ਦੇਖ ਸਿਆਸਤ ਦੇ ਮੱਘਦੇ ਅਖਾੜੇ ✍️ ਸਲੇਮਪੁਰੀ ਦੀ ਚੂੰਢੀ

ਜਿਉਂ ਜਿਉਂ ਚੋਣਾਂ ਨੇੜੇ ਆਵਣ,
ਤਿਉਂ ਤਿਉਂ ਸਿਆਸਤ ਰਹੀ ਗਰਮਾਅ!
ਕੋਈ ਕਹਿੰਦਾ ਏਧਰ ਆ,
ਕੋਈ ਕਹਿੰਦਾ ਓਧਰ ਜਾਹ!
ਕੋਈ ਕਹਿੰਦਾ ਵਾਲ ਕਟਾ,
ਕੋਈ ਕਹਿੰਦਾ ਵਾਲ ਵਧਾ!
ਦੇਖ ਸਿਆਸਤ ਦੇ ਮੱਘਦੇ ਅਖਾੜੇ,
ਚੋਣਾਂ ਦਾ ਬਸ ਚੜ੍ਹਿਆ ਚਾਅ!
ਦੀਨ ਧਰਮ ਨੂੰ ਪਾਸੇ ਸੁੱਟ ਕੇ ,
ਪੱਗਾਂ ਦੇ ਰਹੇ ਰੰਗ ਬਦਲਾਅ!
ਏਧਰੋੰ ਛਕ ਲਿਆ , ਓਧਰੋਂ ਛੱਕਣਾ,
ਲੋਕਾਂ ਦੀ ਨ੍ਹੀਂ ਕੋਈ ਪ੍ਰਵਾਹ!
'ਅਸ਼ੋਕਾ' ਲੱਗਿਆ ਕਾਰ ਚਾਹੀਦੀ,
ਜਿਹੜਾ ਮਰਜੀ ਦਵੇ ਦਿਵਾ!
ਭਵਿੱਖ ਬਣੂੰ ਤੇਰਾ ਇੰਝ ਸੁਨਹਿਰੀ,
ਦੇਣ 'ਵਿਚੋਲੇ' ਬੈਠ ਸਲਾਹ!
ਲੋਕਾਂ ਤੋਂ ਕੀ ਲੈਣਾ ਬੱਲ੍ਹਿਆ,
ਤੂੰ ਮਨ ਆਪਣੇ ਦੀ ਰੀਝ ਪੁਗਾ!
ਕਦੀ ਕੈਪਟਨ ਕੈਪਟਨ ਹੁੰਦੀ ਸੀ,
ਹੁਣ ਨਹੀਂ ਕਰਦਾ ਕੋਈ ਪ੍ਰਵਾਹ !
ਸਟੈਂਡ ਜਿਨ੍ਹਾਂ ਦਾ ਤਕੜਾ ਹੁੰਦਾ,
ਸਦਾ ਉਨ੍ਹਾਂ ਦੀ ਵਾਹ ਬਈ ਵਾਹ!