ਲੰਡਨ,ਜਨਵਰੀ 2020-(ਗਿਆਨੀ ਰਵਿਦਾਰਪਾਲ ਸਿੰਘ)-
ਅੱਜ ਲੰਡਨ ਦੇ ਹੀਥਰੋ ਹਵਾਈ ਅੱਡੇ ਦੀਆਂ ਕਈ ਉਡਾਣਾਂ ਦੇ ਅਚਾਨਕ ਰਸਤੇ ਬਦਲੇ ਗਏ ਹਨ | ਹਵਾਈ ਅੱਡੇ ਅਨੁਸਾਰ ਕੁਝ ਸੁਰੱਖਿਆ ਕਾਰਨਾਂ ਕਰ ਕੇ ਅਜਿਹਾ ਕੀਤਾ ਗਿਆ ਹੈ, ਪਰ ਇਸ ਦੇ ਸਪਸ਼ਟ ਕਾਰਨਾਂ ਦਾ ਅਜੇ ਪਤਾ ਨਹੀਂ ਲੱਗਿਆ | ਖ਼ਬਰਾਂ ਅਨੁਸਾਰ ਆਰ.ਏ.ਐੱਫ਼. ਨੂੰ ਹਵਾਈ ਖੇਤਰ ਦੀ ਕਿਸੇ ਕਾਰਨ ਅਚਨਚੇਤ ਲੋੜ ਪੈ ਗਈ, ਜਿਸ ਨੂੰ ਮੱਦੇਨਜ਼ਰ ਰੱਖਦਿਆਂ 5 ਬਿ੍ਟਿਸ਼ ਏਅਰਵੇਜ਼ ਦੀਆਂ ਉਡਾਣਾਂ ਅਤੇ ਇਕ ਵਰਜ਼ਨ ਐਟਲਾਂਟਿਕ ਉਡਾਣ ਦਾ ਰਸਤਾ ਬਦਲਣਾ ਪਿਆ | ਕੁਝ ਸਮੇਂ ਲਈ ਸਟੈਨਸਟਿਡ ਅਤੇ ਗੈਟਵਿਕ ਹਵਾਈ ਅੱਡੇ 'ਤੇ ਉਤਾਰਿਆ ਗਿਆ | ਜਦਕਿ ਕਈ ਉਡਾਣਾਂ ਲੰਡਨ ਦੇ ਹਵਾਈ ਖੇਤਰ ਵਿਚ ਉਡਾਣ ਲਈ ਮਜਬੂਰ ਰਹੀਆਂ ਹਨ | ਹੀਥਰੋ ਹਵਾਈ ਅੱਡੇ ਦੇ ਬੁਲਾਰੇ ਨੇ ਕਿਹਾ ਕਿ ਅੱਜ ਤੜਕਸਾਰ ਆਰ. ਏ. ਐੱਫ਼ ਵਲੋਂ ਹੀਥਰੋ ਹਵਾਈ ਖੇਤਰ ਦੇ ਕੁਝ ਹਿੱਸੇ ਦੀ ਵਰਤੋਂ ਕਰਨ ਦੀ ਅਪੀਲ ਕੀਤੀ ਗਈ ਸੀ |
