ਹਲਕਾ ਮਹਿਲ ਕਲਾਂ ਵਿੱਚ ਵੀ ਨੂਪੁਰ ਸ਼ਰਮਾ ਅਤੇ ਨਵੀਨ ਜਿੰਦਲ ਮੁਰਦਾਬਾਦ ਦੇ ਲੱਗੇ ਨਾਅਰੇ
ਦੋਸ਼ੀਆਂ ਨੂੰ ਫੜ ਕੇ ਸਜਾਏ ਮੌਤ ਦੀ ਕੀਤੀ ਗਈ ਮੰਗ
ਮਹਿਲ ਕਲਾਂ 10 ਜੂਨ (ਡਾਕਟਰ ਸੁਖਵਿੰਦਰ ਬਾਪਲਾ ) ਇਸਲਾਮ ਧਰਮ ਦੇ ਹਜ਼ਰਤ ਮੁਹੰਮਦ ਸਾਹਿਬ ਜੀ ਦੀ ਸ਼ਾਨ ਦੇ ਖ਼ਿਲਾਫ਼ ਬੋਲਣ ਵਾਲੇ ਭਾਜਪਾ ਦੇ ਪ੍ਰਮੁੱਖ ਨੇਤਾ ਨੂਪੁਰ ਸਰਮਾਂ ਅਤੇ ਨਵੀਨ ਜਿੰਦਲ ਦੇ ਵਿਰੁੱਧ ਪੂਰੇ ਭਾਰਤ ਵਿੱਚ ਹੀ ਨਹੀਂ ਸਗੋਂ ਪੂਰੀ ਦੁਨੀਆਂ ਵਿੱਚ ਰੋਸ ਮੁਜ਼ਾਹਰੇ ਹੋ ਰਹੇ ਹਨ। ਅੱਜ ਮੁਸਲਿਮ ਜਥੇਬੰਦੀਆਂ ਵੱਲੋ ਪੂਰੇ ਭਾਰਤ ਵਿੱਚ ਰੋਸ ਮੁਜ਼ਾਹਰੇ ਕੀਤੇ ਗਏ । ਜਿਸ ਦੀ ਕੜੀ ਵਜੋਂ ਅੱਜ ਇਲਾਕਾ ਮਹਿਲ ਕਲਾਂ ਵਿਖੇ ਵੀ ਰੋਸ ਮੁਜ਼ਾਹਰਾ ਕੀਤਾ ਗਿਆ , ਜਿਸ ਦੀ ਅਗਵਾਈ ਡਾ ਮਿੱਠੂ ਮੁਹੰਮਦ, ਕਮੇਟੀ ਪ੍ਰਧਾਨ ਮੁਹੰਮਦ ਅਕਬਰ, ਮੀਤ ਪ੍ਰਧਾਨ ਮੁਹੰਮਦ ਸਲੀਮ, ਜਰਨਲ ਸਕੱਤਰ ਸਿਤਾਰਦੀਨ, ਖਜ਼ਾਨਚੀ ਨਸੀਬ ਖ਼ਾਨ , ਪ੍ਰੈੱਸ ਸਕੱਤਰ ਸੁਬਹਾਨ ਅਬਦੁਲ,ਮੁੱਖ ਸਲਾਹਕਾਰ ਅਕਬਰ ਖ਼ਾਨ, ਐਗਜ਼ੈਕਟਿਵ ਮੈਂਬਰ ਬੂਟਾ ਖਾਨ, ਵਕੀਲ ਖਾਨ ,ਸੁਖਪਾਲ ਦੀਨ ਨੇ ਕੀਤੀ । ਬੁਲਾਰਿਆਂ ਨੇ ਸੰਬੋਧਨ ਕਰਦਿਆਂ ਕਿਹਾ ਕਿ ਸਾਡਾ ਕਿਸੇ ਵੀ ਹਿੰਦੂ, ਸਿੱਖ ਜਾਂ ਇਸਾਈ ਨਾਲ ਕੋਈ ਜਾਤੀ ਝਗੜਾ ਜਾਂ ਰੰਜਿਸ਼ ਨਹੀਂ ਹੈ ।
ਮਹਿਲ ਕਲਾਂ ਦੀ ਧਰਤੀ ਤੇ ""ਹਿੰਦੂ ,ਮੁਸਲਿਮ, ਸਿੱਖ, ਇਸਾਈ- ਆਪਸ ਦੇ ਵਿੱਚ ਭਾਈ ਭਾਈ"" ਦੇ ਨਾਅਰੇ ਥੱਲੇ ਆਪਣਾ ਜੀਵਨ ਬਤੀਤ ਕਰ ਰਹੇ ਹਨ । ਪਰ ਕੁਝ ਫ਼ਿਰਕਾਪ੍ਰਸਤ ਲੀਡਰ ,ਫੁੱਟ ਪਾਊ ਅਤੇ ਫੋਕੀ ਸ਼ੁਹਰਤ ਪ੍ਰਾਪਤ ਕਰਨ ਵਾਲੇ ਮੌਕਾ-ਪ੍ਸਤ ਲੀਡਰ ਸਾਡੇ ਪਿਆਰੇ ਨਬੀ ਮੁਹੰਮਦ ਹਜ਼ਰਤ ਮੁਹੰਮਦ ਸਾਹਿਬ ਦੀ ਸ਼ਾਨ ਦੇ ਖ਼ਿਲਾਫ਼ ਬੋਲਦੇ ਹਨ,ਅਸੀਂ ਉਨ੍ਹਾਂ ਨੂੰ ਦੱਸਣਾ ਚਾਹੁੰਦੇ ਹਾਂ ਕਿ ਅਸੀਂ ਹਜ਼ਰਤ ਮੁਹੰਮਦ ਸਾਹਿਬ ਜੀ ਦੀ ਸ਼ਾਨ ਦੇ ਖ਼ਿਲਾਫ਼ ਇੱਕ ਵੀ ਸ਼ਬਦ ਨਹੀਂ ਸੁਣ ਸਕਦੇ। ਆਪਣੀਆਂ ਜਾਨਾਂ ਵਾਰ ਦਿਆਂਗੇ ਪਰ ਆਪਣੇ ਸਿਦਕ ਤੋਂ ਪਿੱਛੇ ਨਹੀਂ ਹਟਾਂਗੇ। ਫੁੱਟ ਪਾਊ ਤਾਕਤਾਂ ਮੁਰਦਾਬਾਦ, ਨੂਪੁਰ ਸ਼ਰਮਾ ਤੇ ਨਵੀਨ ਜਿੰਦਲ ਮੁਰਦਾਬਾਦ, ਲੋਕ ਏਕਤਾ ਜ਼ਿੰਦਾਬਾਦ , ਮੁਸਲਿਮ ਏਕਤਾ ਜ਼ਿੰਦਾਬਾਦ ਦੇ ਆਕਾਸ਼ ਗੁੰਜਾਊ ਨਾਅਰੇ ਲਗਾਏ ਗਏ।
ਬੁਲਾਰਿਆਂ ਨੇ ਮੰਗ ਕੀਤੀ ਕਿ ਨੂਪੁਰ ਸ਼ਰਮਾ ਅਤੇ ਨਵੀਨ ਜਿੰਦਲ ਨੂੰ ਫੜ ਕੇ ਜੇਲ੍ਹ ਵਿੱਚ ਡੱਕਿਆ ਜਾਵੇ ਅਤੇ ਸਖ਼ਤ ਤੋਂ ਸਖ਼ਤ ਮਿਸਾਲੀ ਸਜ਼ਾ ਦਿੱਤੀ ਜਾਵੇ ਤਾਂ ਜੋ ਅੱਗੇ ਵਾਸਤੇ ਕੋਈ ਅਜਿਹੀ ਗੁਸਤਾਖ਼ੀ ਨਾ ਕਰ ਸਕੇ। ਉਨ੍ਹਾਂ ਕਿਹਾ ਕਿ ਅਗਰ ਸਰਕਾਰ ਅਜਿਹਾ ਨਹੀਂ ਕਰਦੀ ਤਾਂ ਆਉਣ ਵਾਲੇ ਦਿਨਾਂ ਵਿਚ ਸੰਘਰਸ਼ ਨੂੰ ਹੋਰ ਤਿੱਖਾ ਕੀਤਾ ਜਾਵੇਗਾ । ਇਸ ਸਮੇਂ ਹੋਰਨਾਂ ਤੋਂ ਇਲਾਵਾ ਮੁਹੰਮਦ ਜ਼ਮੀਲ, ਬੂਟਾ ਖ਼ਾਨ, ਫਕੀਰੀਆ ਖਾਨ, ਨਜ਼ੀਰ ਖ਼ਾਨ ,ਲੱਡੂ ਖਾਨ, ਦਿਲਬਰ ਹੁਸੈਨ,ਖਿਜਰ ਅਲੀ 'ਅਰਸ਼ਦ ਅਲੀ , ਤਰਸੇਮ ਖਾਨ, ਮੁਹੰਮਦ ਸ਼ਮਸ਼ੇਰ ਅਲੀ ਆਦਿ ਤੋਂ ਇਲਾਵਾ ਵੱਡੀ ਗਿਣਤੀ ਵਿੱਚ ਮੁਸਲਮਾਨ ਭਾਈਚਾਰੇ ਦੇ ਲੋਕ ਹਾਜ਼ਰ ਸਨ ।
