਮਾਈ ਕਰਮੋਂ ਦੁੱਧ ਦੀ ਤੋੜੀ ਲੈ ਕੇ ਆਈ ਤੇ ਗੁਰੂ ਜੀ ਨੂੰ ਬੇਰੀ ਹੇਠ ਸਿੱਖਾਂ ਸਮੇਤ ਦੁੱਧ ਛਕਾਇਆ।
ਗੁਰੂ ਜੀ ਨੇ ਖੁਸ਼ ਹੋ ਕੇ ਦੁੱਧ ਤੇ ਪੁੱਤ ਦਾ ਵਰ ਦਿੱਤਾ ਅਤੇ ਬਚਨ ਕਰੇ ਕਿ ਜੋ ਵੀ ਮਨੁੱਖ ਸ਼ਰਧਾ ਨਾਲ ਇਸ ਅਸਥਾਨ ਤੇ ਅਰਦਾਸ ਕਰਵਾਏਗਾ ਤਾਂ ਉਸ ਦੀਆਂ ਮਨੋਭਾਵਨਾਵਾਂ ਪੁਰੀਆ ਹੋਣਗੀਆਂ । " ਇਹ ਬੇਰੀ ਅੱਜ ਵੀ ਇਸ ਅਸਥਾਨ ਤੇ ਮੋਜੂਦ ਹੈ। ਸਿੱਖੀ ਸਿਧਾਂਤਾਂ ਦੀ ਪਾਲਣਾ ਕਰਨ ਵਾਲੇ ਬਾਬਾ ਕਿ੍ਰਪਾਲ ਸਿੰਘ ਜੀ ਦੀ ਕਾਰ ਸੇਵਾ ਵਾਲਿਆਂ ਨੇ ਇਸ ਗੁਰਦੁਆਰੇ ਦੀ ਸਾਂਭ ਸੰਭਾਲ,ਸਿੱਖ ਧਰਮ ਦੇ ਹਿੱਤ ਤਰੱਕੀ ਦੇ ਰਾਹ ਪਾਇਆ ਹੋਇਆ ਹੈ।
ਜਾਪ ਕਰਨ ਦੀਆਂ ਤਰੀਕਾਂ - ਇਥੇ ਮਾਰਚ ਦੇ ਮਹੀਨੇ 14 ਮਾਰਚ ਤੋਂ ਹੀ ਸ੍ਰੀ ਆਖੰਡ ਸਾਹਿਬ ਸ਼ੁਰੂ ਹੁੰਦੇ ਹਨ। ਇਥੇ ਲਗਾਤਾਰ 96 ਘੰਟੇ ਜਾਪ ਚਲਦਾ ਰਹਿੰਦਾ ਹੈ। ਨਾਮ ਜਾਪ ਵਿੱਚ ਨੇੜੇ ਦੇ ਬਹੁਤ ਸਾਰੇ ਪਿੰਡ ਸ਼ਾਮਿਲ ਹੁੰਦੇ ਹਨ। ਹਰ ਇੱਕ ਪਿੰਡ ਨੇ ਦੋ ਘੰਟੇ ਦੀ ਵਾਰੀ ਬੰਨੀ ਹੁੰਦੀ ਹੈ । ਨਾਮ ਜਪਨ ਲਈ ਲਗਾਤਾਰ
ਸੰਗਤਾਂ ਆਉਂਦੀਆਂ ਰਹਿੰਦੀਆਂ ਹਨ । ਰੋਜ਼ਾਨਾ ਸੰਗਤਾ ਲਈ ਚਾਹ ਦਾ ਲੰਗਰ , ਗੰਨੇ ਦੇ ਰਸ ਆਦਿ ਪ੍ਰਸ਼ਾਦਿਆਂ ਦਾ ਅਟੁੱਟ ਲੰਗਰ ਚਲਦਾ ਰਹਿੰਦਾ ਹੈ। 14 ਮਾਰਚ ਨੂੰ ਦਿਨ ਵੀਰਵਾਰ ਤੋਂ 18 ਮਾਰਚ ਦਿਨ ਸੋਮਵਾਰ ਦਸਵੀਂ ਵਾਲੇ ਦਿਨ ਭੋਗ ਪੈਣਗੇ । ਵੱਧ ਤੋਂ ਵੱਧ ਸੰਗਤਾਂ ਆਉ ਜੀ ਗੁਰਦੁਆਰਾ ਜੋਤੀਸਰ ਸਾਹਿਬ ਦੇ ਦਰਸ਼ਨਾਂ ਪਾਉ ਜੀ
ਨਗਰ ਕੀਰਤਨ - ਬਹੁਤ ਵੱਡਾ ਨਗਰ ਕੀਰਤਨ ਸਜਾਇਆ ਜਾਂਦਾ । ਜਿਸ ਵਿਚ ਖ਼ੱਚਰ ਰੇੜੇ , ਘੋੜੇ ਰੇੜੇ , ਊਠ ਰੇੜੇ , ਸਾਇਕਲ , ਮੋਟਰਸਾਈਕਲ , ਗੱਡੀਆਂ , ਜੀਪਾਂ ਆਦਿ ਰਾਹੀਂ ਸਾਰੀ ਸੰਗਤ ਬੈਠ ਕੇ ਨਗਰ ਕੀਰਤਨ ਵਿੱਚ ਸ਼ਾਮਿਲ ਹੁੰਦੇ ਹਨ। ਜਿਸ ਪਿੰਡ ਵਿੱਚ ਵੀ ਨਗਰ ਕੀਰਤਨ ਲੱਗਦਾ ਹੈ । ਉਥੇ ਪਿੰਡਾਂ ਵੱਲੋਂ ਜਗਾ ਜਗਾ ਤੇ ਗੰਨੇ ਦੇ ਰਸ ਦੀਆਂ ਛਬੀਲਾਂ , ਪਕੋੜਿਆਂ ਦਾ ਲੰਗਰ , ਚਾਹ ਦਾ ਲੰਗਰ ਲਗਾਉਂਦੇ ਰਹਿੰਦੇ ਹਨ ।
