ਦੋਸਤੋ ਸੱਚ ਦੱਸਿਓ ਕਿੰਨਾ ਸਮਾਂ ਆਪਣੇ ਆਪ ਨਾਲ ਬਿਤਾਇਆ ਅੱਜ? ਯਕੀਨ ਨਾਲ ਕਹਿ ਸਕਦੀ ਹਾਂ ਕਿ ਘਰੇਲੂ, ਸਮਾਜਿਕ ਤੇ ਕੰਮ ਦੀਆਂ ਜ਼ਿੰਮਵਾਰੀਆਂ ਵਿਚੋਂ ਆਪਣੇ ਆਪ ਲਈ ਸਮਾਂ ਹੀ ਨਹੀਂ ਬਚਿਆ ਹੋਣਾ।ਸਭ ਦਾ ਇਹੀ ਹਾਲ ਹੈ। ਪਰ ਕਿ ਤੁਹਾਨੂੰ ਪਤਾ ਹੈ ਕਿ ਤੁਹਾਡਾ ਅਸਲੀ ਸਾਥੀ ਕੌਣ ਹੈ? ਤੁਹਾਡਾ ਮਨ ਤੇ ਤੁਹਾਡਾ ਸਰੀਰ। ਇਹ ਦੋਵੇਂ ਤੰਦਰੁਸਤ ਤੇ ਆਪਸੀ ਤਾਲਮੇਲ ਵਿੱਚ ਹੋਣ ਤਾਂ ਹੀ ਤੁਸੀਂ ਜਿੰਦਗੀ ਦਾ ਮਜ਼ਾ ਲੈ ਸਕਦੇ ਹੋ।ਸਰੀਰ ਦੀ ਸੁੰਦਰਤਾ ਵੱਲ ਸਭ ਧਿਆਨ ਦਿੰਦੇ ਹਨ ਪਰ ਮਨ ਵੱਲ ਨਹੀਂ। ਮਨ ਦਾ ਤੰਦਰੁਸਤ ਹੋਣਾ ਜ਼ਰੂਰੀ ਹੈ। ਜ਼ਰਾ ਜਿੰਨਾ ਮਾਨਸਿਕ ਤਵਾਜ਼ਨ ਵਿਗੜਿਆ ਤੇ ਤੁਹਾਡੇ ਆਪਣੇ ਵੀ ਤੁਹਾਡੇ ਤੋਂ ਕਿਨਾਰਾ ਕਰਨ ਲੱਗਦੇ ਹਨ।ਅਸੀਂ ਕਾਰ ਲੈਂਦੇ ਹੀ ਉਸਦੀ ਪਹਿਲੀ ਸਰਵਿਸ ਦੀ ਤਾਰੀਕ ਯਾਦ ਕਰ ਲੈਂਦੇ ਹਾਂ। ਫਿਰ ਹਰ ਛੇ ਮਹੀਨੇ ਬਾਅਦ ਪਹਿਲਾਂ ਤੋਂ ਹੀ ਕਹਿਣ ਲੱਗਦੇ ਹਾਂ ਕਿ ਫਲਾਨੇ ਦਿਨ ਕਾਰ ਦੀ ਸਰਵਿਸ ਕਰਵਾਉਣੀ ਹੈ।ਪੈਸੇ ਪਹਿਲਾਂ ਤਿਆਰ ਰੱਖਦੇ ਹਾਂ, ਕੰਮ ਤੋਂ ਛੁੱਟੀ ਲੈਂਦੇ ਹਾਂ ਤੇ ਫਿਰ ਕਾਰ ਦੀ ਸਰਵਿਸ ਕਰਵਾਉਂਦੇ ਹਾਂ। ਕਾਰ ਜਦੋਂ ਮਰਜ਼ੀ ਬਦਲੀ ਵੀ ਜਾ ਸਕਦੀ ਹੈ ਪਰ ਸਰੀਰ ਤੇ ਮਨ ਬਦਲੇ ਨਹੀਂ ਜਾਂਦੇ ਨਾ ਹੀ ਨਵੇਂ ਖਰੀਦੇ ਜਾ ਸਕਦੇ।ਸਰੀਰ ਤੇ ਮਨ ਦਾ ਖਿਆਲ ਵੀ ਇਸੇ ਸ਼ਿੱਦਤ ਨਾਲ ਕਰਨਾ ਚਾਹੀਦਾ ਹੈ।ਆਪਣੇ ਆਪ ਨੂੰ ਸਮਾਂ ਦਿਓ।