ਇਸ ਵੇਲੇ ਭਾਰਤ ਬਹੁਤ ਤੇਜ ਰਫਤਾਰ ਨਾਲ ਆਤਮ-ਨਿਰਭਰਤਾ ਵਲ ਵਧ ਰਿਹਾ ਹੈ, ਕਿਉਂਕਿ ਦੇਸ਼ ਵਿਚ ਹੁਣ ਰੋਜ਼ਾਨਾ 2 ਲੱਖ ਪੀ. ਪੀ. ਈ. ਕਿੱਟਾਂ ਅਤੇ 2 ਲੱਖ ਐਨ-95 ਮਾਸਕ ਬਣਕੇ ਤਿਆਰ ਹੋਣ ਲੱਗ ਪਏ ਹਨ। ਸੱਚ-ਮੁੱਚ ਵੱਡੀ ਮਾਤਰਾ ਵਿਚ ਪੀ ਪੀ ਈ ਕਿੱਟਾਂ ਅਤੇ ਮਾਸਕ ਤਿਆਰ ਹੋਣ ਨਾਲ ਜਿੱਥੇ ਭਾਰਤ ਆਤਮ ਨਿਰਭਰ ਬਣ ਰਿਹਾ ਹੈ ਉਥੇ ਦੇਸ਼ ਦੇ ਲੋਕ ਵੀ ਆਤਮ-ਨਿਰਭਰਤਾ ਲਈ ਇਰਾਦੇ ਦੀ ਦ੍ਰਿੜਤਾ ਨਾਲ ਡਿੱਗਦੇ - ਢਹਿੰਦੇ ਆਪਣੀ ਮੰਜ਼ਿਲ ਛੂਹਣ ਵਲ ਵਧਦੇ ਜਾ ਰਹੇ ਹਨ। ਉੰਝ ਪਿਛਲੇ 73 ਸਾਲਾਂ ਤੋਂ ਆਤਮ-ਨਿਰਭਰ ਬਣਨ ਲਈ ਦੇਸ਼ ਦੇ ਜੰਮਦੇ ਬੱਚਿਆਂ ਤੋਂ ਲੈ ਕੇ ਬਜੁਰਗਾਂ ਜਿੰਨਾਂ ਦੇ ਕੰਮ ਕਰਦਿਆਂ ਕਰਦਿਆਂ ਬਾਹਾਂ ਅਤੇ ਲੱਤਾਂ ਦੀਆਂ ਨਾੜੀਆਂ ਫੁੱਲਣ ਲੱਗ ਪਈਆਂ ਹਨ,ਨੂੰ ਕਿਤੇ ਹੁਣ ਜਾ ਕੇ ਮੰਜਿਲ ਦੀ ਪ੍ਰਾਪਤੀ ਹੋਣ ਲੱਗੀ ਹੈ। ਬੱਚੇ, ਬੁੱਢੇ, ਜਵਾਨ ਮਰਦ, ਔਰਤਾਂ, ਬਿਮਾਰ ਅਤੇ ਗਰਭਵਤੀ ਮਾਵਾਂ ਸਮੇਤ ਵੱਡੀ ਗਿਣਤੀ ਵਿਚ ਲੋਕ ਆਤਮ ਨਿਰਭਰ ਹੋ ਕੇ ਭੁੱਖ ਨਾਲ ਲੜਦਿਆਂ ਨੰਗੇ ਪੈਰੀਂ ਆਪਣੀ ਮੰਜਿਲ ਤੱਕ ਪਹੁੰਚਣ ਲਈ ਜਹਿਦੋ-ਜਹਿਦ ਕਰ ਰਹੇ ਹਨ।
ਵਾਹ! ਆਤਮ-ਨਿਰਭਰਤਾ ਲਈ ਤੁਰਦਿਆਂ ਤੁਰਦਿਆਂ ਮਜਦੂਰਾਂ ਅਤੇ ਆਮ ਲੋਕਾਂ ਦੇ ਪੈਰਾਂ ਹੇਠੋਂ ਚਮੜੀ ਉਧੜ ਗਈ ਹੈ, ਟਾਕੀਆਂ ਲੱਥਣ ਨਾਲ ਡੂੰਘੇ ਜਖਮ ਹੋਣ ਕਰਕੇ ਖੂਨ ਚੋਣ ਲੱਗ ਪਿਆ ਹੈ!
-ਸੁਖਦੇਵ ਸਲੇਮਪੁਰੀ
09780620233
19 ਮਈ, 2020
