ਖੰਜਰ ਬਣਕੇ ਖੁੱਭੇਗਾ ✍️ ਸਲੇਮਪੁਰੀ ਦੀ ਚੂੰਢੀ

ਖੰਜਰ ਬਣਕੇ ਖੁੱਭੇਗਾ
- ਸਿੰਘੂ ਬਾਰਡਰ 'ਤੇ
ਮੇਰੇ ਵੱਢੇ ਹੱਥ
ਦੀਆਂ ਹੱਡੀਆਂ
ਬੰਦੂਕਾਂ ਬਣਕੇ
ਬੇਈਮਾਨਾਂ ਦੀਆਂ ਛਾਤੀਆਂ
ਵਿਚੋਂ ਆਰ-ਪਾਰ
ਹੋਣਗੀਆਂ !
ਮੇਰੇ ਵੱਢੇ
ਪੈਰ ਦੀਆਂ ਹੱਡੀਆਂ
ਤਿੱਖੇ ਸੂਏ ਬਣਕੇ
ਪੈਰਾਂ ਵਿਚ ਚੁੱਭਣਗੀਆ!
ਲਹੂ-ਲੁਹਾਣ ਕਰਨਗੀਆਂ !!
ਤੁਰਨ ਜੋਗਾ ਨਹੀਂ ਛੱਡਣਗੀਆਂ!!!
ਨਿਹੱਥੇ ਦਾ
ਡੁੱਲ੍ਹਿਆ ਖੂਨ
ਗੂਹੜੀ ਨੀੰਦੇ ਸੁੱਤਿਆਂ ਨੂੰ
ਹਲੂਣਾ ਦੇਵੇਗਾ,
ਕਿ -
ਜਾਗੋ! ਜਾਗੋ!!
ਨਹੀਂ ਤਾਂ
ਮੇਰੇ ਵਾਂਗੂੰ
ਕਈ ਬੇਦੋਸ਼ੇ ਬਲੀ ਚੜ੍ਹਨਗੇ!
ਮੇਰੀ ਪਿੱਠ ਵਿਚ
ਨਸ਼ੇ ਦਾ ਟੀਕਾ ਖੋਭਣ
ਵਾਲਿਆਂ ਦੇ
'ਭਵਿੱਖ ਦੇ ਢਿੱਡ' ਵਿਚ
ਨਸ਼ੇ ਦਾ ਟੀਕਾ
ਖੰਜਰ ਬਣਕੇ ਖੁੱਭੇਗਾ !
ਮੇਰੀਆਂ ਚੀਕਾਂ
ਬੇਈਮਾਨਾਂ ਦੀਆਂ
ਕਰਤੂਤਾਂ ਨੂੰ
ਉਜਾਗਰ ਕਰਦੀਆਂ
ਨੀਂਦ ਉਡਾ ਦੇਣਗੀਆਂ !
ਬੈਰੀਗੇਟ 'ਤੇ
ਲਟਕਦੀ ਲਾਸ਼
'ਮਾਨਵਤਾ' ਦਾ ਢੰਡੋਰਾ
ਪਿੱਟਣ ਵਾਲਿਆਂ ਦੇ
ਮੂੰਹ 'ਤੇ
ਫਿਟਕਾਰਾਂ ਪਾਉਂਦੀ
ਇਤਿਹਾਸ ਦੇ ਪੰਨੇ ਬਣਕੇ
ਹਮੇਸ਼ਾ ਦੰਦ ਚੜ੍ਹਾਉਂਦੀ
ਰਹੇਗੀ!
ਸ਼ੁਕਰ ਆ!
'ਟ੍ਰਿਬਿਊਨ' ਨੇ ਜਲਦੀ
ਸੱਚ ਦੀਆਂ
ਪਰਤਾਂ ਖੋਲ੍ਹ ਕੇ
ਰੱਖ ਦਿੱਤੀਆਂ ,
ਨਹੀਂ ਤਾਂ
ਮੇਰੇ 'ਤੇ ਇਲਜ਼ਾਮ
ਦੀ ਪੱਕੀ ਮੋਹਰ
ਲੱਗ ਜਾਣੀ ਸੀ!
ਤੇ
'ਵਿਹੜੇ ਵਾਲਿਆਂ'
ਦਾ ਜੀਣਾ ਦੁੱਭਰ
ਕਰ ਦੇਣਾ ਸੀ!
ਕਿਉਂਕਿ -
ਜਾਤ ਦੇ ਹੰਕਾਰੀ ਤਾਂ
ਮਿਹਨਤਾਂ ਦਾ ਮੁੱਲ
ਪਾਉਣ ਦੀ ਮੰਗ
ਕਰਨ 'ਤੇ
ਪਹਿਲਾਂ ਹੀ
ਵਿਹੜੇ ਵਾਲਿਆਂ ਦਾ
ਬਾਈਕਾਟ ਕਰਦੇ
ਆ ਰਹੇ ਨੇ !
ਸ਼ਾਇਦ ਉਹ
ਬੇ-ਖਬਰ ਨੇ
ਕਿ-
'ਗੁਰੂ ਗ੍ਰੰਥ ਸਾਹਿਬ ਜੀ' ਦੀ
'ਬੇਅਦਬੀ' ਦੀ ਸ਼ੁਰੂਆਤ ਤਾਂ
ਉਦੋਂ ਤੋਂ
ਹੁੰਦੀ ਆ ਰਹੀ ਆ
ਜਦੋਂ ਤੋਂ
'ਸੁੱਚਮਤਾ ਤੇ ਉੱਚਮਤਾ'
ਦਾ ਸਰਟੀਫਿਕੇਟ
ਲੈਣ ਲਈ
ਪਿੰਡਾਂ ਵਿੱਚ
ਚਾਰ, ਚਾਰ
ਗੁਰਦੁਆਰਿਆਂ ਦੀ
ਉਸਾਰੀ ਸ਼ੁਰੂ ਕੀਤੀ ਸੀ!