ਹੱਕੀ ਮੰਗਾਂ ਦਾ ਦਿੱਤਾ ਭਰਵਾਂ ਸਮਰਥਨ, ਮੰਡ ‘ਤੇ ਵਰੇ, ਕਿਹਾ-ਬੰਦੀ ਸਿੰਘ ਰਿਹਾ ਕਰੋ, ਹਵਾਈ ਅੱਡੇ ਹਲਵਾਰਾ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਜੀ ਦੇ ਨਾਮ ਤੇ ਰੱਖੋ
ਮੁੱਲਾਂਪੁਰ ਦਾਖਾ 31 ਮਾਰਚ (ਸਤਵਿੰਦਰ ਸਿੰਘ ਗਿੱਲ)-ਬੰਦੀ ਸਿੰਘਾਂ ਦੀ ਰਿਹਾਈ ਸਮੇਤ ਪੰਜਾਬ ਤੇ ਪੰਥਕ ਮੁੱਦਿਆਂ ਦੇ ਸਦੀਵੀ ਹੱਲ ਲਈ ਸ਼ਾਸ਼ਨ/ਪ੍ਰਸ਼ਾਸ਼ਨ ਦਾ ਧਿਆਨ ਦਿਵਾਉਣ ਲਈ 39 ਦਿਨ ਤੋਂ ਭੁੱਖ ਹੜਤਾਲ ਲਈ ਬੈਠੇ ਬਲਦੇਵ ਸਿੰਘ ਸਰਾਭਾ ‘ਦੇਵ ਸਰਾਭਾ’ ਦੇ ਸਮਰਥਨ ‘ਚ ਸਮਾਜਿਕ ਚੇਤਨਾ ਲਈ ਕਾਰਜ਼ਸ਼ੀਲ ਚੌਧਰੀ ਕ੍ਰਿਸ਼ਨ ਲਾਲ ‘ਮਲੋਟ ਸਾਬਕਾ ਐਸ.ਐਚ.ਓ.’ ਵਿਸ਼ੇਸ਼ ਤੌਰ ‘ਤੇ ਪੁੱਜੇ। ਉਨ੍ਹਾਂ ‘ਦੇਵ ਸਰਾਭਾ’ ਨੂੰ ਥਾਪੜਾ ਦਿੰਦਿਆਂ ਸਮਾਜ ਲਈ ਕਾਰਜ਼ਸ਼ੀਲ ਰਹਿਣ ਦਾ ਸਮਰਥਨ ਦਿੰਦਿਆਂ ਬੇ-ਪ੍ਰਵਾਹੀ, ਬੇ-ਲਾਗ, ਬੇ-ਖੌਫ ੳੇ ਉਸਾਰੂ ਸੋਚ ਨਾਲ ਸਮਾਜਿਕ ਚੇਤਨਾ ਅਤੇ ਸਮਾਜਿਕ ਹੱਕਾਂ ਲਈ ਜੂਝਦੇ ਰਹਿਣ ਲਈ ਡਟੇ ਰਹਿਣ ਲਈ ਉਤਸ਼ਾਹਿਤ ਕੀਤਾ। ਉਨ੍ਹਾਂ ਸਜਾਵਾਂ ਪੂਰੀਆਂ ਕਰ ਚੁੱਕੇ ਬੰਦੀ ਸਿੰਘਾਂ ਦੀ ਰਿਹਾਈ ਦੀ ਹਮਾਇਤ ਕਰਦਿਆਂ ਦਲੀਲ ਦਿੱਤੀ ਕਿ ਜੇ ਪੁਲਿਸ ਵਿਭਾਗ ‘ਚ ਕਿਸੇ ਕਾਰਣ ਸਜਾਵਾਂ ਭੁਗਤਣ ਵਾਲਿਆਂ ਨੂੰ ਵੱਡੀਆਂ ਸਜਾਵਾਂ ਤੋਂ 6-6, 2-2 ਸਾਲਾਂ ਦੀ ਸਜ਼ਾ ਅਤੇ ਮੁਆਫੀ ਦੇ ਨਾਲ-ਨਾਲ ਗਵਰਨਰ ਸਾਬ੍ਹ ਤੋਂ ਬੰਦ ਖਲਾਸੀ ਕਰਵਾਈ ਜਾ ਸਕਦੀ ਹੈ ਤਾਂ ਬੰਦੀ ਸਿੰਘਾਂ ਲਈ ਕਿਉਂ ਨਹੀਂ ਕੁਝ ਕੀਤਾ ਗਿਆ ਜਾਂ ਕੁਝ ਹੋ ਨਹੀਂ ਸਕਦਾ? ਜਦਕਿ ਇਹ ਤਾਂ ਇਨਸਾਫ ਮੰਗਦੇ ਹਨ। ਉਨ੍ਹਾਂ ਹਲਵਾਰਾ ਸਥਿੱਤ ਉਸਾਰੀ ਅਧੀਨ ਹਵਾਈ ਅੱਡੇ ਦਾ ਨਾਮ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਹਵਾਈ ਅੱਡਾ ਰੱਖਣ ਦੀ ਜੋਰਦਾਰ ਪ੍ਰੋੜਤਾ ਕਰਦਿਆਂ ‘ਮੰਡ’ ਨਾਮਕ ਉਸ ਸ਼ਖਸ਼ ‘ਤੇ ਜੰਮ ਕੇ ਵਰੇ ਜਿਸ ਨੇ ਰਜੀਵ ਗਾਂਧੀ ਦੇ ਨਾਮ ‘ਤੇ ਹਵਾਈ ਅੱਡੇ ਦਾ ਨਾਮ ਰੱਖਣ ਦਾ ਮੁੱਦਾ ਚੁੱਕਿਆ। ਸ਼੍ਰੀ ਚੌਧਰੀ ਨੇ ਪੁੱਛਿਆ ਰਜੀਵ ਗਾਂਧੀ ਦੀ ਪੰਜਾਬ ਵਾਸਤੇ ਕੀ ਘਾਲਣਾ ਜਾਂ ਕੁਰਬਾਨੀ ਹੈ? ਜਦਕਿ ਜਿਸ ਸ਼ਹੀਦ ਕਰਤਾਰ ਸਿੰਘ ਜੀ ਨੇ ਬਾਲ ਉਮਰੇ ਵੱਡੇ ਕਾਰਨਾਮੇ ਵਿਖਾਉਦਿਆਂ ਜੰਗ-ਏ-ਅਜ਼ਾਦੀ ਲਈ ਆਪਾ ਵਾਰਿਆ, ਉਹ ਹੀ ਅਸਲ ‘ਚ ਹੱਕਦਾਰ ਹੈ। ਉਨ੍ਹਾਂ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਨੂੰ ‘ਭਾਰਤ ਰਤਨ’ ਅਵਾਰਡ ਦੇਣ ਦੀ ਮੰਗ ਕਰਦਿਆਂ ਕਿਹਾ ਜੇ ਇਹ ਸਹੀਦ ਨਾ ਹੁੰਦੇ ਤਾਂ ਅਸੀਂ ਅਜਾਦ ਨਾ ਹੁੰਦੇ, ਅਸੀਂ ਗੋਰਿਆਂ ਦੇ ਅਧੀਨ ਹੁੰਦੇ, ਲਗਾਨ ਵੀ ਦੇਣਾ ਸੀ, ਹੀਣਤਾ ਭਰਿਆ ਜੀਵਨ ਵੀ ਜਿਉਣਾ ਸੀ। ਸ਼ਹੀਦਾਂ ਨੇ ਸਾਨੂੰ ਗੁਲਾਮੀ ਤੋਂ ਛੁਟਕਾਰਾ ਦਵਾਇਆ।
ਸ਼੍ਰੀ ਚੌਧਰੀ ਨੇ ਮਾਨਵਤਾ ਦੇ ਰਾਹ ਦਸੇਰਾ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਨਾਲ ਜੁੜੇ ਮਸਲੇ ਦੀ ਗੱਲ ਕਰਦਿਆਂ ਦੋਸ਼ੀਆਂ ਨੂੰ ਸਖਤ ਤੋਂ ਸਖਤ ਸਜਾਵਾਂ ਦੇਣ ਦੀ ਮੰਗ ਕੀਤੀ।ਉਨ੍ਹਾਂ ਸਵਾਲ ਕਰਦਿਆਂ ਪੁੱਛਿਆ ਜਿਨ੍ਹਾਂ ਲੀਡਰਾਂ ਦੇ ਗਲ਼ਾਂ ‘ਚ ਹਾਰ ਪਾਉਦੇ ਹੋਂ ਉਨ੍ਹਾਂ ਦੀ ਪੰਜਾਬ ਨੂੰ ਕੀ ਦੇਣ ਹੈ? ਇਨ੍ਹਾਂ ਲੁਟਿਆ-ਕੁੱਟਿਆ ਹੀ ਹੈ। ਉਨ੍ਹਾਂ ਦੇਵ ਸਰਾਭਾ ਨੂੰ ਹੌਸਲਾ ਦਿੰਦਿਆਂ ਕਿਹਾ ਵੱਡਾ ਸਮਾਗਮ ਕਰੋ ਤਾਂ ਬਾਈ ਲੱਖਾ ਸਧਾਣਾ, ਸੁਖਵਿੰਦਰ ਹਲਵਾਰਾ, ਸੁੱਖ ਜਗਰਾਓ, ਜਗਦੀਪ ਰੰਧਾਵੇ ਵਰਗੇ ਵੀਰਾਂ ਨੂੰ ਵੀ ਲਿਆਵਾਂਗੇ।ਸਾਬਕਾ ਸਰਪੰਚ ਜਗਤਾਰ ਸਿੰਘ ਸਰਾਭਾ ,ਸ੍ਰੀ ਚੌਧਰੀ ਨਾਲ ਚੌਧਰੀ ਦਵਿੰਦਰ ਨੇ ਵੀ 39 ਵੇਂ ਦਿਨ ਦੀ ਭੁੱਖ ਹੜਤਾਲ ‘ਚ ਹਾਜ਼ਰੀ ਭਰੀ।
