ਹਠੂਰ,13,ਮਈ-(ਕੌਸ਼ਲ ਮੱਲ੍ਹਾ)-ਪਿੰਡ ਕਮਾਲਪੁਰਾ ਤੋ ਪਿੰਡ ਦੇਹੜਕਾ ਤੱਕ ਲੰਿਕ ਸੜਕ ਨੂੰ ਪ੍ਰਧਾਨ ਮੰਤਰੀ ਗ੍ਰਾਮ ਸੜਕ ਯੋਜਨਾ ਤਹਿਤ 804.68 ਲੱਖ ਰੁਪਏ ਦੀ ਲਾਗਤ ਨਾਲ ਬਣਾਇਆ ਜਾ ਰਿਹਾ ਹੈ।ਇਸ ਸੜਕ ਨੂੰ ਅਠਾਰਾ ਫੁੱਟ ਚੌੜੀ ਕਰਨ ਦਾ ਨੀਹ ਪੱਥਰ 11-12-2021 ਨੂੰ ਮੈਬਰ ਪਾਰਲੀਮੈਟ ਰਵਨੀਤ ਸਿੰਘ ਬਿੱਟੂ ਨੇ ਰੱਖਿਆ ਸੀ ਅਤੇ ਉਸ ਤੋ ਦੂਜੇ ਦਿਨ ਹੀ ਸੜਕ ਦਾ ਨਿਰਮਾਣ ਸੁਰੂ ਹੋ ਗਿਆ ਸੀ।ਇਹ ਸੜਕ ਪਿੰਡ ਕਮਾਲਪੁਰਾ ਤੋ ਚੀਮਾ ਤੋ ਭੰਮੀਪੁਰਾ ਕਲਾਂ ਦੀ ਹੱਦ ਤੱਕ ਬਣ ਤੇ ਤਿਆਰ ਹੋ ਚੁੱਕੀ ਹੈ ਪਰ ਪਿੰਡ ਭੰਮੀਪੁਰਾ ਕਲਾਂ ਤੋ ਪਿੰਡ ਦੇਹੜਕਾ ਤੱਕ ਲਗਭਗ ਪੰਜ ਕਿਲੋਮੀਟਰ ਸੜਕ ਤੇ ਪਾਇਆ ਪੱਥਰ ਪਿੰਡਾ ਦੇ ਲੋਕਾ ਲਈ ਵੱਡੀ ਸਿਰਦਰਦੀ ਬਣਿਆ ਹੋਇਆ ਹੈ।ਇਸ ਸਬੰਧੀ ਅੱਜ ਪੱਤਰਕਾਰਾ ਨਾਲ ਗੱਲਬਾਤ ਕਰਦਿਆ ਆਮ-ਆਦਮੀ ਪਾਰਟੀ ਦੇ ਸਰਕਲ ਪ੍ਰਧਾਨ ਸੁਰਿੰਦਰ ਸਿੰਘ ਸੱਗੂ ਅਤੇ ਤੇਜਾ ਸਿੰਘ ਦੇਹੜਕਾ ਨੇ ਦੱਸਿਆ ਕਿ ਸੜਕ ਦਾ ਕੰਮ ਕੀੜੀ ਦੀ ਤੋਰ ਚੱਲ ਰਿਹਾ ਹੈ ਅਸੀ ਜਦੋ ਸਬੰਧਤ ਅਧਿਕਾਰੀਆ ਨਾਲ ਸੜਕ ਨੂੰ ਜਲਦੀ ਬਣਾਉਣ ਬਾਰੇ ਗੱਲਬਾਤ ਕਰਦੇ ਹਾਂ ਤਾਂ ਅਧਿਕਾਰੀ ਸਾਨੂੰ ਇਹ ਆਂਖ ਦਿੰਦੇ ਹਨ ਕਿ ਤੁਹਾਨੂੰ ਸੜਕ ਦੀ ਜਿਆਦਾ ਜਰੂਰਤ ਹੈ ਹੋਰ ਤਾ ਕੋਈ ਸੜਕ ਬਣਾਉਣ ਬਾਰੇ ਬੋਲਦਾ ਨਹੀ।ਉਨ੍ਹਾ ਕਿਹਾ ਕਿ ਪਿੰਡ ਦੇਹੜਕਾ,ਡੱਲਾ, ਮਾਣੂੰਕੇ ਅਤੇ ਭੰਮੀਪੁਰਾ ਕਲਾਂ ਆਦਿ ਪਿੰਡਾ ਦੀਆ ਸੜਕਾ ਪਿਛਲੇ ਲੰਮੇ ਸਮੇਂ ਤੋ ਪੁੱਟੀਆ ਪਈਆ ਹਨ ਜਿਸ ਕਾਰਨ ਅਨੇਕਾ ਹਾਦਸੇ ਵੀ ਵਾਪਰ ਚੁੱਕੇ ਹਨ ਪਰ ਮਹਿਕਮਾ ਸੜਕ ਤੇ ਪ੍ਰੀਮਿਕਸ ਪਾਉਣ ਵੱਲੋ ਕੋਈ ਧਿਆਨ ਨਹੀ ਦੇ ਰਿਹਾ।ਉਨ੍ਹਾ ਕਿਹਾ ਕਿ ਇਸ ਸਮੱਸਿਆ ਨੂੰ ਹੱਲ ਕਰਵਾਉਣ ਲਈ ਅਸੀ ਪਿੰਡ ਦੇਹੜਕਾ ਅਤੇ ਭੰਮੀਪੁਰਾ ਕਲਾਂ ਵਾਸੀ ਹਲਕਾ ਵਿਧਾਇਕ ਬੀਬੀ ਸਰਵਜੀਤ ਕੌਰ ਮਾਣੂੰਕੇ ਨੂੰ ਬੇਨਤੀ ਪੱਤਰ ਦੇਵਾਗੇ ਤਾਂ ਜੋ ਸੜਕਾ ਦਾ ਕੰਮ ਨੇਪੜੇ ਚਾੜਿਆ ਜਾ ਸਕੇ।ਇਸ ਮੌਕੇ ਉਨ੍ਹਾ ਨਾਲ ਡਾ:ਕੇਵਲ ਸਿੰਘ,ਕਾਮਰੇਡ ਹੁਕਮ ਰਾਜ ਦੇਹੜਕਾ,ਜਸਵਿੰਦਰ ਸਿੰਘ,ਮੰਗਲ ਸਿੰਘ,ਦਰਸਨ ਸਿੰਘ,ਬਾਬੂ ਸਿੰਘ,ਸੁਖਦੇਵ ਸਿੰਘ,ਜਰਨੈਲ ਸਿੰਘ, ਤੇਜਾ ਸਿੰਘ, ਸਰਬਜੀਤ ਸਿੰਘ ਆਦਿ ਹਾਜ਼ਰ ਸਨ।ਇਸ ਸਬੰਧੀ ਜਦੋ ਮੰਡੀਕਰਨ ਬੋਰਡ ਦੇ ਜੇ ਈ ਪ੍ਰਮਿੰਦਰ ਸਿੰਘ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾ ਕਿਹਾ ਕਿ ਇਨ੍ਹਾ ਸੜਕਾ ਦਾ ਕੰਮ ਚੱਲ ਰਿਹਾ ਹੈ ਜਲਦੀ ਹੀ ਪ੍ਰੀਮਿਕਸ ਪਾਇਆ ਜਾਵੇਗਾ।