ਦਿਨ ਵਿਚ ਕੁਝ ਸਮਾਂ ਆਪਣੇ ਆਪ ਬਿਤਾਓ।ਆਪਣੀ ਸਿਹਤ ਦਾ ਖਿਆਲ ਰੱਖੋ। ਸਾਰਾ ਜ਼ੋਰ ਕੱਪੜੇ ਗਹਿਣੇ ਤੇ ਹੋਰ ਦਿਖਾਵੇ ਤੇ ਨਾ ਲਾ ਕੇ ਕੁਝ ਚੰਗਾ ਖਾਓ ਪੀਓ ਵੀ।ਸੋਹਣਾ ਬੰਦਾ ਤਾਂ ਹੀ ਲੱਗਦਾ ਹੈ ਜੇਕਰ ਤੰਦਰੁਸਤ ਹੋਵੇ।ਠੀਕ ਇਸੇ ਤਰ੍ਹਾਂ ਮਨ ਦੀ ਤੰਦਰੁਸਤੀ ਚਿਹਰੇ ਤੇ ਰੌਣਕ ਲਿਆਉਂਦੀ ਹੈ।ਮਨ ਖ਼ੁਸ਼ ਹੋਵੇ ਤਾਂ ਹੀ ਚਿਹਰੇ ਤੇ ਖੁਸ਼ੀ ਆਉਂਦੀ ਹੈ।ਅੰਦਰੂਨੀ ਚਮਕ ਦੀ ਖੁਸ਼ੀ ਹੀ ਹੋਰ ਹੁੰਦੀ ਹੈ। ਦੁਨੀਆਂ ਦਾ ਮਹਿੰਗੇ ਤੋਂ ਮਹਿੰਗਾ ਮੇਕਅੱਪ ਵੀ ਉਸ ਦਾ ਮੁਕਾਬਲਾ ਨਹੀਂ ਕਰ ਸਕਦਾ।ਮਾਨਸਿਕ ਤੌਰ ਤੇ ਤੰਦਰੁਸਤ ਹੋਣਾ ਜ਼ਰੂਰੀ ਹੈ।ਜ਼ਰੂਰੀ ਹੈ ਕਿ ਮਨੁੱਖ ਆਪਣੇ ਆਪ ਨੂੰ ਵੀ ਤਰਜੀਹ ਦੇਵੇ।ਖੁਸ਼ੀ ਕੋਈ ਮਹਿੰਗੀ ਚੀਜ਼ ਨਹੀਂ।ਖੁਸ਼ਗਵਾਰ ਜ਼ਿੰਦਗੀ ਹੈ ਮੰਤਰ ਬਸ ਇਹ ਹੈ ਕਿ ਕਿਸੇ ਤੋਂ ਜਿਆਦਾ ਉਮੀਦ ਨਾ ਰੱਖੋ, ਆਪਣੀਆਂ ਜਰੂਰਤਾਂ ਵਿੱਤ ਮੁਤਾਬਿਕ ਰੱਖੋ। ਆਪਣੇ ਆਪ ਲਈ ਕਦੀ ਛੁੱਟੀ ਲਓ। ਆਪਣੀ ਖੁਸ਼ੀ ਲਈ ਕੁਝ ਸਮਾਂ ਆਪਣੇ ਆਪ ਨਾਲ ਬਿਤਾਓ।ਜ਼ਿੰਮੇਵਾਰੀਆਂ ਨਿਭਾਉਂਦੇ ਹੋਏ ਆਪਣੇ ਆਪ ਨੂੰ ਨਜ਼ਰਅੰਦਾਜ਼ ਨਾ ਕਰੋ।ਇਹ ਸੱਚ ਹੈ ਕਿ ਸਭ ਦਾ ਖਿਆਲ ਰੱਖਣਾ ਚਾਹੀਦਾ ਹੈ ਪਰ ਆਪਣੇ ਆਪ ਪ੍ਰਤੀ ਵੀ ਤੁਹਾਡਾ ਫ਼ਰਜ਼ ਹੈ।ਦੁਨੀਆ ਵਿੱਚ ਤੁਹਾਡੇ ਲਈ ਤੁਸੀਂ ਹੀ ਸਭ ਤੋਂ ਮਹੱਤਪੂਰਨ ਹੋ। ਤੁਸੀਂ ਹੋ ਤਾਂ ਹੀ ਬਾਕੀ ਸਭ ਕੁਝ ਹੈ।
ਹਰਪ੍ਰੀਤ ਕੌਰ ਸੰਧੂ
