ਲੁਧਿਆਣਾ, 17 ਫਰਵਰੀ (ਟੀ. ਕੇ. ) ਭਾਰਤੀ ਕਮਿਊਨਿਸਟ ਪਾਰਟੀ ਦੇ ਰਾਸ਼ਟਰੀ ਸਕੱਤਰੇਤ ਨੇ ਬਿਆਨ ਜਾਰੀ ਕਰਕੇ ਕਿਹਾ ਹੈ ਕਿ ਭਾਰਤੀ ਕਮਿਊਨਿਸਟ ਪਾਰਟੀ ਭਾਜਪਾ ਸਰਕਾਰ ਦੁਆਰਾ ਲਿਆਂਦੀ ਗਈ ਇਲੈਕਟੋਰਲ ਬਾਂਡ ਸਕੀਮ ਦੇ ਵਿਰੋਧ ਵਿੱਚ ਹੈ! ਸੀ.ਪੀ.ਆਈ. ਆਜ਼ਾਦ ਅਤੇ ਨਿਰਪੱਖ ਚੋਣਾਂ ਅਤੇ ਚੋਣ ਫੰਡਿੰਗ ਦੀ ਪਾਰਦਰਸ਼ੀ ਪ੍ਰਕਿਰਿਆ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹੈ, ਜਿਸ ਨਾਲ ਸਾਰੀਆਂ ਸਿਆਸੀ ਪਾਰਟੀਆਂ ਨੂੰ ਬਰਾਬਰੀ ਦਾ ਮੌਕਾ ਮਿਲਣਾ ਚਾਹੀਦਾ ਹੈ।
ਗੈਰ-ਪਾਰਦਰਸ਼ੀ ਇਲੈਕਟੋਰਲ ਬਾਂਡ ਸਕੀਮ,ਜਿਸ ਨੂੰ ਸੁਪਰੀਮ ਕੋਰਟ ਨੇ ਗੈਰ-ਸੰਵਿਧਾਨਕ ਕਰਾਰ ਦਿੱਤਾ ਹੈ, ਦੇ ਸਿਧਾਂਤਕ ਵਿਰੋਧ ਦੇ ਕਾਰਨ, ਪਾਰਟੀ ਨੇ ਕਦੇ ਵੀ ਕਿਸੇ ਤੋਂ ਕੋਈ ਚੋਣ ਬਾਂਡ ਨਹੀਂ ਲਿਆ ।
ਸੀਪੀਆਈ ਕਾਮਰੇਡ ਇੰਦਰਜੀਤ ਗੁਪਤਾ ਕਮੇਟੀ ਦੁਆਰਾ ਸਿਫ਼ਾਰਸ਼ ਕੀਤੇ ਅਨੁਸਾਰ ਚੋਣਾਂ ਲਈ ਰਾਜ ਫੰਡਿੰਗ ਸਮੇਤ ਵਿਆਪਕ ਚੋਣ ਸੁਧਾਰਾਂ ਲਈ ਵਚਨਬੱਧ ਹੈ।
ਸੀਪੀਆਈ ਨੇ ਇਸ ਸਬੰਧ ਵਿੱਚ 4 ਨਵੰਬਰ, 2023 ਨੂੰ ਭਾਰਤ ਦੇ ਚੋਣ ਕਮਿਸ਼ਨ ਦੇ ਚੋਣ ਖਰਚ ਡਿਵੀਜ਼ਨ ਨੂੰ ਖੁਦ ਸੂਚਿਤ ਕੀਤਾ ਹੈ ਕਿ ਸੀਪੀਆਈ ਨੇ ਕਦੇ ਵੀ ਕਿਸੇ ਤੋਂ ਕੋਈ ਚੋਣ ਬਾਂਡ ਨਹੀਂ ਲਿਆ ਹੈ।