ਜੋਤੀਸਰ ਗੁਰਦੁਆਰਾ ਵਿੱਚ ਦਸਵੀਂ ਵਾਲੇ ਦਿਨ ਵੀ ਭਾਰੀ ਇੱਕਠ ਹੁੰਦਾ ਹੈ। ਇਲਾਕੇ ਦੀਆਂ ਸੰਗਤਾਂ ਪੂਰੀ ਸ਼ਰਧਾ ਨਾਲ ਪਹੁੰਚਦੀਆਂ ਹਨ।
ਹਸਪਤਾਲ - ਇਸ ਗੁਰਦੁਆਰੇ ਵਲੋਂ ਜੋਤੀਸਰ ਫਿਜ਼ਿਓਥਰੈਪੀ ਹਸਪਤਾਲ ਡਾ: ਜ਼ਲਾਲਤ ਸਿੰਘ ਦੀ ਰਹਿਨੁਮਾਈ ਹੇਠ ਚਲਾਇਆ ਜਾ ਰਿਹਾ। ਹਸਪਤਾਲ ਵਿੱਚ ਜੋੜਾਂ ਦਾ ਦਰਦ, ਲੱਕ , ਗਰਦਨ ਦੀ ਤਕਲੀਫ , ਅੰਧਰੰਗ , ਮਾਸਪੇਸ਼ੀਆਂ ਦੀ ਖਰਾਬੀ , ਨਾੜੀ ਸੰਚਾਰ , ਦੁਰਘਟਨਾ,'ਚ ਨਕਾਰੇ ਅੰਗਾਂ ਨੂੰ ਮੂਵਮੈਟ ਵਿਚ ਲਿਆਉਣਾ, ਸਰਵਾਈਕਲ, ਰੀੜ ਦੀ ਹੱਡੀ ਆਦਿ ਤਕਲੀਫਾਂ ਦਾ ਮਸ਼ੀਨਾਂ ਨਾਲ ਮੁਫ਼ਤ ਇਲਾਜ ਕੀਤਾ ਜਾਂਦਾ ਹੈ। ਮਰੀਜ਼ ਸ਼ਰਧਾ ਨਾਲ ਦਾਨ ਦੇ ਜਾਂਦੇ ਹਨ। ਇੱਥੇ ਇੱਕ ਤਿੰਨ ਮੰਜ਼ਲੀ ਸਰਾਂ ਵੀ ਬਣਾਈ ਗਈ ਹੈ। ਜਿਸ ਵਿੱਚ ਅਧੁਨਿਕ ਸ਼ਹਿਰੀ ਜੀਵਨ ਦੀਆਂ ਸਹੂਲਤਾਂ ਪ੍ਰਦਾਨ ਕੀਤੀਆਂ ਗਈਆਂ ਹਨ। ਏਥੇ ਬਾਹਰੋਂ ਆਈ ਸੰਗਤ ਨੂੰ ਠਹਿਰਾਇਆ ਜਾਂਦਾ ਹੈ। ਸਵੇਰੇ ਸ਼ਾਮ ਲੰਗਰ ਅਥਾਅ ਵਰਤਦਾ ਹੈ। ਹਸਪਤਾਲ ਦੇ ਮਰੀਜ਼ ਵੀ ਇਸ ਲੰਗਰ ਵਿੱਚ ਪ੍ਰਸ਼ਾਦਾ ਛੱਕਦੇ ਹਨ।
ਅਸਥਾਨ - ਇਹ ਗੁਰਦੁਆਰਾ ਸੰਗਰੂਰ ਤੋਂ ਪਟਿਆਲਾ ਰੋਡ ਤੋਂ ਇੱਕ ਕਿਲੋਮੀਟਰ ਸੂਏ ਦੇ ਨਾਲ ਦੇ ਪਿੰਡ ਖੁਰਾਣੇ ਦੀ ਜੂਹ ਵਿੱਚ ਹੈ। ਇਹ ਸੰਗਰੂਰ ਤੋਂ ਅੱਠ ਕਿਲੋਮੀਟਰ ਤੇ ਭਵਾਨੀਗੜ੍ਹ ਤੋਂ 12 ਕਿਲੋਮੀਟਰ ਦੀ ਦੂਰੀ ਤੇ ਹੈ। ਪਿੰਡ ਭਿੰਡਰਾਂ ਦੇ ਅੱਡੇ ਨੂੰ ਜਦੋਂ ਅਸੀਂ ਪਾਰ ਕਰਕੇ ਪਟਿਆਲੇ ਵੱਲ ਨੂੰ ਜਾਂਦੇ ਹਾਂ ਤਾਂ ਸੱਜੇ ਪਾਸੇ ਦੂਰੋਂ ਹੀ ਗੁਰਦੁਆਰਾ ਦਿਸ ਜਾਂਦਾ ਹੈ।
ਵਾਹਿਗੁਰੂ ਜੀ ਕਾ ਖਾਲਸਾ ਵਾਹਿਗੁਰੂ ਜੀ ਕੀ ਫਤਿਹ
- ਗਗਨਪ੍ਰੀਤ ਸੱਪਲ ਪਿੰਡ ਘਾਬਦਾਂ ਜ਼ਿਲਾ ਸੰਗਰੂਰ
